09/24/2020
Drugo wygrano z rzyndu!
W zeszło sobota mieli my okazjo zmierzyć się z wyrobnikami Atomic Sosnowiec. Szpil przebiegł gładko i pewne, 4 punktowe zwycięstwo, stało się faktym. Na szpilu stawili my się w 11 osobowym składzie. Niy groł Szymon Jaworski i Marek Białas,kery szlifowoł technika na weselu.
Łod poczatku szpilu ciśli my żodnie, co przełożyło się na aż 12 punktów w tyj kwarcie, z noszyj strony. Mynsko obrona pozwoliła zaczimać przeciwników na ino 13 ciepniętych okach. Drugo ćwiortka zaczęli my zatym w bardzo dobrych nastrojach. Na boisku pojawił się Jakub Hirsz, kery pokozoł, że ciepanie cegłą i balą to je do niygo dokładnie to samo. Na szczęście zaliczył tyż kilka asyst, z kerych korzystoł Jakub Nowrotek. Na przerwa my złazili z przypadkową stratą 3 punktów no noszych przeciwników.
Na drugo połowa wyszli my z postanowiem podręcenio gry łobronnyj. Bardzo zaangażowano była ławka rezerwowych, z keryj szło słyszeć naprowdy dobre porady: "naciś go", "łobroń", "tref to" i "mijej go, niy ustoi Ci" to ino niykere z nich. Pod koszym piękno walka z cyntrym przeciwników toczyli Paweł Nowrotek i Rafał Chrząszcz. Tyn piyrwszy musioł zlyź za 5 fauli ale dobrze wyszło bo i tak ledwo dychoł. Knur nawyt się niy spocił i po szpilu pojechoł prosto na siłownia. Do dawnyj skuteczności powrócił, chwalony przez nos ostatnio, Szymon Sushi Filczek. Solidne 1/7 musi budzić postrach u przeciwników. Problemy z wstrzeleniem się z dystansu mioła noszo nojlepszo strzelba zespołu czyli Andrzej Boronowski. Łon dopiero włazi w nowy syzon ale zaro po szpilu wygroł turniej tenisowy o "Złoty Brzeszczot", rozgrywany w Bytomiu. Michał Włodarczyk po słabszyj pierwszyj połowie, w drugij wciepnął swój 3 i 4 bieg i był niy do zatrzymanio. Dawid Sega popisoł się nojlypszym zagraniem w szpilu. Chycił bala, kero już leciała poza linią końcową, zastanowił sie, pomachoł zebranym na trybunach fanatykom i nabił rzemieślnika z Sosnowca, kery stojąc na ausie wadził się z syndzią. Krzysiek Kaczmarczyk tym razym bez historii ale już w sobota zmierzy się z ZGP, przeciwko kerym zawsze dobrze mu szło.
To wszystko pozwoliło nom na pewne zwycięstwo. W łostatnij kwarcie zatrzymali my przeciwników na 9 punktach i tukej nic wiencyj niy trzeba dodować. Co ciekawe w niedziela, z nudów, udali my się na szpil noszygo klubu filialnygo czyli Gliwickie Towarzystwo Koszykówki. Chcieli my zoboczyć, jak sobie radzą wyrobniki, kere niy zmieściły się u nos w składzie. Nojlepij zagroł MJ Rhett, kery pokozoł się po roz piyrwszy przed gliwicką publicznością (to również są fani, kerzy niy mieszczą się we Fryna Square Gardyn, podczas noszych szpili). Tyn wyrobnik pokazoł, że mo jeszcze ochota na poważno koszykówa i zamierzo powalczyć o możliwość wystympów w noszyj tresce. W razie czego, ta od Knura, bydzie na niygo ino trocha za wielko.
Na koniec rozstrzygnięcie konkursu. Poprawno skuteczność Knura, z linii rzutów osobowych, jako piyrwszy wytypowoł Kevin Jonson. Nagroda w postaci Tatry Kraftowyj Mocnyj czeko do łodbioru. Proszemy o kontakt, ustalemy szczegóły. I to tyla, juz jutro zapowiedź kolejnygo szpilu, pozdrawiomy!
