Lærdal Fotball A-lag

30/05/2026

Damene satte standarden og starta poengsankinga på Lærdal stadion mot Vik igår. Imorgon, søndag, er det vår tur der me skal gjera alt me kan for å følgja opp! Kampstart er 15:00, kiosken er open og me er klare for kamp mot Førde 3. Me ynskjer våre motstandarar og hovuddommar Tommy Skjerven med sine assistentar Jan Eik Ibsen og Jesper Andersen velkommen til Lærdal stadion!🤩

Lærdal – Vik 4–0
Vik kom til Lærdal som favoritt etter å ha teke 9 poeng på dei fire første kampane, men møtte nok hardare motstand enn dei hadde venta.
Allereie etter seks minutt var midtspissen vår, Malin, på rett plass og sette inn 1–0. Kort tid etter fyrte Agnethe av ein skikkeleg suser til 2–0 – eit mål som åleine var verdt turen til Lærdal stadion i solskin.
Andre omgang hadde knapt starta før Amalie, som kom inn i pausen, skåra etter berre 20 sekund på bana. Eit lite minutt seinare la Bertine på til 4–0, noko som og vart sluttresultatet.
I tillegg hadde me fleire store sjansar og eitt mål som vart annullert for offside.
Den siste treningsveka har me hatt fokus på avstand mellom lagdelane og kommunikasjon innad i laget. Det var tydeleg å sjå at jentene hadde teke dette til seg, og dei leverte ein svært solid kamp.
Me takkar Vik, den solide dommartrioen med Gaute Heggestad som hovuddommar og Ole Martin Uglum og Alexander Holen Vatsaas som assistentdommarar, for kampen.
Til slutt vil me takke alle som møtte opp og såg kampen. Me håpar de kosa dykk like mykje som oss! 😀⚽👏

28/05/2026

Redaksjonen er usikre på kor lenge, men det me er heilt sikre på, det er at det er mange år sidan det har blitt spelt seniorfotball for kvinner på Lærdal stadion. Imorgon fredag skjer det att, då samarbeidslaget vårt Lærdal/Åtil/Jotun damer tek imot Vik til dyst. Møt opp og hei damene fram mot det som vert ein tøff kamp mot serieleiaren! Kiosken er open, og dei som har kjøpt seg sesongkort kan nytte seg av dette i denne kampen også. Kampstart er 19:00. Vel møtt!

22/05/2026

Me tapar 8-2 borte mot Vik. Det er 2-0 allereie før fleire av tilskodarane hadde fått seg kaffe og andre forsyningar i kiosken. Etter sjokkstarten kjem me oss litt og kampen er faktisk jamn fram til pause med sjansar til begge lag. Det står likevel 2-0 når lagi går i garderoben.

Andreomgang startar me friskast; men Vik scorer likevel fyrst. Me får blant anna eit mål annulert for offside midtvegs i omgangen der, i ein periode me har ein form for momentum. I samme situasjon får me blått kort og 10min ut frå bana pga munnbruk. Me klarar likevel å halde eit viss trykk oppe, men til slutt fell me saman.

Måla renner inn feil veg, fleire av dei av den vakre sorten.

Me tapar fortjent, men det går vel an å sei at kampen var litt jamnare enn resultatet tilseier. Me har ein veg å gå spesielt kollektivt, og det einaste som gjeld no er at kvar einskild i og rundt laget brettar opp ermane for seg sjølv og lagkameratane. Neste helg er det Førde 3 heime, og me skal vere klare til dess!

Sindre Bjørkum og Espen Offerdal Vatlestad scora våre mål.

Me takkar Vikjene og dommar Jakob Sande Søgnen so mykje for kampen, og lykke til vidare i sesongen!

22/05/2026

Her er dei som startar kveldens tøffe bortekamp mot Vik. På benken har me med oss Magnus, Erlend, Jonas M, Vadym og Emil. Kampstart 18:30. Me oppdaterer so godt me kan undervegs her👇

20/05/2026

Etter nokre kampar med både dårlege resultat og svake prestasjonar er me klare for nok ein knalltøff kamp. Fredag reiser me nemleg til Vik for å møta klubben med dei stolte tradisjonane og sterke kulturen for idrett og fotball.
Det fine med fotball spesielt og idrett generelt er at det alltid kjem nye muligheiter, og me er klare for å ta den neste muligheiten med begge hender! I årets 5.divisjon, slik som alle dei foregåande sesongane, kan alle lag slå alle. Også Vik har opplevd dette i år og kjem saman med oss til denne kampen med varierande resultat. Me ser verkeleg fram til det som me veit vil bli eit flott arrangement, og sannsynligvis også ein bra fotballkamp! Gudane ville ha det til at me møter Vik på bortebane samstundes som det er både Gamalost-festival i bygdi og pinsehelg. Slik sett ser me for oss god kok rundt kunstgraset også. Dette vert kjekt!

13/05/2026

1-2 tap heime mot Årdal FK 2/ Jotun ikveld.
Me kom greit i gong og tok kommandoen fyrste kvarteret. Blant anna hadde me eit stolpeskot der returen trilla bortover streken bak bortelaget sin sisteskanse tidleg i kampen. Etterkvart fekk me belønning då Håvard stanga inn ein god corner frå Emil. Etter målet er det eitt eller anna som skjer med oss, og ikkje av det positive slaget. Årdølene tek over banespelet og skapar hovudbry for oss med mange lange og presise ballar mot sterke karar i fremste ledd. Stopparane vinn likevel bortimot alt av duellar, men resten av laget heng ikkje med og me tapar kvar bidige andreball. Utlikninga kjem ved at me møstar ballen rett utanfor eigen 16-meter, og med ein presis avslutning i bortre kryss var den vanskeleg å hindra for Tarjei.
1-2 og snuoperasjonen er gjort få minutt seinare. Det målet kjem på dødball etter mykje klabb og babb før ein Årdøl får pirka inn ballen.
Andreomgang er hakket betre og me kunne fort utlikna etter 56min då Sindre får drømmetreff, men diverre treff ballen tverrliggjaren som fortsatt dirrar på stadion. Kampen svingar fram og tilbake utan dei heilt store sjansane, men begge lag er frampå ved fleire høve. Blant anna kjem Jonas på eit godt løp i bakrom, men årdalskeeperen er med eit naudskrik fyrst på ballen og får klarert. Klareringa når Espen som ikkje får stokka føtene heilt og set ballen utanfor.

Alt i alt ein fortjent siger til bortelaget, der me presterer ganske mykje svakare enn vanleg på heimebane. Me tek me oss det positive, medan me ynskjer å lære av det som ikkje var like bra. Med eit ungt mannskap er det ei bratt kurve for mange for tida, so det er kjekt.

Håvard Bringe blei kåra til Lærdals beste spelar idag, god i duellspelet og scora målet. Solid. Han får med det ein valgfri pizza frå Laksen bakeri & kafé, gratulerer!
Me takkar Årdal FK 2 so mykje for kampen, det samme gjere me til dommartrioen Tommy Skjerven, Vegard Bondevik Lie og Theo Opem-Moen.

Me kjem sterkare tilbake håpar me!

📷Beate Gjerde Stølen

13/05/2026

Her er gjengen som startar kveldens kamp mot Årdal fk 2/ Jotun. På benken har me Tinius, Maksym, Jonas Maristuen, Martin og Simen.
Kampstart er 19:30. Me prøver å oppdatere undervegs i kommentarfeltet her for dei som ikkje har muligheit til å sjå kampen på stadion👇

11/05/2026

Me spelar ikkje akkurat ute i Europa, men kampane kjem tett som hagl i desse dagar likevel. Allereie onsdag er det ny kamp då Årdal fk 2 kjem på besøk.
Sesongstarten har for vår del vore varierande i både prestasjon og resultat. Dette gjeld både frå kamp til kamp og innad i kvar kamp, eigentleg. Det var me også forberedt på då me møsta mykje kvalitet og erfaring frå fjoråret som i år er erstatta med ungdommeleg mot. Begge heimekampane til no i år har endt med siger, det samme håpar me skjer onsdag! Møt opp, kampstart 19:30🤩
For dei ekstra interesserte kan me anbefale å ta heile ettermiddagen og kvelden på stadion, for før vår kamp spelar nemleg g12-laget vårt også! Mykje godt fotball å sjå på stadion denne kvelden med andre ord⚽️

Me ynskjer våre motstandarar i Årdal FK 2 hjarteleg velkomne til Lærdal stadion, det samma gjere me til dommartrioen Tommy Skjerven, Vegard Bondevik Lie og Theo Opem-Moen. Det er ingen tvil om at det vert myndig leiing i denna kampen i alle fall!

09/05/2026

4-2 tap borte mot Bremanger. Ein vanskeleg kamp under vanskelege speleforhold, der både den sterke vinden og den ujamne grasbana gjorde det til ein kamp med lite finspel, ei heller særleg muligheiter for å prøva å spela kreativ og bra fotball.
Fyrsteomgangen har me vinden i ryggen og me har masse gode tendensar, men me får ikkje heilt sluttprodukt eller er presise nok i siste tredjedel. Me skapar fleire angrep som ender med cornerar, men me får lite utbytte av desse forutan ein der Jon Martin er millimeterar frå å stange oss i leiinga. Trass at me styrer mykje av spelet får heimelaget også nokre store sjansar i starten, blant anna eit skot i tverrliggjaren og ned på strek før returen blir satt over. Me går opp i ei fortjent 1-0 leiing med eit kontant skot i hjørna av Sindre Fossen Bjørkum.
Ikkje lenge etter utliknar Bremanger til 1-1 ved eit sjølvmål frå oss, før dei scorar 2-1 på ei kontring og dribleraid av den eine spissen deira. Dette blir også pauseresultatet.

Andreomgang startar som fyrste der me tek kommandoen trass sterk motvind. Espen utliknar til 2-2 ved eit gjennomspel der forsvaret og keeperen til heimelaget mistolkar ballbana i vinden og plutseleg er Espen open på blankt mål og set den sikkert.
Nok ei gong svarar heimelaget og går opp i 3-2 leiing ved eit høgt innlegg som vinden tek tak i. Vanskeleg ball å handtere for alle, men spissen til Bremanger klarar det best og set ballen i nettaket på volley. Dette målet kom i det som eigentleg var ein god periode av oss der me skapar ein del gode situasjonar høgt oppe i bana som me diverre ikkje klarar å omsetta i teljande resultat.
Me prøver å krige oss inn att i kampen, men so ofte før skjer det då at laget som leiar kontrar inn eit nytt mål. 4-2 og kampen punktert.
Me takkar heimelaget og dommar Jeiki so mykje for kampen og ynskjer dei alle lykke til vidare i sesongen. Hyggjelege folk som spanderte på sveler etter kampslutt, dei var kjærkomne før ei lang og bitter heimreise etter eit surt tap!

09/05/2026

Edvard er både overraska og imponert over kor langt det går an å køyre i eige fylke for å komma seg til kamp, men no er me i alle fall framme i Bremanger og klare for ein tøff bortekamp! Roald Flodsand har transportert oss på ypperleg vis oppover fjordane. På bilete ser dykk dagens ellever, og på benken har me Emil, Jonas og Erlend. Kampstart 15:00, og me prøver å oppdatere so godt me kan undervegs i kommentarfeltet her👇