07/04/2026
🔵من عيلة أهلاوية بجد، بدأت هنا جودة لعبة تنس طاولة تحت الترابيزة حرفيا وهي عندها 4 سنين بس، كانت قصيرة لدرجة إن المدربين في النادي الأهلي اضطروا يقصوا رجلين الترابيزة عشان تبقى على مقاسها وتعرف تطول الكورة
🔵وهي عندها حوالي 6 سنين خسرت أول ماتش في أول بطولة ليها لكن في تاني بطولة ليها وصلت لدور الـ 16
🔵هنا كانت شايفة دينا مشرف هي مثلها الأعلى محلياً، وعالمياً كانت معجبة بالبطلة الصينية "دينغ نينغ"، وطبعاً المدرب الصيني "تشانغ شاو لين" كان ليه فضل كبير في تطوير مستواها، وسافرت الصين تتمرن هناك لأول مرة وهي عندها 7 سنين بس
🔵ومن هنا بدأت الرحلة العالمية وسافرت الجزائر والسويد، وفي الجزائر وهي عندها 7 سنين بس، قدرت تحقق مفاجأة وتكسب مركز أول تحت 12 سنة ومركز تاني تحت 15 سنة
🔵هنا جودة فازت ببطولات في السويد وتونس وعمان والبحرين، وفي 2019 بقت بطلة أفريقيا للناشئين في غانا
🔵وفي 2020، الدنيا كلها عرفتها لما اتحدت النجم محمد صلاح في مباراة تنس طاولة، والموضوع ده عمل ضجة كبيرة جداً وقتها.
🔵سنة 2021 كانت سنة التحول؛ شاركت في أولمبياد طوكيو كاحتياطية، وحققت رقم قياسي تاريخي كأصغر بطلة لمصر في "فردي السيدات" وهي عندها 12 سنة بس!
🔵وفي 2022 كملت السيطرة وبقت بطلة كاس أفريقيا في نيجيريا، وخدت ذهبية ألعاب البحر المتوسط مع المنتخب، وختمت السنة بذهبية بطولة العالم للناشئين في الزوجي المختلط بتونس
🔵في 2023 دخلت التاريخ من أوسع أبوابه كأصغر بطلة لأفريقيا في الفردي (وهي عندها 15 سنة)، وده اللي أهلها لأولمبياد باريس 2024.
🔵وفي يونيو 2024، العالم كله اتكلم عنها لما لعبت قدام بطلة الأولمبياد الصينية "تشن منغ" ووصلت معاها لشوط فاصل وكانت قريبة جداً من الفوز
🔵وفي أكتوبر 2024، عملت إنجاز تاريخي في بطولة الأبطال بفرنسا لما كسبت المصنفة التانية على العالم الصينية "تشن شينغ تونغ"، وبقت أول لاعبة أفريقية توصل لربع نهائي البطولة دي.
🔵وفي 2025، كملت سيطرتها القارية بذهبيات الفردي والزوجي والفرق في بطولة أفريقيا بتونس، واحترفت في نادي "ميتز" الفرنسي عشان تلعب في دوري أبطال أوروبا
🔵وأخيراً في 2026، أكدت إنها "نمبر وان" في أفريقيا بلا منازع بعد ما كسبت كاس أفريقيا في ليبيا وفازت في النهائي على دينا مشرف بنتيجة 4-0
🔵وفي ربع نهائي كأس العالم لتنس الطاولة، هنا كانت بتلعب قدام الأسطورة الصينية "سون يانج شا"، بطلة العالم والأولمبياد والمرعبة رقم 1 في اللعبة، والماتش خلص بنتيجة 3-4 بالعافية لصالح بطلة الصين.
🔵رغم الخسارة، هنا جودة خرجت وهي كاتبة تاريخ جديد مكنش حد يحلم بيه؛ بقت أول لاعبة مصرية، عربية، وأفريقية في التاريخ تقتحم ربع نهائي المونديال
🔵هنا كانت قريبة جداً من الفوز، ولعبت ند لند قدام التنين الصيني، لكن الخبرة هي اللي حسمت الماتش في النفس الأخير.
🔵هنا جودة لسه بتكتب التاريخ، وكل يوم بتثبت إنها الفراشة الذهبية♥️
