14/12/2016
3 قواعد غالطة لازمهم يتبدلو في مخك
- القاعدة الأولى وهي أنك لازم تترانا على الأقل شهر باش تنجم تستعمل المكملات الغذائية
الفكرة هاذي غالطة و كي العادة مانعرفوش منين جابوها خاطر بدنك مستحق على الأقل وجبة بعد التمرين متكونة من بروتين سريع الإمتصاص باش بدنك يمتصها و يبدأ عملية التصليح و البناء و الوجبة هاذي ماتنجمش تكون أحسن من whey protein
- القاعدة الثانية و هي تترانا كامل أيام الأسبوع ماشي فيبالك قد ماتترانا قد ما تكبر العضلة و هذا غالط خاطر كي ماتعطيش البدنك الوقت باش يصلح و يبني العضلة ماتكبارش كانك تاكل بالباهي و تاخو مكملات من المستحسن ماتفوتش 3 حصص في الجمعة كبداية و كان لقيت روحك بدنك قاعة يرتاح بصفة جيدة تنجم تزيد حصة و لا زوز يعني المجموع يولي 4-5 حصص في الجمعة ما أكثرش و كل شيء مربوط ب recuperation
-القاعدة الثالثة و هي تترانا بالشارش الخفيف باش تشيح و هاذي زادة غلطة كبيرة التنشيف و لا التشيح يجي عن طريق الماكلة ثم من بعد الكارديو يعني تبع نظام غذائي متاع تشيح مبعد تدخل الكارديو في الخدمة متاعك خاطر كان العضلة مستانسة بأوزان و intensity معينة تجي إنتي مبعد تخدم بالخفيف ماكش باش تحدث micro dechirure في العضلة الشيء إلي يخلاها لا تصلح و لا تبني و هكاكا العضلة تبدأ تتلاشى
