27/07/2026
ນ້ຳຖ້ວມ ຢູ່ເມືອງຄູນຄຳ ເສຍຫາຍ 39,71 ຕື້ກວ່າກີບ
ຜົນກະທົບຈາກໄພພິບັດນ້ຳຖ້ວມ ພາຍໃນເມືອງຄູນຄຳ ແຂວງຄຳມ່ວນ ໃນປີ 2026 ມີຄວາມເສຍຫາຍທັງໝົດ 39,71 ຕື້ກວ່າກີບ. ພ້ອມນີ້, ຄະນະກຳມະການຄຸ້ມຄອງໄພພິບັດຂັ້ນເມືອງ ໄດ້ເລັ່ງຊ່ວຍເຫລືອ ແລະ ຟື້ນຟູໃນຂະແໜງການຕ່າງໆ ທີ່ມີຄວາມເສຍຫາຍຫລາຍກວ່າໝູ່ ແລະ ຂົງເຂດທີ່ຈຳເປັນໃນການດຳລົງຊີວິດປະຈຳວັນ ຂອງປະຊາຊົນພາຍຫລັງນ້ຳລຸດລົງ ເພື່ອໃຫ້ກັບຄືນສູ່ສະພາບປົກກະຕິໂດຍໄວ.
ທ່ານ ສົມຫວັງ ສຸວັນທອງ ຫົວໜ້າຫ້ອງການແຮງງານ ແລະ ສະຫວັດດີການສັງຄົມ ທັງເປັນຄະນະກຳມະການຄຸ້ມຄອງໄພພິບັດຂັ້ນເມືອງຄູນຄຳ ໄດ້ຂຶ້ນລາຍງານຜົນການສະຫລຸບໄພພິບັດນ້ຳຖ້ວມ ເມື່ອບໍ່ດົນມານີ້ ວ່າ: ເລີ່ມຕັ້ງແຕ່ວັນທີ 07-17 ກໍລະກົດ 2026, ເມືອງຄູນຄຳ ໄດ້ຮັບຜົນກະທົບຈາກພາຍຸໄມ້ສັກ ແລະ ພາຍຸບາວີ ເກີດມີຝົນຕົກໜັກຕິດຕໍ່ກັນຫລາຍວັນ ເຮັດໃຫ້ເມືອງຄູນຄຳ ເກີດນ້ຳຖ້ວມເຮືອນຊານຂອງປະຊາຊົນ ເປັນບໍລິເວນກວ້າງ ຈຳນວນ 09 ບ້ານຄື: ບ້ານນາກາງ, ບ້ານແກ້ງ, ບ້ານມ່ວງນ້ຳສາງ, ບ້ານນາຄຳ, ບ້ານອໍ້, ບ້ານໂພນແຍງ, ບ້ານກູບ, ບ້ານກອງລໍ ແລະ ບ້ານຄູນມະນີ (ຄຸ້ມບ້ານໜອງຮາງເກົ່າ, ຄຸ້ມບ້ານໂພນທອງເກົ່າ), ຄອບຄົວທີ່ໄດ້ຮັບຜົນກະທົບ 1,365 ຄອບຄົວ, ມີ 6,563 ຄົນ ຍິງ 3,224 ຄົນ.
ນອກນີ້, ນໍ້າຍັງມີຖ້ວມເນື້ອທີ່ນາຂອງປະຊາຊົນ 19 ບ້ານ ພາຍໃນເມືອງຄູນຄຳຕື່ມອີກ. ສ່ວນບັນດາເສັ້ນທາງພາຍໃນເມືອງຄູນຄຳ ກໍຖືກນ້ຳຖ້ວມເຊັ່ນກັນໂດຍ ຜົນເສຍຫາຍຂົງເຂດໂຍທາທິການ ແລະ ຂົນສົ່ງ ແມ່ນນ້ຳຖ້ວມເສັ້ນທາງ 8 ເສັ້ນຄື: ເສັ້ນທາງແຕ່ສາມແຍກບ້ານຄູນເງິນ ຫາ ບ້ານພູໝາກແໜ່ງ, ເສັ້ນທາງບ້ານກອງລໍ, ເສັ້ນທາງບ້ານນາຂາມຫາບ້ານນາເມືອງ, ເສັ້ນທາງແຕ່ບ້ານຜາຄ້ອງເກົ່າ ຫາບ້ານຄູນມະນີ, ເສັ້ນທາງເຂົ້າບ້ານອໍ້, ເສັ້ນທາງແຕ່ແຍກທາງເຂົ້າແຫລ່ງທ່ອງທ່ຽວຕາດຟ້າ ຫາ ທາງເຂົ້າຫົວງານນ້ຳປາປະວັງເວີ້ ບ້ານນ້ຳສະນາມ, ຈຸດເສັ້ນທາງແຍກໄປແຫລ່ງທ່ອງທ່ຽວກະຕືບບ້ານນາ ແລະ ເຄື່ອນໄຟຟ້ານ້ຳຫີນບູນ (ທົ່ງລົມ), ເສັ້ນທາງຊື່ໄປຫາເຂື່ອນທົ່ງລົມເສັ້ນທາງກໍເປ່ເພ ທໍ່ລະບາຍນ້ຳຖືກຕັດຂາດ ລວມມູນຄ່າຜົນເສຍຫາຍ 38,72 ຕື້ກວ່າກີບ.
ຜົນເສຍຫາຍຂົງເຂດກະສິກຳ ແລະ ສິ່ງແວດລ້ອມມີ: ເນື້ອທີ່ທີ່ປະຊາຊົນເຮັດນາປີ 2026 ມີ 3.639 ເຮັກຕາ, ຖືກນ້ຳຖ້ວມທັງໝົດ 3.234 ເຮັກຕາ ໄດ້ຮັບຜົນເສຍຫາຍ 1.769 ເຮັກຕາ, ມີ 1.989 ຄອບຄົວ ກວມເອົາ 19 ບ້ານ ໄດ້ຮັບຜົນກະທົບ. ນອກນີ້, ຍັງມີສວນມັນຕົ້ນ, ສວນຢາງພາລາ, ຊົນລະປະທານ ແລະ ມີສັດລ້ຽງສູນຫາຍ ລວມມູນຄ່າເສຍຫາຍ 20,89 ຕື້ກວ່າກີບ.
ສຳລັບຂົງເຂດສາທາລະນະສຸກ ມີ: ວິດຖ່າຍຂອງປະຊາຊົນເສຍຫາຍ 6 ໜ່ວຍ, ນ້ຳສ້າງ 18 ບໍ່ ລວມມູນຄ່າ 10 ລ້ານກີບ. ຂົງເຂດສຶກສາທິການ ແລະ ກິລາ ນ້ຳຖ້ວມໂຮງຮຽນ 07 ແຫ່ງ ມີອຸປະກອນການຮຽນ-ການສອນເປ່ເພຈຳນວນໜຶ່ງ ປັດຈຸບັນມີຂີ້ຕົມຖົມພື້ນໂຮງຮຽນ ແລະ ຝາຫ້ອງ ຄິດໄລ່ການອະນາໄມ ແລະ ຊື້ອຸປະກອນມາໃຊ້ແທນຄືນໃໝ່ ມູນຄ່າປະມານ 13 ລ້ານກີບ.
ຂົງເຂດທ່ອງທ່ຽວ ມີ: ແພອອກ-ເຂົ້າໃນຖ້ຳກອງລໍເສຍຫາຍ, ເຮືອເຫລັກ 3 ລຳ, ຕູ້ໄຟຟ້າຈົມນ້ຳ ແລະ ເຮືອນພັກໂພນແຍງ ເສຍຫາຍມູນຄ່າ 141 ລ້ານກວ່າກີບ; ຂົງເຂດໄຟຟ້າ ມີນໍ້າຖ້ວມໝໍ້ນັບໄຟ 76 ໜ່ວຍ ແລະ ອຸປະກອນເຊື່ອມຕໍ່ໄຟຟ້າຈຳນວນໝຶ່ງ ລວມມູນຄ່າເສຍຫາຍ 13,9 ລ້ານກວ່າກີບ.
