03/05/2026
Lugano - YB 1:0 (0:0)
Kes Pünktli bim letschte Bsuech im Cornaredo
Scho wider e Niederlag für YB: Bim letschte Spiu im alte Cornaredo-Stadion verliere d'Bärner mit 0:1. Dr Renato Steffen het dr Entscheidigsträffer ersch churz vor Schluss gmacht.
Dr YB-Trainer Gerry Seoane het im Verglich zum Heimspiu gäge Sanggalle zwöi Änderige vor gno. Wil dr Sandro Lauper gsperrt isch gsi, het dr Captain Loris Benito i dr Inneverteidigung gspiut. Und für dr Chris Bedia isch dr Samuel Essende vo Afang a im Sturm cho.
Es isch bis ganz am Schluss gange, bis im letschte YB-Uftritt im Cornaredo es Goal gfaue isch. Nach emne abgwehrte Egge het dr Anto Grgic dr Baunomal i Strofruum gschlage, und dert het dr Renato Steffen per Chopf troffe. Das isch i dr 84. Minute d'Entscheidig gsi.
S'Spiu isch eigentlech rächt ausgliche gsi, aber Lugano het die bessere Chance gha. Scho i dr zwöite Minute het dr Marvin Keller müesse nahriffe, wo dr Kevin Behrens us churzer Distanz zum Abschluss cho isch. Grad nach dr Pause het dr YB-Goali i nere ähnleche Szene gäge Hannes Delcroix grettet, und spater hei dr Mattia Zanotti und dr Belhadj Mahmoud s'Goal knapp verfählt.
YB sälber isch i dr erschte Halbzyt dür dr Samuel Essende, dr Alvyn Sanches und dr Alan Virginius zue Abschlüss cho, aber das isch alles nid würklech gföhrlech gsi. Zäh Minute vor em Goal vo Lugano het dr Joël Monteiro Päch gha, wo si Chopfbau a Pfoschte knallt isch. Und direkt nach em Steffen sim Goal het dr igwächslet Darian Males dr Usglich nume ganz knapp verpasst.
So isch o s'füfte Spiu hinterenang (drü Unentschide, zwöi Niederlage) ohni YB-Sieg z'Änd gange.
Damit isch itze klar: In dr nächste Saison spiut YB nid europäisch.
Witer geits am Sunntig, 10. Mai 2026, mit em Heimspiu gäge Basel. Am haubi füfi geit's los.
