17/01/2025
ယူနိုက်တက်ပရိသတ်တွေအတွက်တော့ ရိုလာကိုစတာဖြစ်ခဲ့တဲ့ပွဲပါပဲ။ လီဗာပူး၊ အာဆင်နယ်တို့နဲ့ပွဲတွေမှာ ပြသတဲ့ ခြေစွမ်းမျိုးကို ယူနိုက်တက်တို့ ဒီပွဲမှာ မပြသနိုင်ခဲ့ဘဲ ကံဆိုးရင် ဆောက်သမ်တန်ကို ဂိုးပြတ်ရှုံးသွားနိုင်တဲ့ အနေအထားမျိုးနဲ့ ရင်ဆိုင်ခဲ့ရပါတယ်။
ပထမပိုင်းမှာလည်း ထောင့်ကန်ဘောကနေ အူဂါတေးနဲ့ထိပြီး ဂိုးဝင်သွားခဲ့တာကြောင့် တောက်လျှောက် ရုန်းကန်ခဲ့ရပါတယ်။ ယူနိုက်တက်တို့ ရှုံးပွဲတွေ့ပြီလို့ အားလုံးက ထင်မှတ်ခဲ့ကြပေမယ့် (၈၂) မိနစ်မှာတော့ အာမတ်က ချေပဂိုးသွင်းယူပေးခဲ့ပါတယ်။
မိနစ် (၉၀) မှာတော့ အဲရစ်ဆင်ရဲ့ ဖန်တီးပေးမှုကနေ အာမတ်က ကြုံသလို ကန်သွင်းရင်း ဦးဆောင်ဂိုးရခဲ့သလို နောက် (၄) မိနစ်မှာတော့ ပြိုင်ဘက်နောက်ခံလူကို သူကိုယ်တိုင်ဖိအားပေးပြီး ရလာတဲ့ ဘောလုံးကို အာမတ်က ဂိုးလွတ်ကြီးထဲ ကန်သွင်းနိုင်ခဲ့ပါတယ်။
ဒီပွဲမှာ ချီးကျူးရမှာက အမော်ရင်ရဲ့ လူစားလဲမှုတွေပါပဲ။ အပြောင်းအလဲတွေကို ရဲရဲဝံ့ဝံ့ လုပ်ခဲ့ပြီး ဒါတွေက အသင်းကို ချက်ချင်းအကျိုးပြုစေခဲ့ပါတယ်။ အန်တိုနီ၊ ဇက်ဇီ၊ အဲရစ်ဆင်တို့ကို ထည့်လိုက်တာက ပွဲကို အပြောင်းအလဲဖြစ်စေခဲ့ပြီး (၂၀၂၅) ရဲ့ ပထမဆုံး အိမ်ကွင်းပွဲမှာ ယူနိုက်တက်တို့ နိုင်ပွဲရရှိခဲ့ပါတယ်။
