06/11/2026
Talo ku socoto walaalkey Omar Abdulkadir Artan;
Dhacdooyinkii maalmihii ugu dambeeyay iska soo daba dhacay waxay lamid ahaayeen sidii dhari taqaya oo kale ugu dambeyna cunadii bislaatay oo haatan dabka laga soo dajiyay kadib markii laguu magacaabay qabashada Finalka UEFA SUPER CUP, tani waxay ka dhigantahay in inta laga gaarayo bisha agoosto ay indhaha caalamka oo dhan kugu soo jeedaan, talaabo kasta oo aad qaadidna saxaafada war ka qori doonto.
Waxaan kugula talin lahaa inaad yareyso kasoo muuqashada dhanka saxaafada taas badalkeedana aad diirada saarto xirfadaada iyo u diyaar garowga kulanka adag ee PSG v Aston Villa, waayo hubaashii kulankaas indhaha caalamka oo dhan adiga ayay ku daawan doonaan, waxaana loo boohanyahay inaad ku muujiso kartidaada kuna soo bandhigto xirfadaada garsoorenimo, adduunkana aad tusto inaad u qalantay kasoo muuqashada World Cup.
Hadal kasta oo aad haatan kadib ku hadashid ama ficil kasta oo aad sameysid waa iney ahaadaan kuwa miisaaman, waayo waxay noqon karaan kuwa horey kuusii qaado ama dib u dhac kuu sababo, sidaas owgeed haatan wixii ka dambeeyo oo aad noqotay shakhsi dunidoo dhan laga yaqaano waxaad u baahantahay inaad sameysato la-taliye heer caalami ah aadna u yaqaano xeerarka dunidaan casriga iyo sida loola macaamilo habka xaaladahaan oo kale, sidoo kale waxaad u baahantahay inaad qabsato qareen aad ayuuna muhiim kuugu yahay.
Ogoow waxaad leedahay cadow doonaya iney kula dagaan, waa kuwii shalay riyadaada kaa hor istaagay, cadowgaaga ma ahan mid daciif ah, waa cadow aad u xoog badan balse adiga maanta waxaad heystaa fursad aad cadowgaas xooga badan kaga guuleysato markale sidaad maantaba uga guuleysatay, marka ogoow in cadowgaas guuldaradii maanta aqbali doonin, oo markala isku dayi doonaan iney jalaafo kuu dhigaan, sidaas owgeed cadowgaada hasiinin fursad uu kugu jalaafeeyo.
Sidoo kale ogow in guusha ugu weyn ee aad gaari karto aysan ahayn oo keliya inaad maamusho kulamo waaweyn, balse ay tahay inaad ilaaliso sumcaddaada, dhexdhexaadnimadaada iyo kalsoonida lagugu qabo. Garsooraha heerka ugu sarreeya lagu gaaro karti, balse lagu sii joogo anshax, dulqaad iyo go'aanno sax ah.
Ha u oggolaan ammaanta badan inay ku beddesho, sida aanad ugu oggolaan dhaleeceyntuna inay ku niyad-jebiso. Labaduba waa qayb ka mid ah safarka qof kasta oo guulo waaweyn gaaraya.
Xusuusnow inaad maanta mataleyso naftaada, qoyskaaga, Soomaaliya, Afrika iyo jiilal badan oo riyadooda kadhex arkaya guushaada. Sidaas darteed talaabo kasta oo aad qaaddo ha noqoto mid ka tarjumaysa biseyl, xirfad iyo masuuliyad.
Fursadaha waaweyn mar walba waxay la yimaadaan imtixaano waaweyn. Haddii aad sii waddo shaqada adag, feejignaanta iyo is-hoosaysiinta aad maanta ku timid, waxaa dhici karta in Finalka UEFA Super Cup uu noqdo oo keliya albaab kuu furaya guulo ka sii waaweyn mustaqbalka.
Ugu dambeyn; Guushu waa adag tahay in la gaaro, balse waxaa ka adag in la ilaaliyo. Maanta waxaad gaartay meel ay malaayiin qof ku riyoodaan, hadda shaqadaada ugu weyn waa inaad caddeyso in meeshaas aad mudan tahay."
