10/10/2024
အသည်း ဇွဲက အရေးကြီးသလား
ရိုးရာလက်ဝှေ့အကြောင်း ပြောကြတဲ့အခါ အသည်းမကောင်းဘူး၊ အသည်းကောင်းတယ်က မပါမဖြစ် သဘောမျိုး ပြောကြတာ တွေ့ရတယ်
အသည်းကောင်းတဲ့ကစားသမား၊ ခံနိုင်ရည်ကောင်းတဲ့ကစားသမားကို ပိုနှစ်ခြိုက်တာလို့လည်း ယူဆတယ်၊ နည်းစနစ်၊ ပညာပိုင်း အပြင် မာဂုဏ်ကိုပါ ဂုဏ်ယူစရာအနေနဲ့ထည့်ပြောကြတယ်
တကယ်တမ်း၊ မာဂုဏ်၊ အသည်းဇွဲက အရေးကြီးသလား
အကြမ်းအားဖြင့် အသည်း ဇွဲက အထိုက်အသင့် အရေးကြီးပါတယ်
အရေးအကြီးဆုံးလို့ ယူဆတယ်ဆိုရင်တော့ လွဲနေပြီ
ထိတာ၊ နာတာ ကိုမမှုပဲ ပေတေ ထိုးတာ၊ ခံထိုးနေတာကို အသည်းကောင်းတယ်ဆိုပြီး မြှောက်ပင့်နေတာကိုက မှားနေတာ
ခံထိုးတဲ့ ကစားသမား အထိနာတဲ့ကစားသမားကို မစာနာလို့ ပြောတာမဟုတ်ဘူး၊ အထိုးခံနိုင်တာ၊ အနာခံနိုင်တာက ဂုဏ်ပုဒ်တစ်ခုမဟုတ်ဘူး၊ ဒါတွေက ရုပ်ပိုင်းဆိုင်ရာမှာ ဒဏ်တွေဖြစ်၊ ဘဝပါ နာသွားနိုင်တာမျိုးပါ
ငယ်စဉ်က အကြီးအသေးမရှောင် ပြီးဆေးဆောင်ဆိုပြီး မြှောက်ပင့်ပေးခဲ့လို့ ကစားသမားဘဝနေဝင်ချိန် စောခဲ့တဲ့ ရိုးရာမောင်တွေလည်း အများကြီးပါ
အရေးကြီးဆုံးက ခံနိုင်ရည်ထက် ပညာပိုင်းဆိုင်းရာ တိုးတက်အောင် လုပ်ဆောင်သင့်တယ်
အထိုးခံရမယ့်အစား အထိုးမခံရအောင် ကစားတတ်ဖို့၊ နင်မပြီး ငါပြီး ဆိုတာမျိုးထက် ကိုယ်မထိပဲ ပြိုင်ဘက်ပဲ ထိအောင် ကစားတာမျိုးက ကစားသမားဘဝ သက်တမ်းရှည်ပါလိမ့်မယ်။
ပရိသတ်က အသည်းမကောင်းဘူး လို့ အပြစ်မြင်မှာကြောက်လို့ ပေတေခံမှာနဲ့စာရင် မကစားခင်ကတည်းက ပြိုင်ဘက်ကိုလေ့လာပြီး ပညာပိုင်း တိုးတက်အောင် လေ့ကျင့်ထားရင် ပိုကောင်းမယ်လို့ မြင်တယ်
အသည်း၊ ဇွဲ ကောင်း၊ မကောင်း ကြည့်တဲ့အချက်ကလည်း မြန်မာ့လက်ဝှေ့ရဲ့ စည်းမျဉ်းတွေကြောင့်လည်း ပါမယ်။
အလူးအလဲ ပူးတွဲသရေပွဲတွေရှိတဲ့အတွက် ဘယ်လောက်အထိုးခံခံ မရှုံးအောင် ကစားရမယ်ဆိုတဲ့စိတ် ကစားသမားတွေထဲမှာ ရှိတယ်
အမှတ်ပေးပွဲတွေ ကျင်းပခဲ့ရင် အထိနာတဲ့အတွက် ထိချက်ကွာပြီး ရှုံးနိုင်တာသိရင် ပေတေ အထိုးခံချင်မှ ခံပါလိမ့်မယ်
အခုကတော့ လက်ရည်ကွာရင်တောင် သရေရနိုင်တယ်ဆိုတဲ့ စိတ်နဲ့ ခံထိုးတယ်လို့ ယူဆတယ်
မြန်မာကစားသမားအများစုက အသက် ၃၀ ကျော်ရင် လူမအိုပေမယ့် လက်ဝှေ့အိုပြီ၊ အနာတရတွေများပြီ၊ စိတ်သွားတိုင်း ကိုယ်မပါတော့ဘူး
အိမ်နီးချင်း ထိုင်းက ကစားသမားတွေဆို အသက် ၄၀ တန်းထိ တန်းဝင်နီးနီး ကစားနိုင်တုန်း၊ ပြိုင်ပွဲဝင်နိုင်ဆဲပါ
အထိ အခိုက်နည်းရင် ကစားသမားဘဝ သက်တမ်းလည်း ဆွဲဆန့် နိုင်ပါလိမ့်မယ်
အခုက အသည်း ဇွဲ ဆိုတာကို ဂုဏ်တစ်ခုအနေနဲ့ထည့်တွက်ကြတော့ နာနေရင်တောင် ပေထိုး၊ ဆိုင်ထိုးရင်း ဘဝတွေပါ ခါးခဲ့တာမျိုး
ဖြစ်နိုင်ရင် ပညာနဲ့ပဲ ယှဉ်ပြိုင်၊ ပညာရည်ပြည့်ဝအောင်ပဲ လေ့ကျင့်ပြီး ကစားသမားဘဝကို ပျော်ပျော်ကြီး ရှေ့ဆက်တဲ့ ရိုးရာမောင်တွေ အများကြီးကို မြင်ချင်တာပါ
