28/10/2023
“Лос-Анжелес 2028” олимпын наадамд 5 спортын төрөл шинээр оруулна
“Лос-Анжелес 2028” олимпын наадмыг зохион байгуулах хорооноос хөтөлбөртөө шинээр таван спортын төрөл оруулах санал гаргаж, ОУОХ-ны Гүйцэтгэх зөвлөлд танилцуулсан байна. Хэрэв саналыг хүлээн авбал ОУОХ-ны 141 дэх чуулганаар хэлэлцэх болно.
Энэхүү таван спортын төрөл нь бейсбол/софтбол, крикет, флаг-футбол (Flag football, америк хөлбөмбөгийн нэгэн төрөл), лакросс, сквош юм. Гэхдээ үүнээс гурав нь өмнө нь олимпын наадмын хөтөлбөрт багтаж байсан спорт байгаа. Бейсбол/софтбол 1992-2008, 2020, крикет 1900, лакросс 1904, 1908 оны олимпын наадамд байсан билээ.
ОУОХ-ноос сүүлийн үед залуучуудыг татах, жендерийн тэгш байдлыг хангах, цаг үетэйгээ хөл нийлүүлэн алхах үүднээс олимп болгонд шинээр спортын төрөл оруулдаг болсон. 2020 оны Токио олимпод бейсбол/софтбол, карате, скейтбординг, спорт авиралт, серфинг шинээр нэмэгдэж байсан бол 2024 оны Парисын олимпын хөтөлбөрт брейк, скейтбординг, спорт авиралт, серфинг ороод байгаа билээ.
