08/05/2026
Baie dankie vir alles wat jy vir Cricket101 beteken het. Jou passie, energie en toewyding het ‘n blywende impak gemaak op elke speler wat jy afgerig het.
Ons wens jou net die beste toe vir die pad vorentoe!
‘n Boodskap vanaf coach Abré:
Liewe Seuns en Ouers,
Met ’n swaar hart skryf ek hierdie boodskap.
Ek wil opreg dankie sê vir elke seun en elke ouer wat oor die jare deel was van hierdie ongelooflike reis. Julle ondersteuning, vertroue en betrokkenheid het nie net ’n krieketprogram gebou nie — dit het ’n familie geskep.
Eldoraigne krieket en Cricket 101 was nog altyd meer as net afrigting. Dit was ’n plek waar seuns gegroei het — as spelers, maar nog belangriker, as mense. Julle het my toegelaat om deel te wees van daardie ontwikkeling, en dit is iets wat ek altyd sal koester.
Ek wil julle verseker dat Eldoraigne krieket en Cricket 101 voortgaan. Die standaard, kultuur en visie bly dieselfde.
Leroux Botes neem oor as die nuwe eienaar van hierdie program, en ek het volle vertroue dat hy dit met dieselfde passie, dissipline en omgee sal lei.
Hierdie besluit om na Hoërskool Nelspruit te beweeg was nie maklik nie. Dit is een wat ek en my gesin deeglik oorweeg het, en uiteindelik geneem het met ons gesin se beste belang op die hart. Dit maak dit nie makliker om totsiens te sê nie.
Ek gaan elkeen van julle opreg mis — die oggende op die veld, laat aande, die wedstryde, die gesprekke, die lag en selfs die moeilike oomblikke wat ons saam deurgewerk het.
Onthou asseblief:
Ek is nooit ver nie.
Julle kan my steeds kontak — vir raad, ondersteuning of net ’n geselsie. Daardie deur bly altyd oop.
Baie dankie vir alles wat julle vir my, Ekdoraigne Krieket en vir Cricket 101 beteken het.
Sterkte vir die pad vorentoe — hou aan bou, hou aan glo, en hou aan groei.
Groete en met groot waardering,
Abré Vollgraaff
[email protected] | 076 537 9132
