01/06/2026
Ta Rayu Kamar Zakanya, Amma Yanzu Tana Bayan Ƙasa!
Ina cikin gudanar da aikin dare (night duty) a asibiti, kimanin ƙarfe goma na dare, shiru ya ratsa ko'ina sai sautin nishi da takun ƙafafun marasa lafiya jefi-jefi.
Kwatsam, sai ga wata baiwar Allah ta shigo cikin asibiti, damuwa fal a fuskarta, hannunta guda dafe da cikinta yayin da take tare da wani ƙaramin yaro. Daga yanayin yadda take nishi da murƙususu, da inda take dafewa alamomi s**a dan nuna min kamar appendicitis ke damunta, sai dai a matsayina na ma'aikaciyar lafiya, ban hanzarta yanke hukunci ba har sai likita ya duba ta. Cikin tausayawa, na tallafa mata da taimakon gaggawa don rage mata radadin zafin kafin gari ya waye.
Washegari da safe, cikin ikon Allah sai ga likitan ya shigo. Bayan dogon bincike da gwaje-gwaje na kimiyya, sakamako ya tabbatar da abin da nake zargi wato Appendicitis ne! Aka nemi likitan fida (surgeon) kuma aka tsara dukkan abubuwan da s**a dace don yin aikin a safiyar gobe da yardar Allah.
A take muka sanya ta a tsarin Nil Per Oral (NPO) wato azumin jiran aiki, inda aka hana ta cin komai ko shan ruwa, duk da tsananin buƙatar da take da ita a lokacin.
Wayewar gari da ƙarfe takwas na safe, likita ya iso. Abin mamaki, ita da kanta ta mike da ƙafafunta ta shiga dakin tiyata (theatre) ba tare da fargaba ba. Aikin bai zo da sauƙi ba, domin likitan ya sha wahala kwarai saboda tsananin ƙiba da tarin kitse na jikinta, amma cikin ikon Allah, aka kammala aikin cikin nasara mai ban mamaki. Tana farkawa daga maganin barci, harshenta bai gaza ba, kalmar Shahada da kiran sallah ne s**a riƙa fita daga bakinta.
Kamar tatsuniya, ita da kanta ta tashi daga gadon fida, ta taka da ƙafafunta har zuwa dakin da aka tanadar mata don hutawa! Kowa ya cika da mamaki hakan.
Bayan sa'o'i ashirin da hudu (24 hours after surgery), ƙishirwa ta addabi ta. Haka take jin sa'o'in nan kamar shekara guda saboda tsananin son ruwa, ta shiga hargowa da bala'i da mutane saboda an hana ta sha.
Ganin halin da ake ciki, likita ya bayar da ikon a ba ta ruwan Lipton cokali ko ludayi biyu kacal don ta jika makogwaronta. Haka aka yi kuwa, daga nan ne fa asibitin ta dan lafa daga hayaniyarta, inda ta koma tamkar 'yar wasan kwaikwayo (comedy) saboda hira da barkwancinta, duk da cewa a tarihinta na baya an bayyana cewa tana fama da matsalar miyagun aljannu masu haɗari.
Jiya da yamma lokacin sallar magriba, na ce bari na leƙa asibitin domin na sanya wayata a caji. Ina shiga na tarar da ita rai a ɓace, tana ta masifa da mahaifiyarta akan an hana ta shan ruwan gora (Mr. V) guda huɗu da aka siyo mata, har ma wai an yi sadaka da su. Tana ta rantse-rantse sai an dawo mata da ruwanta.
Haka, ta ɗauki waya ta kira kira likitan da kanta tana kai ƙarar cewa an hana ta ruwa. Likitan cikin raha ya rarrashi zuciyarta, yace mata Ki yi haƙuri, ina idar da sallar isha'i zan zo, har tuwo ma zan ba ki ci. Wannan magana ta kwantar mata da hankali, tana jiran isowarsa.
Jim kaɗan bayan wannan takaddama, ina zaune a cikin pharmacy, sai ga mahaifiyar ta, ta rugo da gudu cikin firgici tana kiran ɗauki “A zo a gani, kumfa ne ke fitowa ta hancinta!"
Gabanmu ya fadi! Muka garzaya da gudu zuwa dakinta, amma tuni ta fara nisanta da mu. Mun yi dukkan dabarun neman taimakon gaggawa na lafiya (resuscitation) da za mu iya, amma ina! Lamarin ya ki sauyawa.
A daidai lokacin ne likitan ya ƙaraso cikin dakin, sai dai kash, kamar dama zuwansa take jira, a take dukkan alamun rayuwarta (vital signs) s**a ci gaba da faduwa kasa, har komai ya koma zero!
Ta cika! Ta riga mu gidan gaskiya.
Wannan mutuwa ta girgiza dukkan ma'aikata da marasa lafiya a asibitin. Abin da ya fi ban tausayi shi ne mahaifiyarta, wadda suke zaune suna hira da ita mintuna kalilan da s**a gabata, tana jiran zuwan likitan don a ba diyarta ruwa da tuwo, ashe kwananta ya ƙare.
Ya Salam! ta rayu kamar zakanya, mai juriya da jaruntaka, amma a yau gashi an rufe ta a cikin duhun ƙasa. Ubangiji Allah ya jifanci kurenki, ya yafe miki kurakuranki, ya ba mahaifiyarki da sauran iyali juriya da juriya kan wannan rashi.
Amin.
Nurse zainab Bashir
(Ummu Ammara)
