27/04/2026
بصراحة، التأجيل هذا يطرح أكثر من سؤال. كل مرة تتبدل القوانين بطريقة تخدم مصالح أشخاص معيّنين موش مصلحة القطاع ولا مصلحة الرياضة الميكانيكية. قرار سحب الـ licence individuelle وفرض الارتباط الإجباري بجمعية هو أكبر دليل على هذا التوجه.
اللي كانو يعطيو روح ورونق لرالي الطريق، نسبة كبيرة منهم من أصحاب الـ licence individuelle، ناس تخدم بشغفها وإمكانياتها الخاصة وتدعم الحضور والمنافسة. اليوم يتم إقصاؤهم بقرارات بيروقراطية ضيقة، والنتيجة تراجع واضح في المستوى والمشاركة.
وزيد، الراليات موش كان تظاهرة رياضية، عندها دور اقتصادي واضح. النزل تخدم، المطاعم تخدم، محطات الوقود، الحرفيين، وحتى الناس البسيطة تلقى مورد رزق من هالتجمعات. الرالي كان يحرّك الحركة الاقتصادية في الجهات اللي تستضيفو في كامل أنحاء الجمهورية، وكان فرصة للمدن الصغرى باش تنتعش وتستقبل الدراجين والزوار.
وفوق هذا الكل، الرالي كان يجمع الشمل. رغم اختلاف أسماء الجمعيات والتنافس في النتائج، في الأخير كنا عائلة وحدة. صنعنا الفرحة، رسمنا الابتسامة عند الدراجين والمواطنين، صغار وكبار. كانت روح رياضية حقيقية وتضامن بين الجميع.
خسارة كبيرة الوضعية اللي وصلها قطاع الدراجات النارية اليوم. نحبوا قوانين توحّد موش تفرّق، تشجّع المشاركة موش تقصي الناس، وترجع للرالي قيمتو الرياضية والاقتصادية والاجتماعية اللي كان يتميز بيها.
fans زعمة ترجع الأجواء متاع قبل🤔🤔 ؟؟
