Monday Channel Sports Journal

Monday Channel Sports Journal Football isn't two legs game. 🤘

Los Blancos တွေအတွက်သတင်းကြီး(Big News) ၂ ပုဒ်ရှိတယ်၊သတင်းတွေကတပုဒ်ပီးမှ တပုဒ်လာတာမျိုးမဟုတ်ဘူး၊၂ ပုဒ်က ဆုံနေတာ၊တိုက်နေတ...
26/05/2026

Los Blancos တွေအတွက်
သတင်းကြီး(Big News) ၂ ပုဒ်ရှိတယ်၊

သတင်းတွေက
တပုဒ်ပီးမှ တပုဒ်လာတာမျိုး
မဟုတ်ဘူး၊

၂ ပုဒ်က ဆုံနေတာ၊
တိုက်နေတာ၊ ပြိုင်နေတာ၊

ကဲ - စလိုက်ကြရအောင်..
Here we go now!!

လာမယ့်ဇွန်လပထမပတ်
နောက်ဆုံးရက်ထဲ
ရီယဲလ်အသင်းဥက္ကဋ္ဌသစ်
ရွေးပွဲရှိတယ်၊

(သတင်းတွေအရ ဇွန်လ ၇ ရက်
ဖြစ်ဖို့များတယ်)

ဒီတကြိမ်ထူးခြားသစ်လွင်တာက
ဥက္ကဋ္ဌရွေးပွဲမှာ ပဲရက်ဇ်အတွက်
ပြိုင်ဘက်သစ်ပေါ်လာတာပဲ၊

'အန်ရီကေ ရီကဲလ်မီ' တဲ့၊
အသက် ၃၇ နှစ်ပဲရှိသေးတယ်၊
စွမ်းအင်ကုမ္ပဏီ
Cox Energy ရဲ့ CEO..
လက်တင်အမေရိကမှာ
နေရောင်ခြည်စွမ်းအင်သုံးလုပ်ငန်း
စတင်လုပ်ကိုင်ခဲ့တဲ့
စွန့်ဉီးတီထွင်သူတယောက်..
တက်ကြွတဲ့လူငယ်လုပ်ငန်းရှင်၊

သူ့အဖေက အရင်
ရီယဲလ်ဘုတ်အဖွဲ့နဲ့ဆက်နွယ်တဲ့
အမှုဆောင်တဉီးဖြစ်ခဲ့ဖူးတယ်၊

နောက်ဆုံးသတင်းတွေအရ
ရီကဲလ်မီဘက်က ဥက္ကဋ္ဌလောင်းအဖြစ်
တရားဝင်လျှောက်ထားဖို့
လိုအပ်တဲ့ ဘဏ်အာမခံကြေး
ယူရို ၁၉၄ သန်းနဲ့
တခြားစာရွက်စာတမ်းတွေ
ပြည့်ပြည့်စုံစုံတင်ပြနိုင်တာမို့
သူ့တင်သွင်းလွှာကို ဘုတ်အဖွဲ့က
တရားဝင်အတည်ပြုပေးလိုက်ပီလို့
သိရတယ်၊

ဒါကြောင့် ၂၀၀၆ ခုနှစ်နောက်ပိုင်း
(ပီးခဲ့တဲ့ နှစ်ပေါင်း ၂၀ တွင်း)
ပဲရက်ဇ်အတွက် ပထမဆုံးအကြိမ်အဖြစ်
ပြိုင်ဘက်ကောင်းရှိတဲ့
ရွေးကောက်ပွဲနဲ့ ရင်ဆိုင်ရဖို့
ဖြစ်လာခဲ့တယ်၊

(တကယ်တမ်းက
ဥက္ကဋ္ဌရွေးပွဲလုပ်ဖို့ အချိန်
၂ နှစ်လိုသေးတယ်၊
ဒါမဲ့ အသင်းက ၂ ရာသီဆက်
ဖလားလက်မဲ့ဖြစ်တာရယ်
အလွန်ဆိုအထွက်မှာ
ကစားသမားအချင်းချင်း
ပါဝါလွန်ဆွဲပွဲတွေနဲ့
အသင်းအဝတ်လဲခန်းတွင်းလေထု
ဆိုးဆိုးဝါးဝါး
မတည်မငြိမ်ဖြစ်တာရယ်ကြောင့်
အပြောင်းလဲကြီးကြီးတခု
လုပ်ဖို့လိုအပ်တယ်ဆိုပီး
ရွေးပွဲကို ၂ နှစ်စောပီးကျင်းပဖို့
စီစဉ်ခဲ့ကြတာပဲ)

ဆိုတော့.?

ရီယဲလ်ဥက္ကဋ္ဌသစ်ရွေးပွဲ (သို့)
သူ့ခြေ သူ့လက် သူ့ဒဿနနဲ့
အသင်းကို အချိန်အကြာကြီး
Monopoly လုပ်ထားတဲ့
၇၉ နှစ်ရွယ် ပဲရက်ဇ်ဉီးဆောင်တဲ့
Old Skool အဖွဲ့နဲ့
အိုင်ဒီယာအသစ် လှုပ်ရှားမှုအသစ်
စီမံကိန်းအသစ်တွေနဲ့
စိတ်လှုပ်ရှားဖွယ်အပြောင်းလဲသစ်တွေ
ယူဆောင်လာမယ့်
၃၇ နှစ်ရွယ် ရီကဲလ်မီဉီးဆောင်မယ့်
New Skool အဖွဲ့တို့
ထိပ်တိုက်တွေ့ဆုံမှု..?

အဲ့မှာနှစ်ဖွဲ့လုံးက ရွေးပွဲအကြိုမှာ
မဲဆွယ်မှုအနေနဲ့သတင်း ၂ ပုဒ်
ပြိုင်တူနီးပါးထုတ်လွှင့်လိုက်တယ်၊

ပဲရက်ဇ်က သူ့ရာထူးကာကွယ်ဖို့
ကတိကဝတ်တခုပေးတယ်၊
တကယ်လို့ သူ့သာရီယဲလ်ဥက္ကဋ္ဌ
ပြန်ရွေးခံရမယ်ဆိုရင် -
မော်ရင်ညို + အန်ဇိုဖာနန်ဒက်ဇ်
ရအောင်ခေါ်ပေးမယ်၊

ခေါ်ဖို့ပေးအတွက်လည်း
မော်ရင်ညိုနဲ့က ညှိပီးပီ၊
မော်ရင်ညိုရဖို့ ဘယ်လောက်တောင်
ညှိလိုက်ရလဲဆို.?
အရင်ဆို လက်ခံဖို့ခက်ခဲတဲ့
တောင်းဆိုချက် ၁၀ ချက်ကို
ပဲရက်ဇ်ဘက်က လိုက်လျော
လက်ခံပေးရတာရှိတယ်၊

ဥပမာ ..
- စာချုပ်သက်တမ်း ၂ နှစ်ဖြစ်ရမယ်၊
(ပိုလည်းမပို လျော့လည်းမလျော့ရဘူး)
- မီဒီယာနဲ့စကားပြောရင်
အသင်းပြောရေးဆိုခွင့်ရှိသူပုံစံနဲ့
မပြောဘဲ နည်းပြချုပ်အနေနဲ့ပြောမယ်၊
- လူစာရင်းရွေးချယ်မှုများမှာ
ဘယ်သူ့မှ ကြားဝင်စွက်ဖက်ခွင့်မရှိ
သူ့ဆုံးဖြတ်ချက်သာအတည်ဖြစ်ရမယ်၊
- ကစားသမားနဲ့အသင်းကို
ရုပ်ပိုင်း စိတ်ပိုင်းပင်ပန်းနွမ်းနယ်စေတဲ့
အမေရိကန်နဲ့ အာရှမှာကျင်းပမယ့်
ရာသီကြိုခြေစမ်းပွဲ ခရီးစဉ်တွေ
လျော့ချပေးရမယ်၊
- သူ့ကစားကွက် သူ့နည်းစနစ်နဲ့
ကိုက်ညီစေဖို့ အသင်းကစားသမား
အပြောင်းအရွှေ့တိုင်းမှာ အဓိက
ဆုံးဖြတ်သူနေရာ(Decision Maker)
ပေးရမယ်၊

စသဖြင့် အဲ့လိုတောင်းဆိုမှုတွေပါတယ်၊
POV အရတော့ ၂ နှစ်ပဲလုပ်မယ်၊
ပိုလည်းမပို လျှော့လည်းမလျှော့..
(အဲ့ချိန်ဘာပဲဖြစ်ဖြစ် ရာထူးထုတ်ခွင့်
မရှိ)
ပီးတော့ ကွင်းတွင်းနည်းပြမှုအပြင်
အသင်းတခုလုံးရဲ့ စီမံခန့်ခွဲမှုအာဏာပါ
လိုချင်တယ်လို့တောင်းလိုက်တာပါ၊

အန်ဇိုအပြောင်းရွှေ့နဲ့ပတ်သက်ရင်လည်း
ပဲရက်ဇ်က သူကိုယ်တိုင်
အန်ဇိုရဲ့အေးဂျင့်ဆီဖုန်းခေါ်ပီး
ကစားသမားဘက်က
နှုတ်အားဖြင့်သဘောတူညီမှု
(Verbal Agreement) ရအောင်
ဆွေးနွေးညှိနှိုင်းပီးဖြစ်တယ်လို့
ခိုင်မာတဲ့သတင်းရင်းမြစ်တွေက
ဖော်ပြထားတယ်၊

ပြောင်းရွှေ့ကြေး ယူရိုသန်း ၁၅၀ ကျော်
ကုန်ကျခံပီးခေါ်မယ့်
အန်ဇိုအပြောင်းအရွှေ့ကို ပဲရက်ဇ်က
(Galáctico Signing)အဖြစ်
သတ်မှတ်ထားတယ်၊

သူ့ဥက္ကဋ္ဌရာထူးအတွက်
'မော်ရင်ညို + အန်ဇိုဖာနန်ဒက်ဇ်'
ဘာနေဗျူးရောက်စေရမယ်ဆိုတာ
ပဲရက်ဇ်ရဲ့ကတိကဝတ်သတင်းပဲ၊

နောက်တပုဒ်က ရီကဲလ်မီရဲ့
သစ်လွင်စိမ်းလန်းတဲ့ ကတိကဝတ်.?
သူသာဥက္ကဋ္ဌဖြစ်မယ်ဆိုရင်
ရီယဲလ်ကို မြေလှန်ပြောင်းလဲပစ်မယ့်
စီမံကိန်းထဲ ပထမဆုံးခြေလှမ်းက
'ကလော့ပ် + ဟာလန်း' ခေါ်ပေးမယ်
ဆိုတဲ့ ကတိကဝတ်ပဲ၊

သူကလည်း သွက်တယ်၊
ကလော့ပ်ကို Red Bull ကနေ
ဆွဲထုတ်ဖို့ သူ့ရဲ့လက်ရှိစာချုပ်ကို
ဖျက်သိမ်းနိုင်တဲ့
'အထူးအပုဒ်' (Exit Clause) ကို
အသုံးချဖို့ လုပ်နေတယ်၊
Red Bull နဲ့ ကလော့ပ်စာချုပ်အရ
နိုင်ငံအသင်းကြီး (သို့မဟုတ်)
ရီယဲလ်လိုကလပ်အသင်းကြီး
တခုခုကကမ်းလှမ်းလာပါက
စာချုပ်ကို အလွယ်တကူဖျက်သိမ်းပီး
ထွက်ခွာခွင့်ပေးရမယ်ဆိုတဲ့
(Exit Clause) ပါတယ်၊
ခုအဲ့အချက်ကိုအသုံးချပီး
ရီကဲလ်မီက ကလော့ပ်နဲ့ထိတွေ့
ဆွေးနွေးမှုတွေလုပ်ထားတယ်၊

ဟာလန်းရဖို့လည်း ရယ်ဒီပဲတဲ့၊
ဟာလန်းရဲ့စူပါအေးဂျင့် ပီမင်တာနဲ့
စပီးဆွေးနွေးမှုတွေလုပ်နေပီ၊
ဂွာဒီယိုလာအထွက်နဲ့
ဟာလန်းကိုယ်တိုင်
ရီယဲလ်ပြောင်းကစားချင်စိတ်
အရင်ကတည်းက ပြင်းပြမှုကြောင့်
အဲ့အပြောင်းအရွှေ့ကလည်း
အများကြီးခက်ခဲမှာ မဟုတ်ဘူး၊

ဒါကြောင့် ရီယဲလ် လူသစ်
သွေးသစ်နဲ့ အိုင်ဒီယော်လော်ဂျီသစ်
ပြောင်းလဲမှုမှာ ပထမဆုံး
အပြောင်းအလဲက
'ကလော့ပ် + ဟာလန်း' ခေါ်ယူမှုလို့
ရီကဲလ်မီက ကတိကဝတ်
ပေးထားတယ်၊

အဆုံးသတ်မယ်ဆိုရင်.?

Los Blancos တို့အတွက်
အသင်းအပြောင်းလဲကြီးနဲ့ဆိုင်တဲ့
သတင်းကြီး(Big News)
၂ ပုဒ်ရှိတယ်၊

ခင်ဗျားတို့ ရွေးရမယ်၊

၁) စနစ်ဟောင်း ချုပ်ကိုင်မှုဟောင်းနဲ့
လူအို လူဟောင်းကြီး
ပဲရက်ဇ်ထပ်ပေးလာတဲ့
'မော်ရင်ညို + အန်ဇို' နဲ့စမယ့်
အပြောင်းအလဲလား?

၂) အတွေးသစ် အမြင်သစ်နဲ့
လူငယ်လူလတ် ရီကဲလ်မီး
သယ်ဆောင်ပေးလာတဲ့
'ကလော့ပ် + ဟာလန်း'နဲ့စမယ့်
အပြောင်းအလဲလား?

Cmt မှာ လွတ်လပ်စွာ
ဝင်ရေးသွားနိုင်ပါတယ်၊


မက်ဆီနဲ့ Nutrition(အာဟာရဗေဒ) တဲ့၊သိသူနည်းမယ့်Inside Story မျိုးပါပဲ၊လူတွေက ခက်တယ်၊မက်ဆီကို ပြိုင်ဘက်တွေအကြီးကျယ်ပုံဖျက်တ...
18/05/2026

မက်ဆီနဲ့ Nutrition
(အာဟာရဗေဒ) တဲ့၊

သိသူနည်းမယ့်
Inside Story မျိုးပါပဲ၊

လူတွေက ခက်တယ်၊
မက်ဆီကို ပြိုင်ဘက်တွေ
အကြီးကျယ်ပုံဖျက်တဲ့
စကားလုံးတလုံးရှိတယ်၊

'ပါရမီရှင်' တဲ့၊

ပါရမီရှင်ဆိုတာ
မိုးပေါ်ကကျလာတယ်လို့
ထင်ကြတယ်၊

ဘာမှလုပ်စရာမလိုဘဲ
အချိန်တန်ရင်
'မီးခွက်လေးပွတ်..
ဂျီးန်နီလေးခေါ်..
အလိုရှိတာလေးခိုင်းလိုက်ရုံနဲ့
အရာအားလုံး
ပီးမြောက်သွားတယ်' လို့
ထင်ကြတာလားမသိ၊

တကယ်က
ခိုင်ကျည်တဲ့ အောင်မြင်မှုတိုင်းမှာ
ဖြတ်လမ်းမရှိပါဘူး၊

(ပါရမီရှင်ဖြစ်ရုံနဲ့လည်း
ထိုင်နေရင် ဖင်ကျွတ်စွဲ
မည်းရုံပဲ ရှိမှာပါ)

Lasting success
(ရေရှည်တည်တံ့တဲ့ အောင်မြင်မှု)
ဒါမှမဟုတ်
Consistent performance
(အတက်ကျမရှိ စွမ်းဆောင်ရည်)
ရဖို့ဆိုတာ
Individual Training နဲ့
အစားအသောက်နဲ့ အနေအထိုင်
(Lifestyle n' Diet) ကို
သာမန်ထက် ထူးထူးကဲကဲ
အားထုတ်ကြိုးပမ်း
ဖြည့်ဆည်းရပါတယ်၊

မက်ဆီက
သူ့ Lifestyle n' Diet plan နဲ့
Individual Training တွေကို
လိုင်းပေါ်မတင်တာနဲ့ပဲ
ပါရမီတခုတည်းအားကိုးနဲ့
ရှေ့ထွက်လာသူလို့
ကောက်ချက်ဆွဲပီး
အဓိပ္ပါယ်လွဲလို့ မရပါဘူး၊

သူ့ဘဝမှာ ခန္ဓာကိုယ်ကြံ့ခိုင်မှုနဲ့
ပတ်သက်ရင်
ကျော်ဖြတ်ခဲ့ရတဲ့ စိန်ခေါ်မှုကြီး
၂ ခုရှိခဲ့တယ်၊

တခုက အားလုံးသိထားတဲ့
အသက် ၁၁ နှစ်အရွယ်မှာဖြစ်ခဲ့တဲ့
(GHD) လို့ခေါ်တဲ့
ကြီးထွားဟော်မုန်းချို့တဲ့ရောဂါပါ၊

ဆေးပညာအရဆို
ဦးနှောက်အတွင်းရှိ ပစ်ကျူထရီဂလင်း
(Pituitary Gland) ကနေ
ခန္ဓာကိုယ်ကြီးထွားဖို့လိုအပ်တဲ့
ဟော်မုန်းအလုံအလောက်
မထုတ်ပေးနိုင်တဲ့ ရောဂါပါပဲ၊

ရောဂါဖြစ်တဲ့အခါ
သက်ရောက်မှုအရ -
- အရပ်နိမ့်တာ၊
- ခန္ဓာကိုယ်ကြီးထွားမှုနှေးကွေးတာ၊
- ကြွက်သားထုတည်ဆောက်စွမ်း
လျော့နည်းတာ၊
- အရိုးသိပ်သည်းဆအားနည်းတာနဲ့
- ကိုယ်ခံအားကျဆင်းတာတွေဖြစ်ပီး
ထိပ်တန်းအားကစားသမား
တယောက်ဖြစ်လာဖို့ အလွန်အမင်း
ခက်ခဲစေတဲ့ ရောဂါမျိုးပါ၊

စစဖြစ်ခြင်း မက်ဆီရဲ့အရပ်က
၄ ပေ ၄" ပဲရှိပီး
အဲ့ရောဂါကို မကုသနိုင်ဘူးဆို
အရပ် ၄ ပေ ၇" ထက်ပိုရှည်ဖို့
မဖြစ်နိုင်ဘူးလို့ ဆရာဝန်တွေက
သတိပေးခဲ့ကြတာပါ၊

ဒါကို မက်ဆီက ဘာဆာရဲ့
ပံ့ပိုးမှုနဲ့ သူ့ရဲစိတ်ပိုင်းဆိုင်ရာ
အားကောင်းကြံ့ခိုင်မှုပေါင်းပီး
နှစ်ပေါင်းများစွာကြာအောင်
ကြီးထွားဟော်မုန်းအစားထိုးဆေး
(HGH) ကို ညတိုင်း
ခြေထောက် ၂ ဖက်လုံးမှာ
တလှည့်စီ သူ့ဘာသာသူထိုးပီး
ကျော်ဖြတ်ခဲ့ရတာပါ၊

(စဉ်းစားရင် လူကြီးတယောက်
ရေရှည်စွဲသောက်ရတဲ့
ဆေးတောင် ညတိုင်း
မပျက်မကွက်သောက်ဖို့
မေ့တာ လျော့တာနဲ့
မလွယ်တဲ့ အခြေအနေမှာ
လူငယ်လေးတယောက်က
အသက် ၁၂ နှစ်ကစပီး
ရောဂါပျောက်တဲ့အချိန်ထိ
ဆေးထိုးအပ်နဲ့ဗူးကို
ကိုယ်နဲ့မကွာဆောင်ထားရင်း
ညတိုင်းခြေထောက် ၂ ဖက်မှာ
သူ့ဘာသာသူတလှည့်စီထိုးရင်း
ကျော်ဖြတ်ခဲ့ရတာပါ၊

အဲ့ဒါနဲ့ပတ်သက်ပီး
အင်တာဗျူးတခုမှာ သူက -
" ၈ နှစ်ကနေ ၁၂ နှစ်လောက်အထိ
မိဘတွေ ထိုးပေးတယ်၊
ဒါပေမဲ့ ၁၂ နှစ်နောက်ပိုင်းကနေ
ကုသမှုပြီးတဲ့အထိတော့
ငါ့ဘာသာ ကိုယ်တိုင်ပဲထိုးခဲ့တယ်၊
ဘယ်သွားသွား ဆေးထိုးပြွန်ပါတဲ့
ဗူးလေးသယ်သွားပီး
သူငယ်ချင်းအိမ်အလည်
သွားရင်တောင် သူ့အိမ်က
ရေခဲသေတ္တာထဲထည့်ထား..
ညကျမှ ထုတ်ထိုးရတယ်"လို့
ဖြေခဲ့ဖူးတယ်၊

အဲ့ကတည်းက
သူ့ရဲ့စိတ်ပိုင်းရာကြံ့ခိုင်မှုနဲ့
ပရိုဘောလုံးသမားဖြစ်ရေး
ဉီးတည်ချက်က
ရှင်းလင်းပြတ်သားလွန်းပါတယ်)

နောက်တခုက
အပေါ်မှာပြောခဲ့တဲ့
မက်ဆီနဲ့ Nutrition
(အာဟာရဗေဒ) အကြောင်းပါ၊
လူသိနည်းပါတယ်၊

၂၀၁၃ လောက်မှာ
မက်ဆီအနေနဲ့ သူ့ရဲ့
စားသောက်ပုံစံမမှန်မှုကြောင့်
ခန္ဓာကိုယ်ဝိတ်တက်ပီး
မကြာခဏ အော့အန်ခြင်း၊
ပျို့တက်ခြင်းနဲ့
အမြဲမောပန်းလွယ်တဲ့ရောဂါ
ဖြစ်ခဲ့တယ်၊

ဒါနဲ့ပတ်သက်ပီး သူက -
"အသက် ၂၂ နဲ့ ၂၃ ဝန်းကျင်မှာ
ချောကလက်တွေ၊
တောင်အမေရိကမုန့်တွေနဲ့
အချိုရည်တွေ အများကြီး
စားမိပီး နှစ်ပေါင်းအတော်ကြာ
စားသောက်မှုပုံစံ
အမှားကြီး မှားခဲ့ဖူးတယ်"

"အဲ့ချိန် ခဏခဏအန်လာတယ်၊
ပထမ ဆရာဝန်တွေက
ဒါတခြားအကြောင်းမျိုးစုံကြောင့်
ဖြစ်ရတာလို့ ထင်ခဲ့ကြပေမယ့်
နောက်ဆုံးမှာတော့
ငါ့ရဲ့ စားသောက်မှုပုံစံကို
ပြောင်းလဲလိုက်တဲ့အခါ
အဲ့ဒါတွေအားလုံး ရပ်တန့်သွားခဲ့တယ်"
လို့ အင်တာဗျူးတခုမှာ
ဝန်ခံသွားခဲ့တယ်၊

၂၀၁၄ မှာ သူက
အီတလီလူမျိုးအာဟာရဗေဒပညာရှင်
ဒေါက်တာ ဂျူလီယာနိုပိုဆာရဲ့
လမ်းညွှန်မှုနဲ့ အစားအသောက်ပုံစံကို
သိသိသာသာ တော်လှန်လိုက်တယ်၊

- သကြားလုံးနဲ့ အချို
(သကြားဓာတ်က ကြွက်သား
တည်ဆောက်မှုအတွက်
အဆုံးဆုံးရန်သူဖြစ်တယ်)
- သန့်စင်ဂျုံမှုန့်များ (Refined Flour)
- ဓာတုပိုးသတ်ဆေးနဲ့
တာရှည်ခံဆေးပါဝင်တဲ့
အစားအစာတွေကို
လုံးဝရှောင်ကြဉ်ရမည့် အစားအစာ
(The Banned List) အဖြစ်
သတ်မှတ်တယ်၊

- ရေ
- သံလွင်ဆီ
- သဘာဝကောက်သီးနှံ
- လတ်ဆတ်တဲ့သစ်သီးဝလံ
- အသားငါးနဲ့ ဟင်းသီးဟင်းရွက်
အသုပ်မျိုးစုံကို
အဓိကစားသောက်ရမယ့်
အခြေခံအစားအစာ
မဏ္ဍိုင် ၅ မျိုးဖြစ်သတ်မှတ်တယ်၊

ပီးတော့
ပွဲရက်အကြို အာဟာရဓာတ်
စနစ်တကျ ပြင်ဆင်မှု
(Match-Day Nutrition)ကိုလည်း
သိပ္ပံနည်းကျပြောင်းလဲတယ်၊

ပွဲမကစားခင် ၁၀ ရက်အလိုမှာ -
ကာဗိုဟိုက်ဒရိတ်စားသုံးမှု
လျှော့ချပြီး အသားဓာတ်ဖျော်ရည်
(Protein Shakes)
တစ်ရက် ၃ ကြိမ် သောက်ပီး
ရေဓာတ်အဓိကဖြည့်တယ်၊

ပွဲမကစားခင် ၅ ရက်အလိုမှာ -
ကြွက်သားပြန်လည်သန်စွမ်းရေးနဲ့
သွေးလည်ပတ်မှုကောင်းဖို့
ဂျင်း၊ နနွင်း နှင့် နံနံပင် တို့ပါဝင်တဲ့
ဟင်းသီးဟင်းရွက်စွပ်ပြုတ်ကို
အဓိကထား သောက်တယ်၊

ပွဲမကစားခင် ၁ ရက်အလိုမှာ -
အစာခြေစနစ်ပေါ့ပေါ့ပါးပါးဖြစ်ဖို့
ပြုတ်ထားတဲ့ အာလူး၊ ကြက်သား
(သို့) ငါးနဲ့ အသုပ်တွေပဲစားတယ်၊

ပွဲမကစားခင် မိနစ် ၉၀ အလိုမှာတော့ -
အစာခြေလွယ်ပီး
ချက်ချင်းအားအင်ဖြစ်စေတဲ့
ပန်းသီး (သို့) ငှက်ပျောသီးပဲ
စားတယ်၊

သူ့ရဲ့အကြိုက်ဆုံး ကျန်းမာရေးမီနူး
အစားအစာက -
မုန်လာဥနီ၊ ကြက်သွန်မြိတ်၊
ကြက်သွန်ဖြူစတဲ့
ဟင်းသီးဟင်းရွက်တွေနဲ့
ရောဖုတ်ထားတဲ့ ကြက်သား
(Roasted Chicken with
Root Vegetables) ပါတဲ့၊

သူ့ရဲ့ အစားသောက်ပုံစံ
ပြောင်းလဲပီးနောက် ပြောခဲ့တဲ့
စကားက နာမည်ကြီးတယ်၊

"ခုတော့ ကိုယ့်ကိုယ်ကိုယ်
အရင်ကထက်
ပိုပီးဂရုစိုက်ဖြစ်ပါတယ်၊
အရာအားလုံး စနစ်တကျ
ပြင်ဆင်ထားပီး
(ကျန်းမာရေးနဲ့အစားသောက်ကို)
သေချာစောင့်ကြည့်
စစ်ဆေးနေပါတယ်" တဲ့၊

မက်ဆီကို ပြိုင်ဘက်တွေ
အကြီးကျယ်ပုံဖျက်ခဲ့တဲ့
'ပါရမီရှင်' ဆိုတဲ့ စကားလုံးနဲ့
သူ့ရဲ့ အနှိုင်းမဲ့အောင်မြင်မှုများ.?

ပါရမီရှင်ဆိုတာ
မိုးပေါ်က ကျလာတာမဟုတ်သလို
မီးခွက်လေးပွတ်ပီး
ဂျီးန်နီတန်ခိုးနဲ့
အရာရာဖန်ဆင်းနိုင်သူလည်း
မဟုတ်ပါဘူး၊

သူများထက်ပိုပီး
ခက်ခဲပင်ပန်းစွာကြိုးစားရတဲ့
အစားအသောက်
အနေအထိုင်
လေ့ကျင့်မှုပုံစံတွေနဲ့
သူတိုရဲ့ 'Lasting success '
(သို့မဟုတ်)
'Consistent performance' ကို
တည်ဆောက်ကြရတာပါ၊

မက်ဆီက
ပါရမီရှင်(Genius) ဆိုတာထက်
A True Overcomer ပါလို့
အတည်ပြုရင်း..


"ဘက်ဂျီယိုက (ထိပ်တန်းပန်းချီဆရာ)ရာဖေးလ်ဆိုရင် ဒယ်လ်ပီအဲရိုက ပင်တူရီခီယိုပဲ၊သူက ကွင်းထဲဘောလုံးကန်နေတာမဟုတ်ဘူး၊မြက်ခင်းစိမ...
11/05/2026

"ဘက်ဂျီယိုက
(ထိပ်တန်းပန်းချီဆရာ)
ရာဖေးလ်ဆိုရင်
ဒယ်လ်ပီအဲရိုက ပင်တူရီခီယိုပဲ၊
သူက ကွင်းထဲ
ဘောလုံးကန်နေတာမဟုတ်ဘူး၊
မြက်ခင်းစိမ်းကင်းပတ်စပေါ်မှာ
ပန်းချီဆွဲနေတာပါ"

(ပင်တူရီခီယိုဆိုတာ
ရီနေဆန်းခေတ်မှာပေါ်ခဲ့တဲ့
နာမည်ကျော်အီတလီရဲ့
ခေတ်ဆန်းပန်းချီဆရာပါ၊
သူ့ပန်းချီကားတွေက
ထူးခြားတဲ့စရိုက်လက္ခာ
အရောင်သွေးစုံလင်မှုနဲ့
စုတ်ချက်အသေးစိတ်ကျနမှုကြောင့်
နာမည်ကြီးပါတယ်)

ဒီစကားကိုပြောခဲ့တာက
ယူဗင်တပ်စ်အသင်းဥက္ကဋ္ဌ
အက်ညက်လီပါ၊

ဘောလုံးနဲ့ခြေထောက်ထိတိုင်း
မြက်ခင်းစိမ်းကဗျာတပုဒ်ပေါ်လာသူ
(သို့မဟုတ်)
သစ္စာတရားရဲ့ အမြင့်မားဆုံး ပြယုဂ်
(သို့မဟုတ်)
'The Last King of Turin'
(သို့မဟုတ်) ဒယ်လ်ပီအဲရို

သူ ဘယ်ကလာပီး ဘယ်လိုသွားခဲ့လဲ?
-

"ငယ်ငယ်က ငါ့ရဲ့အချစ်ဆုံး
သူငယ်ချင်းက 'အိမ်နံရံ' တွေပဲ၊
ကန်လိုက် ထွက်လာတဲ့
ဘောလုံးတွေ ထိန်းလိုက်နဲ့ပဲ
နေ့တွေကိုကုန်လွန်စေတယ်"

"ငါတို့ ကားဂိုဒေါင်ထဲမှာ
မီးသီးတလုံးရှိတယ်၊
မှတ်မှတ်ရရ
အဲ့မီးသီးပိတ်တဲ့ခလုတ်ကို
ဘောလုံးနဲ့ကန်ပီးပိတ်နိုင်ဖို့
နာရီပေါင်းများစွာ
လေ့ကျင့်ခဲ့ဖူးတယ်"

"အဲ့ဒါက ငါ့ကို
ကမ္ဘာ့အကောင်းဆုံးဖရီးကစ်
ကန်သွင်းသူစာရင်းထဲ
ပါလာစေမယ့် အစပျိုးမှုလား?
မသိဘူး.."

"ရယ်ရတာက
ကလေးဘဝအိပ်မက်က
နာမည်ကျော်ဘောလုံးသမား
ဖြစ်ဖို့ မဟုတ်ဘူး၊
ငါ့က အဖေချစ်သား..
အဖေမောင်းတဲ့
ထရပ်ကားမောင်းဆရာပဲ
ဖြစ်ချင်တာ၊
ဘောလုံးနဲ့ ကမ္ဘာပတ်ဖို့မဟုတ်ဘဲ
ထရပ်ကားနဲ့ ကမ္ဘာပတ်ဖို့က
ကလေးဘဝ အိပ်မက်ပဲ"

"နောက်ရယ်ရတာက
Mamma mia!
(ငါ့ရဲ့ မေမေရေ..) က
ဘောလုံးကန်ရင်
ပင်ပန်းမှာစိုးလို့နဲ့
ဒဏ်ရာအနာတရ
ရမှာစိုးတာလို့ ဂိုးသမားပဲ
လုပ်ခိုင်းတယ်၊
မာမားက ဂိုးသမားဆို
သိပ်မပြေးရသလို
ဒဏ်ရာရလည်း နည်းတယ်လို့
ထင်ခဲ့တယ်၊ ဒါကြောင့်
ငါ့ဘောလုံးစကန်တော့
ဂိုးဖမ်းခဲ့ဖူးတယ်"

"တိုက်စစ်သမားဖြစ်လာတာ
စတက်ဖာနိုကြောင့်ပဲ၊
(စတက်ဖာနိုဆိုတာ
သူ့ထက် ၉ နှစ်ကြီးတဲ့ အကို၊
သူတို့က ညီကို ၂ ယောက်တည်း၊
သူ့အကိုလည်း ဘောလုံးသမား
ဖြစ်ခဲ့ဖူးတယ်)
သူက မာမားကို
ဘောလုံးကန်ခါနီးတိုင်း
'မာမား -
အဲလက်စ်ကန်တတ်ပုံနဲ့
နောက်မှာ မနေခိုင်းပါနဲ့..
ရှေ့တက်ကစားခိုင်းပါ..' လို့
ပြောပါများရာကနေ
မာမား ခွင့်ပြုချက်နဲ့
တိုက်စစ်သမားဖြစ်လာတာပဲ.."

"ငါတို့ မိသားစုက
ဆင်းရဲတယ်၊
ငါတို့မြို့ Conegliano ကလည်း
ကျဉ်းကျဉ်းလေး၊
နွေဆိုပူအိုက်ပီး ဆောင်းဆို
အရိုးခိုက်အောင်အေးတယ်၊
ဖိနပ်သစ်မဝယ်နိုင်လို့
မာမားက ဘောလုံးကန်တိုင်း
'ဖိနပ်ပြတ်မယ်နော်' လို့
အမြဲတမ်းဆူတယ်၊
ဒါနဲ့ပဲ အိမ်နောက်ဖေးမှာ
သူငယ်ချင်တွေနဲ့ကန်တိုင်း
ခြေဗလာနဲ့ပဲကန်ဖြစ်ခဲ့တယ်"

"ဒါကလည်း ငါ့ကို
ဘောလုံးနဲ့အထိအတွေ့
(In Touch)ပိုင်း
ပိုကောင်းအောင်
သင်ပေးခဲ့သလိုဖြစ်တယ်"

"ငယ်ဘဝမှာ
ဘောလုံးနဲ့ပတ်သက်ပီး
ပျော်စရာအကောင်းဆုံး
အခိုက်အတန့်က
ငါ ၁၀ နှစ်သား
ဒေသတွင်းပြိုင်ပွဲတခုမှာ
ပထမရလို့
'ဖိနပ်တရံ' ဆုရခဲ့တာပဲ၊
ဖိနပ်ပြတ်မှာစိုးလို့
မာမား အော်ပီးဆူသံ
တခဏတော့
တိတ်ဆိတ်စေခဲ့တယ်လေ"

"နောက်ပျော်စရာက
ဘောလုံးကနေ
ပရော်ဖက်ရှင်နယ်အဖြစ်
ပထမဆုံးပိုက်ဆံရတော့
အိမ်မှာလိုတဲ့
ပရိဘောဂအသစ်တွေ
ဝယ်ပေးနိုင်ခဲ့တာပဲ"

"ပရော်ဖက်ရှင်နယ်
ဘောလုံးသမားဘဝအစလား?
လူတွေမှန်းဆထားတာထက်
အများကြီးပိုခက်ခဲခဲ့တယ်၊
ငါ့ ၁၂ နှစ်သားမှာ
တိုရီနိုအသင်းလူရွေးပွဲ(Trail)
သွားခဲ့တယ်၊
မှတ်ချက်က - 'ပါရမီရှိပေမဲ့
ကိုယ်ခန္ဓာသေးငယ်လွန်းတာမို့
ခွန်အားသုံးကစားတဲ့
ပရော်ဖက်ရှင်နယ်ဘောလုံးလောကမှာ
မရှင်သန်နိုင်ဘူး' တဲ့"

"အေစီမီလန်သွားရွေးတော့လည်း
အဲ့လိုမှတ်ချက်မျိုးနဲ့
ငြင်းပယ်ခံခဲ့ရတယ်၊
အဲ့မှတ်ချက်တွေက
ငါ့ကို ပိုတွန်းအားဖြစ်စေတယ်၊
'လူမကြီးပေမယ့်
စွမ်းရည်တော့ ကြီးရမယ်'
အဲ့စိတ်နဲ့ အသေအလဲ
ပိုလေ့ကျင့်ဖြစ်ခဲ့တယ်၊
နောက်ဆုံး ပါဒိုဗာအသင်းက
ငါအရွယ်စားထက်
စွမ်းဆောင်ရည်ကိုကြည့်ပီး
လက်ခံခဲ့တာမို့
ဘောလုံးသမားဘဝစခဲ့တယ်"

"ယူဗင်တပ်စ်အသင်းလား?
၁၉ နှစ်ကြာခဲ့တယ်၊
ငါ့အတွက်တော့
ယူဗင်တပ်စ်ဂျာစီက
ဒုတိယအရေပြားတခုဆိုတာထက်
ပိုတယ်၊ အဲ့ဒါက
ငါ့ဘဝဖြစ်တည်မှု
အစိတ်အပိုင်းတခုပဲ"

"တူရင်ပျက်စီးချိန်မှာ
ငါ စပယ်ရှယ်ကမ်းလှမ်းမှုတွေ
အများကြီးရတယ်..
ဆာအဲလက်စ်ဆို
၁၁ ကြိမ်မြောက်ကမ်းလှမ်း
လာတယ်၊
'အလက်ဆန်ဒရို ငါမင်းကို
အလိုရှိတုန်းပဲ..
အိုးထရက်ဖို့ဒ်ကလည်း
မင်းကိုလိုချင်တယ် လာခဲ့'
တဲ့၊

'ဆာအဲလက်စ် -
ငါက ယူဗင်တပ်စ်ဆိုတာ
ခင်ဗျားသိပါတယ်..
ငါ့ဘဝတခုလုံး ဒီမှာပဲရှိခဲ့သလို
သူတို့အလိုရှိသရွေ့လည်း
ဒီမှာပဲ ဆက်ရှိနေမှာပါ
နောက် ဒီဂျာစီကိုယ်နှိုက်က
ငါ့ရဲ့ ဖြစ်တည်မှုပါပဲ'

'စစ်မှန်တဲ့ ဂုဏ်သရေရှိသူဆိုတာ
သူ့အမျိုးသမီး(The Lady)ကို
ဘယ်တော့မှ မစွန့်ပစ်ဘူး' လို့
ပြန်ပြောခဲ့မိတယ်"

(Old Lady ဆိုတာ
ယူဗင်တပ်စ်အသင်း နာမည်ပြောင်ပါ၊
ဒယ်လ်ပီအဲရိုက သူ့အသင်းကို
အမျိုးသမီးတယောက်နဲ့
တင်စားပြောခဲ့တာပါ)
-

ဒယ်လ်ပီအဲရို (သို့)
အနုပညာဆန်တဲ့ ကျောနံပါတ် ၁၀..

'ဘဝမှာ ချစ်ခြင်းမေတ္တာနဲ့
ဉာဏ်ပညာပဲ' လိုတယ်ဆို
'ဘောလုံးမှာလည်း
နည်းစနစ်နဲ့ ဉာဏ်ပညာပဲ
လိုတယ်' ဆိုတာ
ဒယ်လ်ပီအဲရိုက သက်သေ
ပြသွားခဲ့တာပါ၊

မာရာဒိုနာကိုယ်တိုင်
"သူက ဇီဒန်းနဲ့မတူဘူး၊
သူက ကစားရတာကို
မြတ်နိုးတယ်၊
သူ့ရဲ့ စိတ်ဝိညာဉ်ထဲကနေ
ခံစားပီးတော့ ကစားတာ၊
သူနဲ့ ဇီဒန်းဆိုရင်
ငါကတော့ ဒယ်လ်ပီအဲရိုပဲရွေးမှာပါ၊
သူကစားပုံကြည့်ရတာ
အရမ်းအနှစ်သာရရှိပီး
သူ့မှာ (တခြားသူတွေနဲ့)
မတူညီထူးခြားတဲ့ စရိုက်ရှိတယ်"
လို့ ချီးကျူးခဲ့ဖူးတယ်၊

ဘောလုံးသယ်ပုံ
လှုပ်ရှားပုံ ကျော်ဖြတ်ပုံနဲ့
ပေးပို့ပုံ အရာအားလုံးဟာ
ကျော့ရှင်းလှပလွန်းပီး
နွဲ့နှောင်းလွန်းလို့
ဘောလုံးကွင်းတွင်းက ပန်းချီဆရာလို့
တင်စားခဲ့ကြတာပါ၊

နောက် ဒယ်လ်ပီအဲရိုရဲ့
ထူးခြားနည်းစနစ်ဝိသေသက
ခြေထောက်အတွင်းဘက်ဘေးသား
(Inside of the foot) နဲ့
ကန်တဲ့ ကန်ချက်ပါ၊

ကွင်းဘယ်ဘက်ခြမ်းကနေ
အတွင်းဝင်ပီး (Inside foot)နဲ့
ပွတ်ကန်တဲ့ ဘောလုံးတွေက
လေးကိုင်းသဏ္ဌန်
လှလှပပကွေ့ဝှိုက်ပီး
ဂိုးရဲ့အဝေးတိုင်ထောင့်
(Far top corner) ထဲ
စွတ်ခနဲဝင်သွားတတ်လို့
ဘောလုံး Industry မှာ
ကွင်းဘယ်ဘက်ထောင့်ဧရိယာကို
'Zone Del Piero'
(ဒယ်လ်ပီအဲရိုဧရိယာ) လို့
အမည်ပေးတဲ့အထိပါပဲ၊

နောက်ပီး ဒီဘက်ခေတ်မှာ
မတွေ့နိုင်တော့တဲ့
အသင်းတသင်းပေါ်
ခိုင်ကျည်မြဲတဲ့ သစ္စာတရား..

ယူဗင်တပ်စ်အသင်းရောက်မှ
အာဟာရပိုင်းဆိုင်ရာ
ထိန်းသိမ်းစောင့်ရှောက်မှုနဲ့
သိပ္ပံနည်းကျ
အထူးလေ့ကျင့်ခန်းတွေကြောင့်
သူ့ကြွက်သားနဲ့ ခွန်အားထု
ရုပ်ပိုင်းတိုးတက်ခဲ့ရသလို..
ပိုကောင်းတဲ့ ကစားသမား
ပိုကောင်းတဲ့ လေ့ကျင့်ကွင်းဆက်ရှင်နဲ့
ပိုကောင်းတဲ့ ပံ့ပိုးမှုတွေကြောင့်
အသိအမြင်နဲ့ အတွေ့အကြုံပိုင်း
တဘဝလုံးစာရခဲ့တယ်ဆိုပီး
၂၀၀၆ မှာ လုပ်ပွဲအရှုတ်တော်ပုံနဲ့
ယူဗင်တပ်စ်အသင်း စီးရီးဘီကို
တန်းဆင်းရချိန်
ကာနာဗာရို ဇလာတန်နဲ့ ဗီအဲရာတို့
အသင်းပြောင်းသွားကြပေမယ့်
သူက အသင်းကိုမစွန့်ဘဲ
စီးရီးဘီထိ လိုက်ဆင်းသွားခဲ့တယ်၊

တကယ်တမ်း
ကမ္ဘာ့အဆင့်ပလေယာတွေနဲ့
ကမ္ဘာ့အဆင့်ကွင်းကြီးတွေမှာ
ကန်ခဲ့တဲ့ သူလိုလူအတွက်
အဲ့ခေတ်က စီးရီးဘီရဲ့တချို့
မြေသားအတိနဲ့ ကွင်းငယ်လေးတွေထဲ
ရုန်းပီးကန်ခဲ့ရတာ မလွယ်ခဲ့ပါဘူး၊
ဒါမဲ့ တန်းဆင်းပီးရာသီမှာပဲ
၂၀ ဂိုး သွင်းပီး သူ့ဉီးဆောင်မှုနဲ့
စီးရီးအေပြန်တက်အောင်
အဓိကနေရကနေ ကူညီပေးခဲ့တယ်၊

၁၉ နှစ်တိုင်တိုင်
ယူဗင်တပ်စ်နဲ့အတူ
နိမ့်-မြင့်-တက်-ကျ
လောကဓံတွေဖြတ်သန်းရင်းနဲ့
သူ့ရဲ့အကောင်းဆုံးအချိန်နဲ့
စွမ်းအားတွေကို တူရင်မှာပဲ
ကုန်ဆုံးစေခဲ့တာပါ၊

The Greatest Symbol of Loyalty
(သစ္စာတရားရဲ့ အခမ်းနားဆုံးပြယုဂ်)
ပါပဲ၊

အတိတ်ဆိုတာ..
ညနေခင်းရောင်ခြည်ပါပဲ၊
မတောက်ပတော့ပေမယ့်
ရင်ထဲထိ နွေးစေတယ်တဲ့၊

ခင်ဗျားရော
ဒယ်လ်ပီအဲရိုကို လွမ်းလား?


ဒီရာသီ လစ်ဗာပူးလ်ရဲ့Downgrade အပေါ်မြင်မိတဲ့ အမြင်တချို့ပေါ့လေ၊အမြင်မတူတာရှိရင်?(ဒါမှမဟုတ်)ဖြည့်စွက်ပြောချင်တာရှိရင်? Cm...
04/05/2026

ဒီရာသီ လစ်ဗာပူးလ်ရဲ့
Downgrade အပေါ်မြင်မိတဲ့
အမြင်တချို့ပေါ့လေ၊

အမြင်မတူတာရှိရင်?
(ဒါမှမဟုတ်)
ဖြည့်စွက်ပြောချင်တာရှိရင်?
Cmt မှာဝင်ရောက်ဆွေးနွေးဖို့
ဖိတ်ခေါ်ပါတယ်၊

သုံးသပ်တဲ့နေရာမှာလည်း
နည်းပြအိုင်ဒီယာလော်ဂျီနဲ့
တိုက်ရိုက်သက်ဆိုင်တဲ့
Tactical Analysis ဆိုတာထက်
ပေါ့ပေါ့ပါးပါး
ကစားသမားပိုင်းဆိုင်ရာ
ချဉ်းကပ်သုံးသပ်မှု
Technical Analysis ပဲလုပ်မှာပါ၊

(တကယ်က နည်းပြရဲ့
Tactical Analysis ကို
ကိုယ်တွေလို အလှမ်းဝေးတဲ့
လက်လှမ်းလည်းမမီ
သေချာလည်းမသိနိုင်တဲ့
နေရာကနေ ဝေဖန်တာ
အကျိုးမရှိပါဘူး..
နောက်နည်းပြတယောက်ရဲ့
အိုင်ဒီယာလော်ဂျီက
ကောင်းတယ်ဆိုးတယ်မရှိပါဘူး၊
အောင်မြင်တယ်
မအောင်မြင်ဘူးပဲရှိတာပါ၊
ဥပမာ - မော်ရင်ညိုရဲ့
ခံစစ် Low Block ကို
Defensive Discipline ပေါင်းထားတဲ့
'Parking the Bus'
အိုင်ဒီယာဆိုရင်
အစက Anti Football ဆိုပီး
ပြင်းပြင်းထန်ထန်ဝေဖန်ခဲ့ကြတာပဲ၊
ဒါမဲ့ အောင်မြင်မှုရတော့
ကြီးမားတဲ့ influence ဖြစ်ပီး
နောက်နည်းပြတွေ ပုံစံတူ မျိုးကွဲနဲ့
လိုက်သုံးလိုက်လုပ်ကြတာ
အများကြီးပါပဲ.. ထားတော့)

ဒီရာသီ
လစ်ဗာပူးလ် Downgrade မှာ
၃ ချက်မြင်မိတယ်၊

၁) ဖလိုရီယန်ဗစ်ဇ် Flop ဖြစ်တာ၊

ဘာလို့ Flop ဖြစ်လဲ?
ဒီနေရာမှာ ကစားသမားရဲ့
ကိုယ်ရည်ကိုယ်သွေး
အားနည်းမှုကြောင့်ဆိုတာထက်
နည်းပြရဲ့ နေရာထားပုံ
Duties Functions အရ
ကစားကွက်တည်ဆောက်မှုမှာ
ဝင်ထမ်း ဝင်ရုန်းပီး
နစ်ခဲ့တာကြောင့်လို့ထင်တယ်၊

ပီးတော့ မမေ့ရမှာက
အစစအရာရာ
မတူညီကွဲပြားတဲ့နယ်မြေသစ်မှာ
ပထမဆုံးကစားရတဲ့
ရာသီလည်းဖြစ်တယ်ဆိုတာပဲ၊

လစ်ဗာပူးလ်က စံချိန်တင်
ပြောင်းရွှေ့ကြေးနဲ့ သူ့ကိုခေါ်ခဲ့တဲ့
ရည်ရွယ်ချက်မှာကိုက
Attacking Build-up မှာ
အဓိက Link-man
(ချိတ်ဆက်ပေးသူ) အဖြစ်
အကောင်းဆုံးကစားပေးဖို့ပဲ၊

သူ့ရဲ့ Agility & Vision ကို
အသုံးချပီး
ကွင်းလယ်နဲ့ တိုက်စစ်ကြား
ဘောလုံးစီးဆင်းမှုမြန်ဆန်အောင်
လုပ်ပေးရမှာ.?

အချက်အလက်အရ
သူက တပွဲချင်းပျှမ်းမျှ
xG (Expected Goals)
ဝ.၂၃ ဂိုးပဲရှိပီး
ရာသီဝက် စုစုပေါင်း
xG(Expected Goals)ဂိုးက
၆.၃ ဂိုးပဲရှိတယ်၊
အဲ့မှာ ခုထိ ၅ ဂိုးပဲ
သွင်းထားနိုင်တယ်ဆိုတော့
အခွင့်အရေးကောင်းတချို့ကို
ဂိုးအဖြစ် ပြောင်းလဲဖို့
ခက်ခဲရုန်းကန်ခဲ့ရတာ
မြင်နိုင်တယ်၊

ဒါမဲ့ သူက
Progressive passes မှာ
ဘောလုံးပေးပို့မှုတိကျနှုန်း
၈၇% ရှိသလို၊
ဒီရာသီ Open Play ကနေ
Chance Created ဖန်တီးမှု
အကြိမ် ၅၀ ကျော်လို့
PL မှာ ဘရူနိုဖာနန်ဒက်ဇ်ပီးရင်
ဒုတိယအများဆုံး
ပလေယာအဖြစ်
မှတ်တမ်းတင်နိုင်ခဲ့တယ်၊

ဂိုးဖန်တီးမှု (Assists) ဆိုလည်း
Pl မှာ ၃ လုံးပဲရထားပေမယ့်
Big Chances Created ၄ လုံးထိရှိပီး
ရာသီအစပိုင်း သူဖန်တီးပေးခဲ့တဲ့
အခွင့်အရေးတွေကို
အသင်းဖော်တွေက
ဂိုးအဖြစ် မပြောင်းနိုင်လို့ ၃ လုံးနဲ့ပဲ
တစ်နေခဲ့တာပါ၊

ချုပ်ပြောမယ်ဆို - ဗစ်ဇ်က
မျှော်လင့်သလောက်မဖြစ်ခဲ့ပေယ့်
အောင်မှတ်လောက် ရခဲ့ပါတယ်၊

ဒါပေမယ့်
- အီဆက်ခ်နာ
- ဆာလာခြေစွမ်းကျ
- ဂတ်ပိုက ခုထပ်ဘာမှ
ပိုမထူးလာတဲ့အခြေနေမှာ
မျှော်လင့်တကြီးနဲ့ခေါ်ခဲ့တဲ့
သူကလည်း သာမန်ထက်
နည်းနည်းပဲသာတယ်ဆိုတော့
အသင်းရဲ့ Attacking Build-up
ပုံပျက်သွားတာပါပဲ၊

၂) Jack of all trades
ဆိုဘိုစလိုင်း..

Jack of all trades ဆိုတာ
ဟိုစပ်စပ်ဒီစပ်စပ်နဲ့
ဘာမှ မထူးချွန်တာကို
ပြောတာပါ၊

အမြင်အရ ဆိုဘိုစလိုင်းက
အလွန်ယေဘုယျဆန်တဲ့
ပလေယာလို့ မြင်တယ်၊
သူ့ကစားပုံက Work rate မြင့်ပေမယ့်
ထိရောက်မှု (Impact) မရှိဘူး၊

ပွင့်ပွင့်လင်းလင်းပြောရရင်
Rank အရ သူ့ခြေစွမ်းနဲ့
စွမ်းဆောင်ရည်အတိုင်းဆို
လီဗာပူးလ်ထက် ပဲလေ့စ်
ဘရိုက်တန် ဘွန်းမဲသ်တို့မှာ
ကစားဖို့ ပိုသင့်တော်မယ်လို့
ထင်တယ်၊

ကစားအားအရ
reliable ဖြစ်တယ်ဆိုတာလည်း
တခါတလေ ထောင်ချောက်ပဲ၊

ဆလော့တ်က နည်းစနစ်ပိုင်းအရ
သူ့ကို Advanced Midfielder
(10 Role)မှာ ကစားခိုင်းပေမယ့်
တိုက်စစ်ဇုန်ထဲ နောက်ဆုံး
ဘောလုံးပေးပို့မှု (Final ball)နဲ့
အဆုံးဖြတ်ဂိုးတက်သွင်းယူမှု
(Finishing) ပိုင်းမှာ
အရမ်းအားနည်းလွန်းတယ်၊

ဆိုလိုတာက
ခံစစ်ကူရင် အပြေးပဲများပီး
ဖျက်အားမရှိသလို
တိုက်စစ်ဆင်ရင်လည်း
ပြေးလွှားနေပေမဲ့
ဒီဘရိုင်းလ် ကော်တင်ညိုတို့
Prime Time ကလို
ထိရောက်တဲ့ ဂိုးဖန်တီးမှုမျိုး
မပေးနိုင်ဘူး၊

သူက အသင်းအတွက်
'Work rate မြင့် တန်ဖိုးရှိ
ပလေယာမျိုး' ဖြစ်ပေမယ့်
'ပွဲဖြတ်နိုင်တဲ့ ကြယ်ပွင့်'တော့
ဘယ်တော့မှဖြစ်လာမှာ
မဟုတ်ဘူး၊

ဒီတော့ သူ့ကိုတောက်လျှောက်
အားကိုးပီး Set pieces ကအစ
ကန်တင်ခိုင်းတဲ့ ဆလော့တ်ရဲ့
တိုက်စစ် ဒီနှစ်အလွန်ယေဘုယျ
ဆန်သွားတာ အဆန်းတော့
မဟုတ်ဘူး၊

၃) အပြောင်းအရွှေ့စီမံခန့်ခွဲမှု
အမှားများ..

၂ ခုရှိတယ်၊
တခုက လူချို(ဒီအက်စ်)ကို
ရောင်းလိုက်တာ၊

ဘယ်လိုဆုံးဖြတ်ချက်လဲ?
ဘယ်သူ့ဆုံးဖြတ်ချက်အဓိကလဲ?
မသိနိုင်ပေမယ့် Wise ဖြစ်တဲ့
ဆုံးဖြတ်ချက်တော့ မဟုတ်ဘူး၊

ဆာလာက မနှစ်က
ဆိမ့်နေအောင်ကောင်းတယ်ဆိုတာ
ငြိမ်းမယ့်ဆီမီးခွက် ထတောက်မှန်း
ဘောလုံးရည်ဝသူတိုင်း သိတယ်၊
အသက်ရွယ်၊
ကစားနိုင်အားနဲ့ ညှစ်ထုတ်စွမ်းရည်?
ကုန်နေပီ၊

နောက် ဂတ်ပို?
သူက စက်ရုံထုတ်ခြေစွမ်း..
နှစ်တိုင်း ဒါပဲ၊
ဒီလောက်ပဲ၊
ထပ်မရနိုင်တော့ဘူး၊
ကုန်ပီ၊

အဲ့လိုအခြေအနေမှာ
လူချိုကို ဘိုင်ယန်ရောင်းတဲ့
ဆုံးဖြတ်ချက်.?

ရောင်းမယ့်ရောင်း
ဘာမှထပ်မျှော်လင့်လို့မရတော့တဲ့
ဂတ်ပိုရောင်းချင်ရောင်း..
ဒါမှမဟုတ်
ကြံရည်စက်ထဲက ထွက်လာတဲ့
ကြံဖတ်လို ညှစ်စရာကုန်သွားတဲ့
ဆာလာရောင်း..

ခုတော့ အသက်နဲ့ခြေစွမ်း
စွမ်းဆောင်ရည်အရ
Prime Time ရောက်နေတဲ့
လူချိုကို ရောင်းလိုက်တော့.?
ဒီရာသီ လီဗာပူးလ်တောင်ပံတိုက်စစ်
ချန်ပီယံလူအင်အားနဲ့
ချန်ပီယံစွမ်းဆောင်ရည်
မရှိဖြစ်သွားတယ်၊

နောက်တခုက လူဝယ်တဲ့အမြင်?
Balance တခြမ်းစောင်းကြီး၊

တိုက်စစ်အတွက်
ပေါင်သန်း ၂၀၀ နီးပါးနဲ့
တပြိုင်နက်တည်းသုံးဖို့ခက်တဲ့
အဓိကတိုက်စစ်မှူး ၂ ယောက်
ဝယ်ခဲ့ပေမယ့်
ခံစစ်အတွက် လူမဝယ်ခဲ့ဘူး၊

အချက်အလက်အရ
ဒီရာသီမှာ PL ရှုံးပွဲ ၁၁ ပွဲထိ
ရှိလာတယ်၊
ဒါ ပီးခဲ့တဲ့ ၂၄ နှစ်တွင်း
ရာသီမကုန်ခင်ရှုံးပွဲ ၁၁ ပွဲမရှိခဲ့ဖူးတဲ့
လစ်ဗာပူးလ်အတွက်
၂၁ ရာစုမှာအဆိုးရွားဆုံး
ကြုံခဲ့ရတဲ့ မှတ်တမ်းပဲ၊

ပေးဂိုးလည်း ၄၇ ဂိုး၊
ပေးဂိုး ၄၇ ဂိုးဆိုတာ
ရုန်းကန်ခဲ့ရတဲ့ ၂၀၂၂-၂၃ ရာသီက
၃၈ ပွဲ ၄၇ ဂိုးထက်
ပိုများပီး ပိုဆိုးတဲ့ရလဒ်ပဲ၊

နောက် Set-pieces
(တည်ကန်ဘော)တွေကနေ
၁၇ ဂိုးပေးထားရတယ်၊
ဒါ ပရီမီးယားလိဂ်ခေတ်မှာ
လီဗာပူးလ်ရဲ့ နောက်တန်းရဲ့
အဆိုးဆုံး Record ပဲ၊

Clean Sheet (ပေးဂိုးမရှိပွဲ)ဆိုလည်း
ဒီရာသီ ကစားပီးသမျှ
ပွဲအားလုံးရဲ့ ၂၉% ပဲရှိတယ်၊

ဗန်ဒိုက် + ကနူတေးအတွဲမှာ
ဗန်ဒိုက်က မနှစ်ကတည်းက
ကျပီ၊

ပွဲကိုဖတ်နိုင်စွမ်းနဲ့
အမြင်ကျယ်ဉီးဆောင်နိုင်စွမ်း
ဆက်ရှိနေပေမယ့်
အဓိက အမြန်နှုန်းကျသွာတယ်၊
ဘောလုံးလမ်းကြောင်းဖျက်ဖို့
သိနေမြင်နေပေမယ့်
မလိုက်နိုင်တော့ဘူး၊

ကနူတေးကတော့
ခွန်အားနဲ့ အမြန်နှုန်း(Pace)
ကောင်းပေမယ့်
Foul play များတယ်၊
ပီးတော့ တယောက်တည်းထိန်းနိုင်တဲ့
Vision မျိုးလည်းမရှိဘူး၊

ဗန်ဒိုက်နေရာ ထိန်းဖို့
(ဒါမှမဟုတ်) Push လုပ်ဖို့အတွက်
ဗဟိုနောက်ခံလူ
World Class တယောက်
မဖြစ်မနေ ခေါ်ဖို့လိုတယ်၊

ဒါမဲ့ တခြမ်းစောင်းကြီး..
တွဲကစားဖို့ (ခက်တဲ့) မဖြစ်နိုင်တဲ့
World Class တိုက်စစ်မှူး
၂ ယောက်ကြီး တပြိုင်တည်းခေါ်ပီး
နောက်တန်းလိုအပ်ချက်
လျစ်လျူရှု ပျက်ကွက်ခဲ့တဲ့အခါ.?

ဘောလုံးတသင်းအောင်မြင်မှုက
One For All, All For One ဖြစ်ဖို့
လိုပါတယ်၊

ကစားသမား
တဉီးတယောက်ချင်းစီအားကနေ
အသင်းအစုအဖွဲ့အားတခုတည်ဖို့.?

လာမယ့်ရာသီ
လစ်ဗာပူးလ် Downgrade မှသည်
Upgrade ဖြစ်ဖို့
လိုအပ်ချက်နဲ့ အမှားတချို့
ပြင်ဆင်နိုင်လိမ့်မယ်လို့
မျှော်လင့်ရင်း..?


၁)"ငါ့အဖေက သားသတ်ရုံမှာလုပ်တယ်၊ငါ့အမေက ကျောင်းမှာရုံးအကူ(ကျောင်းစာရေး)ပေါ့..ငါတို့ မိသားစုက မချမ်းသာဘူးဒါမဲ့ နွေးထွေးကြတ...
28/04/2026

၁)

"ငါ့အဖေက သားသတ်ရုံမှာ
လုပ်တယ်၊
ငါ့အမေက ကျောင်းမှာရုံးအကူ
(ကျောင်းစာရေး)ပေါ့..
ငါတို့ မိသားစုက မချမ်းသာဘူး
ဒါမဲ့ နွေးထွေးကြတယ်"

"ငါငယ်ငယ်က ဘောလုံးကို
လုံးဝစိတ်မဝင်စားဘူး၊
ငါ့အရပ်မောင်းနဲ့လိုက်တဲ့
ဘက်စကက်ဘောပဲ
သည်းသည်းမည်းမည်းကစားခဲ့တာ..
ဒါကြောင့် ဘောလုံးဘက်ရောက်တာ
နောက်ကျခဲ့တယ်"

၂)

"ဘောလုံးဘက်ဘယ်လို
စိတ်ရောက်ခဲ့လဲမေးရင်?
မာရီယိုကမ်ပတ်စ်ကစားတာ
မြင်ပီး ရောက်လာခဲ့တာပဲ"

"နဲဝဲလ်စ်အိုဘွိုင်းကိုရောက်တော့
(နယူးဝဲလ်စ်အိုဘွိုင်းလို့
အသံမထွက်ပါ)
အသက် ၁၉ နှစ်ပြည့်ပီ၊
အဲ့မှာ အဝလွန်နေတော့
ဘီအဲလ်ဆာက ငါ့ကို
'Gordo'(Fatty) လို့ခေါ်ခဲ့တယ်"

"ဘောလုံးနဲ့ အစပိုင်းနေ့တွေက
ပျော်စရာမကောင်းခဲ့ဘူး၊
ငါ ရိုဆာရီယို
(မက်ဆီမွေးရပ်မြေ)ရောက်တော့
အိမ်ကိုအသေလွမ်းပီး
ဘာမှအာရုံစိုက်နိုင်စွမ်းမရှိဘူး၊
ခြေစွမ်းလည်းမပြနိုင်လို့
ရာသီဝက်အသင်းသေးမှာ
အငှားနဲ့သွားကစားလိုက်ရတယ်"

"ငါ့ဘဝအစက
ရေးဗားပလိတ်ကနေ
ဘိုကာဂျူနီယာကိုပြောင်းတာပဲ၊
အဲ့မှာ 'Batigol' ဆိုပီးဖြစ်စေမယ့်
နည်းပြတာဘာရိစ်နဲ့တွေ့တယ်"

"အရင် ငါကဘောလုံးကို
ခွန်အားတခုတည်းသုံးပီး ဆော့တာ၊
သူနဲ့တွေ့မှ ဘောလုံးမှာ
ခွန်အားထက်ဥာဏ်ပညာ(သိမြင်မှု)နဲ့
တခြား နည်းစနစ်ပိုင်းသင်ယူမှုတွေ
ပိုအရေးကြီးမှန်း သိခဲ့တယ်"

"တကယ်တော့ ဘောလုံးက
ခေါင်းနဲ့ကန်တာပါ"

၃)

"လူတွေက ငါ့ကိုဘောလုံးရဲ့
သစ္စာတရားလို့ ခေါ်ကြတယ်..
ဒီတင်စားမှုကို ငါကြိုက်တယ်၊
ဒါ ချီးမြှင့်မှုလို့ပဲ မှတ်ယူတယ်"

"၉၃ ဖီအိုစီးရီးဘီဆင်းတော့
ငါ ကမ်းလှမ်းမှုတွေ
အများကြီးရတယ်၊
အေစီ ရီယဲလ်နဲ့ မန်ယူအပါ
အသင်းကြီးတွေရဲ့
အမှတ်တံဆိပ်ပါတဲ့
စာရွက်တွေအထပ်လိုက်
ငါ့စားပွဲပေါ်ရောက်လာတယ်၊
ငါရွေးရုံပဲ..
ဒါပေမယ့် ငါအေးဂျင့်ကို
တခွန်းပဲပြောလိုက်တယ်"

"ငါက သူရဲဘောကြောင်တဲ့ကောင်
မဟုတ်ဘူး..
ဖီအိုကို စီးရီးအေပြန်မပို့ဘဲနိုင်ဘဲ
ငါတယောက်တည်း ကိုယ်လွတ်ရုန်း
ဘယ်တော့မှ မထွက်ဘူး"

"Florence မြို့ကို
ငါ့ရဲ့ ချစ်သူတယောက်လိုပဲ
အမြဲသဘောထားတယ်၊
ဒီမြို့အပေါ်ထားတဲ့
ငါ့ချစ်ခြင်းနဲ့သစ္စာတရားကို
ရှင်းပြစရာမလိုလောက်အောင်
ပါပဲ"

"ဖာဂူဆန်က ဖုန်းဆက်ပီး
မန်ယူလာဖို့
လိုလိုလာလားခေါ်တုန်းက
ငါငြင်းတယ်၊
ဘာလို့လဲသိလား?
ဖီအိုနဲ့အတူ စီးရီးအေလိဂ်ဖလား
ရချင်ခဲ့လို့ပဲ"

၄)

"ဖီအိုကထွက်တဲ့အချိန်တွေက
ဘဝမှာ ပြန်မတွေးချင်ဆုံး
မှတ်ဉာဏ်တွေပဲ.."

"ဖလော့ရင့်စ်မှာ ငါ ၉ နှစ်ကြာတယ်၊
ဥက္ကဌဗစ်တိုရီယိုချီခီဂိုရီက
အသင်းကို လိဂ်ဖလားရတဲ့
လူစာရင်းမျိုး
တည်ဆောက်ပေးမယ်လို့
ကတိတွေအထပ်ထပ်ပေးခဲ့ပေမယ့်
အသင်းက နောက်ပိုင်းမှာ
ငွေကြေးပိုင်းအခြေအနေ
ပိုပိုပီး ဆိုးရွားလာတယ်"

"အဲ့ချိန်မှာ ရိုးမားကနေ
ကာပယ်လိုက ကတိတခုတည်းနဲ့
လာဖို့ခေါ်တယ်၊
'မင်းလာရင် ချန်ပီယံဖြစ်အောင်
လုပ်ပေးမယ်' တဲ့၊
ရဲရဲတောက် ကတိမျိုးပဲ၊
ငါ့အသက်က ၃၁..
ဖီအိုငွေကြေးအခြေအနေနဲ့
ငါ့ဘောလုံးသမားသက်တမ်း?
ငါ - ရွေးချယ်စရာမရှိခဲ့ဘူး"

"ဖီအိုကထွက်တော့
အသင်းနဲ့အတူ
ဖလားကြီးကြီးမားမားမရခဲ့ပေမယ့်
(အဲ့အချိန်)အသင်းကြီးတွေ
အာရုံစိုက်ခံရတဲ့
ပြိုင်ဘက်ကောင်းအဖြစ်
ကူညီပေးနိုင်ခဲ့လို့
ငါကိုယ့်ငါ အောင်နိုင်သူအဖြစ်
သတ်မှတ်တယ်.."

"ငါ့ခန္ဓာကိုယ်က
ရိုးမားကိုပြောင်းခဲ့ပေမယ့်
ငါ့နှလုံးသားကတော့
ဖလောရင့်စ်မှာပဲကျန်ခဲ့တယ်"

၅)

"ခုတော့ ငါ့အတွက်
လမ်းလျှောက်ရတာကို
ခက်ခဲနေပီ..
ဘာလို့လဲဆို ငါကန်တုန်းက
လုပ်နိုင်တာထက်
ပိုပီးပြင်းပြင်းထန်ထန်
လုပ်ခဲ့မိလို့ပဲ.."

"တခါတလေ နာကျင်မှု
ပြင်းထန်လွန်းလို့
ဆရာဝန်ဆီသွားပီး
ငါ့ခြေထောက်ဖြတ်ပေးဖို့အထိ
တောင်းဆိုခဲ့ဖူးတယ်"

(ဖီအိုမှာကစားစဉ်မှာ
သူမပါရင် အသင်းရလဒ်
မကောင်းမှာစိုးလို့
ရခဲ့တဲ့ဒဏ်ရာတွေကို
ဆေးထိုးပီး ဆက်ကစားတဲ့
ပွဲတွေရှိခဲ့တယ်၊
အဲ့လို ဒဏ်ရာတွေကို
သေချာမကုဘဲ
ဆေးထိုးကစားခဲ့တဲ့ရလဒ်က
အနားယူပီးနောက်
ခြေကျင်းဝတ်နာကျင်မှုဒဏ်ကို
အပြင်းထန်ဆုံးခံစားခဲ့ရတယ်)

"ငါ့အောင်မြင်မှုလျှို့ဝှက်ချက်?
- မရှိပါဘူး -
လေ့ကျင်းခန်းတရက်မပြတ်
ဆင်းတယ်၊
အစားအသောက်
အနေအထိုင်
အအိပ်အနေနဲ့ပတ်သက်ရင်
စည်းကမ်းရှိရှိနေတယ်၊
ဂရုစိုက်တယ်၊ ပီးတော့
လူတွေကိုဘယ်တော့မှ
အစီအစဉ်တွေမပြောဘဲ
ရလဒ်ပဲထုတ်ပြဖို့ ကြိုးစားတယ်၊
ဒါတွေကပဲ ဘောလုံးလောကမှာ
ထိပ်တန်းရောက်စေတဲ့
မှော်ဆန်သော အပြုအမူနဲ့
အတွေးအမြင်တွေပါပဲ.."

"နောက် ငါလုပ်လေ့ရှိတာတခုက
ပွဲမတိုင်ခင် ညမှာအခန်းထဲရှိသမျှ
မီးအကုန်ပိတ်လိုက်တယ်၊
ပီး ပွဲမှာဘာတွေဖြစ်လာနိုင်မလဲ?
စိတ်ကူးထဲ ကြိုပုံဖော်ကြည့်တယ်၊
အဲ့အလေ့အထက
ကွင်းထဲ တကယ်ဖြစ်လာတဲ့အခါ
တုံ့ပြန်ဖို့ ငါ့ကိုစက္ကန့်ပိုင်းလောက်
ပိုမြန်သွားစေတယ်.."

၆)

အပေါ်အကြောင်းအရာတွေက
အီတလီသတင်းထောက်နဲ့
စာရေးဆရာ
အင်ဒရေအာရိုမာနိုရေးတဲ့
Batistuta: L'ultimo centravanti
(The Last Centre-Forward):
စာအုပ်ထဲက
အာဂျင်တီးနားဂန္ထဝင်တိုက်စစ်မှူး
ဘာတစ္စတူတာရဲ့ ငယ်ဘဝ၊
ဖီအို ဖလော့ရင့်စ်နဲ့
မြဲမြံတဲ့ သူ့သစ္စာတရား..
နောက် နေဝင်ချိန်ကယ်ရီယာနဲ့
ရောမမြို့သိမ်းပိုက်ခြင်းစတဲ့
အခန်းလိုက်အသေးစိတ်
ရေးသားထားတဲ့ထဲက
ကောက်နုတ်ချက်တွေပါ၊

ဘာတစ္စတူတာလို ကစားဟန်မျိုးနဲ့
9 Role တိုက်စစ်မှူးမျိုးက
ဒီနေ့ခေတ်မှာ မရှိတော့ပါဘူး၊

ဒါကြောင့်လည်း
'The Last Of Traditional
Jersey Number 9' လို့
တင်စားခဲ့ကြတာပါ၊

ခန္ဓာကိုယ်အလွန်တောင့်တင်းပီး
ပြိုင်ဘက်နောက်ခံလူတွေထက်
သာလွန်တဲ့ ခွန်အားရယ်၊
ဧရိယာတွင်း ဂိုးဘယ်လိုသွင်းမလဲ
အလိုလျောက်သိစိတ်
(Natural goal-scoring instinct)ရယ်
ဘယ်/ညာခြေ ၂ ဖက်လုံးနဲ့
အားပါပြင်းထန်တဲ့ကန်ချက်ရယ်
ဘယ်သူနဲ့မှ မတူတဲ့
တိုက်စစ်ကစားဟန်မျိုးနဲ့
ဂိုးပေါင်းများစွာသွင်းခဲ့တာပါ၊

၉၀ ပြည့်လွန် စီးရီးအေညများနဲ့
One of the kind တိုက်စစ်မှူး
ဂါဘရီယဲလ်ဘာတစ္စတူတာ (သို့)
ဘာတီဂိုးလ်ရဲ့ အတိတ်နေ့ရက်များ..

လွမ်းဖွယ်ပါပဲ၊


'One for all, All for one'(အများအတွက်တယောက်တယောက်အတွက်အများ)ဆိုတာစကားအလှသက်သက်ပြောဖို့ သုံးဖို့မဟုတ်ဘူးဗျ..သူ့အနက်အဓိပ္ပ...
22/04/2026

'One for all, All for one'
(အများအတွက်တယောက်
တယောက်အတွက်အများ)ဆိုတာ
စကားအလှသက်သက်
ပြောဖို့ သုံးဖို့မဟုတ်ဘူးဗျ..

သူ့အနက်အဓိပ္ပါယ်သားက
သိပ်ကိုပြည့်ဝလေးနက်လွန်းပီး
လုပ်ယူဖို့ခက်တယ်..

မက်ဆီနဲ့ ကမ္ဘာ့ဖလားအောင်ပွဲ?
မလွယ်ကူခဲ့ဘူးဆိုတာ
လူတိုင်း သိပါတယ်၊

(တချို့သောသူတွေ
အမနာပတွေပြောတဲ့
- ၇/၈ ပွဲပြိုင်ပွဲတို့
- ဒိုင်ကူတာတို့
- ကံကောင်းတာတို့ဆိုတာ
Bu****it တွေ..
ထားလိုက်)

ဒီနေ့ သူတို့ကမ္ဘာ့ဖလားရယူရမှာ
ရုပ်ပိုင်းဆိုင်ရာ
ထိခိုက်မှု ပြိုလဲမှုနဲ့
ကြံ့ကြံ့ခံဖြည့်တင်း
ကျော်လွှားနိုင်မှုပိုင်းထက်
အရေးကြီးဆုံး
စိတ်ဓာတ်ပိုင်းဆိုင်ရာ
မာကြောမှု ခံနိုင်ရည်အား
စေးကပ်မှုနဲ့ တုန့်ပြန်မှုအကြောင်း
နည်းနည်းပြောမယ်၊

မက်ဆီနဲ့ အာဂျင်တီးနား
ကမ္ဘာ့ဖလားရရေးမှာ
ကြီးမားသော စိတ်အဟုန်ကိုဖြစ်စေတဲ့
အခြေအနေကြီး ၃ ရပ်ရှိခဲ့တယ်၊

၁)
ပထမအခြေအနေက
၂၀၂၁ ကိုပါဖလားဖိုင်နယ်မှာ
ဖြစ်တာ၊

အဲ့ပွဲက မက်ဆီအတွက်
Make Or Break ပဲ၊
ရှုံးရင် ပီးပီ၊
ရှုံးတာနဲ့ လက်ရွေးစင်
ကစားသမားဘဝနားပီ၊

နားရင်.?
မက်ဆီဆိုတဲ့အမည်နာမက
ကြီးကျယ်ထင်ရှားတဲ့
ဘောလုံးသမားအဖြစ်
သမိုင်းထဲထင်ကျန်ရစ်မှာဆိုပေမယ့်
ခုလို ကမ္ဘာ့ဖလားပိုင်ရှင်နဲ့
ကိုပါဖလား Back to Back
၂ ထပ်ကွမ်းပိုင်ရှင် တုနှိုင်းမမီသူ
(Unparalleled success)မျိုး
ရလာ ဖြစ်လာမှာတော့
မဟုတ်ဘူး၊

၂၀၂၁ ကိုပါဖိုင်နယ်ပွဲက
ဘရပ်ဇဲလ် Maracanã ကွင်းကြီးမှာ
ကစားရတာ၊

အဲ့ပွဲမစခင်
အဝတ်လဲခန်းထဲမှာ မက်ဆီက
သူ့အသင်းသားတွေကို
ကမ္ဘာကျော်မယ့်မိန့်ခွန်း
ပြောတယ်၊

"ငါတို့ ဒီပြိုင်ပွဲအတွက်
အိမ်နဲ့ဝေးခဲ့တာ ၄၅ ရက်ရှိပီ၊
ငါတို့ထဲကတချို့ဆိုရင်
ကိုယ့်သားသမီးမွေးတာတောင်
မတွေ့ရလိုက်ဘူး၊
(ဒီဘူးကိုပြောတာ၊
အဲ့ပြိုင်ပွဲကာလမှာ
ဒီဘူးက သမီးလေးမွေးတယ်၊
ကိုဗစ်ကာလမို့မပြန်ရဘူး)
ဒါတွေအားလုံးက
ဘာအတွက်လဲ?
ဒီနေ့ဖလားရဖို့အတွက်ပဲဖြစ်ရမယ်"

"နောက် ငါတို့ ဒီပြိုင်ပွဲကို
အာဂျင်တီးနားမှာ
ကစားရဖို့ရှိခဲ့ပေမယ့်
ဘုရားသခင်က ဘရပ်ဇဲလ်ကို
ရွှေ့ပေးလိုက်တယ်၊
ဘာလို့လဲဆိုတော့ -
ငါတို့ ဘရပ်ဇဲလ်ကို
သူ့ကွင်းထဲမှာပဲအနိုင်ယူပီး
ဖလားကိုင်မြှောက်တာကို
မြင်ချင်လို့ဖြစ်ရမယ်"

(၂၀၂၁ ကိုပါပွဲက ပထမ
ကိုလမ်ဘီယာနဲ့ အာဂျင်တီးနား
ပူးတွဲကျင်းပဖို့ပဲ၊
ဒါမဲ့ ပြိုင်ပွဲကျင်းပခါနီးမှ
ကိုလမ်ဘီယာမှာ
ဆန္ဒပြပွဲတွေဖြစ်ပီး
အာဂျင်တီးနားကလည်း
ကိုဗစ်ပန်ဒမစ်ကြောင့်
နှုတ်ထွက်ချိန် ပြိုင်ပွဲကစားခါနီး
၁၃ ရက်လိုမှ ကွင်းနဲ့တခြား
အခြေခံအဆောက်ဉီတွေရှိတဲ့
ဘရာဇဲလ်ကအိမ်ရှင်အဖြစ်
လက်ခံခဲ့လို့ ကျင်းပနိုင်ခဲ့တယ်)

"ဒီနေ့ ငါတို့ဒီဖလားကို
အိမ်ကို ယူသွားကြမယ်၊
ငါတို့မှာ ဘာသံသယမှ
ရှိစရာမလိုဘူး.."

အဲ့လိုအသင်းသားတွေကို
မိုတီမိန့်ခွန်းပေးနေချိန်မှာ
ဒီပေါလ်ရဲ့ ဖွင့်ဟဝန်ခံချက်အရ -
"မက်ဆီရဲ့မျက်ဝန်းတွေဟာ
ထူးထူးခြားခြား အရောင်တောက်နေပီး
အရင်ကထက်ပိုပြင်းထန်တဲ့
စိတ်ခွန်အားတွေမြင်ခဲ့ရပီး
အသင်းသားအားလုံးရင်ထဲလည်း
မက်ဆီအတွက်ဆိုရင်
အသေခံရမယ်စစ်မြေပြင်ကိုတောင်
သွားရဲတဲ့စိတ်ဓာတ်မျိုးထိ
ဝင်သွားခဲ့ကြတယ်" လို့ဆိုတယ်၊

အဲ့မိန့်ခွန်းရယ်
အဲ့အခြေအနေမှာဖြစ်ခဲ့တဲ့
အသင်းလိုက်စိတ်ခွန်အားရယ်
၂၈ နှစ်ကြာပီးမှရလိုက်တဲ့
ကိုပါအောင်ပွဲရယ်က
နောက် ၂၀၂၂ ကမ္ဘာ့ဖလားရဖို့
အရေးကြီးဆုံးနဲ့ အခြေခံအကျဆုံး
အုတ်မြစ်ဖြစ်ခဲ့တယ်တဲ့၊

၂)
ဒုတိယဖြစ်ရပ်က
၂၀၂၂ ကမ္ဘာ့ဖလားပွဲဉီးထွက်
ဆော်ဒီနဲ့ရှုံးပွဲအပီးမှာဖြစ်တာ၊

အဲ့ပွဲပီးအားလုံး
အရုပ်ကြိုးပြတ်ဖြစ်ကုန်ကြတယ်၊
အသင်းသားအားလုံးပွဲပီး
ကမ့်မပြန်ကြဘဲ
ကိုယ့်မိသားစုဆီကိုယ်ပြန်ပီး
တရက်နားခဲ့ကြတယ်၊

နောက်နေ့ကြမှ
အားလုံးလူပြန်စုပီး
ဘာတွေဖြစ်ခဲ့လဲ?
ဘယ်လိုကစားမိခဲ့လဲ?
၃၆/၃၇ ပွဲဆက်ရှုံးပွဲမရှိပီးမှ
ဘာလို့ ခုပွဲဆိုးဆိုးဝါးဝါး
ရှုံးပွဲကြုံရတာလဲ?
မေးခွန်းတွေထုတ်ကြတယ်၊
အဖြေတွေဝိုင်းပေးကြတယ်၊
အဲ့ကနေ ယုံကြည်မှု
ပြန်တည်ဆောက်ပီး
ရှုံးနိမ့်မှုကနေရတဲ့
အပြုသဘောဆောင်တဲ့
ကောင်းကွက်တွေပြန်ရှာကြတယ်၊

အဲ့ညမှာ မက်ဆီက အသင်းရဲ့
WhatsApp Group ထဲ
စာအရှည်ကြီးတစောင်ပို့တယ်၊

"အသင်းနဲ့သူတို့တွေကြား
ဖြတ်သန်းခဲ့ရတဲ့အရာတွေနဲ့
ရှေ့မှာဘယ်လိုအရာတွေရှိနေလဲ?
ဆိုတာတွေကို ရေးထားတဲ့
စာအရှည်ကြီးပါတဲ့၊
အဲ့မှာ အသင်းသားအားလုံးကလည်း
ထောက်ခံကြ အားပေးကြ
ဝိုင်းဝန်းကြနဲ့ အပြန်အလှန်
ယုံကြည်စိတ်ပြင်းပြင်းပြပြဝင်လာကြပီး
အခြေအနေတွေအားလုံးက
အဲ့ချိန်ကစပီးပြောင်းလဲသွားတယ်
လို့ဆိုတယ်"

၃)
နောက်ဆုံးနဲ့ အခက်ခဲဆုံးက
ပြင်သစ်နဲ့ကစားမယ့်ဖိုင်နယ်ပွဲမတိုင်မီ
အဝတ်လဲခန်းထဲ စည်းလုံးမှုနဲ့
စိတ်ဓာတ်မြှင့်တင်မှုအပိုင်းပဲ၊

မက်ဆီ တည်တည်ငြိမ်ငြိမ်နဲ့
စကားအများကြီးပြောခဲ့တယ်၊

အသင်းသားတွေနဲ့
သူ့မိသားစုဝင်တွေရဲ့
အနစ်နာခံမှုတွေ ဆုံးရှုံးမှုတွေ
ဒီဖလားရဖို့
နှစ်ပေါင်းများစွာတိုင်အောင်
ကျကုပ်ကျခဲနဲ့
အားထုတ်ကြိုးစားခဲ့ရပုံတွေကို
ပြန်ပြောင်းပြောပြပြီး
နောက်ဆုံးမှာ -
"ဘာပဲဖြစ်ဖြစ် မင်းတို့အားလုံး
ငါ့အတွက် လုပ်ပေးခဲ့သမျှကို
ငါဒီနေ့မှာ ..
အထူးကျေးဇူးတင်တယ်" လို့လည်း
ပြောရော အသင်းသားတွေ
မျက်ရည်ကျခဲ့ကြတယ်၊

အခြေအနေကနေ
သူ့အသင်းသားအတွက်
ပီးတော့
သူ့တို့ခေါင်းဆောင်အတွက်
ဘာမဆိုရင်ဆိုင်ကျော်ဖြတ်မယ်ဆိုတဲ့
စိတ်ဓာတ်ခွန်အားက
အာဂျင်တီးနားနဲ့မက်ဆီကို
ကမ္ဘာ့ဖလားရစေခဲ့တယ်၊

၄)
'One for all, All for one'

မက်ဆီအတွက်
အာဂျင်တီးနားအသင်း
အာဂျင်တီးအသင်းအတွက်
မက်ဆီ..

သူတို့
ဘယ်လိုတွေဖြတ်သန်းခဲ့ရပီး
ဘယ်လိုတွေ
ကြံ့ကြံ့ခံကျော်လွှားခဲ့ရလဲ?

ထိုက်တန်တဲ့အောင်မြင်မှုထူး
တခုနောက်ကွယ်မှာ
စစ်မှန်ပီး စေးကပ်လွန်းတဲ့
စိတ်ပိုင်းဆိုင်ရာ
ညီညွတ်အားကောင်းမှုတခု
ရှိတယ်၊

ကမ္ဘာ့ဖလားဆိုတာ
ထိုက်တန် စစ်မှန်သူတို့ဖလားပါ၊


Address

Yangon

Website

Alerts

Be the first to know and let us send you an email when Monday Channel Sports Journal posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Monday Channel Sports Journal:

Shortcuts

Share

Category