06/14/2026
Awe mi selekshon ta hunga su promé wega den un Mundial.
Esaki tabata literalmente algu imposibel 25 aña pasa.
Kla mi ta kòrda sinta den 'Kueba di Pantera Negra' komo mucha di 13 aña i mi a puntra mi tata, nos( e tempu ei Antias Hulandes ainda) por yega Mundial? E di kumi no mi yu nos no por hasi esaki. E no a gañami, paso komo tata el a bisami e bèrdat( e tempu ei).
Esaki a duelmi hopi, paso mi ke a mira mi selekshon den Mundial.
For di e tempu ei ma purba na sigui mi selekshon mas di aserka kumi por. Sinta buska informashon di mayoria hungadó, ku a hunga pa nos selekshon òf lo por hunga.
Keremi ta masha bunita rekuerdo nos a haña den tur e tempu ei. Ounke ainda e stap grandi, ainda no a logra yega.
Na 2011 despues ku Kòrsou a bira outonomo den reino, selekshon di Kòrsou a nanse. Nos himno, nos bandera i nos kolonan den un selekshon.
E promé pasonan no tabata grandi, pero a kuminsa kana e kaminda largu ku konfiansa i fe.
No opstante tur duda, mi a keda kere den nos selekshon. Esaki no opstante no tabatin logra ainda.
Esaki a kambia ora ku na 2017, Kòrsou a gana e último edishon di Kopa Karibe. Ku e titulo aki Kòrsou a logra klasifiká, pa su promé Gold Cup.
E promé blòkinan a keda pone pa e kas grandi, ku lo bin kla mas despues.
Na 2019 Kòrsou a sakudi region, ora nos a yega te kuart final di Gold Cup.
Meskos ku tur historia di eksito, esun di nos tabatin su momentunan difisil.
Tur hende a kuminsa bisa para e proyekto aki, pa motibu ku e no ta bira nada.
Na 2024 despues di algun aña den turbulensia, e historia a kuminsa kana su kaminda bèk.
Despues a sigui klasifikashon atrobe pa Gold Cup, promoshon bèk pa Liga A di Nations League i e logro historiko di klasifiká pa Mundial.
Danki na tur hende ku a yuda pa e proyekto aki kristalisá. Speshalmente Rignaal 'Jean' Francisca, ku a kere den algu i pone tur kos den wega, pa e soño por bira realidat.
Mi ta yama danki na tur miembro di direktiva, tur miembro di staf, kantor di FFK, tur hungadó lokal i esnan ku bin di afo pa loke nos a logra. Bosnan tur a yuda pone blòki, pa awe nos ta para aki nan.
Mi no ke menshoná nòmber pa mi no lubida niun, paso ta miles di hende a hasi e soño aki realidat.
E loke e historia aki a siña nos ta ku Dios, trabou duru, sakrifiká anto uni huntu komo famia, tur loke ta imposibel por bira posibel.
Awe no ta ami lo ta sinta den stadion pero e mucha di 13 aña, ku su soño di mas grandi a bira realidat.
Mi stima mi pais ku hinter mi kurason, i mi ta orguyoso di ta Yu di Kòrsou.
