Fiskebustøylen

17/08/2026

Kva kan vel vera meire gjevande for oss på Fiskebustøylen enn å kunne samla klassevener frå Gimle skule. Alle desse gjekk i same klasse, og alle feirar 80 år i løpet av dette året. Fleire hadde ikkje sett kvarandre sidan skuledagane, så det vanka rikleg med gode varme klemmar og også nokre tårer i augekroken var å sjå. Mange i klassa har falle frå, og desse 9 reiste seg under middagen og tok 1 minutt stille til minne om dei gode klassevenene som er avlidne. Ein fin kveld vart det, med god mat og mange var dei gode minna som kom fram gjennom ein lang kveld. Velkomne attende til Fiskebustøylen skal de vera, når 90-års feiringa skal haldast 🙂

08/07/2026

Nå er det gode fiske i gang for alvor på Valebjørgheia. Starten på fiskesesongen var heller vanskeleg, med mykje nordavind og lite insekter. Men dei siste vekene har det snudd. Mykje insekt på vassflata og så har klekkinga av den blå augestikkaren kome igang for fullt. Fiskerane gjev tilbakemelding på gode fangstar i heile utmarkslagets område. Kanskje er det din tur til å slå årets rekord på 1550 og såleis få gratishelg på Olavsbu i 2027. Velkomen skal du vera til Fiskebustøylen og Valebjørgheia!

11/08/2025

Så var storfisken på godlag att. Den fekk god forsyning med regn, og godt med vind. Det gjorde fleire fiskarar smørblide. Eit av fiskelaga hadde verkeleg lukka med seg. 11 fine fjellaurar med gjennomsnitt på 822 g. Største fisken var på 1290g, så denne fiskaren ligg godt ann til gratishelg på Olavsbu. Ein rogalandsfiskar var ikkje så fornøgd. Storfisken var nesten sikra, då den takka sluken for fylgje og symde ut att til sin vante plass ved storsteinen i dette vatnet. Mellom 2-3 kg var anslaget på denne fisken. Ein annan fiskar var på dagstur i øvre del av vassdraget og fekk 7 fine fjellaurar. Så med lågare nattetemperaturar bør det bli godt fiske framover, nå når fisken er på det finaste. Alt tyder nå på at vi får det beste orrfuglåret på lenge. Alle rapporterar melder om mange og fine kull, med frå 5 -7 små i orrfuglkulla. Ein stor reinsdyrbukk, med godt over 20 spir, har visst teke på seg oppsynet på heivegen til Fiskebustøylen. Mange nyt synet av dette flotte dyret. Så godtfolk, kom dykk til fjells og opplev desse flotte haustdagane framover med godt fiske og rikt dyreliv. 👍🙂

20/06/2025

Ja, så var den igang, klekkinga av den blå augestikkaren. Eit eventyr å sjå fisken under vaking i dette fine fjellvatnet. Er du der dei rette dagane kan du høyre plaska i vatnet når fisken treff vassflata etter vaket. Har sjølv sett det saman med Per Tørmoen i dette fjellvatnet. Ei stor oppleving. Les boka "Fri kar". Fiskarane melder om gode fangstar. Ein kameratgjeng på 5 fekk 90 fisk på 3 dagar med stongfiske. 27 av dei var over halvkiloen. Nydeleg i heia om dagane, med ein fin vind som gjer at du kan nyta godværet utan å bli plaga av insekt. Har du lyst til og oppleva Valebjørg heia, så ta kontakt. Vil du overnatte er Fiskebustøylen staden. Vi har små og store hytter. Velkomen på heitur!!

15/06/2025

12/06/2025

Ynskjer du gratis helgopphald i Olavsbu på Fiskebustøylen?? Opphaldet kan bli ditt om du tek største fisken på Valebjørgheia i tida 20 mai til 1 oktober. Så enkelt, ikkje sant. 😉 Nå om dagane er det utruleg godt fiske. Fint og varmt vær gjev stor insektsklekking. Fiskane meskar seg med dei beste delikatessene som ligg på vassflatene. Snart klekker den blå augestikkaren, og då er tida for å ta storauren. BLIR DET DU? Du kan lese om dette eventyret i boka Fri kar av Per Tørmoen. Største fisk til nå er på 1,1 kg, og mykje fisk mellom 0,5 og 1 kg er teken dei siste dagene. Velkomen skal du vera til å sikre deg gratis helg på Olavsbu og fagre Valebjørgheia.

12/05/2025

Ja visst er det vår på Valebjørgheia. Dei kjente vårteikna er på plass. Fyrst kom villreinen innom Fiskebustøylen på veg sørover. Så høyrde vi dei kjente skrika i Holmevatn, der lomeparet sa klart ifrå at også i år ville det bli auke i lomfamilien på Langeøy. Så kom medhjelperane på fiskeforvaltninga varslande med kjente skrik at dei også i år hadde innteke fiskeørnreiret i Midtvatn. Alt er liksom med det vante, med unnateke ein altfor tidleg vår. Når bjørkelauvet lyser grønt på Maurdalsrista 10. mai, er det noko riv ruskande gale. Men for våre kjære sportsfiskarar kan dei nå få vinterdepresjonen ut av kroppen. Fisken syner livlege sprell der den hoppar etter dei fyrste ertande flugene rett over vassflata. Så no er tida for dei vidunderlege naturopplevingane på Valebjørgheia denne våren. Velkomne skal de vera til eit heiområde med ro og stille.🙂
– Jørund