أوفياء الأولمبيك Fidèles l'Olympique

19/05/2026

14/05/2026

ناس كانت تتعارك على الصور والسفريات والامتيازات، ومسؤولين يتصدروا المشهد وقت الأفراح والانتصارات، أما وقت طاحت الجمعية ، الكل اختفى وخلى النادي يواجه مصيره وحده.
الجمعية ولات كيما الحومة، نهار الحد يلمّو في اللاعبين من الديار باش يكمّلوا العدد ويدخلوا يلعبوا مباراة فقط لتجنب فضيحة الانسحاب… وهذه أكبر إهانة لتاريخ النادي وجماهيره.
لاعبين خانوا وهربوا، ومسؤولين تفرجوا أو ساهموا في الخراب بالصمت، بالمجاملات، وبالتسيير العشوائي.
وقت كان يلزم رجال يوقفوا مع النادي، ظهرت الحقيقة:
فما شكون يحب الجمعية بصدق، وفما شكون كان يستغل اسمها للمصلحة، للظهور، وللعلاقات.
موش كيف اللي يحبك وقت الفرحة والأضواء…
كيف اللي يبقى معاك وقت الغصرة، وقت الوجيعة، وقت السقوط والناس الكل تهرب.
وقت الشدة يطيحو الوجوه، وتبان المعادن.
أما الجمعية، حتى وهي مجروحة، باش تبقى أكبر من كل من خانها أو استغلها
التاريخ يقيد

14/05/2026

لن نسكت ولن نسامح في أي تلاعب أو تساهل داخل التقرير المالي.
القانون الداخلي واضح: كل هزيمة داخل ملعبنا يقابلها اقتطاع من أجور اللاعبين، وكل غياب عن التمارين أو المباريات يتحاسب عليه، موش يتحط في الدروج وقت المصالح.
الأخطر من هذا، لاعبين خانوا القميص، هربوا قبل نهاية المشوار، وما كملوش الموسم وقت النادي كان يغرق، وفي الأخير ياخذو فلوسهم كاملة وكأنهم حققوا الصعود!
إذا ثبت وجود مسؤولين تستروا على التجاوزات أو تعمدوا عدم تطبيق القانون الداخلي، فهم شركاء في الكارثة قبل أي طرف آخر.
جماهير النادي من حقها تعرف:
شكون اقتطعولو؟
وشكون لا؟
وعلاش القانون يطبق على ناس وناس لا؟
النادي موش ضيعة، وفلوس الجمعية موش غنيمة تتقسم بين المتخاذلين.
المحاسبة لازم تكون قاسية وواضحة، لأن اللي خان وقت الشدة ما يستحق لا احترام لا امتيازات.

12/05/2026

يمشي النافح و يبقى المغروم

09/05/2026

الخيانة عمرها ما كانت غلطة…
الخيانة اختيار ناس باعت الجمعية بالرخيص،
وركعت قدّام مصالحها وصحابها،
وخلاّت النادي يغرق وهي تتفرّج.
ناس تدّعي الحب والوفاء،
وهي في الحقيقة سكاكين في ظهر الجمعية،
يخدمو لأصحابهم، يغطّيو على الفاشلين،
ويحاربو كل واحد يحب مصلحة النادي بصدق.
واللي ساندهم وصفّق لهم،
ماهوش بريء…
هذاك شريك في الخراب،
وشريك في دموع الجمهور وقهر الرجال.
التاريخ ما ينساش،
والجمعية اللي تعرّت بالخونة،
نهار ترجع توقف على ساقيها،
أول حاجة تعملها تنظّف روحها من الوجوه المريضة اللي دمّرتها.

06/05/2026

**كل يد خلّات بصمة ما تتمحاش 💔⚽
أساميهم حيّة… حيّة ما تموتش
رجالة عطاو الروح وما حسبوش
موش كيما لي خانوا الأمانة وما صانوش
رحمة الله عليهم… ديما في البال
نجة نصيبي ،الفاهم بلهادي ،خالد العجمي

06/05/2026

أولمبيك سيدي بوزيد في عيون التاريخ ...
* كان الأولمبيك متواجدا قبل الإستقلال و ينشط باسم الغزال الرياضي الهمامي و يجري مقابلات ضد الفرق الجهوية و فرق الفرنسيين و قد كان فريقا تونسيا مسلما بالرغم من أنه كان يضم بعض المعمرين الفرنسيين بما أن المسيرين حينها هم من رجالات سيدي بوزيد من أمثال نورالدين اسكندر و و محمد جلالي بن ضو رحمهما الله و عثمان التوهامي أطال الله في عمره ...
من بين اللاعبين الذين نشطوا في تلك الفترة نذكر : عثمان بن محمود و علي بن المدب و عبد الجليل بن المدب و محمد الري و بلقاسم دي و حسين شيحاوي (حارس) و علي الباجي و الفرنسييين : هنري ، مارسال ، تيتي هاررد
* بعد الإستقلال تغير اسم الفريق ليصبح النسر الرياضي بسيدي بوزيد و من أبرزاللاعبين في تلك السنوات الأولى من الإستقلال أي بداية من 56 نذكر : حسن بن ساسي ، شلبي ، بشير بن عمر ، الوردي عكرك ، علي بن بوبكر ، شلبي عمر ، الحبيب عدلاني ، أحمد بن عترة ، عبد العزيز بن عترة ، حسن برقوقي ، الأزهر بن رايس ...
أشرف على تدريب الفريق صالح صبارة و محمد الطيب القصري
* في 3 نوفمبر 1959 قام نور الدين اسكندر و عثمان التوهامي بتأسيس الفريق رسميا و كان هذ الأخير هو الرئيس المؤسس للفريق باسم النسر الرياضي بسيدي بوزيد و كان أول إنخراط بالجامعة التونسية لكرة القدم بعد سنتين بتاريخ 8 نوفمبر 1961 باشراف المسيرين علي مخلوف و بشير بن عبد الله و ميمون بن حسونة
المدرب حسن الجريدي (لاعب سابق للنادي الصفاقسي)
المقابلة الأولى الرسمية كانت بتاريخ 25 نوفمبر 1962 بسيدي بوزيد ضد هلال الرديف
قائمة اللاعبين حينها :
غربي عكرمي - سعيد الطرابلسي - عمران بن عبد الله - قيقي لوي - عبد الله الصغير - عبد العزيز الشريف - بشير برقوقي (باي باي) - بشير برقوقي (كميون) - حبيب وصيف - الطيب وصيف - يوسف ولد شكري حسيني - إبراهيم برقوقي - قني - منجي عيساوي - الطيب القفصي ... و عدة لاعبين أتوا لتعزيز الفريق من صفاقس أمثال كيكي و علي زقالو و عبد الكريم شقرون و محمد العقربي (حارس) شابي شقرون و بن جديدية
رحم الله الأموات منهم و أطال في عمر الأحياء

05/05/2026

*"إعادة بناء النادي ما تكونش بالترقيع… تكون بثورة حقيقية.
الي صار فضيحة بكل المقاييس، وخلّى الحقيقة عارية: النادي هذا يحتاج تنظيف شامل، موش مسكنات.
يلزم إبعاد كل من عبث بتاريخ الفريق:
مسؤولين ضعاف، لاعبين بلا انضباط،
اللي خان الأمانة ما عندوش مكان، واللي استغل النادي لمصالحه لازم يتحاسب، موش يتغطّى.
لكن التنظيف وحده ما يكفيش…
يلزمنا مشروع رياضي واضح لسنوات، مبني على رؤية، أهداف، وخطة تخدم خطوة بخطوة:
تكوين، انضباط، استقرار فني، واحترام القميص قبل أي شيء.
والأهم من هذا الكل:
اختيار ربّان للسفينة… موش أي اسم.
شخص عندو المال باش يوقف النادي على ساقيه،
وعندو النظافة باش يحميه من الفساد،
وعندو الشخصية باش ما يكونش خاتم في صبع حتى حد.
النادي يلزمو قيادة قوية، قرار واضح، وخط أحمر ما يتعدّاش:
لا ضغوط، لا محاباة، لا تدخلات من أصحاب المصالح.
لازم إدارة تفرض القانون على الجميع،
مدرب يخدم في بيئة نظيفة ومحمي،
ولاعبين يفهموا أنو القميص مسؤولية موش امتياز.
المرحلة الجاية يا إمّا تكون بداية جديدة حقيقية،
يا إمّا تكون مواصلة في نفس المستنقع.
النادي أكبر منكم الكل…
وأكبر من أي واحد حاول يستغلو.
اليوم يلزمنا شجاعة:
نقصّو الفاسد،
نختارو الصحيح،
ونبداو مشروع يشرّف اسم النادي لسنوات، موش لشهور.
وقتها برك ينجم النادي يوقف على ساقيه ويرجع للمكانة اللي يستحقها."**

05/05/2026

**"موش كل واحد لبس الشعار قال نحب النادي…
الحب يتقاس وقت الشدة، موش وقت المصالح.
الي صار موش صدفة، وماهوش مجرد سوء نتائج… هذا سقوط مُمنهج، بدا بإضرابات لاعبين فقدوا الإحساس بالمسؤولية، ولقاو تشجيع خفي من ناس تدّعي الانتماء، وهي في الحقيقة كانت تدفع للنادي نحو الهاوية.
لكن الأخطر من اللاعبين… هو ضعف المسؤولين.
مسؤولين ما نجموش يفرضوا الانضباط، وما عندهمش الجرأة ياخذوا قرارات حاسمة، خاصة قدّام لاعبين مدعومين من بعض "الأحباء" أصحاب المصالح.
النادي ولى ساحة نفوذ: كل واحد يحمي مجموعتو، وكل واحد يضغط بطريقتو، والنتيجة؟ لا قرار، لا هيبة، لا نظام.
كيفاش نادٍ يعيش على تاريخه وجماهيره، يلقى روحو رهينة عند مجموعة تحط مصلحتها الشخصية قبل كل شيء؟
كيفاش لاعبين ياخذوا حقوقهم ويزيدوا يضربوا، ويحبوا يفرضوا رأيهم بالقوة، وما يلقاوش حتى ردع؟
والأخطر من هذا، خروج بعض اللاعبين السابقين—اللي ما عادش عندهم حتى صفة—بتصريحات وهمية وإشاعات تزيد تشعل الفتنة وتفرّق الصفوف… ناس كان المفروض تكون سند، ولات عبء.
كل مدرب يجي بنية الإصلاح وفرض الانضباط، يلقى روحو وحدو في المعركة:
لا إدارة تساند، لا قرارات تحميه، لا بيئة تساعده يخدم.
يتشوّه، يتضغط عليه، ويتحارب من الداخل قبل الخارج.
والمؤلم أكثر، أنو بعض اللاعبين المحسوبين على "أبناء النادي"، استعملوا القرب والانتماء كوسيلة نفوذ، موش كمسؤولية.
الانتماء موش كلمة… الانتماء تضحية، التزام، واحترام للقميص.
النادي ما يسقطش كي يخسر مقابلة…
النادي يسقط كي تغيب القيادة، كي يضعف القرار، وكي تولي الفوضى أقوى من القانون.
الي صار اليوم نتيجة طبيعية:
غياب محاسبة + ضعف مسؤولين + ضغط أصحاب المصالح = سقوط نادي كامل.
يا إمّا نفيقو ونرجّعو هيبة القرار ونحطّو حد للفوضى،
يا إمّا نقبلو الواقع… ونحضّرو لأسوأ من هذا.
النادي أكبر منكم الكل…
والتاريخ ما يرحمش."**

04/05/2026

كان نادي… موش مجرد فريق نتابعوه، كان حكاية عمر، كان ذكريات صغارنا، كان ضحكة فرح وبكاء قهر، كان حاجة تجمعنا وتخلينا نحسّوا بالانتماء الحقيقي.
اليوم، نشوفوه يطيح… نشوفوا اسم كبير يتجرح، تاريخ يتلوّث، وجمهور وفيّ يتعذّب. الوجيعة موش في النزول بحد ذاتو، الوجيعة في الكيفاش وصلنا لهنا… في الخيبات، في الغدر، في ناس كانت تحلف بحب النادي وهي أول من باعته وقت الشدّة.
حب النادي موش كلام في الفم، موش صور وتصريحات، حب النادي تضحية، صدق، ووقفة رجولية وقت الأزمات. أما للأسف، برشة اختاروا مصالحهم، صداقاتهم، وحساباتهم الخاصة على حساب الجمعية… وخلاّوا النادي يخلص الفاتورة وحدو.
سوء التسيير، قرارات عشوائية، انتدابات فاشلة، صراعات داخلية… كل هذا تراكم، وكل هذا خلّى السفينة تغرق شوية بشوية، واحنا نتفرّجوا بقلوب محروقة وما باليد حيلة.
جمهور النادي… هو الوحيد اللي بقى وفيّ. جمهور ما يبيعش، ما يخونش، يقف في المدرّج حتى في أسوأ الظروف، يغنّي وهو موجوع، ويشجّع وهو يعرف أنو الفريق يتألم. هذا الجمهور هو الروح الحقيقية للنادي.
اليوم نطيحوا، نعم… أما موش النهاية. التاريخ يعلّمنا أنو برشة أندية كبيرة طاحت ورجعت أقوى، أما الفرق الوحيد هو: هل نتعلّموا من أخطائنا؟ هل ننقّوا النادي من الناس اللي استغلّته؟ هل نرجّعوا القيم الحقيقية اللي ضاعت؟
النادي هذا أكبر من أي رئيس، من أي لاعب، ومن أي شخص يظن روحو فوقه. النادي ملك لجماهيره، ملك للتاريخ، ملك للناس اللي تحبّو بصدق.
باش نرجعوا… يمكن الطريق يكون طويل، يمكن يكون صعيب، أما الأكيد أنو النادي هذا ما يموتش. يعيش بينا، بصبرنا، وبإيماننا.
حتى وهو يطيح… يبقى في قلوبنا واقف.