စာပေ

27/08/2026

မိသားစု
______________
#စိုင်းဝင်းမြင့်

မိသားစုဆိုတာ
တစ်ယောက်ရှေ့ရောက်ဖို့
တစ်ယောက်နောက်ဆုတ်ရတယ်
သစ်ကိုင်းတစ်ကိုင်တိုးထွက်ဖို့
သစ်ကိုင်းတစ်ကိုင်အခုတ်ခံရတယ်
မိသားစုသီချင်းဟာ အတက်အဆင်းရှိတယ်
သံစုံမြည်တယ် ။

မိသားစုဆိုတာ
လူခြောက်ယောက်ရှိ လူခြောက်ယောက်
လက်ဆယ်ချောင်းရှိ လက်ဆယ်ချောင်း
ခေတ်က တောင်းဆိုတဲ့အတိုင်း လှုပ်ရှားရတယ်
အိမ်ရှိလူအကုန် ။

မိသားစုဆိုတာ
ရှင်သန်ဖို့အတွက် အဆက်မပြတ် တိုက်ပွဲဝင်ရတယ်
ရန်ကုန်ဟာ စစ်မြေပြင် ။

လဲကျသွားတဲ့ ငါ့အဖေနေရာကို
ငါ့ညီလေးဝင်ခဲ့တယ်
ယိုင်နဲ့သွားတဲ့ ငါ့အမေနေရာကို
ငါ့ညီမလေးဝင်ခဲ့တယ်
မိသားစုကို ငါမမြင်ခဲ့ဘူး ။

ငါ့အတွေးအခေါ်က
သားသမီးဆိုတာ သီးခြားရှင်သန်ရတဲ့ဘဝတစ်ခု ။

ငါဟာလမ်းပေါ်မှာ ကြီးပြင်းခဲ့လို့
လမ်းနဲ့သွေးသားတော်ဆက်တယ်လို့ ထင်တယ် ။

ငါ့မိသားစုမှာ ငါဟာ မလင်းတဲ့မီး
ငါ့မိသားစုမှာ ငါဟာ မလုံခြုံတဲ့ ထရံ
ငါ့ကြိုးကို တီးခတ်လိုက်တိုင်း သံကြောင်ထွက်တယ်
ငါ့မိသားစုမှာ
မိုးယိုပေါက်လေးတစ်ပေါက် ရှိနေတယ်ဆိုလည်း
ငါပဲဖြစ်မှာ
ငါ့မိသားစုမှာ
ကြမ်းခင်းတစ်ချပ် ကျိုးပဲ့နေတယ်ဆိုလည်း
ငါပဲဖြစ်မှာ
မအောင်မြင်တဲ့ ဘောလုံးအသင်းဟာ ငါ့မိသားစုပဲ
မဝင်တဲ့ ဂိုးတွေကို ငါသွင်းခဲ့တာ ။ ။

Sai Win Myint

17/07/2026

“ သူများစိတ်အနှောင့်အယှက် ဖြစ်စရာ
ဘာမှမလုပ်ပါနဲ့။

ကိုယ်ကြိုက်တာကိုယ်လုပ်ပြီး
သူတို့ဘာသာသူတို့ ကိုယ့်ကိုကြည့်ပြီး
အနှောင့်အယှက် ဖြစ်နေပါစေ.... ။ ။ "

#အကြည်တော်

16/07/2026

အောက်ပါမေးခွန်းများကိုဖြေဆိုပါ
-------------------------+-------------------------

( ၁ )
မိတ်အင်ဂျပန်လို့ ရိုက်နှိပ်ထားတဲ့
တရုတ်ဖြစ်များအကြောင်းပြောပါ ။

( ၂ )
' ငါ ' ဆိုတဲ့ပုံဆောင်ခဲဟာ
ဘယ်အချိန် ၊ ဘယ်အခါ ၊ ဘယ်နေရာမှာ
ဘယ်လို အငွေ့ပျံသွားနိုင်ပါသလဲ ။

( ၃ )
လူသုံးကုန် လူမှုရေးမှာ
အပြုံးတုတွေ မည်မျှရောင်းရပါသနည်း ။

( ၄ )
သမ္မာအာဇီဝအကြောင်း
လက်တွေ့ ကျကျဖွင့်ဆိုပါ ။

( ၅ )
ကွက်လက်ဖြည့်ပါ ။
( က ) မိသားစု
( ခ ) ချစ်ခြင်းမေတ္တာ
( ဂ ) ကိုယ်ကျင့်တရား

( ၆ )
ရိုးသားစွာ ဆင်းရဲကြသူများအား
ဖော်ပြပါ ။

( ၇ )
ငွေကြေးနှင့် အနုပညာအကြောင်း
စာစီကုံးပါ ။

#လင်းလတ်တာရာ

----------------------------------------------------------------------------------

အစ်ကိုကြီး
---------+----------

ပြန်မလာတော့ဘူး
သူထွက်သွားတာကြာပြီ
တစ်နေ့တာ
မိသားစုအတွက် စာကလေးတစောင်နဲ့ သူလက်ရေးမူ
' တစ်ခုလိုချင်ရင် တစ်ခုပေးရတဲ့ကမ္ဘာမှာ
ကျွန်‌တော်အတွက်တော့ ဝမ်းနည်းမနေပါနဲ့ " တဲ့
ဖြေဆေးအတွက်တော့
ငွေကြေးတွေပို့လိုက်တယ် ။ ။

#ရာဇာမျိုး ( အင်ကုန်း )

-----------------------------------------------------------------------------------------

ကျွန်တော်နဲ့သမီးလေး
----------------+----------------

သမီးလေးကမေးတယ်
ကျွန်ဆိုတာ ဘယ်လိုဟာလဲဖေဖေတဲ့
ကျွန်တော်ကပြောတယ်
ကျွန်ဆိုတာ သမီးစီးတဲ့ စက်ဘီး‌လေးလိုပေါ့ကွယ်
ထားရာနေ စေရာသွား
ဒါဆိုဖေးဖေးစီးတဲ့ကားကြီးကရောတဲ့
ဟား......ဟား.....ဟား
အဲဒါဖေဖေ့သူဌေးကားသမီးရဲ့
သမီးလေးက သူ့ခေါင်းသူကုပ်
သူ့မျက်နှာလေးကို စူပုပ်ပုပ်လုပ်ထားတယ် ။ ။

#လူခါး

📖 ပင်လယ်နဲ့ ပတ်သက်နေတဲ့ရွက်တွေ
✍️ လင်းလတ်တာရာ ၊ ရာဇာမျိုး ( အင်ကုန်း ) ၊ လူခါး
🔴 ဝဿန်ပုံနှိပ်တိုက် ၊ ဟီရိုး စာပေ
🖨️ ပထမအကြိမ် ၊ ဩဂုတ်လ ၊ ၂၀၁၂
📃 စာမျက်နှာ = ၁၂၀
💵 မျက်နှာဖုံးမှာပါသည့်တန်ဖိုး = ၁၅၀၀
သော် ခန့်

27/09/2025

27/09/2025

02/08/2025

ထုံဆေး
၊၊၊၊၊၊၊၊၊၊၊၊၊၊၊

ကိုယ့်လည်ပင်းကိုပြန်စွပ်မယ့်ကြိုးကို
ဘာလို့မြဲအောင်ကျစ်ခဲ့တာလဲ

လွမ်းဆွတ်တာတစ်ခုတည်းနဲ့
ဘယ်သူမှ သူ့ကိုယ်ကို မညှင်းဆဲနိုင်ဘူး

မြစ်ကို ငါက
ရေနှစ်ခါချိုးဖို့လာခဲ့တာမဟုတ်
ငေးဖို့လာခဲ့တာ

တစ်ယောက်က ငါ့ကိုသတိရတယ်
ငါက ငါ့ကိုငါမေ့နေတယ်

တစ်ယောက်က မပျော်ပဲအိပ်ရတယ်
တစ်ယောက်က အိပ်ပြီးမပျော်ခဲ့ဖူး
ဒီညဟာ နှစ်ယောက်စလုံးအတွက် အလကားပဲ

ဘယ်လောက်ပဲ အဆင်ပြေပြေ
လူတွေကို ငါမယုံဘူး

ကျနေတဲ့မျက်ရည်တွေ
မိုးရေထဲမျှောထည့်လိုက်တယ်

ညကြီးမဲကြီး
မိုးဟာ သဲ (သည်း) ကြီးမဲကြီး
ကဗျာလည်း ကဲလို့
ကမ္ဘာလည်းသဲလို့
ငါနဲ့မင်းလည်း ကွဲလို့

အငိုကတိတ်နေပြီ
မိုးကခုထိအမှောင်ကျနေတုန်း

ပါးစပ်က စကားအတုပြောလို့ရတယ်
မျက်လုံးက မျက်ရည်အတု ကျမရဘူး

ငါ့ကိုငါ
ဘယ်မြို့မှာ ပြန်ရှာလို့ ရမလဲ ။

သော် ခန့်
၂၁ ၊ ဇွန် ၊ ၂၀၂၅

07/06/2025

စိတ်ပါသည်ဖြစ်စေ၊ မပါသည်ဖြစ်စေ
လုပ်စရာရှိတာလုပ်တဲ့သူတွေပဲ တိုးတက်သွားတာ။

မိုးရွာလို့ မလုပ်သေးဘူး၊ နေပူလို့မလုပ်သေးဘူး
လုပ်နေသူတွေက တစ်ခုခုဆို အလုပ်ဖြစ်အောင်
လုပ်ဖို့ထက် ဆင်ခြေတွေနဲ့တင် ရပ်တန့်နေတတ်ကြတယ်။

ကိုယ်လုပ်ရမယ့်အရာ၊ လုပ်မယ်လို့
ကိုယ့်ကိုယ်ကိုယ် ကတိပေးထားတဲ့အရာကို
ဖြစ်အောင်လုပ်တာက Self-discipline ပဲ။

တစ်ပတ် လေးရက်လေ့ကျင့်ခန်းလုပ်မယ်ဆို
လုပ်ဖြစ်အောင်လုပ်တာ
တစ်ရက် တစ်နာရီစာဖတ်မယ်ဆို
ဖတ်ဖြစ်အောင်ဖတ်တာ Self-discipline ပဲ။

ကိုယ့်စည်းကမ်းကိုယ်
လိုက်နာဖို့အရေးကြီးတယ်။
လုပ်စရာရှိတာကို ဖြစ်အောင်လုပ်တဲ့သူတွေက
အမြဲတမ်း အလုပ်ပြီးမြောက်တတ်ပြီး
လုပ်စရာရှိတာကို
နေ့ရွှေ့ ညရွှေ့ ရွှေ့တတ်တဲ့သူတွေက
ဘယ်အရာမှာမှ ဖြစ်မြောက်လာမှာမဟုတ်ဘူး။

(တိုးတက်သူနဲ့ သာမန်လူတွေကြား
အဓိက ကွာခြားသွားစေတာSelf-discipline ပဲ)
အားလုံး ကောင်းမွန်တိုးတက်သော
ဘဝတစ်ခု ပိုဆိုင်နိုင်ကြပါစေ။ 🙏🙏🙏

07/06/2025

ကျိန်စာ မတိုက်ဘူး
သစ္စာ မဆိုဘူး
လက်စား မချေဘူး

ငွေပေးလို့ ကျေအေးတဲ့အထဲမှာလည်း
ဝဋ်ကြွေးနဲ့ သေဘေးဆိုတာ မပါဘူး

ကံ ကံရဲ့အကျိုးတရားကို
ကောင်းစွာ ယုံကြည်ထားတယ်

ပြု တဲ့သူက အသစ်ကံ
ဖြစ် တဲ့သူက အဟောင်းကံ မို့လို့
အတိတ်ဘ၀က ဝဋ်ကြွေးရှိရင်
အကျေဆပ်ခဲ့ချင်ပါတယ်

အဲဒါကြောင့်မို့လို့
ကိုယ့်အပေါ် ယုတ်မာချက်တွေ
ကမ်းကုန်နေရင်လည်း ပြုံးနေတတ်ခဲ့ပြီပဲ

သံသရာ တစ်ပတ်လည်လို့
ကိုယ်ပြုတဲ့ကံ ကိုယ့်ထံအရောက်
ပြန်လာခဲ့တဲ့ အခါမှာလည်း
ပြုံးနေတတ်အောင် ကြိုးစားနိုင်ပါစေ

အဲဒီ့ ဝဋ် ဆိုတဲ့ အရာဆီက
ဘယ်သူကမှ ပြေးလို့လွတ်နိုင်မှာ မဟုတ်သလို
အဲဒီ့ ဝဋ် ဆိုတဲ့ အရာကလည်း
ဘယ်သောအခါမှ ရပ်တန့်နေလိမ့်မှာ မဟုတ်ပါဘူး

ဝဋ် တဲ့
တစ်လုံးတည်းပါပဲ ဒါပေမယ့်
ငါ့ဝဋ်ကြွေးကုန်လို့ မင်းဝဋ်ကြွေးစလာတဲ့အခါ
ငါပြုံးလိုက်တိုင်းမှာ မင်းငိုရပြီလို့သာ
မှတ်ထားလိုက်ပါ

Credit _Eternal Love&မင်းနန္ဒ(ချယ်ရီမြေ)