06/06/2026
-كانوا هيخسروا 37 مليون جنيه , ويخسروا بعض
بيزنس العائلة .!
واحد من أسوأ أنواع الشراكة اللي بيحصل فيها
خلافات , نزاع , فجور في الزعل , تعمد خسارة بسبب العند ..!
“إلا من رحم ربي”
-الموضوع دا متكرر
بنفس السيناريو مع اختلاف البيزنس , الأفراد , حجم رأس المال .!
الموضوع فيه نوعين
“الثاني هتكلم عنه في بوست منفصل”
-أما النوع الأول
ودا اللي هتكلم عنه دلوقتي لأنه جاليخلال شهر واحد
أكتر من 6 استشارات ومعظمهم كانو خسرو بالفعل
أو تعمدوا الخسارة بسبب العند بكذا طريقة .!
النوع الأول - ابن من الأبناء وغالبًا الكبير متحكم في الإدارة بكل جوانبها بالكامل
بسبب وجوده مع والده من بدري في المشروع
ولما الأب قرر يسيب الشغل للإخوات
الأخ القديم في الشغل همش الكل
ونصب نفسه صاحب البيزنس يا كدا يا هخسركم كلكم وأفتح لوحدي .!
كلمني من أسبوعين تقريبًا
اتنين إخوات , أمهم
أبوهم موجود
بس كبر في السن مبقاش ليه سلطان على أخوهم الكبير
وعليهم بسبب المرض .!
-الابن الأكبر شغال مع أبوه براتب من أول ما اشتغل
فاهم في الشغل وبيكبر وراتبه بيزيد ومع والده في الشغل
رأس مال البيزنس بتاعهم معدي الـ 37 مليون جنيه
خلال الفترة اللي اشتغل فيها مع والده 7 سنين
كبر , غير كام عربية , اشترى لمراته عربية , حياته الاجتماعية اتطورت ما شاء الله على عكس كل إخواته .!
-مع إنه بياخد نظير تعبه مقابل شغله من أول شهر شغل
ومكنش عنده اي دخل من مكان تاني يخليه يطور حياته كدا .!
المهم
إخواته 2 اشتغلوا من سنة معاه بس تحت إيده مش تحت إيد أبوه
المفروض إنهم شركاء مش عمال في البيزنس بتاعهم .!
أخوهم المتحكم
شغلهم شغل ملوش علاقة بالإدارة ولا يعرفوا أي حاجة عن التوزيع ولا التوريد
ولا حسابات ولا مديونيات ولا غيره
شغلهم في الـ operation مع العمال
والتصنيع وليهم راتب وخلاص .!!
كل ما يقرروا يعرفوا عن الشغل أكتر
كحسابات , نسب , توريد , توزيع وطبعًا الداتا بتاعت الشغل كلها .!
-أخوهم اشتغل معاهم بنظريتين
•الأولى - خدوهم بالصوت .!
•الثانية - هزهقهم في حياتهم .!
ولما صمموا يعرفوا حقهم حصلت مشاكل بينهم
عملوا قاعدة عرفية طلعو منها مديونين ..!!!
لأنه في الفترة اللي اشتغل فيها نظير راتب مع أبوه
طور الشغل , زود معدات , أخد فلوس أبوه في فترة معينة
وضارب بيها في البورصة وكسب ورجع حطها في الشغل ..!
-بقوله
طيب ما هو عمل كل دا من أصل رأس مال الأب
اللي هو أساسًا بتاعكم كلكم .!
وكان بياخد مرتب نظير شغله ومرتب مش محسوب يعني اللي كان عايزه بياخده .!
-بيقولي
قولنا الكلام دا وهو مفيش فايدة .!
هوا عايز يحط كل اللي زوده من أول ما اشتغل لحسابه
ودا يزود نسبته ويقلل نسبتنا ويطلعنا مديونين
ولو هنضيفه اللي زوده لأصل مال البيزنس
يبقى ندفع فلوس كل حاجة زودها في الشغل
علشان نكون متساويين في رأس المال اللي هو في الأساس بتاع الأب بالكامل .!
ضيف على كدا إنه عايز يضيف نسبة لنفسه
كتعويض عن تشغيل كل الفترة اللي فاتت مع إنه كان بياخد من غير حساب أصلًا .!
بقوله
وهل الناس اللي في المجلس العرفي وفقوه على الكلام دا .!
قالي
لأ
بقوله
إنت وأخوك التاني رأيكم إيه .!
بيقولي
بيني وبينك أنا زهقت ومعاملته وحشة جدًا معانا بيطفشنا حرفيًا
أمي كلمته وكل القرايب ..! مفيش فايدة
-المهم
بيقولي للأسف أنا بعت دهب مراتي وعربيتي
علشان أسدد الفلوس
اللي المفروض طالعة عليا علشان يكون ليا حصة شريك كاملة
وكذلك أخويا وأنا أقنعته بالعافية يعمل كدا أحسن ما نخسر
وبعد ما دفعنا برضو مفيش جديد آه بناخد فلوس نسبة , مرتب
بس كل شهر بحوار مختلف مرة خسارة مرة تجديدات
من أول ما دخلنا ودا الحال .!
بقوله
أولًا - حتى لو دفعت لأخوك الفلوس مكنش هيخليك تبقى متحكم معاه في حاجة ..؟
أخوك كان بيحط شروط تعجيزية مش أكتر وكل ما توافق على واحد هيطلع ليك بالتاني .!
ثانيًا - كل اللي اتأسس في القعدة العرفية
من أخوك مبني على باطل
لأن أصل رأس المال نفسه خالص من مال أبوك = بتاعكم كلكم بالتساوي بشرع ربنا , الأصول
-حتى لو أخوك
كبر البيزنس فهو كبر وضع حياته معاه وأخد المقابل مرتين
•مرة لما أخد جانب مادي في صورة راتب غير محدد
•ومرة لما زود أصل رأس المال نفسه لأن دا عائد عليه وعليكم
بس هو فضل يكون العائد عليه بس فقرر ينسب أي تطوير
من معدات أو عربيات ليه ودا لا من حقه ولا يخصه
إلا لو كان دفع من حر ماله بعد ما ياخد الإذن من أبوك إنه يدفع في البيزنس وساعتها يتعامل معاملة الشريك .!
الأم ردت عليا
وقالت دا محصلش هو كان بياخد أكتر مما يستحق من غير أي حساب .!
قولتله
بالشرع , القانون
أخوك ملوش أي حق في التحكم الكامل اللي نسبه بنفسه لنفسه
بس للأسف هو مش سامع ليكم ومش عايزكم معاه أصلًا .؟
فالحل
إنك تعمل جلسة عرفية لآخر مرة بالأصول بحكم الأخوة اللي بينكم ..
•تحضر فيها الناس دي ويكونوا ناس فاهمة في شغلها كويس
شيخ أزهري دكتور في الفقه
محامي
محاسب قانوني
يتكلموا معاه بالشرع , القانون , الحسابات
يعرفوه الصح والغلط
ولو كان ليه ياخد ولو كان عليه يرد اللي أخده
ويديكم حقوقكم في المال , الإدارة ويعرفكم كل صغيرة وكبيرة في الشغل .!
-وتفهموه
أبعاد كل اللي بيعمله لو دخل في نطاق القانون مش هيكون في مصلحة حد الكل هيخسر وهو أولهم
والخسارة هتكون في كل حاجة هتخسروا بعض , الفلوس , البيزنس نفسه .!
ودا شغل المحامي يوضح الأبعاد كاملة
يمكن لما يشوف إنكم جمعتوا الأطراف الصح اللي
تحكم وتوضح صورة المستقبل في العقاب , الخسارة
لو دخل في نزاع قضائي أو مشاكل عائلية بسبب التعند يفهم
إنه كدا كدا هيخسر فياخد قرار مناسب وخصوصًا إنك مش قاعد علشان تطبطب ولا تحايل إنت قاعد علشان تاخد موقف واضح بعد القعدة دي وتكون أفرغت الحجة من ناحيتكم .!
وأنا متأكد إنه هيفهم وهيرجع عن اللي في دماغه حتى لو دا هيحصل غصب عنه .! لأنه ملوش أي حق إطلاقًا في كل اللي بيعمله
وتحديدًا
إنك تقدر تثبت إنه ملوش دخل أو أصول قبل كدا يقدر من خلالها يزود أصول البيزنس
يعني هو فعلًا أخد من الأصل وشغله في نفس البيزنس ودا ميدلوش أي أحقية في نسب أي توسع لنفسه …!
المهم قفلنا وهو عارف هيعمل إيه .!
••والله كلموني هو وأمه , أهو
الخميس اللي فات بيقولي
عملت زي ما حضرتك قولت واتحلت الحمد لله ..♥️
نصيحة
كل اللي مشي في طريق العند مع إخواته وهما أصحاب رأس مال
نزاعهم مع بعض خسرهم بعض , الفلوس , البيزنس .!
فمش الصح إنك تنصب نفسك على مال مش مالك لوحدك
ادي لكل واحد حقه في الإدارة قبل الفلوس
ولو إنت خايف من عدم فهمه للشغل فاشتغل إنت
اعملها شركة ليها رئيس مجلس إدارة وأعضاء وليهم الحق في الاطلاع على كل تفاصيل الشغل وتبقى إنت سايق بالشورى بينكم
لكن لا أخليهم يفهموا ولا يشتغلوا ولا ياخدوا نصيبهم ولا حصتهم
تبقى جاحد .!
-في الطبيعي إنت لو معاك شريك عادي
هتعرفه كل صغيرة وكبيرة في شغلك ومش هتعرف تاخد قرار غير بالرجوع ليه .!
فإزاي لما يبقى ليك أخ شريك تبقى عايز تاكله , تطفشه , تهمشه
وخصوصًا لو المال نفسه مش مالك .!
وللأسف أعرف إخوات في الشغل بيعاملوا بعض أسوأ معاملة
بيتعامل مع الموظفين أفضل 1000 مرة من الأخ حتى لو توزيع الشغل , التدرج الوظيفي داخل المكان .!
خليك جدع لان يد الله مع الجماعه ♥️
#استشارات
#نصيحة
#استشارة
