11/11/2025
राष्ट्रिय फुटबल टोलीबाट खेल्ने अवसर पाउनु केवल मेरो मेहेनतको प्रतिफल मात्र होइन। यो मेरो भाग्य र देशप्रतिको समर्पणको प्रतीक पनि हो।
राष्ट्रिय टोलीको जर्सी लगाएर खेल्ने सपना हरेक खेलाडीको हुन्छ । त्यो सपना साकार हुनु भन्दा ठूलो गौरव अरू केही हुन सक्दैन। तर, हरेक सपना पूरा हुँदैन। म पनि हरेक नेपाली खेलाडीको जस्तै एउटा साधारण खेलाडी हुँ, तर देशले जब आवश्यकता ठान्छ, म सधैं तयार हुन्छु । देशका लागि मैदानमा आफ्नो सम्पूर्ण ऊर्जा, आत्मा र समर्पणसहित खेल्नेछु।
राष्ट्रिय टोलीमा छनोट हुनु गर्वको कुरा हो, तर टोलीमा नपर्नुको अर्थ फुटबलको अन्त्य होइन। म ती सबै खेलाडीसँग आफूलाई देख्छु, जो निरन्तर घरेलु फुटबलमा पसिना बगाइरहेका छन्।
मैले राष्ट्रिय टोलीबाट खेलिरहेको छु भन्ने अर्थ यो होइन कि नेपाली फुटबलको अवस्था सब ठीक छ। पछिल्लो ए डिभिजन लिग सम्पन्न भएको करिब ९ सय दिन नाघ्दैछ । जुन व्यावसायिक फुटबलका लागि अत्यन्तै दुःखद पक्ष हो।
हामी खेलाडीहरूको माग सरल छ । खेल्ने अधिकार र अवसरको सुनिश्चितता। त्यसका लागि नेपाल फुटबल खेलाडी संघले अगाडि सारेको आन्दोलनप्रति मेरो पूर्ण समर्थन छ। देशको जिम्मेवारीमा जहाँ रहे पनि, म सधैं यो आन्दोलनसँग एकताको भावनासहित उभिनेछु।
किनकि फुटबल रह्यो भने मात्र हाम्रो भविष्य रहन्छ।
फुटबल खेल्ने हालको र आउदै गरेको नयाँ पुस्ताको सपनालाई साकार पार्न लक्ष्य पूरा नभएसम्म हाम्रो संघर्ष जारी रहनेछ।
🙏🏻🇳🇵⚽️
