06/06/2025
35e Klassieker rit Enter
EMC op zundag 27 april bie kluphoes Krompatte 4, 100 km.
Smaans alene hen e-reejen. Goed wear. Eers nog un bitjen fris moar ut wet zunnig. Um kwat oaver negun was ik d’r. Ze waren de boel net an ut kloar zet’n en ik konne gelieke inschriev’n. Muntje veur de koffie en un bonnetje veur un breudjen bal. Dat begint al good, dach ik. Gezellige luu doar in Enter! D’r kwam steeds mear volk biej, ok vrouwluu.
Af en toe kwam d’r wat heavug an knap’n en knal’n; dat trekt wel kiekers! Van de Klassieker waren wiej met vier man. Woar blif de rest? dach ik. Met dat mooije wear. D’r was un rit veur klassiekers, brommers en de snelle motoor’n. Wiej gingen riejen met zo’n viefentwintug motoor’n; un mooijen rieje.
Eers op Wiene an. Ut was vrie rustig op de weag’n. Hengevelde; wildeganzen, koeien, peerde, schoap’n en ooijevaars en ander geveugelte. Ik vinne dat pragtug. Hoe dat allemoal zien gang geet. Ut F.C. Twentekanaal, dat kuj neet missen! Gelselaar; de boer’n waren alwear an ut inkuulen! Mooi vrog. Diepenheim veurbiej en joa heur, doar zie ie den T.V. toor’n alwear van Markelo; kan neet missen! Wiej slakkert alle kant’n op tot dat wiej wear biej ut kluphoes an de Krompatte ankomp veur de pauze.
Breudjen bal en pauze. Ut was gezellug doar met zien allen. Iedereene hef wel wat moois te vertel’n! Toen wear riejen veur de tweede helfte. Ut ging de andere kante uut, langes mooijen boerderiejen, landweag’n, eijen, kanaal’n en landhuuzen. Alle plaatsnamen wed ik neet mear. De leaftied denk ik.
Moar wie dat graag wol weet’n had zelluf ok mét kunnen riejen. Of neet than!
Ik wolle den EMC Enter nog bedank’n veur dissen pragttegen rit en goeijen ontvangst!
Tunnus Gierpet den Lullebreur uut Lier’n!
