13/08/2026
لقد كان يوما مليئا ب"الجامعة، او رئيسها" 😂 .. اخطاو التفدليك، بيان الترجي تاريخي، جمعية كبيرة تكلمت كما لم تتكلم من قبل .. طرحت تقريبا جميع الاشكالات و التجاوزات و المشاكل الي نعيشو فيها و يغطيو فيها بالصور على الصفحة .. بيان الترجي يعطي نظرة كبيرة على واقع الايسبورتس التونسي .. و المسؤول الاول و الاخير هي الجامعة و لازم تتحمل كافة المسؤولية متاعها في حالة الاحتقان الي تعيشها الساحة التونسية للاسف الشديد، التعنت و الاصرار على الاخطاء و لغة السلطة ساهمو بشكل كبير في تدهور المستوى العام لكل ملاعبي وطنيا و النتيجة مشاركات ضعيفة تقريبا لجميع المنتخبات على الصعيد العالمي و شلل تام على المستوى الوطني .. و لا نلوم على حتى ملاعبي، الناس لكل دعمناهم بالي نقدرو و نشكرو كل ملاعبي عطى احسن ما عندو لتمثيل المنتخب لكن اللوم على سوء الاختيارات .. سوء التنظيم .. عدم توفير مستوى احترافي للملاعبية على المستوى الوطني، تقريبا 5 سنوات منذ تولي المكتب الحالي مسؤولية ادارة الايسبورتس التونسي و حتى نظام بطولة او حتى نظام عادي يعطي منافسة و يخلي الملاعبية يطورو من رواحهم ما صارش، و بالرغم ساهل برشا ارساء نظام بطولة مطول كيف الي اقترحتو انا و مشكورة الجامعة الي سمعتني لاول مرة، و هذا الي يخلي الرعاة يكتشفو العالم متاعنا و تتحرك العجلة عند الجامعة و الجمعيات و الملاعبية.
التاريخ باش يقيد الي الترجي و الشبيبة قالو الي ما نجمش غيرهم يقولو ✌️ و كل مرة يعطيو صورة للواقع الي نعيشو فيه .. تحولنا للاسف من مجتمع ايسبورتس و بداية احتراف للملاعبية و الاداريين و المسؤولين الى مجتمع يكتشف في المشاكل و الخور متاع الجامعة، الى مجتمع يفهم قانون و اجرائات تقاضي و اشغال المحاكم و المحامين و عدول المنفذين ومكاتب الضبط من القصر الرئاسي للمحاكم، كنا نحكيو ايسبورتس اصبحنا نحكيو شكايات و تهديدات و تشويه و تكذيب لناس بقدرهم و جمعيات بتاريخها، تصرفات صبيانية وخرت بينا لتالي في عوض تقدم بينا لقدام. الي يشوف الواقع هذا و عاجبو يحب يعيش الدراما نقلو للاسف نجحت الجامعة بمسؤولها الاول في تظليلكم على الهدف الاول الي من المفروض تسعى باش تحققو الا و هو الارتقاء بالملاعبية و السيستام التونسي و لم شمل و تقريب مكونات المجتمع، هي اصلا اسمها "جامعة" يعني من المفروض تجمع موش تفرق و تعادي، نحب نقلكم للاسف نجحت الجامعة في افساد الجو العام و تفريق الجمعيات و الملاعبية و اثارة مشاكل كنا نستغناو عليها كيف الاقصائات المتعمدة للاعبي الشبيبة باستثناء البعض، و اقصائات متعمدة للاعبي الترجي بمختلف الاساليب، طريقة اقصاء زياد و ياسين موش كيف طريقة اقصاء اكرام .. للاسف الخبث و التسلط هذا ماكانش عندو لازمة الا لو يكون يخدم مصالح المسؤولين على الي صار.
رسالتي للملاعبية و رؤساء فروع الايسبورتس في تونس، اقفو للدومان متاعكم، احترموه برغم الي صاير لكل، اخدمو على رواحكم و خليوكم بالحق تمارسو في غرامكم على امل نهار توصلو للعالمية في يوم ما .. كيف كيف كلامي للجمعيات المعنية بالامر موش الجمعيات الي منخرطين "شكليا" تحت الجامعة بمباركة المسؤولين و الي ما عندهم حتى وجود في الايسبورتس، بعض الجمعيات مشكورة انها قاعدة تخدم و تقدم برغم الضروف الي قاعدين الناس لكل نتعداو بيها من فراغ تام و شلل لمنظومة الايسبورتس التونسي .. 8 اشهر بالتمام و الكمال و الجمعيات تستنى في ربع فرصة متاع مسابقة تصير كان من الجامعة او من الخواص و الي الجامعة تشوف الي هوما يعملو في نشاط "موازي" .. النهار الي باش تفيق في الجامعة على التقصير متاعها و ظلمها للناس لكل قريب يجي.. حبيت نزيد على الحكايات هاذم لكل انو الجامعة وصلت تتظلم و تشكي بشخص عندو salle de réseau ..باش تعرفو التخمام الكارثي متاعهم و الي وصل لاكبر مستويات متاع ماعادش نجمو نحكيو اكثر .. و المشكل موش في الجامعة عندها الحق و الا لا .. المشكل انو هذاك التوجه متاعهم .. هذاك التخمام متاعهم. هذاك مخهم اش قاللهم .. كنا نستناو في جامعة مسؤولة و متفتحة و تسمع و تدعم و هي بيدها تستفاد ... نلقاو جامعة محترفة كان في التشكي و التظلم و الاستجوابات و الايمايلوات .. و يا ريتهم فلحو حتى في الشيء هذا .. للاسف ما قعدتش فما صورة محترمة للجامعة و هوما السبب بتصرفاتهم اللامسؤولة.. برشا منكم ما يعرفوش انو قبل ما تكون فما جامعة اصلا، تونس كانت تلعب iesf .. برشا ما يعرفوش انجازات كبيرة تمس العالمية كيف انجاز AZRA في Nexus قريب ال6 سنين لتالي كيف زادة عندنا بطل العالم في الhearthstone.. برشا منكم ما يعرفوش الي عندنا remind لعب سنين خارج تونس .. و ڨعلول .. و gara ..و lokmays و dean و برشا ملاعبية في برشا اختصاصات اخرى .. اعملو bilan ميسالش و قارنو بين قبل و بين توة، بعد 5 سنوات فاشلة للمكتب الحالي و احكمو وحدكم .. ميسالش حلو اليوتب، تفرجو في omen HP 2018 ..تفرجو في الBO3 .. شوفو قبل كيفاش كنا نخدمو و يحاولو نقدمو بالايسبورتس التونسي .. و قارنو بالوضع من 2021 .. تعيشو فيه موش ايسبورتس .. بل هو قمة العبث .. حتى المستشهرين فشلت الجامعة في استقطابهم لروحها ..عندنا جمعيات كيف الشبيبة و غيرها نجحت انها تعمل و تجيب مستشهرين اكثر منهم .. فشلت وقت الي كنا لكلنا في الموازي ناس اقنعت الHP و غيرها باش ينظمو و يتعاملو معانا مازال برشا كلام باش يتقال .. اما نبقى في اصل المنشور هذا: شكرا للترجي على الواقعية و الاحترافية الي وضحتها في المنشور، الترجي جمعية كبيرة موش بالاسم كهو، الترجي صحابنا منا و فينا، الترجي تكلمت على روحها و على غيرها و قدرت برشا ناس و تكلمت بكل واقعية على الشبيبة و الي مستحيل كنا نشوفو جمعيات كيف الترجي و الشبيبة يدعمو يعضهم ... تحية كبيرة للترجي و للمشرف على فرع الايسبورتس على وقفتهم مع ملاعبيتهم و اطاراتهم و ناسهم .. التاريخ يقيد حتى لو الناس ما تعرفش او ما تفهمش الي موش بالساهل تلقى جمعيات محترمة تضرب على ملاعبية متاعهم كيف الترجي و الشبيبة .. شكرا مرة اخرى للمسؤولين في الترجي الي اختارو ما يسكتوش على حقوقهم و يا ريت الجمعيات يتعلمو الشيء هذا .. يتعلمو ياقفو و يدعمو ملاعبيتهم خاطرهم "راس المال" و خاطر الدنيا هاذي و الجامعة و الجمعيات موش باش يدومو لحتى حد .. يبقى كان الاثر الباهي و الخايب في مخاخ و قلوب العباد ... و للحديث بقية ..
