09/10/2023
الإستيراد من الصين و غيرها من البلدان المصنّعة هو حلم العديد من الشباب و التجّار لخلق مورد رزق أو تنميته أو تطويره… في ظل عدم توفّر العديد من الحاجيّات بالبلاد أو لغلاء أسعارها و إحتكارها من طرف أفراد و خاصة بسبب السياسة المفروضة على الدولة بالإعتماد المطلق على السلع الأوروبية و ذلك بتقديم إمتيازات ضريبية إلخ… و لكن ما لا يعلمه أغلب الناس، أن تلك البضائع هي في أغلبها صينيّة المنشئ إن لم تكن صينية الصنع ١٠٠٪!! فبالتالي، فإن الدول الأوروبية المصدّرة تشتريها بأسعار منخفضة و تصدرها لنا تحت غطاء التعاون المشترك و الشريك الإقتصادي المميّز و إلغاء الضريبة …. بحيث شايخة الأوروب!
إضافة لهذا كله، السياسة البنكيّة الرّائعة و المتميّزة التي تسهّل بشكل مبهر و فعّال جل التحويلات النقدية الخارجية بكل سلاسة تزيد الطين بلّة و تحد بشكل شبه كلّي من إمكانية إستيراد البضائع من دول غير أوروبية بالخصوص.
باهي يا سيدي، هذا الكل مفهوم و مبرّر باش نحمييو الصناعة المحلّية و نحافظو على العملة الصعبة و نشجعو على الإستثمار الداخلي و نساندو الباعثين الشبّان و و و ، لكن عن أي صناعة محلّية نتحدّث؟؟ فاش نصنعو أحنا؟ سيّارات محلّية عاملين عليها قاوق و هي دون الكاركاس المصنوعة من ألياف البلّور كل شي مستوردينو ؟ على معمل الإطارات اللي نهار يخدم و عشرة لا و يفرضوا علينا نشرييو كان منو و نرضاو بالسوم و الجودة المفروضة علينا؟؟ ما نحيكيوش عاد على باعثي المشاريع الصغرى و المتوسّطة اللّي ما يوصلو ياخذو رخصة مالحماية المدنية في السلامة و يركّبولهم منڤالة الضو كان ما فلوسهم وفات و دخلو في حيط ، و اللي تعدى ستاج الوحش هذا، يلقى روحو يا عاجز على إخراج العملة الصعبة لشراء المعدّات اللازمة للمشروع و إلاّ إذا كان والديه داعين عليه بالخير و خرّجهم الفلوس، يوحل في الإجراءات الديوانية و السلعة ياكلها البقّ في البرط…
أخطانا من هذا الكل، يا رسول الله يقومو بفرض إجراءات تعجيزية على توريد الأجهزة الالكترونية كيما كاميرات المراقبة و غيرها من الأساسيات في وقتنا هذا، قال شنوّة لازم تعمل نيابة و تاخذ رخصة من وزارات دخول الحمّام و خروجو أسهل من دخولهم !!! علاش؟؟؟ ما ندروش!!
النتيجة: عزوف الشباب على الإستثمار، خسارة ربحيّة للتجّار و المصنعين و منعهم من التطوير و التوسّع، إزدهار التجارة الموازية و تهريب العملة و التهرب الضريبي…-> خسارة مضاعفة للدولة على جميع الأصعدة الإقتصادية، الضريبية، الاجتماعية ….
يمكن تفهّم الوضع هذا بسبب السلع الرّخيصة جدا و الغير مطابقة لأي نوع من انواع السلامة اللي قاعدة تدخل للبلاد و اللي عطات فكرة مغلوطة على جودة المنتجات الصينية! إضافة لهذا ما ننساوش القدرة الشرائية المتدهورة للشعب اللي موش قادر على تحمل عبء الحياة و زيد عليه العقليّة المغلوطة اللي تدفع الشخص إنّو يحس روحو معلّم و وليدها كي يشري حاجة في ظاهرها طيّارة بسوم رخيص هههه لازم العباد تفهم قبل ما تتذمّر، إنّو ما تلقى الجودة كان على قد فلوسها… المصنعين ماهمش بهايم ولّا يخدمو بالخسارة باش يوصّلولك سلعة متاع مائة بعشرة لاف ولاّ بدينار 😅 لكن جهل العباد و حب إغتنام الفرص يدفع العملاء و المورّدين لتوريد هذا النوع من السلع ذات الجودة "الإفريقيّة"…
ولكن!
في خضم هذا الوضع البائس و العيشة الكحلا، ما يمنعش أنّو فمّا حلول و إمكانيات مختلفة لتسهيل عمليات التوريد و توفيرها لجميع الشرائح من كبار المؤسسات إلى صغار تجار التجزئة و حتى لأي شخص له نيّة أو مجرد فكرة لبدء مشروع تجاري ولو بسيط … مع ضمان جودة محترمة حسب طلب الحريف بالطبع، و نصائح في كل ما يخص سلسة التوريد و المعاملات البنكيّة… و ربي يسهّل للجميع إنشاء الله 🤲
"وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا" صدق الله العظيم
