23/08/2026
Hier verlaat DeWet Nel, oud-prokureur en jarelange lid van Carnarvon Rolbalklub, die baan vir die laaste keer.
Dit was Oktober 2024, tydens die trekking vir die spanne van die Rooivleisdag. Niemand sou op daardie oomblik weet dat dit sy laaste keer op die baan sou wees nie. Enkele maande later, in 2025, is DeWet oorlede.
Ons het wonderlike staaltjies van hom op én langs die baan gehoor – altyd met daardie besondere DeWet-humor.
As iemand die bal baie kort en sag rol, was sy kommentaar eenvoudig: “Very lady-like.”
En as twee b***e agtermekaar swak gerol word, het hy droogweg gesê:
“Sheila always said, consistent bad bowling.”
Later, toe hy nie meer maklik kon buk nie, het hy die bal sommer effens gegooi. En natuurlik het ons dit toe ’n “prokureursbal” genoem.
Maar dalk is een van die mooiste herinneringe aan DeWet nie eens op die baan nie. Ná ’n warm somersdag se spel, met ’n whisky in die hand en ‘n sigaar wat stadig brand het ons op die stoep gesit terwyl die Karoo in die goue uur begin afkoel. Dan sou DeWet opmerk:
“Sheila always said, the evenings in the Karoo always apologise for the day.”
En so sal ons hom onthou – met ’n glimlag, ’n droë sinnetjie, ’n whisky ná die spel en sy liefde vir die Karoo, sy kleurryke mense en Carnarvon se rolbalbaan.
Die baan het hom vir oulaas laat gaan, maar sy staaltjies bly hier.
