29/08/2026
قناة الاهلي أعلنت عن تعيين المدرب الالماني ماركوس اوربان مدير فني لفريق الشباب
تعال اقولك مين هو المدرب ده و كل الكلام المتاح عنه
ماركوس أوربان ألماني مواليد 22 يونيو 1983 يعني عنده 43 سنة، ومعاه رخصة UEFA A وحاصل على ماجستير في علوم الرياضة وكمان عنده رخصة إعداد بدني متقدمة يعني من البداية أنت قدام واحد خلفيته مش تدريب كرة بس، لكن تدريب + علوم رياضة + إعداد بدني + تطوير مدربين ولاعبين
بدأ كمدير فني مع هوهنشتاين إرنستتال في موسم 2013/14، واستمر لحد 2014/15 الفريق كان بيلعب وقتها في الساكسن ليجا، ودي كانت الدرجة السادسة في ألمانيا
قعد مع الفريق موسمين قاد خلالهم 60 مباراة: كسب 22، تعادل 17، وخسر 21، ومتوسطه 1.38 نقطة في المباراة وفي آخر موسم ليه، الفريق حقق نتائج كويسة جدًا، وأنهى الموسم في المركز الثالث حسب سجل مبارياته وإحصائياته المتاحة
بعدها راح بيشوفشفيردا إف في 08، ودي محطة مهمة جدًا في مسيرته
اشتغل هناك من 2015 لحد 2021 تقريبًا، لكن مش كمدير فني؛ كان مدرب مساعد ومدرب إعداد بدني والنادي نفسه قال إنه شارك مع الفريق في 145 مباراة وإنه كان له دور مهم في نجاح الفريق خلال السنوات دي خصوصًا في الجانب البدني
والفريق ده خلال الفترة اللي كان أوربان جزء من جهازه عمل حاجة مهمة جدًا: في موسم 2017/18 تصدر دوري الدرجة الخامسة وصعد للدرجة الرابعة وهي الريجيونال ليجا نورديست
وبعد الصعود لعب الفريق موسم 2018/19 في الدرجة الرابعة وأنهى الدوري في المركز الـ16
يعني الراجل شاف بنفسه فريق بيطلع من الدرجة الخامسة للرابعة، وكان جزء من الجهاز اللي حقق ده لكن هنا لازم نبقى منصفين: البطولة والصعود مش إنجاز أوربان لوحده لأنه كان مدرب مساعد وإعداد بدني، مش المدير الفني
بعدها كانت له تجربة قصيرة كمدير فني لفريق تي بي برلين الثاني في 2019، لكن التجربة مش طويله وانتهت في ديسمبر من نفس السنة. ومفيش أرقام موثقة كفاية عن الفترة دي تسمح لنا نطلع منها بحكم كبير عليه
رجع بعدها لبيشوفشفيردا كمدرب مساعد وفي 2021 انتقل لإف سي آيلنبورغ وكان مساعدًا للمدير الفني نيكو كنوبل الفريق كان وقتها في الريجيونال ليجا نورديست يعني الدرجة الرابعة في ألمانيا. وقعد هناك موسم تقريبًا، قبل ما ينتقل للمرحلة الأهم في مسيرته
وهنا بقى ييجي اسم يونيون برلين
من 2022 اشتغل مع يونيون برلين، لكن مش كمدرب فريق أول ولا كمدرب ناشئين عادي
كان مسؤول عن تعليم وتطوير المدربين وتنظيم برامج التدريب والتأهيل، والمشروعات الدولية وبعدها تولى مسؤولية تطوير قطاع الناشئات بالكامل
والأهم إن شغله هناك كان مرتبط بفكرة: إزاي تطور المنظومة نفسها، مش مجرد إزاي تكسب ماتش
وفي 2025 يونيون برلين حصل على أعلى مستوى اعتماد من الاتحاد الألماني لكرة القدم كـ«مركز تطوير تابع للـDFB» في قطاع الناشئات، وأوربان كان مسؤولًا عن تطوير القطاع وقتها، وقال إن الاعتماد تأكيد لجودة الشغل، لكنه في نفس الوقت حافز للاستمرار وتطوير العمل بشكل أكبر
طيب نيجي بقى لأهم حاجة: الراجل بيفكر إزاي؟
وده اللي خلاني مهتم بالاختيار أكتر من مجرد أرقامه كمدرب
أوربان عنده فكرة بيكررها كتير جدًا في شغله: قيّم، حلّل، وبعدها عدّل
يعني ببساطة، مش من نوعية المدرب اللي عنده طريقة واحدة ويحاول يحشر كل اللاعبين فيها.
يشوف اللاعب الأول
إيه اللي بيعمله كويس؟إيه اللي ناقصه؟ليه بياخد قرار غلط؟ليه بيخسر الكرة؟ليه بدنيًا مش قادر يكمل؟هل المشكلة فنية؟ بدنية؟ ذهنية؟
وبعد ما يعرف المشكلة، يغير طريقة التدريب على أساسها.
وده مش كلام إنشائي جزء كبير من شغله في يونيون برلين كان أصلًا قائم على تعليم المدربين وإدخالهم في تدريبات ومراقبة طرق العمل داخل قطاع الناشئين وتحليلها ومناقشتها
وفي برامج تأهيل المدربين اللي كان مسؤول عنها، كانت الموضوعات نفسها تقولك دماغه ماشية إزاي:
تحليل فيديو، تحليل فردي للاعب، تطوير المهارات داخل مواقف لعب، التحولات، مبادئ اللعب، والقوة الذهنية
يعني مش مجرد «خد الكرة ومررها»
الفكرة عنده إن اللاعب يتعلم وهو جوه موقف شبه اللي هيقابله في المباراة، عشان لما يبقى تحت ضغط يعرف يفكر ويقرر، مش يكون حافظ التمرين وخلاص
وفي تصريح ليه عن كرة الأطفال، قال جملة أنا شايف إنها تلخص جزء كبير من فلسفته:
«المهم إننا ناخد كل لاعب معانا، والنتائج مش هي الأولوية، لكن المتعة في الحركة.»
وده معناه إنك لو عندك ناشئ 15 أو 16 سنة، مش هتبقى كل الحكاية عنده: كسبنا كام ماتش؟
هيبقى السؤال الأهم:
الواد ده اتطور؟اتعلم؟بقى بياخد قرارات أحسن؟بقى أقوى بدنيًا؟بقى شخصيته أفضل؟هل قرب خطوة من إنه يبقى لاعب ينفع للفريق الأول؟
وده بصراحة يفسر ليه الأهلي اختار واحد بالشكل ده لفريق الشباب ، لأننا مش محتاجين مدرب ناشئين كل همه ياخد بطولة الجمهورية ويكسب ماتشات وخلاص.
إحنا محتاجين واحد يبص للاعب ويقول:
«الواد ده ممكن يبقى لاعب للفريق الأول بعد سنتين؟ طيب نعمل إيه من دلوقتي عشان نوصلّه للمستوى ده؟»
وده تحديدًا اللي أنا شايف إن أوربان ممكن يضيفه
وعشان كده أنا شايف إن الحكم عليه في الأهلي مش هيكون بعدد ماتشات كسبها مع فريق 2007
الحكم الحقيقي هيكون بعد سنة أو سنتين:
كام لاعب اتطور؟كام لاعب قرب من الفريق الأول؟كام لاعب بقى جاهز بدنيًا وفنيًا وذهنيًا؟
ولو الأهلي فعلًا سايبه يشتغل بالطريقة دي، ومش كل أسبوع حد يحاسبه على نتيجة ماتش ناشئين
ممكن جدًا نكون جايبين واحد أهميته الحقيقية مش في إنه يكسب بطولة شباب، لكن في إنه يساعد الأهلي «يصنع لاعب»
بإذن الله يكون اضافة و يقدر يصنع لاعيبة علي غرار حمزه عبد الكريم و بلال عطيه و تريزيجيه و رمضان صبحي و مصطفي شوبير و احمد عبد القادر و بلال عطيه و غيرهم كثير من إنتاجات الاهلي
