25/05/2026
Minneord Olav Olai Holsæter
Ei eldsjel, ein heidersmann og ein bauta i Jotuns skihistorie har gått vekk!
Det var med stor sorg Skigruppa mottok meldinga om at Olav Olai Holsæter hadde sovna inn etter kort tids sjukdom 14. mai. Olav levde eit langt liv og 23. februar 2026 fylte han 99 år.
Olav var ei viktig drivkraft i anleggsarbeidet på 70-talet både med å få på plass lysløypa, men og Skihytta i Fardalen.
Ilag med Ingrid hadde Olav hovudansvaret for drifta av Skisenteret i mange tiår. Olav kjøpte til og med inn snøskuter for eiga rekning og køyrte opp skispor medan Ingrid steikte pannekaker, fyrst i ei brakke nede på parkeringsplassen, seinare i Skihytta. Dette gjorde dei ikkje for eiga vinning, men for å glede andre.
Olav og Ingrid hadde ikkje born sjølve, men alle besøkande i skianlegget vart mottekne som om dei var deira eigne og alle, store og små, vart høgt verdsette.
Olav var skitrenar på lokalt nivå i ei årrekke både for skiskulen og aktive løparar, men han hadde og verv som krinstrenar for skiaktivitetar.
Sjølv om Olav etter kvart let andre overta driftsansvaret for Skisenteret var han ikkje framand for å ta i eit tak når det var trong for det. Trenar, tidtakar på renn, kvisting/merking av turløypa, snømåking og utallege timar vinterstid oppi Åsetelva anten med ishakking eller tining av vassrøyr for å nemne noko.
Olav var ei ekte eldsjel!
Olav var vel det me må kunne kalle ein Fardalspatriot. Han hadde budd heile livet på Vigarsletti i Fardalen til han hausten i 2023 flytta ned på Neset, og etter kvart inn i ein eldrebustad i Øvstetunshagen.
Tida som aktiv utøvar er dårleg dokumentert og Olav sjølv snakka lite om den, men me veit han var aktiv både innan ski og maratonløp i sine yngre dagar.
I 1951 vann Olav ilag med Per B. Gjerde og Lars Heggheim vandrepokalen i Årdalsrennet til odel og eige.
I 1993 vart Olav utnemnd til æresmedlem i Jotun for sin lange innsats for langrennsmiljøet.
Olav var ein mann av Jotun og siste arrangementet han deltok på var 100-årsjubileet til Jotun i 2023. Trass i at han var den med høgst alder var det mange langt yngre som avslutta feiringa den kvelden før han.
Dei siste vekene budde han på ÅBO. Ikkje av helseårsaker, men fordi han ynskte å treffe meir folk enn han gjorde i Øvstetunshagen.
Tusen takk Olav, for den du var for Skigruppa og Skisenteret, men og som person.
Og tusen takk for minnegåva til Skisenteret i høve bortgangen din.
Skigruppa lyser fred over Olavs minne.
Kvil i fred, og takk for lang og trufast teneste.
Skigruppa, IL Jotun
