24/06/2022
سيدي نحب نولّي بطل ..
هو من ناحية الحب بلاش اي انسان يحب الي يحب عليه .. اما باش تكون بطل يلزم برشة تضحيات واسس علمية
تترانى ثلاثة مرات في الجمعة ؟ وساعات تجي حصة وساعات حصتين ؟ وتحب تولي بطل ؟
الابطال يتراناو 5 مرات اسبوعيا صباحا مساء يعني 10 حصص في الاسبوع فاكثر .. موش هاني في البحر .. هاني عندي عرس .. هاني ماشي للبلاد .. هاو خالة بنت عمة امي في السبيطار .. هاو ماشي رحلة .. وما الى ذلك من ضربان اللغة تتسبب في الغيابات.
الفترة الصيفية مهياش فترة خلاعة اكهو .. ناس تحضّر للعام الجاي .. ناس في عينيها ميدالية .. الي يوصل بطل هو ملك الميزان هذاكة .. واذا تقبل شكون ينحيلك بلاصتك ويهبطك من عرش البطولة .. هذا يعني انك مكنتش تستاهل تكون بطل مالأوّل.
انت تحب تولي مشروع بطل ؟ اي فاش قاعد تاكل؟ الميزان نرمالمون تقعد فيه عامين قبل ما تطلع للميزان الي بعدو . يعني ماتكلش المرُق والزيوت والعجين ونهار كامل غاطس في الشكلاطة وتحب تولي بطل ..
تحب تولي بطل يلزم تاكل ماكلة نظيفة كيف البطل .. يلزمك تكون مستعد تستغنى على الشهوات الي يعيشها الانسان العادي ..
تحب تولّي بطل وانت مقتنع بقدرات متحبش تطوّر فيهم .. متحبش تزيد تتحسّن .. تحب تكتفي بالمستوى الي انت فيه .. غيرك كيف قطار الي يمشي في الالف كلم .. باش يتعداك ويفوتك ويخليك متقوقع على ذاتك .. تلقى روحك ولّيت ديما تخسر .. وماكش فاهم علاش .. رغم انك كنت بطل يوما ما .. ببساطة لانو البطل يتدرّب ومايقلقش .. موش موسم نضيعو بيه في وقتنا او هواية نمارسوها مع القراية .. كيما يقولو بعض الاولياء نحبو نجيبو اولادنا يتراناو باش نخففو عليهم ضغط القارية ؟؟؟
كيفاش تحب تكون بطل وانت عندك عقلية كان ربحت ولا خسرت عادي .. احنا مدربين نعلموكم الروح الرياضية والربح والخسارة عادي .. اما في الحقيقة وقتلّي نحضروك باش تلعب .. تاخو من وقت اصحابك ووقت مدربك وتهبط تلعب ومتعطيش حتى ربع مجهود .. ما تتصوروش الوجيعة الي يحس بيها كل مدرّب ..
تحب تكون لاعب عالمي وانت معندكش معداتك الخاصة . يبطى شوية.. مستحيل تكون لاعب متميّز .. لانو لازمك توفر الاساسيات اللازمة من زي وواقي وحامي ايدي وارجل .. باش ما تتضربش .. باش كيف تلعب البطولة متبداش تلعب مع واحد لاباس عليه وانت ايدك ولا ساقك مكسرة ..
حتى الروح القتالية .. حتى خزرتك ... تى عيطتك في الصالة كيف تخرج مالقلب .. وقتها تكون مشروع بطل ..
_ وقتلي تحوس وتتفرهد وتنسى رياضتك تخليها عجلة احتياط متستناش منها باش تعطيك .. حوس وتفرهد .. اما وقت التدريب وقت مقدّس .. شنعمل بيهم انا الفلوس الي تطيشوهملي اول الشهر وتترانالي حصتين
_ وقت تلعب السنة في ميزان والعام الي بعدو نلقاك ولّيت عجل صغيّر .. منجم نقول كان استهتار وعدم احساس بالمسؤولية وشهواتكم في الماكلة والقلاص والشكلاطة اقوى منكم .. والي نفسو ضعيفة مينجمش يكون مشروع بطل
خلاصة القول
_ لا تخلقوا اعذارا بل اصنعو نتائج حتى وان كانت بسيطة
