14/11/2025
Plutseleg var det over. Mobilen er heilt stille – det tikker verken inn billettbestillingar på SMS eller Messenger. Kva fyller ein tida med når ein ikkje driv med revy? Det er litt rart å plutseleg ha tid til å vere heime, slappe av og drive dank 😉
Tenk å vere så heldig at ein får vere saman med så fine, flinke, gøyale, kreative folk og lage revy! På våren dukkar det plutseleg opp ein tekst nå og ein då, ettersom forfattarane får inspirasjon. I august begynner dei å øve, nå skjer det ein del moro på scenen, bortsett frå oppvarminga, oppvarming er aldri gøy 😉 Etter endelaust med terping, der vi alle lærar tekstane om vi vil eller ikkje, så fell ting på plass og vi ser samanhengen som Olav har prøvd å få fram heile hausten. I år var det siste laurdagen før premieren.
På sundag kom Kjetil for å rigga opp lyd. Klokka 11.00 var alt kopla opp og fullt band var på plass. Me er utruleg heldige som har så flinke musikarar lokalt. Tolmodige er dei og 😉
Å WOW – for eit sverd! Kommunen kan sikkert kontakte Eivind Dalseg for å avtale snarleg overtaking 😁
I tillegg til desse så har vi eit makelaust "crew" på kjøkkenet, dei kokar kaffi, danderer kaker, steike vaflar, heng opp lys og hjelper med å rulle ut løparen til publikum kjem, i tillegg så sel dei kake og kaffi for mange tusen kroner!
Det er mykje som må ordnast i dagane før premiera, rekvisittar må vere på plass, mat bestillast og hentast, kaker bakast, bestille brus og kaffi, skilting av revyområdet (takk til Nomeland Maskin for hjelpa) og ikkje minst dei siste billettane må seljast – totalt blei det seld 603!!! billettar til desse 3 førestillingane. Folk kom i frå Åseral, Hovden, Søgne, Vegusdal, Rysstad, Kristiansand – ja frå heile Agder, kanskje vidare og? Seier det kvart år – men eg meiner at publikummet som kjem til Bygland kulturscene desse 3 mørke novemberkveldane er det aller, aller beste!
