GoalZone Sports, Yangon (2026)

01/10/2026

မန်ချက်စတာယူနိုက်တက်ရဲ့ ကွင်းလယ်ပိုင်းမှာ ပရိသတ်တွေ အားအကိုးချင်ဆုံးဖြစ်နေတဲ့ ကားလို့စ် ဘာလီဘာဟာ ကာရင်တန်လေ့ကျင့်ရေးကွင်းဆီ ရောက်ရှိနေပြီး အသင်းဖော်တွေနဲ့အတူ လေ့ကျင့်ခန်း အပြည့်အဝ ဆင်းနေပါပြီ။ ကွင်းလယ်အင်ဂျင်သစ်တစ်ယောက်အနေနဲ့ စပါးအသင်းနဲ့ပွဲစဉ်မှာ ပွဲထွက်လူစာရင်းမှာ ပါဝင်ကစားနိုင်ဖို့အတွက် ကိုယ်ခန္ဓာကြံ့ခိုင်မှု အပြည့်ရအောင် အပြင်းအထန် အာရုံစိုက် ကြိုးစားနေတာ တွေ့ရပါတယ်။

ကင်မရွန်းကွင်းလယ်ကြယ်ပွင့်ဟာ ပရီးမီးယားလိဂ်ရဲ့ ကွင်းလယ်ပြိုင်ဆိုင်မှုပြင်းထန်ပုံကို ကောင်းကောင်းသိထားသူဖြစ်ပြီး ကွင်းလယ်ခံစစ်ပိုင်းမှာ အကောင်းဆုံး ဒိုင်းသဖွယ် လိုက်ပါကာကွယ်ပေးနိုင်တဲ့ ကစားသမားပါ။ ပြိုင်ဘက်ဆီကနေ ဘောလုံးဆုံးရှုံးသွားတဲ့အချိန်တွေမှာ ချက်ချင်း ပြန်လည်လုယူဖျက်ထုတ်နိုင်စွမ်း မြင့်မားသလို၊ နောက်တန်းကနေ တိုက်စစ်အထိ လိုက်ပါကစားပြီး ဘောလုံးလမ်းကြောင်းတွေကို ပုံဖော်ပေးမယ့်သူအဖြစ် အသင်းအတွက် ကြီးမားတဲ့ ခွန်အားတစ်ခု ဖြစ်လာဖို့ အားလုံးက မျှော်လင့်နေကြပါတယ်။

ဘာလီဘာရဲ့ နောက်ထပ် အားသာချက်တစ်ခုကတော့ ကွင်းတွင်းကစားဟန်တင်မကဘဲ အသင်းတွင်း အငွေ့အသက်ကိုပါ ပြောင်းလဲပေးနိုင်စွမ်း ရှိနေတာပါ။ သူဟာ ပတ်ဝန်းကျင်သစ်နဲ့ မြန်မြန်ဆန်ဆန် ယဉ်ပါးကျွမ်းဝင်လာပြီး အမြဲတစေ ပျော်ပျော်နေတတ်တဲ့ စိတ်နေစိတ်ထား၊ အားတက်သရော ရှိလှတဲ့ အပြုအမူတွေကြောင့် ကာရင်တန်မှာရှိတဲ့ အသင်းဖော်တွေနဲ့ အတော်လေး အံဝင်ခွင်ကျ ဖြစ်နေပါပြီ။

ရှုံးနိမ့်နေတဲ့အချိန်တွေမှာတောင် အသင်းသားတွေရဲ့ စိတ်ဓာတ်ကို မြှင့်တင်ပေးနိုင်မယ့် သူ့ရဲ့ အပြုသဘောဆောင်တဲ့ စရိုက်လက္ခဏာဟာ ယူနိုက်တက်အတွက် တကယ့်ကို အဖိုးတန်တဲ့ အရည်အချင်းတစ်ခု ဖြစ်ပါတယ်။ အခုတစ်ပတ် ပွဲစဉ်မှာသာ ဘာလီဘာ ကွင်းလယ်ကနေ စတင်ခြေစွမ်းပြသခွင့် ရသွားမယ်ဆိုရင်တော့ ယူနိုက်တက်ပရိသတ်တွေ မျှော်လင့်စောင့်စားနေတဲ့ အားမာန်ပြည့် ကွင်းလယ်တိုက်ပွဲဝင်မှုပုံစံသစ်ကို စိတ်လှုပ်ရှားဖွယ် မြင်တွေ့ရတော့မှာ အသေအချာပါပဲ။

Photo Credit

Goal Zone

30/09/2026

တိုက်စစ်ပိုင်းမှာ ဂိုးရဖို့ ရုန်းကန်နေရတဲ့ မန်ချက်စတာယူနိုက်တက်ရဲ့ ပစ်မှတ်စာရင်းထဲကို မထင်မှတ်ထားတဲ့ နာမည်တစ်ခု ရောက်ရှိလာပါတယ်။ အဲဒါကတော့ ခရစ္စတယ်ပဲလေ့စ်ရဲ့ ပြင်သစ်တိုက်စစ်မှူး ဂျင်းဖိလစ် မာတေတာ ဖြစ်ပြီး လာမယ့် ဇန်နဝါရီ အပြောင်းအရွှေ့ကာလမှာ ခေါ်ယူဖို့ ယူနိုက်တက်ဘက်က စိတ်ဝင်စားမှု မြင့်တက်နေတာပါ။ အသင်းရဲ့ နည်းစနစ်ဒါရိုက်တာ ဂျေဆင် ဝီလ်ကော့စ် ကိုယ်တိုင်က ပရီးမီးယားလိဂ် အတွေ့အကြုံရှိပြီး ခန္ဓာကိုယ်ကြံ့ခိုင်မှု ကောင်းမွန်တဲ့ မာတေတာကို အထူးသဘောကျနေတာ ဖြစ်ပါတယ်။

တစ်ဘက်မှာလည်း မာတေတာရဲ့ ကိုယ်စားလှယ်အဖွဲ့က ပဲလေ့စ်ကနေ ထွက်ခွာခွင့်ရဖို့အတွက် ယူနိုက်တက်ဘက်နဲ့ ဆက်သွယ်မှုတွေ စတင်ပြုလုပ်ထားပြီး ဖြစ်ပါတယ်။ မာတေတာဟာ ပြီးခဲ့တဲ့ နှစ်နှစ်တာကာလအတွင်း အသင်းကနေ ထွက်ခွာဖို့ အကြိမ်ကြိမ် ကြိုးစားခဲ့ဖူးသလို သူ့ရဲ့ စာချုပ်သက်တမ်းကလည်း မကြာခင် ကုန်ဆုံးတော့မှာပါ။ ဒါကြောင့် ပဲလေ့စ်ဘက်ကလည်း ကစားသမားကို အလွတ်ပြောင်းရွှေ့ကြေးနဲ့ ဆုံးရှုံးရမယ့်အခြေအနေကို ရှောင်လွှဲဖို့ ဇန်နဝါရီမှာပဲ လက်လွှတ်ရောင်းထုတ်ဖို့ စဉ်းစားလာနိုင်ပါတယ်။

ယူနိုက်တက်ဘက်က မာတေတာကို ပစ်မှတ်ထားလာရခြင်းဟာ တိုက်စစ်ကစားသမားတွေရဲ့ အနာဂတ်နဲ့လည်း တိုက်ရိုက် ဆက်စပ်နေပါတယ်။ အသင်းမှာ ခြေစွမ်းပြသဖို့ ရုန်းကန်နေရတဲ့ တိုက်စစ်မှူး ဆက်စ်ကိုကို ဂျေဆင် ဝီလ်ကော့စ်က အသင်းကနေ လက်လွှတ်စေချင်နေပြီး တိုက်စစ်နေရာကို ပြန်လည်ပြင်ဆင်လိုတာပါ။ အဲဒီနေရာမှာ ပြိုင်ဘက်နောက်တန်းကို ဖိအားပေးနိုင်စွမ်းရှိပြီး ကိုယ်ခန္ဓာအားသာချက်နဲ့ ဘောလုံးလမ်းကြောင်းတွေကို ပုံဖော်ပေးနိုင်မယ့် မာတေတာကို ရွေးချယ်စရာတစ်ခုအဖြစ် စဉ်းစားလာခဲ့တာ ဖြစ်ပါတယ်။

ပရီးမီးယားလိဂ်ရဲ့ ကြမ်းတမ်းတဲ့ အခင်းအကျင်းမှာ အထိုင်ကျပြီးသား တိုက်စစ်မှူးတစ်ဦးကို ရရှိဖို့ဆိုတာ လက်ရှိယူနိုက်တက်အတွက် လက်တွေ့ကျတဲ့ ခြေလှမ်းတစ်ခု ဖြစ်လာနိုင်ပါတယ်။ အသက်အရွယ်အရ ရင့်ကျက်တဲ့အပိုင်းကို ရောက်ရှိနေတဲ့ မာတေတာအနေနဲ့ အိုးထရက်ဖို့ဒ်ရဲ့ ဖိအားဒဏ်ကို ဘယ်လောက်အထိ ခံနိုင်ရည်ရှိမလဲဆိုတာ စောင့်ကြည့်ရမှာ ဖြစ်ပေမယ့် ဂိုးဧရိယာထဲမှာ တိုက်ရိုက်ခြိမ်းခြောက်နိုင်တဲ့ သူ့ရဲ့ကစားဟန်က ယူနိုက်တက်တိုက်စစ်အတွက် ကောင်းမွန်တဲ့ အပြောင်းအလဲတစ်ခု ဖြစ်လာနိုင်ပါတယ်။

Photo Credit

Goal Zone

30/09/2026

မန်ချက်စတာယူနိုက်တက်ဂန္ထဝင်တိုက်စစ်မှူး ဝိန်း ရွန်နေးရဲ့ အားကစားစိတ်ဓာတ်နဲ့ သမာသမတ်ကျမှုကတော့ ဘောလုံးလောကသားတွေအတွက် စံထားလောက်တဲ့အထိ လေးစားစရာကောင်းပါတယ်။ မန်ချက်စတာစီးတီးအသင်းရဲ့ ဘဏ္ဍာရေးစည်းမျဉ်းချိုးဖောက်မှုစွပ်စွဲချက်တွေကြောင့် ၂၀၁၁-၁၂ ဘောလုံးရာသီ ပရီးမီးယားလိဂ်ချန်ပီယံဆုကို ပြန်လည်ရုပ်သိမ်းခံရမယ်ဆိုရင်တောင် အဲဒီဖလားဆုတံဆိပ်ကို လုံးဝလက်ခံမှာမဟုတ်ဘူးလို့ ရွန်နေးက ပြတ်ပြတ်သားသား ဖွင့်ဟပြောဆိုလာပါတယ်။

အဲဒီရာသီတုန်းက ရာသီသိမ်းဖို့ လေးငါးပွဲလောက်အလိုမှာ ယူနိုက်တက်ဟာ ခြောက်မှတ်၊ ခုနစ်မှတ်အထိ ပြိုင်ဘက်ကို အသာရပြီး ဦးဆောင်နေခဲ့တာပါ။ ဒါပေမဲ့ ရာသီအဆုံးသတ်ပိုင်းမှာ အမှားအယွင်းတွေဆက်တိုက်ဖြစ်ခဲ့ပြီး အခွင့်အရေးကို ကိုယ်တိုင်လက်လွှတ်ပစ်ခဲ့တာမို့ ချန်ပီယံဆုနဲ့ မထိုက်တန်ခဲ့ဘူးလို့ ရွန်နေးက ပွင့်ပွင့်လင်းလင်း ဝန်ခံသွားပါတယ်။ အသင်းပိုင်ရှင်တွေရဲ့ ပြဿနာကြောင့် စီးတီးကစားသမားတွေ ဆုတံဆိပ်လက်လွှတ်ရမယ်ဆိုရင် ကစားသမားအချင်းချင်းစာနာမိသလို၊ သူတို့ကိုယ်တိုင်လည်း ကွင်းတွင်းစွမ်းဆောင်ရည်အရ အပြည့်အဝမစွမ်းဆောင်နိုင်ခဲ့တာကြောင့် ဒီလိုဆုတံဆိပ်မျိုးကို လိုချင်စိတ်မရှိဘူးလို့ ဆိုပါတယ်။

ဒါ့အပြင် ယူနိုက်တက်ကစားသမားဘဝမှာ ကိုယ်တိုင်ချွေးထွက်ပြည့်အဝစိုက်ထုတ်ပြီး ရယူပေးခဲ့တဲ့ ပရီးမီးယားလိဂ်ချန်ပီယံဆု (၅) ကြိမ်နဲ့တင် အလွန်ကျေနပ်ပျော်ရွှင်နေပြီဖြစ်ကြောင်း ထုတ်ဖော်ပြောကြားခဲ့ပါတယ်။ ပြိုင်ဘက်ရဲ့ စည်းမျဉ်းချိုးဖောက်မှုကြောင့် ချန်ပီယံဆုကို ပြန်လည်လွှဲပြောင်းပေးလာရင်တောင် ဒါဟာ ကိုယ်တိုင်တိုက်ခိုက်ယူခဲ့တာမဟုတ်တဲ့အတွက် လက်ခံဖို့ စိတ်ထဲမှာ လုံးဝအဆင်ပြေမှာမဟုတ်ဘူးလို့ ရွန်နေးက ရှင်းရှင်းလင်းလင်း ရပ်တည်ပြသွားတာပါ။

ဒီလိုပြောကြားချက်ဟာ ပြိုင်ဘက်အသင်းရဲ့ အားနည်းချက်ကို အခွင့်ကောင်းမယူဘဲ အနိုင်အရှုံးကို အားကစားသမားပီသစွာ ရင်ဆိုင်လက်ခံတတ်တဲ့ ရွန်နေးရဲ့ ရင့်ကျက်မှုနဲ့ စိတ်ဓာတ်မြင့်မားမှုကို ပေါ်လွင်စေပါတယ်။ ကိုယ့်ခြေထောက်ပေါ်ကိုယ်ရပ်တည်ပြီး ရယူခဲ့တဲ့ အောင်မြင်မှုတွေကိုသာ တန်ဖိုးထားတတ်တဲ့ ရွန်နေးရဲ့ ခံယူချက်ကတော့ ယူနိုက်တက်ပရိသတ်တွေအတွက်ရော တစ်ကမ္ဘာလုံးက ဘောလုံးချစ်သူတွေအတွက်ပါ စံနမူနာယူစရာ စစ်မှန်တဲ့ ခေါင်းဆောင်ကောင်းတစ်ယောက်ရဲ့ နှလုံးသားလို့ ပြောရမှာဖြစ်ပါတယ်။

Photo Credit

Goal Zone

29/09/2026

မန်ချက်စတာယူနိုက်တက်ရဲ့ အသင်းခေါင်းဆောင် ဘရူနိုဖာနန်ဒက်စ်ရဲ့ အသင်းအပေါ်ထားရှိတဲ့ စိတ်ဓာတ်နဲ့ ပေးဆပ်မှုကတော့ တကယ့်ကို လေးစားစရာကောင်းပါတယ်။ အသင်းရလဒ်တွေ မတည်ငြိမ်ဘဲ ရုန်းကန်နေရတဲ့ အချိန်တိုင်းမှာ အရှေ့ကနေ မားမားမတ်မတ် ရပ်တည်ပေးလေ့ရှိတဲ့ ပေါ်တူဂီကွင်းလယ်လူဟာ အခုတစ်ကြိမ်မှာလည်း ခေါင်းဆောင်တစ်ယောက်ရဲ့ တာဝန်ကျေပွန်မှုကို လက်တွေ့ပြသခဲ့ပါတယ်။

ဘရူနိုဟာ မကြာသေးခင်က ရရှိခဲ့တဲ့ ဒဏ်ရာပြဿနာကြောင့် အနားယူသင့်တဲ့ အခြေအနေမှာ ရှိနေခဲ့ပေမယ့် အသင်းအတွက် ဆက်တိုက်ဆိုသလို ပွဲထွက်ကစားပေးခဲ့ပါတယ်။ သူဟာ အဆိုပါဒဏ်ရာဒဏ်ချက်တွေကြားကနေ သုံးပတ်နီးပါးအထိ ပွဲစဉ်တွေကို အံကြိတ်ပြီး ရင်ဆိုင်ပေးခဲ့တာဖြစ်ပါတယ်။ အဓိကအားဖြင့် မန်ချက်စတာစီးတီးလို မြို့ခံပြိုင်ဘက်ကြီးနဲ့ ရင်ဆိုင်ရတဲ့ပွဲအပြင် ဖူလ်ဟမ်နဲ့ပွဲတွေမတိုင်ခင်မှာတောင် ပွဲကစားဖို့ အတော်လေး မသေချာတဲ့အထိ ဖြစ်ခဲ့ရပါတယ်။

ဒါပေမယ့်လည်း အသင်းအကျပ်အတည်းဖြစ်နေချိန်မှာ ဘေးထိုင်ဘုပြော မနေချင်တဲ့ အသင်းခေါင်းဆောင်ဟာ ပွဲမစခင် နောက်ဆုံးအချိန်အထိ ကြိုးစားခဲ့ပါတယ်။ ပွဲမတိုင်ခင် စစ်ဆေးတဲ့ ကြံ့ခိုင်မှုစစ်ဆေးချက်တွေကို အောင်မြင်အောင် ဖြတ်ကျော်ပြီးမှ ပွဲထွက်လူစာရင်းထဲ ပါဝင်လာခဲ့တာပါ။ နာကျင်မှုတွေကို ဘေးဖယ်ထားပြီး အသင်းဖော်တွေနဲ့အတူ ကွင်းတွင်းမှာ ရုန်းကန်ပေးခဲ့တဲ့ သူ့ရဲ့ စိတ်ဓာတ်ခံယူချက်က အသင်းသားတွေအတွက် အားဆေးတစ်ခွက် ဖြစ်စေခဲ့ပါတယ်။

ခေတ်သစ်ဘောလုံးလောကမှာ ဒဏ်ရာရရင် အနားယူဖို့ ဦးစားပေးတတ်ကြပေမယ့် အသင်းလိုအပ်ချိန်တိုင်း ရှေ့တန်းကနေ တာဝန်ယူပေးဆပ်ရဲတဲ့ ကစားသမားမျိုးက ရှားပါးပါတယ်။ ဘရူနိုဖာနန်ဒက်စ်ရဲ့ ဒီလိုစံနမူနာယူစရာ စိတ်ဓာတ်နဲ့ အသင်းအပေါ် သစ္စာရှိမှုဟာ မန်ချက်စတာယူနိုက်တက် အသင်းသားတွေအတွက်သာမက ဘောလုံးပရိသတ်တွေကြားမှာပါ အသင်းခေါင်းဆောင်လက်ပတ်နဲ့ အမှန်တကယ် ထိုက်တန်သူအဖြစ် အသိအမှတ်ပြုစရာ ဖြစ်နေပါတော့တယ်။

Photo Credit

Goal Zone

29/09/2026

မန်ချက်စတာယူနိုက်တက်ရဲ့ အသက်သွေးကြောလို့ ပြောရမယ့် အသင်းခေါင်းဆောင် ဘရူနိုဖာနန်ဒက်ဇ် အိုးထရက်ဖို့ဒ်ကနေ ထွက်ခွာသွားခဲ့ရင် သူ့နေရာကို ဘယ်သူအစားထိုးမလဲဆိုတာ ပရိသတ်တွေကြား စိတ်ဝင်စားစရာ မေးခွန်းတစ်ခု ဖြစ်လာပါတယ်။ ပေါ်တူဂီကြယ်ပွင့်ဟာ ယူနိုက်တက်ဆီ ရောက်လာကတည်းက အသင်းအတွက် ဂိုးတွေ ဆက်တိုက်သွင်းယူပြီး ဂိုးဖန်တီးမှုတွေပါ အဓိကတာဝန်ယူပေးခဲ့ပေမယ့် အသက်အရွယ်အပိုင်းအခြားအရ အသင်းအနေနဲ့ သူ့နေရာကို ရေရှည်လက်ဆင့်ကမ်းပေးနိုင်မယ့် ထိပ်တန်းကစားသမားတစ်ဦး ရှာဖွေဖို့ ပြင်ဆင်ရတော့မှာပါ။
‎
လက်ရှိအချိန်မှာ ချဲလ်ဆီးကြယ်ပွင့် ကိုးလ်ပါလ်မာကို ချိတ်ဆက်နေတယ်ဆိုတဲ့ သတင်းတွေ ထွက်ပေါ်နေပေမယ့် ဘောလုံးသုံးသပ်သူတွေကတော့ ရီးယဲလ်မက်ဒရစ်ကွင်းလယ်လူ ဂျုဒ်ဘယ်လင်ဟမ်ကိုသာ ခေါ်ယူသင့်တယ်လို့ ထောက်ပြနေကြပါတယ်။ ဘယ်လင်ဟမ်ဟာ ဆယ်ကျော်သက်အရွယ် ကတည်းက ဆာအဲလက်စ်ဖာဂူဆန် ကိုယ်တိုင် အိုးထရက်ဖို့ဒ်ကို ခေါ်ယူဖို့ အစွမ်းကုန် ကြိုးစားခဲ့ဖူးတဲ့ ကစားသမားဖြစ်သလို ကွင်းလယ်တိုက်စစ်တင်မက ကွင်းလယ်အထိုင်အထိပါ ပုံစံမျိုးစုံ ကစားနိုင်စွမ်းရှိသူပါ။
‎
ဒါ့အပြင် ဘယ်လင်ဟမ်ရဲ့ အဓိကအားသာချက်က ပြိုင်ဘက်ကစားသမားတွေအပေါ် ဘောလုံးလမ်းကြောင်း လုယူနိုင်အောင် အဆက်မပြတ် ဖိအားပေးကစားနိုင်စွမ်းနဲ့ အသင်းဖော်တွေကို လှုံ့ဆော်ပေးနိုင်တဲ့ ခေါင်းဆောင်မှု စိတ်ဓါတ်ပါပဲ။ သူဟာ တစ်ဦးချင်းခြေစွမ်းထက်မြက်ရုံသာမက ကွင်းတွင်းအနိုင်ရလိုစိတ် ပြင်းထန်လွန်းတာကြောင့် ယူနိုက်တက်ရဲ့ စံချိန်စံညွှန်းတွေကို အဆင့်တစ်ခုအထိ ပြန်လည်ဆွဲတင်ပေးနိုင်မယ့် စရိုက်လက္ခဏာမျိုး အပြည့်အဝ ပိုင်ဆိုင်ထားပါတယ်။
‎
ဒါကြောင့်မို့ ယူနိုက်တက်အနေနဲ့ ပါလ်မာကို စိတ်ဝင်စားနေတာထက် ကမ္ဘာ့အကောင်းဆုံး ကွင်းလယ်လူတွေထဲက တစ်ယောက်ဖြစ်တဲ့ ဘယ်လင်ဟမ်ကိုသာ စံချိန်တင်ပြောင်းရွှေ့ကြေး အကုန်အကျခံပြီး အရခေါ်ယူနိုင်ခဲ့မယ်ဆိုရင် ဘရူနိုရဲ့နေရာမှာ လုံးဝအံဝင်ခွင်ကျဖြစ်သွားမယ့်အပြင် အသင်းကိုပါ နောက်တစ်ဆင့်ဆီ ဦးဆောင်ခေါ်သွားပေးနိုင်မယ့် အဖြေကောင်းတစ်ခု ဖြစ်လာမှာ သေချာပါတယ်။

Photo Credit

Goal Zone

28/09/2026

မန်ချက်စတာယူနိုက်တက်ရဲ့ အနာဂတ်ကွင်းသစ်စီမံကိန်းကြီးနဲ့ပတ်သက်ပြီး ဂလေဇာမိသားစုအတွက် ခေါင်းခဲစရာအခြေအနေတစ်ခု စတင်ပေါ်ပေါက်လာခဲ့ပါပြီ။ ယူနိုက်တက်ပရိသတ်တွေ နှစ်ပေါင်းများစွာ မျှော်လင့်တောင့်တနေတဲ့ ခေတ်မီအားကစားကွင်းသစ်ကြီး တည်ဆောက်ရေးအိပ်မက်ဟာ လက်တွေ့မှာတော့ ငွေကြေးဆိုင်ရာ စည်းမျဉ်းစည်းကမ်းတွေရဲ့ တင်းကျပ်မှုနဲ့ ရင်ဆိုင်နေရပါတယ်။

ဗြိတိန်ရဲ့ ဘောလုံးလောကထိန်းကျောင်းကြပ်မတ်ရေးအဖွဲ့သစ်ကနေ မန်ချက်စတာယူနိုက်တက်အနေနဲ့ ကွင်းသစ်ကြီးတည်ဆောက်ဖို့အတွက် နောက်ထပ်အကြွေးတွေ အဆမတန်ယူခွင့်မရအောင် ကန့်သတ်ပိတ်ပင်သွားဖို့ ရှိနေပါတယ်။ နှစ်ပေါင်းများစွာ ကလပ်အသင်းရဲ့လည်ပင်းမှာ ကြိုးကွင်းစွပ်ထားသလို ဖြစ်နေတဲ့ အကြွေးဝန်ထုပ်ဝန်ပိုးတွေကို ထပ်ပြီးတိုးမလာစေဖို့ စည်းမျဉ်းအရ အကာအကွယ်ပေးမယ့် သဘောလည်း ဖြစ်ပါတယ်။

ဒီအခြေအနေဟာ ကလပ်အသင်းကို ငွေကြေးအလွန်အကျွံစိုက်ထုတ်ခြင်းမရှိဘဲ ကြွေးမြီနဲ့ လည်ပတ်နေကျဖြစ်တဲ့ ဂလေဇာတွေအတွက်တော့ လမ်းဆုံလမ်းခွကို တွန်းပို့လိုက်တာပါ။ ကွင်းသစ်စီမံကိန်းကို ဆက်အကောင်အထည်ဖော်ချင်တယ်ဆိုရင် သူတို့ကိုယ်ပိုင်ငွေထဲကနေ မဖြစ်မနေ ထည့်ဝင်ရင်းနှီးမြှုပ်နှံရတော့မှာဖြစ်သလို၊ အဲဒီလိုမှမဟုတ်ရင်လည်း သူတို့လက်ဝယ်ရှိထားတဲ့ ရှယ်ယာတချို့ကို ထပ်မံရောင်းထုတ်ရမှာ ဖြစ်ပါတယ်။

အဆိုးဆုံးအနေအထားမှာတော့ ဂလေဇာမိသားစုအနေနဲ့ ကလပ်အသင်းတစ်ခုလုံးကို လက်လွှတ်ပြီး အပြီးတိုင်ရောင်းထုတ်ပစ်ဖို့အထိ ရွေးချယ်စရာလမ်းကြောင်း ရှိနေပါတယ်။ ဘယ်လိုပဲဖြစ်ဖြစ် ဒီတင်းကျပ်မှုဟာ အကြွေးနွံထဲကနေ ရုန်းထွက်ချင်နေတဲ့ ယူနိုက်တက်အတွက်ရော၊ အသင်းရဲ့အနာဂတ်အပြောင်းအလဲကို စောင့်ကြည့်နေတဲ့ ပရိသတ်တွေအတွက်ပါ ကြီးမားတဲ့ အချိုးအကွေ့တစ်ခု ဖြစ်လာနိုင်ပါတယ်။

Photo Credit

Goal Zone

28/09/2026

ပရီးမီးယားလိဂ်မှာ နှစ်ပေါင်းများစွာ အခြေချကျင်လည်ခဲ့ပြီး ဆုဖလားပေါင်းများစွာ ဆွတ်ခူးခဲ့ဖူးတဲ့ စပိန်ကွင်းလယ်လူ ဟွမ်မာတာရဲ့ စကားတစ်ခွန်းက ပရိသတ်တွေကြား ရေပန်းစားသွားခဲ့ပါတယ်။ သူဟာ ပြီးခဲ့တဲ့ပွဲစဉ်တစ်ခုရဲ့ ရုပ်သံအစီအစဉ်မှာ ပါဝင်တင်ဆက်သူအဖြစ် ရောက်ရှိလာရင်း သူ့ရဲ့ကစားသမားဘဝအကြောင်း ပြောဆိုရာကနေ ပရိသတ်တွေကို အံ့အားသင့်စရာ ဟာသပြက်လုံးတစ်ခု ပြုလုပ်ခဲ့တာပါ။

မာတာဟာ ချဲလ်ဆီးနဲ့ မန်ချက်စတာယူနိုက်တက်လို အင်္ဂလန်ထိပ်သီးကလပ်တွေမှာ ကာလရှည်ကြာ ကစားခဲ့သူဖြစ်ပြီး ချန်ပီယံလိဂ်၊ ယူရိုပါလိဂ်နဲ့ အက်ဖ်အေဖလားတို့ကို အောင်မြင်စွာ သိမ်းပိုက်နိုင်ခဲ့ပါတယ်။ ဒါပေမဲ့ သူ့ရဲ့ကစားသမားဘဝတစ်လျှောက် ပရီးမီးယားလိဂ်ချန်ပီယံဆုကိုတော့ တစ်ကြိမ်မှ မကိုင်မြှောက်ခဲ့ဖူးပါဘူး။ အဲဒီအချက်ကို ရည်ညွှန်းပြီး မာတာက သူဟာ ပရီးမီးယားလိဂ်ဖလားကို တစ်ခါမှမရဖူးကြောင်း အစီအစဉ်မှာ စတင်ပြောဆိုခဲ့ပါတယ်။

အဲဒီနောက်မှာတော့ သူက ရယ်ရယ်မောမောနဲ့ပဲ တကယ်ရော မရခဲ့တာ သေချာလို့လားဆိုတဲ့ သဘောမျိုး မေးခွန်းထုတ်လိုက်ပါတယ်။ ဒါဟာ မန်ချက်စတာစီးတီးအသင်း ရင်ဆိုင်နေရတဲ့ ဘဏ္ဍာရေးစည်းမျဉ်းချိုးဖောက်မှု စွဲချက်တွေနဲ့ပတ်သက်ပြီး ပြစ်ဒဏ်ချမှတ်ခံရရင် သူတို့ဒုတိယရခဲ့တဲ့ ၂၀၁၇-၁၈ ရာသီ ပရီးမီးယားလိဂ်ချန်ပီယံဆုကို ယူနိုက်တက်က ပြန်လည်ရရှိနိုင်မလားဆိုတဲ့ အချက်ကို နောက်ပြောင်လှောင်ပြောင်လိုက်တာ ဖြစ်ပါတယ်။

အဲဒီရာသီတုန်းက ဟိုဆေးမော်ရင်ဟိုရဲ့ မန်ချက်စတာယူနိုက်တက်ဟာ ရမှတ် ၈၁ မှတ်နဲ့ အဆင့် ၂ နေရာမှာ ရပ်တည်ခဲ့တာကြောင့် မာတာရဲ့ ထေ့လုံးဟာ ဘောလုံးပရိသတ်တွေကြား အတော်လေး ဟာသဖြစ်သွားခဲ့ပါတယ်။ ဘယ်လိုပဲဖြစ်ဖြစ် စပိန်ကြယ်ပွင့်ရဲ့ အချိန်ကိုက်ဟာသပြက်လုံးကတော့ ပရီးမီးယားလိဂ်သမိုင်းကြောင်းထဲက ပြိုင်ဆိုင်မှုအငွေ့အသက်တွေကို ပြန်လည်အသက်သွင်းပေးလိုက်သလိုပါပဲ။

Photo Credit

Goal Zone

27/09/2026

မန်ယူနိုက်တက် မှာ တစ်ခါတလေ အမှားတစ်ချက်က ကစားသမားတစ်ယောက်ရဲ့ နာမည်ကို လွှမ်းမိုးသွားတတ်တယ်။ ဒါပေမယ့် ဆန်နီ လမ်မန်းစ်ကတော့ အဲဒီအမှားတစ်ချက်ထဲမှာ ပိတ်မနေခဲ့ဘူး။ မနေ့ညက ရောမမြို့မှာ ဘယ်လ်ဂျီယံအတွက် အီတလီကို ၂-၀ နဲ့အနိုင်ရတဲ့ပွဲမှာ လမ်မန်းစ်က ပွဲချိန်ပြည့်ကစားပြီး ၆ ကြိမ်အထိ ကာကွယ်ပေးခဲ့တယ်။ အဲဒီထဲက ၄ ကြိမ်ကလည်း ဂိုးဧရိယာအတွင်းက ကန်သွင်းမှုတွေ ဖြစ်ခဲ့တယ်။

အီတလီက အိမ်ကွင်းမှာ ဘယ်လ်ဂျီယံရဲ့ဂိုးပေါက်ကို အကြိမ်ကြိမ် စမ်းသပ်ခဲ့ပေမယ့် လမ်မန်းစ်ကတော့ အေးအေးဆေးဆေးနဲ့ တစ်ကြိမ်ပြီးတစ်ကြိမ် တားဆီးပေးခဲ့တယ်။ နောက်ဆုံးမှာ ဘယ်လ်ဂျီယံက ၂-၀ နဲ့ Clean Sheet ရခဲ့ပြီး လမ်မန်းစ်ကတော့ ပွဲရဲ့ အဓိကကစားသမားတစ်ယောက် ဖြစ်လာခဲ့တယ်။ မန်ယူကစားသမားတစ်ယောက်အနေနဲ့ နိုင်ငံအသင်းအတွက် ဒီလိုညမျိုး ဖြတ်သန်းနိုင်တာက အရေးကြီးတယ်။

ဂိုးသမားတစ်ယောက်ရဲ့ တန်ဖိုးက Save အရေအတွက်နဲ့ပဲ တိုင်းလို့မရဘူး။ ဘောလုံးလမ်းကြောင်းကို ကြိုဖတ်နိုင်တာ၊ အန္တရာယ်ရှိတဲ့နေရာမှာ ကိုယ့်ရဲ့ Positioning ကို မှန်မှန်ကန်ကန် ထားနိုင်တာ၊ အရေးကြီးတဲ့အချိန်မှာ ဆုံးဖြတ်ချက်မမှားတာတွေက ပိုအရေးကြီးတယ်။ မန်ယူမှာလည်း ဖူလ်ဟမ်နဲ့ ၁-၁ သရေကျခဲ့တဲ့ပွဲတုန်းက လမ်မန်းစ်က ၆ ကြိမ်ကာကွယ်ပြီး ပရိသတ်တွေရဲ့ ပွဲစဉ်အကောင်းဆုံးကစားသမားဆုကို ရခဲ့သေးတယ်။

အခု မန်ယူရဲ့ နံပါတ် ၁ ဖြစ်လာတဲ့ လမ်မန်းစ်အတွက် ဒီလိုလက်စွမ်းတွေက တစ်ပွဲတည်းနဲ့ ပြီးသွားတဲ့အရာမဟုတ်တော့ဘူး။ အီတလီလို ပြိုင်ဘက်မျိုးကို ရောမမြို့မှာ ရင်ဆိုင်ပြီး Clean Sheet ထိန်းနိုင်ခဲ့တာက သူ့ရဲ့ ယုံကြည်မှုကို ပိုတက်လာစေမှာ သေချာတယ်။ တစ်ချိန်က ဗန်ဒါဆားတို့လို ဂိုးသမားတွေကို မန်ယူပရိသတ်တွေက ယုံကြည်ခဲ့သလို လမ်မန်းစ်ကလည်း သူ့ရဲ့ ဇာတ်လမ်းကို တစ်ပွဲချင်းစီနဲ့ ရေးနေပြီ။ အခုတော့ လမ်မန်းစ်အတွက် အရေးကြီးတာက လက်စွမ်းကောင်းတစ်ပွဲကို နောက်ထပ်ကောင်းတဲ့ပွဲတွေနဲ့ ဆက်သွားဖို့ပါပဲ။

Photo Credit

Goal Zone

27/09/2026

ဘောလုံးကွင်းထဲက ရလဒ်တွေတင်မကဘဲ ကွင်းပြင်ပက ဘဏ္ဍာရေးအခြေအနေတွေမှာပါ မန်ချက်စတာယူနိုက်တက်တို့ မျက်ခုံးလှုပ်စရာ အခက်အခဲတွေနဲ့ ရင်ဆိုင်နေရပါတယ်။ ပြီးခဲ့တဲ့ နွေရာသီကာလအတွင်း အသုံးစရိတ်တွေအတွက် ဘဏ်ချေးငွေလိုင်းကနေ ပေါင် သန်း ၁၂၀ အထိ ထပ်မံထုတ်ယူသုံးစွဲခဲ့ရပြီး စက်တင်ဘာလကုန်ပိုင်းမှာ ပေါင် သန်း ၃၀ ပြန်ဆပ်ခဲ့ပေမယ့်လည်း အသင်းရဲ့ ဘဏ္ဍာရေးဝန်ထုပ်ဝန်ပိုးကတော့ လျော့ပါးမသွားခဲ့ပါဘူး။

လက်ရှိအချိန်မှာ ယူနိုက်တက်ရဲ့ စုစုပေါင်းကြွေးမြီပမာဏဟာ ပေါင် ၁.၁၅ ဘီလီယံအထိ မြင့်တက်လာခဲ့ပြီဖြစ်ပါတယ်။ ကာလရှည်တည်ရှိနေတဲ့ အရင်းခံကြွေးမြီ ပေါင် ၅၇၈ သန်းအပြင် လက်ကျန်ဘဏ်ချေးငွေ ပေါင် သန်း ၂၀၀ နဲ့ အရင်ကစားသမားခေါ်ယူမှုတွေကနေ ပေးချေဖို့ကျန်နေသေးတဲ့ အပြောင်းအရွှေ့ကြွေးကျန် ပေါင် ၃၇၅ သန်းတို့ ပေါင်းစည်းသွားတာကြောင့် အသင်းရဲ့ ငွေကြေးအခြေအနေဟာ စိုးရိမ်စရာအဆင့်ကို ရောက်ရှိလာခဲ့တာပါ။

ကွင်းတွင်းခြေစွမ်းပိုင်း တည်ငြိမ်မှုမရှိသေးတဲ့ကာလမှာ အခုလို ကြွေးမြီပမာဏ ဘီလီယံချီ ရှိနေတာဟာ အသင်းရဲ့ အနာဂတ်ရင်းနှီးမြှုပ်နှံမှုတွေအပေါ် ကြီးမားတဲ့ အရိပ်မည်းကြီးတစ်ခုလို ဖိစီးနေပါတယ်။ အထူးသဖြင့် ကစားသမားသစ်တွေ ထပ်မံအားဖြည့်ဖို့နဲ့ အသင်းကို ပြန်လည်တည်ဆောက်ဖို့ ကြိုးစားနေရချိန်မှာ ဝင်ငွေနဲ့ ထွက်ငွေ မမျှတဘဲ အတိုးနှုန်းတွေ၊ ပေးဆပ်ရမယ့် ကြွေးမြီတွေက ရှေ့ဆက်ရမယ့် ခြေလှမ်းတိုင်းကို နှောင့်နှေးစေတာ အမှန်ပါပဲ။

ဘောလုံးလောကရဲ့ ထိပ်တန်းအင်အားကြီးအသင်းတစ်သင်းအနေနဲ့ ကွင်းတွင်းအောင်မြင်မှုတွေ ပြန်ရဖို့ အရေးကြီးသလိုပဲ ကွင်းပြင်ပက အခုလို ဘီလီယံချီကြွေးမြီပြဿနာကို ဘယ်လိုဖြေရှင်းကျော်လွှားမလဲဆိုတာကလည်း ယူနိုက်တက်ရဲ့ ရေရှည်အနာဂတ်အတွက် အဓိကစိန်ခေါ်မှုကြီးတစ်ခုအဖြစ် ရှိနေပါတော့တယ်။

Photo Credit

Goal Zone

26/09/2026

မန်ချက်စတာမြို့ခံပြိုင်ဘက် နှစ်သင်းကြားက အားပြိုင်မှုဟာ ကွင်းတွင်းမှာတင်မဟုတ်ဘဲ ကွင်းပြင်ပ ဥပဒေရေးရာကိစ္စတွေအထိ ပိုမိုပြင်းထန်လာနေပါတယ်။ မန်ချက်စတာစီးတီး ရင်ဆိုင်နေရတဲ့ ဘဏ္ဍာရေးစည်းမျဉ်း ချိုးဖောက်မှု စွပ်စွဲချက်တွေနဲ့ပတ်သက်ပြီး ပြစ်ဒဏ်ကြီးကြီးမားမား ချမှတ်ခံရနိုင်တယ်ဆိုတဲ့ ခန့်မှန်းချက်တွေ ထွက်ပေါ်လာချိန်မှာ မန်ချက်စတာယူနိုက်တက် ပရိသတ်တွေအတွက် စိတ်ဝင်စားစရာ အခြေအနေတစ်ခု ဖန်တီးပေးလာခဲ့ပါတယ်။

ပရီးမီးယားလိဂ်ရဲ့ ဘဏ္ဍာရေးစည်းမျဉ်း ချိုးဖောက်မှုတွေအတွက် စစ်ဆေးကြားနာမှုတွေ အပြီးသတ်လို့ မန်စီးတီးဘက်က အမှန်တကယ် အပြစ်ရှိကြောင်း အတည်ပြုခံရပြီး ရရှိထားတဲ့ ဆုဖလားတွေကို ပြန်လည်ရုပ်သိမ်းခံရမယ်ဆိုရင် ဆိုတဲ့ မေးခွန်းက အဓိကဇာတ်လမ်း ဖြစ်လာပါတယ်။ အကယ်၍ အဆိုပါဘောလုံးရာသီတွေက ရလဒ်တွေကို ပယ်ဖျက်တာမျိုး ဒါမှမဟုတ် ဒုတိယရရှိတဲ့အသင်းထံ ဆုဖလားလွှဲပြောင်းပေးတာမျိုး စီရင်ဆုံးဖြတ်ခဲ့ရင် အကျိုးဆက်က သမိုင်းစာမျက်နှာကို ပြောင်းလဲသွားစေနိုင်ပါတယ်။

အထူးသဖြင့် မန်စီးတီး ချန်ပီယံဖြစ်ခဲ့ပြီး ယူနိုက်တက်က ဒုတိယနေရာနဲ့သာ ကျေနပ်ခဲ့ရတဲ့ ၂၀၁၁-၁၂ နဲ့ ၂၀၁၇-၁၈ ဘောလုံးရာသီတွေဟာ အဓိက အာရုံစိုက်စရာ ဖြစ်လာပါတယ်။ ၂၀၁၂ တုန်းက နောက်ဆုံးစက္ကန့် ဂိုးကွာခြားချက်နဲ့ ဆာအဲလက်စ်ဖာဂူဆန် လက်လွှတ်ခဲ့ရတဲ့ ပရီးမီးယားလိဂ်ဆုဖလားအပြင် ၂၀၁၈ တုန်းက ဂျိုဆေးမော်ရင်ဟို ဦးဆောင်မှုနဲ့ ဒုတိယရရှိခဲ့တဲ့ ရာသီတွေအတွက် ယူနိုက်တက်ဟာ ပရီးမီးယားလိဂ် ချန်ပီယံဆု ၂ ကြိမ် ထပ်မံရရှိသွားနိုင်တဲ့ အခွင့်အရေးမျိုး သဘောတရားအရ ဖြစ်ပေါ်လာနိုင်တာပါ။

ဒါပေမယ့် ပရီးမီးယားလိဂ်ရဲ့ စည်းမျဉ်းအရ သမိုင်းဝင်ဆုဖလားတွေကို ပြန်လည်ရုပ်သိမ်းပြီး ဒုတိယရအသင်းကို လွှဲပြောင်းပေးဖို့ဆိုတာ အလွန်တရာ ရှုပ်ထွေးတဲ့ ဥပဒေရေးရာ လုပ်ငန်းစဉ်တွေ ကျန်ရှိနေပါသေးတယ်။ ဘယ်လိုပဲဖြစ်ဖြစ် ကွင်းတွင်းမှာ ဆုံးရှုံးခဲ့ရပြီးသား ဂုဏ်သိက္ခာနဲ့ အောင်ပွဲခံခွင့်တွေကို စားပွဲဝိုင်းပေါ်က ဆုံးဖြတ်ချက်နဲ့ ပြန်လည်ရယူနိုင်မလားဆိုတဲ့ အချက်ကတော့ မန်ချက်စတာဒါဘီရဲ့ သမိုင်းကြောင်းမှာ အငြင်းပွားစရာ အကောင်းဆုံး ဇာတ်လမ်းတစ်ပုဒ်အဖြစ် ဆက်လက်တည်ရှိနေဦးမှာ အမှန်ပါပဲ။

Photo Credit

Goal Zone

GoalZone Sports

01/10/2026

30/09/2026

30/09/2026

29/09/2026

29/09/2026

28/09/2026

28/09/2026

27/09/2026

27/09/2026

26/09/2026

Address

Website

Alerts

Shortcuts

Share

Category

Listing takedown request