22/06/2026
🇽🇰 MIHANE GASHANI, PËRFAQËSUESJA JONË NË KOMBËTAREN E KOSOVËS
Për të dytin vit radhazi, klubi dhe qyteti ynë përfaqësohen në Kombëtaren e Kosovës përmes Mihane Gashanit, lojtare e cila me përkushtimin, disiplinën dhe punën e saj ka përfaqësuar me sukses shtetin tonë në CEV Volleyball European League 2025.
Me formatin e ri të garave kualifikuese, Mihanja ishte pjesë e Kombëtares së Kosovës në tri raundet kualifikuese: në Bosnje dhe Hercegovinë, ku Kosova garoi në grup me Bosnjën dhe Hercegovinën si dhe Spanjën; në Greqi, ku u përball me nikoqirin Greqinë dhe Portugalinë; si dhe në Prishtinë, ku Kosova ishte në grup me Malin e Zi dhe Hungarinë.
Në kuadër të klubit tonë, Mihanja ka qenë gjithmonë pjesë e sukseseve historike. Megjithatë, një nga emocionet më të veçanta për të dhe për gjithë komunitetin e volejbollit ishte fitorja e Kosovës ndaj Malit të Zi, një fitore historike që do të mbahet mend gjatë, pasi ishte fitorja e parë e Kosovës pas më shumë se një dekade nga pranimi zyrtar në institucionet më të larta të volejbollit evropian (CEV) dhe botëror (FIVB).
Faleminderit Mihane, për përkushtimin dhe paraqitjet dinjitoze me fanellën e Kosovës. Faleminderit, Kosovë, për emocionet dhe krenarinë që na keni dhuruar gjatë këtij rrugëtimi.
Si klub, do të vazhdojmë të punojmë dhe të kontribuojmë në ngritjen e cilësisë së volejbollit tonë, me synimin që edhe në të ardhmen të japim kontribut në sukseset e Kombëtares së Kosovës.
