30/08/2026
REAGIM ZYRTAR I FC VUSHTRRIA
FC Vushtrria reagon me shqetësim lidhur me ngjarjet e ndodhura në ndeshjen e sotme ndaj FC Drita.
Klubi ynë e konsideron të papranueshme mënyrën se si një numër i shikuesve/tifozëve të ekipit mysafir nga Gjilani kanë hyrë në stadium, pa paralajmërim dhe procedurat e nevojshme që duhet të respektohen sipas rregulloreve dhe organizimit të përcaktuar nga FFK-ja.
Menjëherë pas hyrjes së tyre në stadium, janë regjistruar sjellje të papranueshme dhe incidente serioze. Është sulmuar autoambulanca e klubit, janë hedhur tyma dhe mjete të tjera piroteknike në fushën e lojës, ndërsa gjatë gjithë ndeshjes janë dëgjuar sharje, ofendime dhe fyerje të vazhdueshme ndaj FC Vushtrria, tifozëve tanë dhe qytetit të Vushtrrisë.
Si pasojë e këtyre veprimeve dhe situatës së krijuar, ndeshja është detyruar të ndërpritet për plot 13 minuta, duke dëmtuar rëndë mbarëvajtjen normale të takimit dhe atmosferën sportive që duhet të mbizotërojë në një ndeshje të Superligës.
FC Vushtrria dënon fuqishëm çdo akt dhune,
vandalizmi, përdorimin e mjeteve piroteknike, sulmet ndaj stafit dhe pajisjeve mjekësore, si dhe gjuhën e urrejtjes dhe ofendimet që nuk kanë asnjë vend në futboll.
Ne i bëjmë thirrje Federatës së Futbollit të Kosovës, organeve kompetente të garave dhe institucioneve përgjegjëse, që të analizojnë me seriozitet të plotë të gjitha ngjarjet e sotme dhe të ndërmarrin masat e nevojshme në përputhje me rregulloret në fuqi.
FC Vushtrria ka bërë dhe do të vazhdojë të bëjë maksimumin për organizimin e ndeshjeve në një ambient të sigurt dhe sportiv. Megjithatë, siguria dhe respektimi i rregullave duhet të jenë përgjegjësi e të gjithëve, pa përjashtim.
Futbolli duhet të jetë festë, respekt dhe garë sportive jo dhunë, vandalizëm dhe urrejtje.
FC VUSHTRRIA
