23/07/2026
محترمہ وزیراعلیٰ پنجاب مریم نواز صاحبہ
محترم چوہدری جنید انوار صاحب (ایم این اے، وفاقی وزیر بحری امور)
محترم سردار کرنل (ر) ایوب خان صاحب (ایم پی اے، صوبائی وزیر)
محترمہ ڈپٹی کمشنر ٹوبہ ٹیک سنگھ
محترم اسسٹنٹ کمشنر ٹوبہ ٹیک سنگھ
🏏 ہمارے بچوں کا گراؤنڈ بچا لیجیے...!
محترمہ مریم نواز صاحبہ! آپ کی حکومت نے عوامی فلاح کے لیے کئی اچھے اقدامات کیے ہیں، اور "اپنا کھیت، اپنا روزگار" بھی ایک بہترین اقدام ہے۔ ہماری صرف اتنی گزارش ہے کہ روزگار کے ساتھ ساتھ بچوں اور نوجوانوں کے کھیل کے میدانوں کا بھی تحفظ کیا جائے۔
ہمارے گاؤں چک نمبر 515 گ ب کا کرکٹ گراؤنڈ گزشتہ 10 سال سے نوجوانوں، بچوں اور اہلِ علاقہ کی کھیلوں کی سرگرمیوں کا مرکز ہے۔ بدقسمتی سے اب یہی گراؤنڈ "اپنا کھیت، اپنا روزگار" اسکیم کے تحت الاٹ کر دیا گیا ہے، جس سے پورے گاؤں میں شدید تشویش پائی جاتی ہے۔
ہم واضح کرنا چاہتے ہیں کہ جس شخص کے نام یہ زمین الاٹ ہوئی ہے، اس سے ہماری کوئی ذاتی دشمنی یا اختلاف نہیں۔ اگر حکومت انہیں کسی دوسری مناسب سرکاری زمین پر متبادل الاٹمنٹ کر دے تو ہمیں اس پر کوئی اعتراض نہیں ہوگا۔ ہماری صرف یہی درخواست ہے کہ اس عوامی کھیل کے میدان کو برقرار رکھا جائے، اسے باقاعدہ سپورٹس گراؤنڈ کے طور پر منظور کیا جائے اور آئندہ نسلوں کے لیے محفوظ بنایا جائے۔
یہ صرف کرکٹ گراؤنڈ نہیں بلکہ کرکٹ، فٹ بال، والی بال اور نیزہ بازی سمیت مختلف کھیلوں کا مرکز ہے۔ یہاں عیدالفطر، عیدالاضحیٰ، اور مختلف مواقع پر بڑے بڑے ٹورنامنٹس اور سپورٹس ایونٹس منعقد ہوتے ہیں۔ سال بھر اس میدان میں نوجوانوں کی رونقیں لگی رہتی ہیں، اور یہ گراؤنڈ پورے علاقے کی پہچان بن چکا ہے۔
اگر یہ گراؤنڈ ختم ہو گیا تو صرف ایک میدان نہیں جائے گا بلکہ سینکڑوں بچوں اور نوجوانوں سے ان کی صحت مند سرگرمیوں کا واحد مرکز چھن جائے گا۔ کھیل کے میدان نوجوانوں کو نظم و ضبط، اتحاد اور مثبت سوچ دیتے ہیں۔ جب کھیل کے مواقع کم ہوتے ہیں تو کچھ نوجوان موبائل فون کی لت، آوارہ گردی، نشے یا دیگر نقصان دہ سرگرمیوں کی طرف مائل ہو سکتے ہیں۔
محترمہ وزیراعلیٰ پنجاب مریم نواز صاحبہ، محترم جنید انوار صاحب، محترم سردار کرنل (ر) ایوب خان صاحب، ڈپٹی کمشنر صاحبہ اور اسسٹنٹ کمشنر صاحب!
ہم اہلِ چک 515 گ ب آپ سب سے پُرخلوص اپیل کرتے ہیں
اور مؤدبانہ گزارش ہے کہ ہمارے بچوں کا یہ 10 سال پرانا کھیل کا میدان بچا لیا جائے۔ جس شخص کو یہ زمین الاٹ کی گئی ہے، اسے حکومت کسی دوسری مناسب سرکاری زمین پر متبادل الاٹمنٹ کر دے، لیکن ہمارے گاؤں کے اس گراؤنڈ کو برقرار رکھا جائے۔ اور اور مستقل طور پر منظور کرکے گراؤنڈ کا درجہ دیا جائے تاکہ آنے والی نسلیں بھی کھیل سکیں اور ایک صحت مند معاشرہ پروان چڑھے۔
یہ صرف ایک گراؤنڈ نہیں... یہ ہمارے بچوں کا مستقبل، ہمارے گاؤں کی شناخت اور ہماری آنے والی نسلوں کی امید ہے۔
اہلِ چک 515 گ ب کی پُرامن اپیل
