12/11/2024
𝐒𝐈𝐊𝐋𝐈𝐒𝐓𝐀𝐍𝐆 𝐏𝐀𝐋𝐀𝐁𝐀𝐍: 𝐇𝐀𝐍𝐃𝐀 𝐍𝐀𝐍𝐆 𝐌𝐀𝐊𝐈𝐏𝐀𝐆𝐏𝐀𝐃𝐘𝐀𝐊𝐀𝐍 𝐏𝐀𝐑𝐀 𝐒𝐀 𝐁𝐀𝐓𝐀𝐍𝐆 𝐏𝐈𝐍𝐎𝐘 𝟐𝟎𝟐𝟒
Miyembro ng cycling team na TEAM A&A na sina Van Carll Paninsoro, Nickolo Gallardo, at Revenkyle Bautista, 15 at 16 na taong gulang ay handa ng irepresenta ang Bayan ng Ramos at Lalawigan ng Tarlac, para sa nalalapit na Batang Pinoy 2024 na gaganapin sa Puerto Prinsesa ngayong ika-23 hanggang 29 ng Nobyembre.
Kanya-kanyang preperasyon ang ginagawa ng tatlong batang seklista. Umulan man o umaraw, patuloy sila sa pag-eensayo upang masiguro na ang katawan nila ay nasa kundisyon kapag sila ay sasalang na sa laban. Kasama rin sa paghahanda nila ang panalangin, dahil naniniwala sila na sa tulong ng Maykapal, mas tatatag sila sa laro.
Ang unang sistema ng suporta na nagbibigay lakas at tatag ng loob sa kanila ay ang kanilang pamilya. Lalo na ang kanilang mga magulang na sa bawat laban na kanilang sinasalihan ay lagi silang nasa kanilang likuran. Ganoon din sa mga kaibigan, sponsors, solicitors at kung sino mang taong patuloy na naniniwala sa kanila.
“Naglalaro kami not for fame e. We’re playing this sport because this is really our passion. Magaan ang loob namin sa tuwing nakakapagpadyak kami sa iba’t ibang lugar, and we want people to remember us na isang humble player. Even though we won and having numerous awards, e humble pa rin at down to earth. Syempre, gusto namin na maaalala kami ng mga tao in a good way,” saad ni Paninsoro.
Dahil sa pagmamahal nila sa kanilang sport, kahit saang lugar sila dalhin ay handang-handa sila. Dahil hindi lang pangalan nila ang kanilang nirerepresenta kung ‘di ang kanilang paaralan, bayan, at lalawigan.
Para sa mga kabataang gustong sumunod sa kanilang mga yapak, payo naman ni Gallardo, “Mahalin ninyo ang inyong ginagawa. Mahalaga ang passion sa bawat laban. Yakapin ang bawat proseso, gaano man ito kahirap, at palaging magtiwala sa Diyos.”
Samantala, sabi naman ni Bautista, “Hindi ko maipaliwanag ang saya at excitement na nararamdaman ko. Para sa akin, ang laban na ito ay higit pa sa personal na tagumpay, ito ay isang pagkakataon upang ipakita ang husay at tatag ng mga kabataan ng Tarlac. Sa bawat pedal ng bisikleta, bawat pawis na tumutulo, at bawat segundo sa laban, dala ko ang pangalan ng ating bayan at ang pagmamahal ko sa Tarlac. Gagawin ko ang lahat para maging karapat-dapat sa tiwala at suporta ng mga kababayan ko, at ibubuhos ko ang buong puso’t kaluluwa upang maging karangalan ng ating mahal na bayan at lalawigan.”
Mahigit dalawang taon na sa paligsahan ang tatlong batang ito at marami na silang natamong parangal at kampyonato sa kanilang disiplina sa larangan ng siklistang isport. Sa kabila ng tagumpay, patuloy pa rin ang kanilang pagiging mapagkumbaba at handa nilang ibuhos ang kanilang galing sa Batang Pinoy 2024 upang bigyang karangalan ang kanilang bayan at lalawigan.
𝐒𝐢𝐧𝐮𝐥𝐚𝐭 𝐧𝐢: Alfred Jan Facun
𝐋𝐚𝐫𝐚𝐰𝐚𝐧 𝐧𝐢: Team A&A
---
Makipag-ugnayan sa amin:
✉️ | [email protected]
[The Voice. The Truth. The Sentinel.]
