24/04/2026
شهيد ڊاڪٽر آڪاش انصاري جي ياد ۾ هڪ شاندار ۽ يادگار ڪرڪيٽ ٽورنامينٽ ڪاميابي سان پڄاڻي تي پهتو، جنهن ۾ علائقي جي رانديگرن ۽ ڪرڪيٽ جي شوقينن وڏي انگ ۾ شرڪت ڪئي۔ ٽورنامينٽ ۾ ڪل 16 ٽيمن حصو ورتو، جن مان زبردست مقابلي کان پوءِ "مجاهد اليون بدين" ۽ "گيليڪسي اليون" فائنل تائين پهتيون۔ فائنل ميچ ۾ مجاهد اليون شاندار ڪارڪردگي ڏيکاري ونر ٽرافي پنهنجي نالي ڪري ورتي۔ کين 10 هزار رپيا ڪيش انعام ۽ ٽرافي ڏني وئي، جڏهن ته رنر اپ گيليڪسي اليون کي 5 هزار رپيا ڪيش انعام سان ۽ ٽرافي سان نوازيو ويو۔
ميچ جو سڀ کان اهم اعزاز "مين آف دي ميچ" ۽ "مين آف دي سيريز" گيليڪسي اليون جي نعمان علي پنهنجي بهترين آل رائونڊ ڪارڪردگي جي بنياد تي حاصل ڪيو۔
هن يادگار ٽورنامينٽ ۾ مهمان خاص طور ڊاڪٽر ناڪاش عالماڻي، خادم ٽالپر ۽ امير آزاد پنهور شرڪت ڪئي، جن رانديگرن ۾ انعام ورهائيڻ سان گڏ سند حوصلا افزائي ڪئي ۽ اهڙين صحتمند سرگرمين کي نوجوانن لاءِ انتهائي فائديمند قرار ڏنو۔ ٽورنامينٽ جي ڪاميابي پٺيان آرگنائيزر ذوالفقار عرف زلفي دل ۽ عمران علي لنڊ جي انتھائي محنت، لگن ۽ بهترين انتظام نظر آيو، جن کي پڻ سندن خدمتن عيوض ٽرافيون ڏنيون ويون۔ ان موقعي تي ميچن کي لائيو ڪوريج فراهم ڪندڙ دلدار بلوچ کي 5 هزار رپيا ڪيش انعام سان نوازيو ويو، جڏهن ته شاندار ڪمينٽري ڪندڙ ساجد رستماڻي کي پڻ انعام ڏنا ويا۔هي ٽورنامينٽ نه رڳو شهيد ڊاڪٽر آڪاش انصاري جي ياد کي تازو ڪرڻ جو وسيلو بڻيو، پر علائقي ۾ ڪرڪيٽ کي هٿي وٺرائڻ ۽ نوجوانن ۾ مثبت سرگرمين کي فروغ ڏيڻ جو به اهم ذريعو ثابت ٿيو۔
