17/02/2023
أيا سيدي فطقتو مواهبكم في التنبير ؟
شفتو على عينيكم الصفحات و الناس برتبة créateur digital البودورو كيفاه الأسابيع الي فاتت تقول المكشر فاشل و كيف خرج و رجع هوما نفسهم ولاو يقولو وليدها و موش عارف شنوة ؟
شفتو رواحكم الأغلبية المطلقة مشات وراء العاطفة لين صار تنويمكم و جعلكم وقود للصفحات الي تخدم ناس تحب فشل الجمعية باش يلعبو دور المنقذين ؟
لتوة لا حبيتو تفهمو أنو كثرة الصفحات تعني أنو كثرت البيوعة منا فينا ؟
لتوة لا حبيتو تفهمو إنو الجمهور الي فعلا يكون عندو ضغط إيجابي باش يدز للربح و للنجاح هوا بيدو كل موسم يكون ضغط سلبي باش ما يخلي حد بدا خدمة يكملها ؟
يخي لتوة لا نحبو نفهمو الخدمة و العمل لخلق فريق متكامل على جميع المستويات تحبلو موسم و زوز و ثلاثة خاصة كيف تبدى ما عندكش الإمكانيات الكاملة في وقت أصبح المال قوام الأعمال ؟
يخي وقتاه باش نفيقو أنو الكرة في بلادنا قبل ما يفزدوها بعض المسؤولين ، فزدناها أحنا بالتعصب الي فات حب الكرة و أصبح دمار للنجاح و التقدم ؟
يخي كجمهور لتوة لا حبينا نفهمو أنو فشل نادي معين و النوادي الأخرى يعني فشل البطولة و في الأخير فشل المنتخب الوطني الي كل مرة نوصلو نتفرجو عليه بكل جوارحنا و في اللخر نرجعو كان بالغصة على خاطر نحبو بلادنا و نحبوها ديما في العلالي مهما كرهونا فيها ؟
يخي لتوة لا نحبو نحكمو العقل و نكونو واقعيين ونمشيو خطوة خطوة في كل شيء و نحطو في مخاخنا إنو طلوع سلم النجاح يكون درجة درجة و كيف تغب درجة تطيح و تتكب على وجهك ؟
يخي وقتاه باش نفهمو الجمهور مهمتو الإستمتاع بالكرة و المساهمة في صناعتها بالمساندة و السكات موش بالتدخل في الدوالب الكل ؟
فقط تساؤلات جاتني على بالي بعد ما خيرت السكات جملا و الإكتفاء بالفرجة على إبداعات الجميع
هكا و
مهما كثرو الخونة في راهي تمرض و ما تموتش
✅ و فقطا تذكير بسيط للهدف المرصود من بداية الموسم هو الوصول للبلاي أوف موش البطولة
