12/03/2026
फेरि अर्को घटना 😓 ❗️कहिले हुन्छ अपराधी लाई कार्वाही ❓️
नेपालमा २०१० देखि २०२६ सम्मको समय केवल वर्षहरूको हिसाब होइन, यो हाम्रो समाजको विवेकमाथि लागेको रगतको दागको इतिहास पनि हो। हामी सभ्यता, धर्म, संस्कृति र नैतिकताको ठूलो भाषण दिन्छौं, तर जब एउटी नाबालिका छोरी घरबाट निस्कन्छे, त्यो सुरक्षित फर्किने ग्यारेन्टी समाजले दिन सकेको छैन।
यही असफलताको प्रमाण हुन् निर्मला पन्त, अङ्गिरा पासी, बराह क्षेत्रकी बालिका(नाम खुलेको छैन), भागरथी भट्ट, सालिना पोखरेल, आरती भट्टराई, निशा तामाङ, अंशु गौतम, माया बिक, रश्मिता परियार र अहिले इनिशा बि.क.। यी नामहरू कुनै सूचीका शब्द मात्र होइनन्, यी हाम्रो समाजको मौन अपराधका जिउँदा प्रमाण हुन्।
निर्मला पन्तको ह*त्या हुँदा देश आक्रोशित भयो, सडक भरिए, न्यायको नारा गुञ्जियो। तर वर्षौँ बितिसक्दा पनि न्याय कहाँ छ ? पैसा र पावरको आडमा अझै अपराधी म्ज गरेर बाँचेको छ! अङ्गिरा पासीको घटनाले दलित बालिकाको पीडा र सामाजिक विभेदको कुरूप अनुहार देखायो। बराह क्षेत्रकी बालिकाको हत्या, भागरथी भट्टको हत्या, त्यसपछि फेरि नयाँ नामहरू थपिँदै गए सालिना पोखरेल, आरती भट्टराई, निशा तामाङ, अंशु गौतम, माया बिक। अब सूचीमा रश्मिता परियार को नाम पनि जोडिएको छ, र आज फेरि इनिशा बि.क. को नाम थपिएको छ।
हरेक पटक एउटै कथा दोहोरिन्छ। घटना हुन्छ, केही दिन देश स्तब्ध हुन्छ, सामाजिक सञ्जालमा आक्रोश फैलिन्छ, सरकार छानबिनको आश्वासन दिन्छ, प्रहरीले अनुसन्धान जारी रहेको भन्छ। तर समय बित्दै जाँदा सबै मौन हुन्छ। मौन हुन्छ समाज, मौन हुन्छ राज्य, मौन हुन्छ न्यायको प्रणाली। तर पीडित परिवारको पीडा कहिल्यै मौन हुँदैन। यो सब पैसा र पावरमा भएकाले गरेको अपराध हो आखिर दोषी लाई किन बचाईन्छ ?
प्रश्न उठ्छ यस्तो समाज कस्तो समाज हो जहाँ एउटा किशोरी बिहान घरबाट पढ्न निस्कँदा उसको जीवनको कुनै ग्यारेन्टी हुँदैन? किन अपराधीहरूलाई लाग्छ कि यहाँ अपराध गरेर पनि बच्न सकिन्छ ? किन हरेक पटक न्याय ढिलो हुन्छ, किन हरेक पटक सत्य धमिलो हुन्छ?
समाजले इज्जत, प्रतिष्ठा, धर्म, संस्कृति र नैतिकताको कुरा धेरै गर्छ। तर जब निर्मला पन्त, अङ्गिरा पासी, बराह क्षेत्रकी बालिका, भागरथी भट्ट, सालिना पोखरेल, आरती भट्टराई, निशा तामाङ, अंशु गौतम, माया बिक, रश्मिता परियार र इनिशा बि.क. जस्ता नामहरू एकपछि अर्को थपिँदै जान्छन्, तब प्रश्न उठ्छ वास्तवमा हाम्रो समाजको नैतिकता कहाँ छ ❓
यो केवल अपराधीको समस्या होइन, यो संरचनाको समस्या हो। जब समाज मौन बस्छ, जब शक्तिशालीहरू दोषीलाई बचाउन खोज्छन्, जब न्याय ढिलो हुन्छ, तब अपराधीलाई अर्को अपराध गर्न साहस मिल्छ। यही कारणले सूचीमा नामहरू थपिँदै जान्छन्।
अब प्रश्न सीधा छ के हामी फेरि अर्को नाम थपिने प्रतीक्षा गर्दै बस्ने समाज हौं, कि अन्ततः यस्तो हिंसा जन्माउने मानसिकता र संरचनामाथि प्रश्न उठाउने समाज बन्नेछौं ?
अपराधी जो सुकै होस् ,कडा भन्दा कडा कार्वाही गरियोस् ताकी यस्तो अपराध गर्ने आंट अरु कसैमा नआओस् !!!
.S.Y.C.
