18/03/2022
“‘n Klompie jare gelede, toe ‘personal trainers’ net ‘n ding geword het, het ek gedink iemand wat saam met so hel-instrukteur oefen is òf verveeld, òf mors met geld, òf weet nie van beter nie. Lelike vooropgestelde idees.
‘n Paar jaar later, lang storie tot hier, raak ek lekker pêlle met ‘n vriendin wat my vat soos ek is, met my raas as dit moet, en sommer net luister as ek ‘moan’, kwaai is, of moedeloos raak. Ons drink saam koffie, lag baie en stoei deur moeilike tye. Sy gee raad en inspireer. En sê: nee, ons eet nie brood nie, ons byt vas!
En toe sleep sy my gym toe… om nie net een keer ‘n week nie, saam met ‘n ‘personal trainer’ te oefen. Ek sweet! En het met tye so seer dat ek die jong man in die vroeë oggend-ure aanspreek, tot ontsteltenis van die man van die huis wat langs my slaap. Ek verwens haar so nou en dan, en het selfs al in ‘n swak oomblik van pyn en sweet, vir haar gesê dat ek wens sy trek! Gelukkig ken én verstaan sy my… en dan lag sy net en kry my weer in die gym.
Nou ja, met die skool wat vandag gesluit het, het ek (alweer) ‘n eerste beleef: ‘n gym-sessie saam met die gevreesde Simeon, ter viering van ons paar dae se vryheid. Ons onnies het ook maar ons gewoontetjies en dinge, en een daarvan, is koffie en koek, of bier en burgers wanneer die skool sluit. Dit hang maar af wie almal in ons feestelike groepie is wanneer daai skoolklok lui, of ons in ‘n koekplek, of kloekplek eindig… nie vandag nie. Vandag was ons in ‘n spring-, sweet-, hol- en huilplek. Saam met nog twee jong, energieke, fikse juffrouens wat van Januarie af saam met ons skool hou. Dankie julle drie, Marisca Badenhorst Miceala Oosthuizen Sunique Becker, vir nog ‘n eerste, en geduld met die ‘senior’ in die groepie!”
Woorde van - Welma Prinsloo Pieters
Dankie Simeon Schoeman 👏🏻
