29/11/2025
Me er utruleg krye over at vår eigen Lene Lægreid vart tildelt Blå Diplom av Sogn og Fjordane Fotballkrets på kretstinget no i kveld. Blå Diplom er ei høgthengande utmerking som vert tildelt personar som har lagt ned ein særskild innsats for klubben og kretsen over lang tid. 🥳❤️
I juryen si grunngjeving heiter det mellom anna::
Lene vil meir!
Lene Lægreid (37) har vore ei travel og engasjert fotballmamma i mange år.
Ho har følgt opp begge sønene sine, Kevin (ÅTIL/Jotun/Årdal FK/Fjøra) og Julian (ÅTIL/Jotun/ÅrdalFK/Brann/Norge U20) som lagleiar for laga dei har spelt på heilt sidan dei var små.
Då yngstejenta Kaja byrja med fotball for åtte år sidan, vart Lene trenar for ÅTIL sitt jentelag (fødd 2012 og 2013) - og har vore det heilt sidan.
Lene har såleis lang fartstid i barne- og undomsfotballen, og har etter kvart også opparbeidd seg brei erfaring som trenar.
Det som først og fremst kjenneteiknar Lene, er at ho er ein tydeleg og trygg vaksen som nyter stor respekt blant både spelarar og foreldre.
Lene ser kvar einskild spelar, ho kjenner jentene svært godt og har eit naturleg og godt tillitsforhold til kvar einskild.
Difor evnar ho også å gje dei solid oppfølging med tanke på personleg utvikling.
Samstundes er ho oppteken av at dei skal fungera godt saman som lag og er tydeleg på kva ho forventar av dei, spesielt med tanke på å støtta og motivera kvarandre.
Lene gjev ingen negative tilbakemeldingar og ho tillet heller ikkje at nokon andre gjer det.
Ho legg vekt på å vera positiv og konstruktiv i dialogen med spelarane og laget.
Ho forfektar Fair Play i alt ho gjer - og stiller krav til dei ho har rundt seg om å gjera det same.
Lene har eit roleg og lågmælt vesen og lun sans for humor.
Ho har alltid ein fin og varm dialog med motstandarane våre og er respektert av trenarar og leiarar i heile kretsen for dette -i klubben er me stolte over at me har ein slik representant i fotbalfamilien i Sogn og Fjordane.
Det er ikkje utan grunn at fråfallet på dette laget, som no er ÅTIL J13 gjennom alle desse åra har vore minimalt.
Fleire av spelarane har delteke på sone- og kretssamlingar, og jentene tok seg til bronsefinale i KM i futsal på Sandane sist vinter.
Dei tok seg også til åttandedelsfinale i A- sluttspelet i Norway Cup, ingen av delane er kvardagskost for jentelag i denne årsklassen i Årdalstangen idrettslag.
Kretsen peikar også på Lene sine gode evner til samarbeid med naboklubbame Lærdal og Jotun og trekk fram hennar årelange innsats og framtidsretta tankar om å gje eit god tilbod til fotballjentene våre på lenger sikt.
Me gratulerer Lene så masse med vel fortjent heider!! 💪🏻⚽️❤️ NFF Sogn og Fjordane
