Ballettskóli Eddu Scheving var stofnaður árið 1961 og er því elsti einkarekni listdansskóli landsins.
Árið 2016 flutti skólinn í afar hentugt húsnæði sem er sérhannað fyrir starfsemi skólans. Salurinn er 167 fm en honum er skipt niður í 2 minni sali. Einnig er góð búningsaðstaða, setustofa og sturtuaðstaða. Skólinn sérhæfir sig í kennslu í klassískum ballett en einnig er boðið upp á kennslu í öðrum dansstílum og formum. Eftir margra ára reynslu hefur skólinn viðað að sér og stuðst við efni úr mörgum kerfum, þar á meðal frá Royal Academy of Dancing, the Vaganova method o.fl. Skólinn hefur einnig sett saman sína eigin námskrá sem sniðin er fyrir hvern aldurshóp fyrir sig. Markmið skólans er að veita nemendum markvissa þjálfun sem sett er fram á skemmtilegan og jákvæðan hátt. Áhersla er lögð á fjölbreyttar æfingar, góða tæknivinnu, jafnvægisæfingar, liðleika og styrktaræfingar sem og uppbyggilegar og jákvæðar leiðbeiningar. Nemendur kynnast mörgum mismunandi dansformum og stílum. Aðalkennarar skólans hafa allir farið í gegnum langt og strangt dansnám og hafa margra ára reynslu í dansi sem og kennslu. Við leggjum mikla áherslu á að nemendur njóti dansins og dansgleðinnar auk þess sem við myndum ætíð góð og persónuleg tengsl við alla nemendur okkar. Aðalkennari og eigandi skólans er Brynja Scheving og hefur skólinn verið rekinn af henni síðan árið 2002 en þá tók hún við rekstrinum af móður sinni Eddu Scheving.
