12/05/2026
د بنګلهدېش تاریخي بریا؛ پاکستان ته په لومړۍ ټېسټ لوبه کې ستره ماتې
د پاکستان او بنګلهدېش ترمنځ د ټېسټ لوبو د لړۍ لومړۍ سیالي، چې د ډهاکې په میرپور لوبغالي کې ترسره شوه، د کوربه بنګلهدېش په پیاوړې او تاریخي بریا پای ته ورسېده. بنګلهدېش وکولای شول پاکستان ته د ۱۰۴ منډو په توپیر ماتې ورکړي او د لوبلړۍ پیل په بریا سره وکړي.
بنګلهدېش په خپلې لومړۍ پاڼۍ کې د ۴۱۳ منډو ستره مجموعه جوړه کړه، چې د لوبډلې توپوهونکو پکې له زغم، تخنیک او غوره ملګرتیا څخه کار واخیست. پاکستان هم په ځواب کې ۳۸۶ منډې وکړې، خو د بنګلهدېش له مجموعې لږ وروسته پاتې شو.
کوربه لوبډلې په دویمه پاڼۍ کې د ۲۴۰ منډو تر جوړولو وروسته خپله پاڼۍ اعلان کړه او پاکستان ته یې د ۲۶۸ منډو هدف وټاکه. خو د بنګلهدېش منظمې او اغېزمنې توپاچونې د پاکستان د توپوهونکو لپاره سترې ستونزې جوړې کړې.
د پاکستان لوبډله د هدف په تعقیب کې یوازې ۱۶۳ منډې جوړې کړې او ټول لوبغاړي یې وسوځېدل، چې له امله یې بنګلهدېش د ۱۰۴ منډو په توپیر ستره بریا خپله کړه.
دغه بریا نه یوازې د بنګلهدېش د کرکټ لپاره مهمه لاسته راوړنه بلل کېږي، بلکې دا یې هم وښوده چې کوربه لوبډله اوس په ټېسټ کرکټ کې د سترو سیالو پر وړاندې د باور وړ او قوي لوبډله ګرځېدلې ده.
لومړۍ ټېسټ لوبه – میرپور، ډهاکه
بنګلهدېش: ۴۱۳ او ۲۴۰/۹ ډیکلېر
پاکستان: ۳۸۶ او ۱۶۳
بنګلهدېش د ۱۰۴ منډو په توپیر بریالی شو.
