20/09/2022
ကြွက်သားကြီးချင်တယ်၊ Abs ပေါ်ချင်တယ်၊ အဆီမရှိတဲ့ Body လိုချင်တယ်၊..... GYM လာတဲ့လူတိုင်း အဲဒီလို ပြောကြတယ်။ သို့သော် ၁လ..၂လ လောက်နေရင် လစ်သွားကြရော။ ဘာကြောင့်လဲလို့ မေးလိုက်ရင် အများစုက
၁။ ပစ္စည်းမစုံလို့
၂။ နည်းပြမကောင်းလို့
၃။ ဆော့လည်း တက်လာတဲ့အရိပ်အယောင် မတွေ့လို့
၄။ ပင်ပန်းလို့
ဆိုပြီး ဆင်ခြေပေးတတ်ကြတယ်။ ဟုတ်ပြီ။ Body Building & Fitness လောကမှာ Level လေးဆင့်ရှိတယ်။
၁။ Beginner Level
၂။ Pre-intermediate Level
၃။ Intermediate Level
၄။ Professional Level
ကိုယ်က ဘယ် Level ကလဲဆိုတာ အရင်ဆုံးသုံးသပ်သင့်တယ်။
ပစ္စည်းမစုံလို့
==========
" Beginner သမားတွေက P-I Level တန်း Workouts တွေကို ဆော့လို့မရဘူး၊ ထို့အတူ P-I Level ကလည်း I Level Workouts တွေကို ဆော့လို့မရပါ။ "
အထက်ပါသဘောတရားကို သိထားသင့်တယ်။ ကပ်သီးကပ်ဖဲ့သမားတွေက မေးလိမ့်မယ်၊ ဘာလို့ ဆော့လို့မရတာလဲ။ မယုံရင် ဆော့ကြည့်လိုက်ပါ။ Post Injuries နဲ့ညားလိမ့်မယ်၊ အခန့်မသင့်ရင် တသက်လုံး ဒုက္ခိတဘဝ ရောက်သွားလိမ့်မယ်။
သို့သော် Pro သမားတွေဆော့တဲ့ Workouts Video တွေကြည့်၊ Motivation Video တွေကြည့်ပြီး GYM ကိုရောက်လာ၊ ရောက်လာတော့ " ဟင်! ဟို Video ထဲကလို စက်ပစ္စည်းတွေလဲ မရှိပါလား၊ ဘာလားပဲ။ " ဆိုပြီး စိတ်ထဲကွက်ခနဲ ဖြစ်သွားကြတယ်။
Training လုပ်ဖို့ရောက်လာတာလား၊ စက်ကြည့်ဖို့ ရောက်လာတာလား။
နည်းပြမကောင်းလို့
==============
နည်းပြမကောင်းတာလား၊ ကိုယ်က lacking ဖြစ်နေတာလား။
နည်းပြ နဲ့ လေ့ကျင့်သူအကြား Communication နဲ့ နားလည်မှု ရှိဖို့ လိုအပ်တယ်ဆိုတာ အရင်သိထားရမယ်။
GYM လာရင် ဘယ်သူမှ ငါ့လောက်မတော်ဘူးဆိုသည့် ပုံစံမျိုးနဲ့လာ၊ နည်းပြက သေချာလမ်းညွှန်ပြတုန်း သေချာမကြည့်၊ ပြီးမှ သောက်တလွဲလုပ်၊ နည်းမကျတော့ ဘာဖြစ်သလဲ၊
- ကိုယ်ပဲ ပင်ပန်းတယ်၊
- ဥပမာ ကိုယ်က Biceps Workouts ဆော့သော်လည်း နည်းမကျတော့ Biceps အစား Forearms မှာပဲ သွားထိတယ်၊
- ကြာတော့ Injuries တွေဖြစ်လာမယ်၊
1. နှုတ်ဆက်ပါ။
နှုတ်ဆက်ဖို့ မပျင်းပါနဲ့၊ မရှက်ပါနဲ့၊ အပိုအလုပ်လို့မထင်ပါနဲ့။
- ကျောင်းမှာ စာသင်ခန်းထဲ ဆရာဝင်ရင် ဆရာ့ကို နှုတ်ဆက်ရမယ်၊ မဟုတ်လား။ အဲဒီလိုပဲ GYM မှာလည်း စိတ်ပါသည်ဖြစ်စေ၊ မပါသည်ဖြစ်စေ၊ ဆရာရေ...ကျနော်တို့ရောက်ပြီ၊ ဆရာရေ....ကျနော်တို့ပြန်ပြီ ဆိုပြီး အသိပေးရတယ်။ သူငယ်ချင်းလာလည်ရင်တောင်မှ " ငိုးမ၊ ဒေါင်းစား၊ အေရိုး.... ဖအေကြွပြီ " ဆိုပြီး အပြန်နှုတ်ဆက်ကြတယ်လေ။
2. လေးစားမှုထားပါ
- နည်းပြက နည်းလမ်းပြသနေပြီဆိုရင် စိတ်ဝင်တစားနဲ့ Respect ထားပြီး သေချာကြည့်၊ နားမလည်ရင် ဆရာ ဒီဟာက ဘယ်လိုလုပ်ရသလဲ၊ Respect ထားပြီးမေးရမယ်။ သို့သော် ကိုယ်က သူပြနေတုန်း သေချာမကြည့်၊ စကားပြောရင်လည်း Respect မထားတော့ ဘယ်နည်းပြမှ ကိုယ့်ကို ကောင်းကောင်းဂရုစိုက်မှာ မဟုတ်ဘူး။ ဘာ့ကြောင့်လဲ .... ဥပမာ ခင်ဗျားတို့ ၁၃နှစ်အရွယ် ကလေးတစ်ယောက်ကို စာမေးကြည့်၊ ကိုယ်ကသေချာမေးသော်လည်း သူက ဖြေချင်သလို၊ မဖြေချင်သလို၊ သူ့အကြည့်မှာလည်း ကိုယ့်အပေါ်လေးစားမှုရှိတဲ့ အရိပ်အယောင်မတွေ့ဘူးဆိုရင် ခင်ဗျားတို့စိတ်ထဲ ဘယ်လိုဖြစ်မလဲ။ သောက်ခွက်ကြီးပဲ ဖြတ်ရိုက်ပစ်ချင်စိတ်ပေါ်တယ်မလား။ အဲဒီလိုပဲ....
နေရာတကာမှာ Respect ထားတတ်တဲ့စိတ်ရှိရင် လူတိုင်းက သင့်ကို Respect ပြန်ထားမှာပဲ။
3. Communication တည်ဆောက်ပါ
- နည်းပြနဲ့ စကားပြောဆိုပေးရမယ်။ ပြောတဲ့အခါကျရင် #ကိုယ်သာသိ၊ #ကိုယ်သာတတ် ဆိုတဲ့ ပုံစံမျိုးမပြောရဘူး။ ဆရာ နှင့် တပည့်၊ အစ်ကို နှင့် ညီ တစ်ယောက်လို Conversation တည်ဆောက်ရမယ်။ ပြောတဲ့အခါကျရင် ဆရာပြောတဲ့စကားပြီးမှ ကိုယ်ကပြောရမယ်၊ ငါ့စကားနွားရ ဆိုပြီး ရေတံခွန်က ရေဒလဟောကျသလို မပြောရဘူး၊ ကြားဖြတ်မပြောရဘူး။
4. နားလည်မှုရှိပါ။
- GYM က နည်းပြတွေဟာ မနက်စောစော ကနေ ညမိုးချုပ်သည်အထိ လာသမျှ လူပေါင်းစုံ၊ အကျင့်စရိုက်ပေါင်းစုံကို Train ပေးရတယ်။ အဲဒီအတွက် တခါတလေကျရင် သူတို့ပင်ပန်းနေတတ်တယ်၊ အဲဒီအခါမှာ ကိုယ့်ဘာသာကိုယ် လေ့ကျင့်ရတော့မယ်။ ရှင်းရှင်းပြောရရင် နည်းပြလည်း လူပဲ။ လူတစ်ယောက်ချင်းစီကို ဘေးနားက ထိုင်ပြီး သေချာလိုက်ပြပေးဖို့မဖြစ်နိုင်ဘူး၊ ခင်ဗျားတို့၊ ကျနော်တို့တောင် အမေက ဟိုခိုင်း၊ ဒီခိုင်း လုပ်ရင် သောက်ပျင်းတောင်ကြီးသေးတာ မဟုတ်လား။ သို့သော် တချို့တွေကျတော့ ပြောသေးတယ်၊ " ငါတို့က အလကားလာလုပ်တာ မဟုတ်ဘူး၊ ပိုက်ဆံပေးပြီး လာလုပ်တာ " .... မှန်တယ်၊...ပိုက်ဆံပေးပြီး လာကျင့်တယ်ဆိုတာ သူတို့ တစ်ယောက်တည်းမှ မဟုတ်ဘူး၊ လူပေါင်းမြောက်များစွာ လာနေကြတာ။ တစ်ယောက်တည်း သီးသန့်ကျင့်ချင်ရင် Personal Trainer ဌားလိုက်လို့ပဲ ပြောချင်တယ်။
{ ဒီနေရာမှာ ဒီအတိုင်း တခြားသူတွေနဲ့ ကျင့်တာ နှင့် တစ်ယောက်တည်း သီးသန့်ကျင့်တာ ဘယ်ဟာ ပိုကောင်းသလဲလို့ မေးလာရင် အခြားသူတွေနဲ့အတူ ကျင့်တာ အကောင်းဆုံးပဲလို့ပြောချင်ပါတယ်။
4X Mr. Olympia Jay Cutler ရဲ့ 10 Rules Of Never End Growing မွာ
" ကျနော် GYM မှာ သွားကျင့်ပြီဆိုရင် လူတချို့က တစ်ယောက်တည်းပဲ လာတယ်၊ ကျင့်တယ်၊ ပြန်တယ်။ ထို့အပြင် သူတို့ကို စကားသွားပြောရင်လည်း မကြိုက်ကြဘူးဗျ။ အာရုံစူးစိုက်မှု ပျက်တယ်ဆိုတဲ့ ပုံစံမျိုးနဲ့ပဲ ပြောလွှတ်ကြတယ်။ သို့သော် ကျနော်ကတော့ GYM ရောက်ရင် ကျနော့် playmate တွေနဲ့အတူကျင့်တယ်၊ နားတုန်းမှာ ဟာသတွေပြောတယ်၊ မိန်းကလေးအကြောင်းတွေပြောတယ်ပေါ့ဗျာ။ ထို့အပြင် ဘယ်သူက ဘယ်လောက်ကြီးတယ် ဆိုပြီး အပြိုင်အဆိုင်လေးလည်းရှိတော့ GYM လာဆော့ရမှာ မပျင်းတော့ဘူးဗျ။ တဖြည်းဖြည်း ပျော်လာတယ်ပေါ့ဗျာ။ " }
5. အသိတရားရှိပါ။
တချို့တွေက နိုင်ငံခြားက Workouts Video တွေကိုကြည့်၊ ပြီးရင် သူတို့လုပ်သည့်အတိုင်း အလေးတွေကိုပစ်ချတယ်။ ဟိုက အလေးပစ်ချတယ်ဆိုတာ..... Weighs ပေါင်းများစွာထည့်ထားလို့ သေချာပြန်ချသည့်အခါ Injuries ဖြစ်မှာစိုးသည့်အတွက် ပစ်ချတာပဲဖြစ်ပါတယ်။ သို့သော် ဒီကဟာတွေက ၂၀-၃၀ လောက်နဲ့ ပစ်ချနေကြတယ်။ အလေး ပစ်ချချင်ရင် အိမ်မှာပဲ ဆော့ပါ။ လူအများဆော့တဲ့ GYM လာမဆော့ပါနဲ့။ ရှင်းရှင်းပြောရင် ကျနော်ဟာ ဘယ်သောအခါမှ အလေးတုံးတွေကို မပစ်ချဘူး၊ ပစ်ချတာလည်း လုံးဝမကြိုက်ဘူး၊ အလေးတပ်ဆင်ရင်တောင်မှ အလေးပြားက ချွင်၊ ချွမ်ဆိုတဲ့အသံထွက်တာ လုံးဝမကြိုက်ပါဘူး။ အလေးပြားတွေကို ပစ်စလခတ်ထားတာတွေ၊ ကိုယ်ဆော့ပြီးရင် ပြန်မထားတာတွေ .... ငါ့ပစ္စည်းမှ မဟုတ်တာ၊ လုပ်ချင်ရာ လုပ်မယ်၊ ဘာဖြစ်လဲဆိုတဲ့စိတ်ဓာတ်မျိုးတွေ၊
အဲဒီလိုအပြုအမူမျိုးတွေက ရှင်းရှင်းပြောရင် ရိုင်းတယ်၊ စည်းကမ်းမဲ့ တစ်ကိုယ်ကောင်းဆန်တယ် လို့ပဲ သတ်မှတ်ရလိမ့်မယ်။
လူမှန်ရင် စည်းကမ်းရှိရမယ်၊ လေးစားရမယ်၊ အသိတရားရှိရမယ်။
ကိုယ်ကိုယ်တိုင်က စည်းမရှိ၊ ကမ်းမရှိ ဖြစ်ရင် ဘယ်သူမှ ကိုယ့်ကိုမလေးစားတော့သလို၊ ဘယ်သူမှ ကိုယ့်ကို သောက်ထင်ကြီးမှာမဟုတ်ဘူး။
သူများကို အရင်အပြစ်ဖို့မယ့်အစား မိမိအမှားကို အရင်ဆုံးဆန်းစစ်ပါ။
ဆော့လည်း တက်လာတဲ့အရိပ်အယောင်မတွေ့လို့၊ ပင်ပန်းလို့
=========================================
အရာရာတိုင်းကို နည်းပြကိုယ်တိုင်ပြမှ၊ နည်းပြပြောမှ လုပ်မယ်ဆိုတဲ့သူတွေ.....စိတ်ချ.... ခင်ဗျားတို့ ဘယ်သောအခါမှ ခင်ဗျားတို့ လိုချင်တဲ့ Body ရမှာမဟုတ်ဘူး။
နည်းပြဆိုတာ #လမ်းညွှန်ဆိုင်းဘုတ် နဲ့တူတယ်။ ဒီလမ်းကို ညွှန်ပေးတယ်၊ ဘယ်လိုလုပ်ရင် ဘယ်လိုဖြစ်မယ်၊ ဘာစားရင် ဘယ်လောက်တက်မယ်... ဆိုပြီး ပြောမယ်။ သို့သော် သူတို့လည်း စာရေးသလောက် အတိအကျမပြောနိုင်ဘူး၊ ဘာကြောင့်လဲဆိုတော့ သူတို့အတွေးနဲ့ သူတို့ရှိလို့ပဲ။
အဲဒီအတွက် နည်းပြက ပြောတာ၊ သင်ကြားပြသတာတွေကို မှတ်သားထား၊ ပြီးရင် Internet က Body Building, Fitness ပိုင်းဆိုင်ရာ ဆောင်းပါးတွေဖတ်၊ လေ့လာ၊ နည်းပြပြောတာနဲ့ ချိန်ထိုးပြီး လိုနေတဲ့ ကွက်လပ်ကို ဖြည့်၊ ပြီးရင် ဆန်းစစ်၊ လုပ်ဆောင်ရမယ်။
တစ်နေ့လာလည်း GYM လာ...စက်ရုပ်လို ဒါလုပ်..No Disucssion...No Question....ပြီးပြန်.... အဲဒီလိုသာဆိုရင်တော့ ခင်ဗျားတို့ မတက်တာလည်း မပြောနဲ့။
လှချင်လို့သာ ဆော့ရတယ်၊ စိတ်ကမပါ၊ စိတ်မဝင်စားရင်တော့... လုပ်လည်း ဘာမှမထူးဘူး။ အပေါက်ပါတဲ့ ရေဘူးထဲ ရေထည့်နေသလိုပဲ။
Ko Aung Aung
