28/05/2026
Die rugby was kookwater die naweek! Die senuwees was gedaan toe Oos-Moot in die laaste sekondes van die wedstryd daardie wen drie druk teen 'n baie sterk Transvalia! Uitstekend seuns!
💪 BB SKOLE VERSTEWIG POSISIES
🔥 Bere, Kloof 1ste en 2de in Beker-afdeling
Ses Blou Bulle-skole is ná die naweek se wedstryde in Virseker se Noordvaalreeks nóg sterker in die wedloop om vir die onderskeie halfeindrondes te kwalifiseer.
📌In die twee Beker-wedstryde het Garsfontein, kampioen in 2023, 2024 en 2025, en Waterkloof, die NWU-Skolesportreekskampioen die afgelope drie jaar, die pap dik aangemaak.
Die Bere het die Pretoria-derby teen Menlopark op ’n drafstap met 52-20 gewen en daarmee nóg harder gebrul oor hul vasberadenheid om die kampioenskapstitel ’n vierde agtereenvolgende keer in te palm.
Op sy tuisveld het Kloof self groot indruk gemaak deur Middelburg, die Plaatkampioene van 2025, oortuigend te klop. Dié sege met 48-26 oor ’n gedugte opponent het verdere momentum gegee aan Kloof se herbouprogram om homself weer as ‘n kragreus in skolerugby landwyd te vestig. Die winde van verandering wat hier waai ná die herstrukturering van die sportafdeling lewer duidelik reeds beduidende vordering ten opsigte van algehele mededingendheid.
Monument, naas die Bere die enigste onorwonne span in die Beker-afdeling, het in een wedstryd minder as Garsies [1ste met 19 punte] Waterkloof [2de met 16 punte] gespeel. Monnas is derde op die puntelys met 15.
Hoewel Menlo baie stof tot nadenke het ná die loesing teen die Bere en nou 6de is met 7 ligapunte, het hy verlede jaar ’n soortgelyke benarde situasie só merkwaardig omgekeer dat hy uiteindelik die halfeindronde gehaal het. Met drie ligawedstryde oor en 15 punte op die spel is ’n herhaling van 2025 se Operasie Regruk nie uitgesluit nie.
📌In die Plaatafdeling, waar Montana, Oos Moot en Zwartkop die Bulle se vaandel dra, lyk Zwarries ná slegs twee wedstryde doelgerig ingestel om sy sukses in die NWU Prestigereeks te herhaal toe hy Heidelberg Volkskool oortuigend in die finaal geklop het.
Zwarries is derde op die puntelys met 10. Eerste is Nelspruit, die enigste ander onoorwonne span (20), met Kempton Park tweede (16). Hulle het albei reeds vier wedstryde agter die rug.
Oos Moot (5de met 9) is vir seker nog sterk in die halfeindronde wedloop. Monties, die Skildkampioen van 2025, is selfs ná vier nederlae in met 6de plek en 6 ligapunte nie uit die halfeind-wedloop nie, maar sal eerstens moet leer om weer die kuns van wen te bemeester.
Die groot Pretoria-derby Saterdag tussen Monties se Wit Bulle en Oosies se Blou Golf kan van deurslaggewende belang vir albei se halfeindronde aspirasies wees.
📌In die Skild-afdeling is Eldoraigne die enigste BB skool wat deelneem, en hul vertoningslys is nie goeie leesstof nie. Die eerste span is laaste op die puntelys met ’n ronde nulletjie.
📌Twee 2025-kampioene, Midstream [Noordvaal Afd 2] en Centurion [BB Afd 2 Stadsbeker], het die tonge los met hul debuutseisoen-kraglopie in die BowlWes-afdeling.
Centurion is onoorwonne ná drie wedstryde en die ligavoorloper [15] met Midstream in die tweede plek, ook met 15, ná drie seges in vier kragmetings.
📌In die Bulle se Afdeling 2-reeks spog Pretoria-Noord nou met die enigste onoorwonne eerste span nadat hy die afgelope naweek ook die tande van die Wonnies-Tiere getrek het. Die feit dat PNHS drie ligapunte minder het as sowel die Tiere en die Bulldogs van John Vorster, is bloot omdat hy een wedstryd minder gespeel het.
Blue Bulls High Schools Rugby AssociationBlou Bulle Afrigters Vereniging / Blue Bulls Coaches AssociationDie LigblouesHoërskool EldoraigneHoërskool GarsfonteinHoërskool ZwartkopMidstream CollegeMenlo RugbyHoërskool GarsfonteinHoërskool ZwartkopWoerie Rugby - Hoërskool Centurion RugbyHoërskool Montana Pta AmptelikHoërskool WaterkloofHoërskool Oos-Moot - AmptelikVirseker Noordvaal Cup
