Kareem Ragaie

10/12/2025

انا حابب اوجه كلمه للاتحاد المصري لكرة القدم ..

بس قبلها حابب اوجه الشكر لمنتخب الأردن اللي كان مريح لاعيبته الاساسيه .. واهنيهم على ادائهم وروحهم القتاليه في الملعب.. وجمهورهم الاكتر من رائع في الملعب وفي التشجيع بما اني كنت حاضر المباراة في الملعب..
والف مبروك التأهل بالعلامه الكامه عن جدارة واستحقاق ..

انا بخصوص اتحاد الكورة بتاعنا الجميل .. ايه رايكم في منظر منتخب مصر اللي كان بيتسمع اسمه بس كل اللي ضدك ركبت تخبط في بعض ؟؟ ايه رايك في واحد من افضل منتخبات افريقيا يبقى بالشكل المهزأ ده !! عشان ترضي مين يعني تجمع فريق وجهاز فني بالمنظر ده ؟؟ وانا هنا مش بعيب في لاعيبه ولا جهاز فني لان هو ده تماهم ومقدرتهم مش هيقدرا على اكتر من كدة !!

منتخب حسام حسن ليه ميلعبش كاس العرب ؟؟
ويبقى هو ده فتره تاهيل لكاس افريقيا .. وكان عادي جداً يريح اللاعيبه التقيله لوقت اللزوم .. يعني كان عادي متلاعبش صلاح ولا مرموش ولا حد من الناس التقيله اللي خايف عليهم ..
بس كان قدامك فرصة تلعب بتاع ٥ ماتشات تعتبرهم تاهيل لفريقك قبل بطولك مهمه زي افريقيا ..

بس عشان احنا عندنا اتحاد كره جبان وملوش لا كلمه ولا رأي طلعنا بفكره المنتخب التاني ..

اه هي اتطبقت مع الجزائر والمغرب وتونس وتونس فشلت زينا كده برده بس كسبو اخر ماتش وسجلو ٣ اهداف ..

احنا سجلنا هدفين بالعافيه واحد منهم ضربة جزاء ..

انا حضرت ال ٣ ماتشات في الملعب .. ايه المنظر القمئ ده !!! ولا واحد في الملعب قادر يطلع بكوره عدله واللي بيوصل للجول في كميه فشل في الانهاء مش طبيعي ..

واحقاقاً للحق انا مشوفتش في ال ٣ ماتشات دول حد كان عنده دم في الملعب الا اكرم توفيق اللي كان مموت نفسه عالكورة .. ومحمد بسام عمل اللي عليه والله وزياده .. غير كده ولا لاعب تاني لا اساسي ولا احتياطي يصلح لممارسة كرة القدم ..

المغرب والجزائر عملوا فريق تاني ميخليكش تحس بان ده فريق تاني .. عشان نسقوا مع بعض ورتبوا امورهم بين الاول والتاني فا طلعوا بشكل محترم ولاعيبع محترمه …

انما احنا منتخب حسام حسن بيشتم في منتخب حلمي طولان .. ومنتخب حلمي طولان طالع يردح لاتحاد الكوره في المؤتمر .. ووصلنا اننا بقينا ملطشة..

انا اتمنى ان يكون في تدخل قوي من الدولة عندنا والله انهم يفوروا منظومة كرة القدم كلها ويحطوا ناس بتفهم في المجال يعيدوا بناء المنظومة من الاول مره تانيه وقوانين سيف على رقبة الكبير قبل الصغير .. عشان احنا مش مودينا في داهيه الا المجاملات ..

#مصر

09/08/2025

بدأنا دوري القطايف واللطايف ..

شوط اول تعبان اخر تعب ..

تريزيجيه - قفشة - شريف
التلاته في الملعب ملهومش اي لازمه وغير مفيدين بالمره ..

وياريت تبديلات سريعه عشان الماتش ميعقربش مننا ..

بن شرقي - ديانج - جراديشار

دي تغييرات مبدئية
يجي وراهم طاهر محمد وكريم فؤاد ..

04/07/2025

خلوني امشي عكس التيار شوية في موضوع وسام وانه يمشي ولا يقعد ..

انا عند رأيي اللي قولته في اكتر من لاعب .. وسام لاعب كواليتي عالي اوي .. وكنا مفتقدين حد بامكانياته في المكان ده اوي ..

انت دلوقتي قعدت معاه اقنعته بانه يقعد وأغريته بالفلوس ووافق .. خير وبركه .. مقتنعش وشايف انه يطلع يمشي يروح قطر ولا يروح اي بلد تانيه عشان باصص للماده والفلوس اكتر والكلام ده .. يبقى خد فيه مبلغ يرضيك ويفيدك كنادي وتكون مجهز بديل محترم اياً كان تمنه كام بس الشرط انك تبقى جاهز …

اي لاعيب مهما كان نجم وقعدته في الفريق غصب عنه هيفضل باله مشغول بالخروج وانه يروح يشوف مصلحته في مكان تاني وده هينتج عنه حاجتين ..

١- مش هيركز في الملعب ومش هيديك زي ما كان
٢- لما يخرج بره مستواه هيتركن دكة وهتقل قيمته التسويقيه ومش هتكسب فيه حاجة يوم ما تيجي تمشيه ..

فا هنا احنا بنتكلم في عقلية لاعب ..
هو عاوز يقعد وموافق وانت هتظبطة فا تمام
هو مش عاوز يقعد وبيفكر في فلوس الخليج ؟ يبقى حط رقم يا باشا عالي استفيد منه واجيب زيه واحسن كمان بس حد عدل يدور ..

وشكراً

24/06/2025

خلص مشوارنا في كاس العالم للاسف بشكل مؤسف .. بتعادلين وخسارة في ٣ مباريات ٢ منهم كانوا في المتناول ..

مباراة انتر ميامي كنت قادر افوز فيها فوز كبير وتاريخي وعريض ..
مباراة بالميراس ماستاهلش فيها اي حاجة وحقها خسارة والحمد لله خلصت ٢-٠ بس ..
مباراة بورتو تعادل ٤-٤ في مباراة اسجل فيها ١٠ اهداف مستريح بس كعادة لاعيبتنا بتتخض وتخاف ..

احنا اه جمهور دايماً بيتطلع للفوز وكنا نتمنى اقل شي نصعد لدور ال ١٦ لان طموحنا دايماً عالي ولكن لاعيبتنا كانوا مش قد المسؤولية ..

ولكن خلينا اروح لحاجات كده الواحد يحط ايده عليها ..
احنا حالياً في حراسة المرمى معنديش حد يصلح انه يبقى الحارس الاول الا مصطفى شوبير .. مع احترامي لمحمد الشناوي وللي قدمه للاهلي ولكن خلاص اشوف كفايه كده وشوبير يقود الرحلة لانه المستقبل للاهلي ولمنتخب مصر قبل ما يطير ونحتاس ..

خط الدفاع .. انا معنديش ولا واحد يصلح في خط الدفاع للاهلي الا احمد رمضان الباقي كلهم حرفياً مينفعوش ولا واحد بلا استثناء يعني انا لازم اركز في صفقات دفاعيه شويه ٢ قلوب دفاع ٢ باك رايت و ٢ باك ليفت ده اقل تقدير ..

خط الوسط انا عندي فيه تخمه في اللاعيبه ولكن عندي تعليق لنا معرفش احنا ليه رجعنا حمدي فتحي وهو مستواه كده ؟ وديانج من اول ماتش دكه ليه وهو دينامو في خط النص هو اه عنده اخطاء ولكنه الافضل مع مروان وبن رمضان وامام عاشور بس حمدي فتحي يجي حالياً في الترتيب بعدهم على مستواه ده ..

خط الهجوم عندي خط ناري وقوي جداً بس نشيل منهم تريزيجيه اللي بيرمح زي الخيل بلا هدف .. يظبطني ماتش و ٢٠ وراه بيرمح ومبيعملش حاجة غير انه عاوز ال R2 في البعيدة وخلاص .. وحسين الشحات ثغرة هجوميه ودفاعيه ولسه بيحنكش كالعاده على كل كورة ..

اللي أستفيده من تجربه كاس العالم اللي فشلت فيها ..
اني افوز خط الدفاع كامل واسيب احمد رمضان بس ..
وارجع حمدي فتحي من مكان ما جيبته خلاص ..

وامشي الشناوي وحسين الشحات وقفشة ومحمد هاني واشرف داري وكوكا واجيب بدايل محليه عادي في كتير ينفعوا..

بس استمراري في الموسم الجديد بدون تدعيم لخط الدفاع دي هتبقى كارثة لان انت فريقك دفاعه مستباح وحارس مرماك مبيحبش يفرد ايديه عالكوره ..

فا ياريت بقى تعرفوا ان عندنا وقت حلو قبل بداية الموسم الجديد نقدر نعمل فيه كتير اوي .. وعندنا كل الموارد اللي تاهلنا نعمل ده ..

17/06/2025

كلمتين جد شوية ..

الحالة الاعلاميه اللي متصدرة المشهد والتغطية الكبيرة اللي معمولة والبروباجندا والاستوديوهات واللقاءات والبرامج اللي شغاله ليل نهار .. كل ده من وجهة نظري عبارة عن أڤوره ومش في صالحنا ومخليه اللاعيبه وحتى الاداريين مش مركزين .. انا مشوفتش ولا سمعت عن فريق تاني في البطولة كلها عامل زي اللي احنا عاملينه .. مفروض ان الموضوع يقتصر بس على ستوديو الماتش قبل وبعد وشكراً وخلاص كده ..

الفريق انا شايفه رايح يتفسح واللاعيبه مهتمه بالسوشيال ميديا لا يا باشا اقفل على نفسك وعلى لاعيبتك وامنعهم من الاعلام والسوشيال ميديا لو هتوصل انك لو لاعيب نزل ستوري ولا بوست عنده تعاقبه .. انا مبقولش اسحب منهم موبايلاتهم بس خليهم مركزين واقفل عليهم وبس ..

احنا واقعيين احنا مش مستنين الاهلي ياخد كاس العالم للاندية .. احنا عاوزين الطموح دايماً يبقى عالي وفوق .. انا عاوز اصعد من مجموعتي والعب دور ١٦ ضد باريس ولا اتليتكو .. عاوز اللاعيبه تحارب وتحط في دماغها انها تروح لبعيد .. انتو مفيش عليكوا اي نوع من انواع الضغوط .. فا تركيزكوا يكون احسن ويديكوا دافع تطلعو كل امكانياتكوا استمتعوا ومتعونا معاكو ..

اعملو اللي عليكو وسيبو النتيجة دي بقى لربنا ..

16/06/2025

ما شاء الله لاعيبة الاهلي مركزة اوي مع السوشيال ميديا وشغالين ستوريز وبوستات .. وولا في دماغهم لا تمرين ولا تركيز ..

الله يمسيك بالخير يا جوزية والله كان زمانه رابطهم بحبل واحد ونازل كربجة فيهم ..

اذا المدير الفني والاداريين في النادي .. مخلوش اللاعيبه تركز في تدريباتها وفي الملعب ومش هيلتزموا .. وانت كمسؤول مبتاخدش قرار او تعاقب فا احنا كجمهور مش هنقدر نستنى منهم حاجة ..

يعني ماتش زي انتر ميامي اللي كان ممكن نفوز فيه بنتيجه تاريخيه تتسجل في التاريخ .. واجهنا فيه كذا حاجة..

- سوء حظ في الفرص ..
- سوء الفنش من لاعيبة الاهلي الليمش بتصدق انها قدام الجون انفراد ..
- انانية اللاعيبة اللي يهمها نفسها ( تريزيجيه و حسين )
- وفي النهاية عقلية اللاعب المصري اللي مش مصدق هو فين وبيلاعب مين ..

انا اه اتمنى اننا نعمل حاجة الماتشين اللي جايين ونصعد نقابل باريس ولا اتليتكو طبعاً .. بس دي اماني وطموحات جمهور ..

بس على ارض الواقع انت طول ما عقلية لاعيبتك كده وتعاملهم كده وواخدين الموضوع في نطاق التمثيل المشرف هو ده اللي هنشوفه .. والايام بيننا .. اذا ما تم ظبط لاعيبة الفريق ظبطة محترمة واذا مفيش رجولة فا انا بقولها من دلوقتي احنا هنتعبى اجوان من بالميراس ومن بورتو ..

#الاهلي
#انترميامي
#بالميراس
#بورتو

31/03/2025

والله يا جماعه لو بصيت لتسلسل الاحداث في الساحة الكروية الفترة الأخيرة..

ان المشكلة الأساسية عندنا في اتحاد الكورة ورابطة الاندية اللي ممشياها بالحب مع الكل..

الاهلي لم يتم تطبيق اللائحة عليه بخصم ٣ نقاط في نهاية الموسم..

الزمالك عليه مديونيات ومفترض ميشاركش اصلاً الا لما يسدها بالكامل زي باقي الاندية بس عشان الزمالك قالك تتقسط

بيراميدز لم يستوفي الشروط عشان يلعب - حسب بيان الاهلي لاني معنديش معلومة اكيدة ..

في النهاية اللي عاوز اوضحه ان كل الاندية دي عندها مخالفات كتيره اوي وبتتظبط في الغرف المغلقة مراضية لكل طرف شوية ..

فا لو هنبصيلها بعين العقل شويه هنعرف ان المشكله الاساسية هي الاتحاد والرابطة الغير قانونية اصلاً .. اللي من المفترض انهم يكونوا هم السيف على رقبة الكبير قبل الصغير.. اللي لما تحصل مخالفة تتنفذ وميبقاش في مجال للنقاش ..

محتاجين نبص لمصلحة الكورة المصرية في الاخر قبل ما نبص ندور على المصالح الشخصية اللي غالبه حالياً على كل حاجة..

22/03/2025

Shout out to my newest followers! Excited to have you onboard!

Mostafa Zaghlol, Ahmed Fawzy, قياده قياده, مسعد جابر

06/02/2025

رايي وبكل موضوعيه في ملف الصفقات والاجانب وبقاء معلول ..

دلوقتي قائمة الاجانب في الفريق كالتالي
١- علي معلول
٢- يحي عطية الله
٣- اشرف داري
٤- اشرف بن شريقي
٥- جراديشار

اذاً فا القائمة عندي مكتلمه ومش في احتياج لصفقة اخرى .. لا انا اشوف اني لسه محتاج لصفقة جديدة وهي في مركز الدفاع هتقولي ازاي هقولك اشرف داري يطلع بره القايمة ونجيب لاعب مكانه ميكونش اصاباته كتير انا جبت اشرف داري ويوسف ايمن والاثنين لاعيبة كويسه ولكن واحد من ساعة ماجه وهو بيتعالج عندنا والثاني مشوفناهوش اصلاً …
طب هتقولي ليه عاوز لاعب محترف مدافع ومش جناح ولا مهاجم ..

هقولك انا في مركز الهجوم مؤقتاً عندي ٢ كويسين هو وسام وجراديشار ودول كافيين ..
طب يا عمي مركز الجناح اقولك بعد تسجيل على معلول اقدر اقول مش محتاج جناح لان معلول يقدر يقوم بالدور ده قدام يحي عطية الله بكفائة عاليه وما اكتر اسيستات معلول من الجبهه اليسرى .. يعني انا لو القائمة بتاعتي كاملة هلعب بيها كده

شوبير
يحي العش داري هاني
معلول امام مروان بن شرقي
جراديشار وسام

فا اتمنى ان اشرف داري يكون سليم الفترة الجاية عشان تكتمل الصفوف مع عودة يحي ومعلول للملعب .. وعلى الدنيا السلانكاتيه وهتشوفو فريق مرعب حرفياً ..

26/01/2025

توقعات وتمنيات اشوفها في الملعب انهارده..

شوبير
كوكا ربيعه العش هاني (عمر)
اكرم الساعي مروان
امام جراديشار محمد عبدالله

البدلاء اللي هيشكلو فرق
قفشة
حسين
الدبيس
عمرو السولية

هو انا شايف انه صعب يلاعب العش ومحمد عبدالله من البدايه ولكن في النهاية ده تمني بالعناصر اللي بشوفها ..

العش حابب انه يكون موجود لانه عنصر جديد ومميز وهيطلع كل اللي عنده في الملعب ..

محمد عبدالله من العناصر الشابه الممتازه اللي محتاجه وقت اكتر في الملعب ولعبه كله ايجابي ناحية الجول ومشروع جناح مميز للاهلي..

قفشة مميز جداً كبديل لقراية الملعب من بره عشان كده نزوله تبديل مؤثر اكتر من انه اساسي..

حسين للاسف الفترة اللي فاتت غير مفيد ووجودة دكة بيديله دافع اكبر لما ينزل انه يشتغل ويشكل فارق..

الدبيس كورته حلوه ولكن هو مش بتاع ماتش كامل لسه فا الاستفاده منه كبديل افضل من حرقة من بداية الماتش..

السولية عنصر خبرة فقط وبيعرف يقف عالكورة ويوصل لقدام كويس بس اخره ٢٠ دقيقة حلوين اوي يديك فيهم اللي محتاجه ..

وده اللي متوفر حالياً واللي نقدر نتكلم فيه في ظل المستشفى اللي عندنا حالياً لحد ما يخلص موسم الانتقالات ويرجعو الاصابات الوضع هيختلف جداً ان شاء الله..

في النهاية الماتش ب ٣ نقاط في مشوار لسه طويل ومش نهاية العام الجمهور تقريباً متشائم وشبة متأكد اننا خسرانين انهارده بسبب ان بيراميدز فنياً احسن منك الفترة دي وعناصر كامله في الملعب وده في حد ذاته يديني سنة تفاؤل شوية اننا نقدر نكسب ان شاء الله .. ولكن بشرط ان يكون في ١١ راجل في الملعب وكريم نيدفيد ميلعبش 😂

#الاهلي
#بيراميدز

15/12/2024

إنا لله وإنا إليه راجعون.. وفاة الفنان نبيل الحلفاوي

14/12/2024