16/09/2026
🚨 လေဆိပ်ကနေ ဘတ် ၁ သန်းကျော်တန် ပစ္စည်းတွေပါဝင်တဲ့ ခရီးဆောင်အိတ် ယူဆောင်သွားခဲ့တဲ့ ဗီယက်နမ်အမျိုးသမီး ဖမ်းမိ
ထိုင်းနိုင်ငံ၊ ဘန်ကောက်မြို့ရှိ သုဝဏ္ဏဘူမိလေဆိပ်အတွင်း ခရီးသည်တစ်ဦး၏ တန်ဖိုးကြီးပစ္စည်းများပါဝင်သော ခရီးဆောင်အိတ် ပျောက်ဆုံးမှုနှင့်ပတ်သက်ပြီး အသက် ၂၇ နှစ်အရွယ် ဗီယက်နမ်အမျိုးသမီးတစ်ဦးကို စက်တင်ဘာ ၁၅ ရက်က ဖမ်းဆီးလိုက်ကြောင်း သိရပါတယ်။
ဖြစ်စဉ်ဟာ စက်တင်ဘာ ၇ ရက်မှာ တရုတ်နိုင်ငံသား ခရီးသည်တစ်ဦးက လေဆိပ်ရှိ Conveyor Belt အမှတ် ၁၅ မှာ သူ့ရဲ့ ပန်းရောင် RIMOWA ခရီးဆောင်အိတ် မတွေ့တော့တာကြောင့် ရဲတပ်ဖွဲ့ထံ တိုင်ကြားခဲ့ရာက စတင်ခဲ့တာပါ။
ပျောက်ဆုံးသွားတဲ့အိတ်ထဲမှာ ယွမ် ၂၀၀,၀၀၀ ကျော်တန်ဖိုးရှိ လက်ပတ်နာရီတစ်လုံးအပြင် ငွေသားနဲ့ ကိုယ်ပိုင်ပစ္စည်းတွေ ပါဝင်ခဲ့ပြီး စုစုပေါင်းတန်ဖိုးဟာ ထိုင်းဘတ် ၁ သန်းကျော် ရှိတယ်လို့ သိရပါတယ်။
တိုင်ကြားချက်ရရှိပြီးနောက် လေဆိပ်ရဲတပ်ဖွဲ့နဲ့ လုံခြုံရေးအဖွဲ့တွေက CCTV မှတ်တမ်းတွေကို စစ်ဆေးခဲ့ရာ ဟိုချီမင်းမြို့ကနေ လေယာဉ်နဲ့ ရောက်လာတဲ့ ဗီယက်နမ်အမျိုးသမီးတစ်ဦးကို သံသယရှိသူအဖြစ် ခြေရာခံနိုင်ခဲ့ပါတယ်။
ရဲတပ်ဖွဲ့ရဲ့ စုံစမ်းမှုအရ သံသယရှိသူဟာ လေဆိပ်ကနေ ထွက်ခွာပြီး တက္ကစီအသုံးပြုကာ ဟိုတယ်တွေကြား နေရာပြောင်းရွှေ့နေထိုင်ခဲ့ကြောင်းလည်း သိရပါတယ်။
စက်တင်ဘာ ၁၅ ရက်မှာတော့ စုံစမ်းရေးအဖွဲ့က ဆက်လက်ခြေရာခံပြီး ဘန်ကောက် Sukhumvit Soi 6 အနီးရှိ မန်ရှင်းတစ်ခုရှေ့မှာ သံသယရှိသူကို တွေ့ရှိဖမ်းဆီးခဲ့ပါတယ်။
ဖမ်းဆီးပြီး စစ်ဆေးမေးမြန်းရာမှာ ခရီးဆောင်အိတ်နဲ့ အထဲက တန်ဖိုးကြီးပစ္စည်းတွေကို Huai Khwang ဧရိယာရှိ ကွန်ဒိုတစ်ခုအတွင်း ဝှက်ထားခဲ့ကြောင်း ပြောဆိုခဲ့ပြီး ရဲတပ်ဖွဲ့နဲ့အတူ အဆိုပါနေရာကို လိုက်ပါပြသခဲ့တယ်လို့ သိရပါတယ်။
ရှာဖွေစစ်ဆေးမှုအတွင်း ပျောက်ဆုံးနေတဲ့ RIMOWA ခရီးဆောင်အိတ်နဲ့ အထဲရှိ တန်ဖိုးကြီးပစ္စည်းတွေကို ပြန်လည်တွေ့ရှိသိမ်းဆည်းနိုင်ခဲ့ပါတယ်။
လက်ရှိမှာ ဖမ်းဆီးခံထားရသူကို စွဲချက်နဲ့ တရားဝင်အခွင့်အရေးတွေ အသိပေးပြီး ဆက်လက်စစ်ဆေးအရေးယူနိုင်ရန် အမှုစစ်ရဲအရာရှိထံ လွှဲပြောင်းထားကြောင်း သိရပါတယ်။
KeyMovie
