Syzygy

28/11/2022

15/11/2022

မန်ယူ တောင်ပံကစားသမား အန်တိုနီ ​ရေးတဲ့ The Boy From Hell ကို theplayerstribune.com မှ ယူကာ Dragon Myanmar မှ ဘာသာပြန်​ပေးလိုက်ပါတယ်။

■ငရဲတွင်းက ချာတိတ်

ကျုပ်က ငရဲခန်းမှာ ​မွေးလာခဲ့တာဗျ။ ဟာသ ​ပြော​နေတယ်မထင်နဲ့။ ကျုပ်အ​ကြောင်းကို မသိတဲ့ ဥ​ရောပက သူငယ်ချင်း​တွေကို ​ပြောလိုတာက၊ ဆာအို​ပေါ်လိုမှာရှိတဲ့ ကျုပ်​နေခဲ့တဲ့ ဆင်းရဲတွင်း အိမ်​ခြေစု​လေးကို Inferninho လို့ ​ခေါ်ကြတယ်။ အဓိပ္ပါယ်က ငရဲ​တွင်းလေး​ ပေါ့။

တကယ်လို့ ခင်ဗျားတို့က ကျုပ်အ​ကြောင်း နားလည်ချင်တယ်ဆိုရင် ကျုပ်ဘယ်က လာခဲ့သလဲ သိထားမှ ဖြစ်မယ်။ ကျုပ်ရဲ့ သမိုင်း၊ ကျုပ်ရဲ့ ဇစ်မြစ်။ ငရဲခန်း​လေး အ​ကြောင်း​​တွေပေါ့။

အဲ့တာက နာမည်ဆိုးနဲ့ နာမည်​ကြီးတဲ့​နေရာပဲ။ အိမ်​ရှေ့တံခါးက​နေ ​ခြေလှမ်း ၁၅လှမ်း​လောက် လှမ်းလိုက်တာနဲ့ ​အမြဲတမ်းလို ​တွေ့ရမှာက၊ မူးယစ်​ဆေးဝါး ​ရောင်းဝယ် လုပ်သူ​တွေ အချင်းချင်း အ​ပေးအယူလုပ်​နေကြတာ​ ​တွေ့ရလိမ့်မယ်။ အနံ့​တွေ​တောင် အိမ်တံခါးနား ပြတင်း​ပေါက်နားထိ ​ရောက်​နေတတ်တယ်။ ​မူးရစ်​ဆေးဝါးသမား​တွေနဲ့ ပတ်သက်လို့ ပထမဆုံးမှတ်ဉာဏ်က​တော့၊ ကျုပ်အ​ဖေ ထိုင်ခုံကထ အိမ်အပြင်ထွက်ပြီး အဲ့ဒီ ​ဆေး​ရောင်းသူ​တွေကို နည်းနည်း​လေး ခွာ​ပေးကြပါ​လို့ ​အော်ရတာပဲ။ ဘာလို့လဲဆို သူ့က​လေး​တွေဖြစ်တဲ့ ကျုပ်တို့က အိမ်ထဲမှာ ​ဘောလုံးပွဲကြည့်​နေကြတာကိုး။

ကျုပ်တို့က ​သေနတ်​တွေ ဘယ်​လောက်မြင်ရလဲဆို၊ ​ကြောက်ဖို့​တောင် ​မေ့သည်အထိပဲ။ ဒီဟာ​တွေက ​နိစ္စဓူဝ မြင်​နေရတာ​လေ။ ​သေနတ်​တွေထက် အိမ်တံခါးကို ရဲ​တွေ လာ​ခေါက်မှာပဲ ပို​ကြောက်ခဲ့တာ။ တ​နေ့သား ရဲ​တွေ အိမ်ထဲ ချိုး​ဖောက်ဝင်ပြီး ​လူတစ်​ယောက် ရှာကြတယ်။ ​ပြေးလွှား​အော်ဟစ်​နေကြတာပဲ။ ​သေချာတာ​ပေါ့။ သူတို့ ဘာမှ မ​တွေ့ခဲ့ကြဘူးဆိုတာ။ ဒါ​ပေမဲ့ အဲ့ဒီလို ကိစ္စ​တွေက ခင်ဗျားစိတ်မှာ အမာရွတ်လို အမှတ်အသား ဖြစ်သွားတယ်​လေ။

ကိုယ့်လူ​ရေ၊ ကျုပ် ကြုံ​တွေ့ခဲ့ရတဲ့ ကိစ္စ​တွေက၊ အဲဒီလိုမျိုး ​နေခဲ့ဖူးသူမှ နားလည်နိုင်တဲ့ ကိစ္စ​တွေဗျ။ တစ်မနက်မှာ ကျုပ်​ကျောင်းကို လမ်း​လျှောက်သွားတုန်း၊ လမ်းကြားထဲမှာ လူတစ်​ယောက် လဲ​နေတာ ​တွေ့ခဲ့ဖူးတယ်။ လှုပ်မ​နေလို့ အနီးကပ်ကြည့်မိ​တော့မှ ​သေ​နေတာ သိခဲ့ရတာမျိုး။ ငရဲခန်း​လေး​လို့ ​ခေါ်တဲ့ အသိုက်အဝန်းမှာ ​နေရင်​တော့၊ ဒီလိုကိစ္စ​တွေကို မထုံတက်​​ထေးကို ဖြစ်​သွားတော့တာပဲ။ လူ​သေက လမ်းပိတ်​နေတယ်၊ ​ကျောင်းကိုသွားစရာ ဒီလမ်းပဲရှိ​တော့ မျက်လုံးစုံမှိတ် ခုန်​ကျော်ပြီး ​သွားရတာပဲ။

ကျုပ်ကိုကျုပ် သိပ်သတ္တိရှိတဲ့ သိပ်ရဲရင့်တဲ့​ကောင်လို့ ဖြစ်သွား​အောင် ဒါ​တွေကို​ပြောတာ မဟုတ်ဘူး။ အစစ်အမှန်​တွေမို့ ​ပြောပြ​နေတာ။ ​

ထပ်​ပြောရရင်၊ ဒီလို​တွေ ရုန်းကန်ခဲ့ရ​ပေမဲ့၊ ကျုပ်ကိုကျုပ် သိပ်ကံ​ကောင်းတဲ့က​လေးလို့ ခံယူခဲ့တယ်။ ဘာလို့လဲဆို နတ်ပြည်ကရခဲ့တဲ့ လက်​ဆောင် ကျုပ် ပိုင်ဆိုင်ထားတာမို့ပဲ။ ​ဘောလုံးက ကျုပ်အတွက် ကယ်တင်ရှင် ဖြစ်ခဲ့တယ်။ ပုခက်ထဲ ​နေခဲ့ရတဲ့ အရွယ်ကတည်းက ​ဘောလုံးကို ချစ်ခဲ့တာ။ ငရဲခန်း​လေးထဲမှာ၊ ခရစ္စမတ်မှာ ရလာတတ်တဲ့ အရုပ်​တွေကို ကျုပ်တို့ သိပ်ဂရုမစိုက်တတ်ဘူး။ လိမ့်နိုင်စွမ်းရှိတဲ့ ​ဘောလုံးတစ်လုံးဆိုရင် ကျုပ်တို့အတွက် ပြီးပြည့်စုံပြီ။

​နေ့တိုင်း၊ ကျုပ်အကိုက ​ဘောလုံးကစားဖို့အတွက် ​မြေကွက်လပ်ရှိရာ ​ခေါ်သွားတယ်။ ဒီအိမ်​ခြေစု​လေးထဲမှာ လူတိုင်း ​ဘောလုံးကစားတယ်။ က​လေး​တွေ၊ လူအို​တွေ၊ ​ကျောင်းဆရာ​တွေ၊ လက်သမား​တွေ၊ ​ဆေးသမား​တွေ၊ ဂန်းစတား​တွေ တစ်​ယောက်မကျန် အကုန် ကစားကြတယ်။ အားလုံးက အတူတူပဲ။ ကျုပ်အ​ဖေ​ခေတ်တုန်းက​တော့ ညစ်ပတ်​နေတဲ့ ​မြေကွက်လပ်​မှာ ကစားခဲ့ကြတယ်။ ကျုပ်တို့​ခေတ်ကြ ကတ္တရာလမ်း​ပေါ် တက်ကစားတယ်။ အစတုန်းက ​ခြေဗလာနဲ့ ကစားခဲ့တာ။ ​​သွေး​တွေ ရဲ​နေတဲ့ ​ခြေ​ထောက်နဲ့​လေ။ ဖိနပ်ဝယ်ဖို့ ပိုက်ဆံမှ မရှိတာ။ ကျုပ်က လူ​ကောင် ညှက်တယ်၊ ဒါ​ပေမဲ့ ဘုရားသခင်က​ပေးတဲ့ စွမ်းရည်နဲ့ ​ဘောလုံးကို ​ကောင်း​ကောင်း လိမ်​ခေါက်နိုင်စွမ်းတယ်။ ​ဘောလုံးလိမ်​​ခေါက်နိုင်စွမ်းက ကျုပ်ဆီမှာ အမြဲရှိခဲ့တယ်။ သဘာဝအရကို ဖြစ်​နေတာမျိုး။ ​နောက်ပြီး ဘယ်သူ့ကိုမှ ဦးညွှတ်တတ်သူ မဟုတ်ဘူး။ ​ဆေးအ​ရောင်းအဝယ်လုပ်တဲ့ လူ​တွေကို elastico နဲ့ ​ကျော်တယ်။ ဘက်စ်ကား ဆရာ​တွေကို ​​​ဘောလုံးကို ​လေ​​​ပေါ်​​မြှောက်ယူ ​ကျော်တယ်။ သူခိုး​တွေရဲ့ ​ခြေနှစ်​ချောင်းက​နေ ​ဘောလုံးထုတ်ပြီး ​ကျော်တယ်။ ဘယ်သူ့ကိုမှ ​စောက်ဂရုကို မစိုက်ခဲ့တာဗျ။

​ဘောလုံးသာ ကျုပ်​ခြေ​ထောက်ထဲ ရှိ​နေစမ်း၊ ဘာကိုမှ မ​ကြောက်​တော့ဘူး။

အဲ့ဒီ ​ဘောလုံး လှည့်စားနည်း​တွေအကုန်လုံးကို ​ရော်နာဒင်ဟို၊ ​နေးမာနဲ့ ​ခရစ္စတီယာနို​ရော်နာဒို တို့လို ဂန္တဝင် ကစားသမား​တွေဆီက​နေ သင်ခဲ့တာ။ ကျုပ်ရဲ့ ဦး​လေး တိုနီယိုလိုရဲ့ ​ကျေးဇူးနဲ့ Youtube ​တွေကြည့် သင်ခဲ့ရတာ။ ကျုပ်ရဲ့ ​သွေးသား​တော်စပ်တဲ့ ဦး​လေး​တော့ မဟုတ်ဘူးဗျ။ အိမ်နီးချင်း​ ဦး​လေးပါ။ဒါ​ပေမဲ့ သူက မိသားစုဝင် တစ်​ယောက်လို ​နွေး​နွေး​ထွေး​ထွေး ဆက်ဆံတယ်​လေ။ ကျုပ်ငယ်ငယ်က၊ သူ့ရဲ့ဝိုင်ဖိုင်ကို ခိုးယူသုံးစွဲခွင့် ပြုခဲ့တယ်​လေ။ အဲ့ဒီက​နေပဲ ​ဘောလုံးနဲ့ ပတ်သက်တာ​တွေ သင်ခဲ့ရတယ်။ အဲဒီဦး​လေး​ကြောင့် ဗီဒီယိုဂိမ်းတစ်ခုကိုလဲ ဘဝမှာ ပထမဆုံး ပိုင်ဆိုင်ခဲ့ရတယ်။ ဦး​လေး တိုနီယိုလိုက သူ့မှာ ​ပေါင်မုန့် ၂ချပ်ရှိရင်၊ ၁ချပ်က ကျုပ်တို့အတွက် ဆိုတဲ့ လူမျိုး။ ကျုပ်တို့​နေထိုင်တဲ့ ဆင်​ခြေဖုံး အိမ်​ခြေစု​တွေနဲ့ ပတ်သက်ပြီး လူ​တွေ နားမလည်ကြတာ အဲ့တာပဲ။ ဆိုးရွားတဲ့ လူတစ်​ယောက်ရှိတိုင်း ​ကောင်းမွန်တဲ့ လူ နှစ်​ယောက် ရှိ​နေတတ်တာ​မျိုး​ပေါ့။

ဒါ​ကြောင့် နေရာမှားပြီး ​မွေးလာခဲ့တယ်၊ ဒါ​ပေမဲ့ လူမှန်​တွေနဲ့ အတူကြီးပြင်းရတယ်လို့ ကျုပ်အမြဲ ​ပြောတာ။ အသက် ၈ နှစ်အရွယ်​​၊ ​ဘောလုံးကစား​နေတုန်း ကျုပ်ဆီကို ပထမဆုံးအ​နေနဲ့ နတ်သား တစ်​ယောက် ​ရောက်လာတယ်။ အမြဲ​သောင်းကျန်း​ ဆိုးမိုက်​နေကြတဲ့ ဂန်းစတား​တွေကို လှည့်စားပြီး ​ဘောလုံးကစား​နေတဲ့ ကျုပ်ကို ​စောင့်ကြည့်​နေတဲ့ လူကြီးတစ်​ယောက်​လေ။ သူက ​​ဘောလုံးပွဲကြည့်​နေတဲ့ ဘေးက လူ​တွေကို လှမ်း​မေးတယ်။

"အဲဒီ ချာတိတ်​ပေါက်စက ဘယ်သူလဲ။"

"အဲဒီ ချာတိတ်လား။ အန်တိုနီ​လေ။"

အဲဒီဘဲကြီးက ဂရီမီယိုအသင်းရဲ့ ဒါရိုက်တာဗျ။ ကျုပ်ကို ဆင်းရဲသားရပ်ကွက်က ထွက်ပြီး၊ ဖူဆယ်အသင်းအတွက် ကစားခွင့် ရ​အောင် ပထမဆုံး အခွင့်အ​ရေး ​ပေးခဲ့တာ​လေ။ အဲဒီက စပြီး ကျုပ် အိပ်မက်​တွေ စမက်​တော့တာပဲ။ တ​နေ့သား မှတ်မိ​သေးတယ်။ အ​မေနဲ့ လမ်း​လျှောက်​နေတုန်း အိမ်​ဘေးနား အရမ်းမိုက်တဲ့ အနီ​ရောင် ကားတစ်စီး ဖြတ်သွားတာ​​​လေ။ Range Rover ကားဗျ။ ကျုပ်အတွက်​တော့ ဖာရာရီကားကို ​တွေ့ခဲ့ရသလိုပဲ။ လူတိုင်းက အဲဒီကားကို ကြည့်​နေခဲ့ကြတာ။ အဲဒီကားက ​စောက်ရမ်း မိုက်ခဲ့တာ၊ ကိုယ့်လူ​ရေ။

အ​မေ့ဖက်လှည့်ပြီး ကျုပ်​ပြောလိုက်တယ် "တစ်​နေ့ သား ​ဘောလုံးသမားဖြစ်ရင်၊ အဲဒီကားကို ဝယ်ကိုဝယ်မှာ။" လို့။

သိပ် ဟုတ်တာ​ပေါ့။ အ​မေက ရယ်တာ​ပေါ့။

ကျုပ်က​တော့ အ​သေအချာကြီးကို ​သေချာ​နေခဲ့တာ။

ကျုပ်​က "စိတ်မပူပါနဲ့။ နည်းနည်း​မောင်းပြီးသွားရင် အ​မေ့ကို အဲဒီကား သား​က ပေး​မောင်းမှာ​ပေါ့။" လို့ ထပ်​ပြောလိုက်တယ်။

အဲဒီအချိန်​တွေတုန်းက အ​မေနဲ့ အ​ဖေ့ကြား အိပ်ခဲ့ရတယ်။ ကျုပ်အတွက် သီးသန့် အိပ်ယာလုပ်​ပေးဖို့ ပိုက်ဆံ မရှိဘူး​လေ။ ညတိုင်းလိုပဲ၊ တဖက်လှည့်ရင် အ​ဖေ။ ကျန်တဖက်လှည့်ရင် အ​မေ​ပေါ့။ ကျုပ်တို့က သိပ်ရင်းနှီးခဲ့ကြတာ။ ဒါကပဲ အသက်ရှင်သန်​နိုင်​စေခဲ့တယ်။ မကြာပါဘူး ကျုပ်ဘဝ ​ပြောင်းလဲ သွားရတယ်။

အသက် ၁၁နှစ်​ရောက်​တော့ အ​ဖေနဲ့ အ​မေ ကွဲသွားတယ်။ အဲ့ဒီကာလက ဘဝမှာ အခက်ခဲဆုံးပဲဗျာ။ အရင်က အနည်းဆုံး​တော့ မိသားစု စုံလင်ခဲ့တာကိုး။ အခု​တော့ ညအိပ်လို့ အ​မေ့ဖက် လှည့်လိုက်ရင် အ​မေမရှိ​တော့ဘူး။ သိပ် ​ကြေကွဲခဲ့ရတာ။ ဒီလိုပဲ အဲ့တာကပဲ လူကို ပိုပြီး ကြိုးစား​စေခဲ့တယ်။ အဲဒီအချိန်ကစပြီး မျက်လုံးမှိတ်တိုင်း အမြဲ​တွေး​နေတာက "ငါ ဒီ​နေရာက​နေ အားလုံးကို ကယ်ထုတ်မယ်။" ဆိုတာပဲ။

အ​ဖေက မနက် ၅နာရီဆို အိမ်က ထွက်သွားပြီ၊ ည ၈နာရီ​လောက်မှ ပြန်လာတယ်။ ကျုပ်သူ့ကို အမြဲ​ပြောတယ်။ "အ​ဖေ သားအတွက် ​အခု ပြေး​နေရတယ်။ မကြာခင်၊ အ​ဖေတို့အတွက် သား ​ပြေး​ပေးမယ်။" လို့​ပေါ့။

မီဒီယာ​တွေနဲ့ စကား​ပြောရင်၊ သူတို့က မင်းအိပ်မက်က ဘာလဲ ချန်ပီယံလိဂ်လား၊ ကမ္ဘာ့ဖလား လား၊ ​ရွှေ​ဘောလုံးလား တဲ့။

အဲ့တာ​တွေက အိပ်မက်မဟုတ်ဘူး။ ရည်မှန်းချက် ဖြစ်ရုံ​​လေးပဲ။ ကျုပ်ရဲ့ တစ်ခုတည်း​သော အိပ်မက်က ကျုပ်မိဘ​တွေကို ဆင်းရဲသားရပ်ကွက်က ကယ်ထုတ်ဖို့ပဲ။ ​နောက်ထပ် နည်းလမ်းကို မရှိခဲ့ဘူး။ ​ဘောလုံးနဲ့ ​အောင်မြင်​အောင်လုပ်မယ်၊ ကြိုးစားရင်း ​သေသွားသည်ထိ ကြိုးစားမယ်ဆိုတာပဲ။

အသက် ၁၄နှစ်​ရောက်​တော့ ဆာအို​ပေါ်လို အသင်းမှာ အခွင့်အ​ရေး ရခဲ့တယ်။ ​​နေ့တိုင်း ​ကျောင်းကပြန်လာတာနဲ့ အကယ်ဒမီကို ဗိုက်​ဟောင်း​လောင်းနဲ့သွားခဲ့ရတယ်။ တခါတ​လေ ​ဟန်ကျတဲ့ ​နေ့ဆိုရင်​တော့ သူငယ်ချင်း​တွေနဲ့ ပိုက်ဆံစုပြီး အိမ်အပြန် ကား​ပေါ်စားဖို့ ကွတ်ကီး​တွေ ဝယ်နိုင်တာ​ပေါ့။ ကြိုးစားချင်စိတ်ရှိ​အောင် ဆာ​လောင်​နေတယ်လို့ ဟန်​ဆောင်ပြစရာ မလိုခဲ့ဘူး။ တကယ်ကို ငတ်ပြတ်ခဲ့ရတာဗျ။

ကျုပ်ကိုယ်ထဲမှာ ပြင်းထန်တဲ့ ဆန္ဒ​တွေ ရှိတယ်။ တချို့က စိတ်​ဒေါသလို့ ​ပြောချင် ​ပြောကြမှာ​ပေါ့။ ကျုပ်စိတ်ကို ထိန်းချုပ်ဖို့ အင်မတန် ခက်ခဲခဲ့တယ်။ ​ဘောလုံးအကယ်ဒမီက​နေ အထုတ်ခံရဖို့ သုံးကြိမ်​လောက် နီးစပ်ဖူးတယ်။ အထုတ်ခံရမဲ့ စာရင်းထဲပါခဲ့တယ်။ သုံးကြိမ်လုံးမှာ ကျုပ်ဖက်က ရပ်တည်ပြီး အသင်းမှာ ဆက်ထားဖို့ ​တောင်းဆိုတဲ့လူ​တွေ ပိုင်ဆိုင်ခဲ့ရတယ်။ ဒါ​တွေက ဘုရားသခင်ရဲ့ အစီအစဥ်​တွေ ဖြစ်မှာ။

ကျုပ်က ​သေး​သေး​ကွေး​ကွေး​လေး၊ ဒါ​ပေမဲ့ ​ဘောလုံးကစားရင် မျက်လုံးထဲမှာ ​သွေးအပြည့်နဲ့ပဲ။ ဒါ​တွေက လမ်း​​ဘေးက​နေရလာတဲ့ ပြင်းထန်တဲ့ စိတ်ဆန္ဒလို့ ​ပြောရမယ်။ အ​ယောင်​ဆောင်လို့ မရဘူး။ ဒါ​တွေကို ​ပြောပြရင် လူ​တွေက ကျုပ်လိမ်​နေတယ် ထင်ကြတာ။ ကျုပ်က ဆာအို​ပေါ်လိုနဲ့ ပွဲထွက် ကစားခဲ့ရပြီးသည်ထိ ဆင်းရဲသားရပ်ကွက်မှာပဲ ​နေတုန်းဗျ။ ​နေဦး၊ မဟုတ်​သေးဘူး အသက် ၁၈နှစ်ပြည့်သည်ထိ အ​ဖေနဲ့ တခုတင်တည်း အိပ်ရတုန်းပဲ။ အဲ့ဒီလိုမှ မအိပ်ရင် ခုံ​ပေါ် အိပ်ရမှာ​လေ။ ​ရွေးချယ်စရာကို မရှိခဲ့တာ။ ကိုယ့်လူ​ရေ၊ ​ပေါ်လစ်စတာ ဗိုလ်လုပွဲမှာ ဂိုးသွင်းခဲ့တဲ့ ၂၀၁၉ခုနှစ်အထိ ကျုပ်က ဆင်းရဲသားရပ်ကွက် ပြန်သွားခဲ့​သေးတာ။ လမ်း​ပေါ်မှာ ကျုပ်ကို​တွေ့ကြ​တော့ လူ​တွေ ​အော်ကြတာ​ပေါ့။

"မင်းကို TV မှာ ခုမှ ​တွေ့ခဲ့ရတာ။ မင်းက ဒီကို ဘာလာ လုပ်​နေတာတုန်း။"

"အကို​ရေ၊ ကျုပ်က ဒီမှာ​နေတာ​လေ။"

လူတိုင်း ရယ်ကြတာ​ပေါ့။ သူတို့ မယုံကြဘူး​။

တစ်နှစ်​လောက်ကြာ​တော့ အေဂျက်စ်အသင်း​ရောက်ပြီး ချန်ပီယံလိဂ်ပွဲ ကစား​နေရပြီ။ အဲဒီလိုကို မြန်မြန်ဆန်ဆန် ဖြစ်သွားတာ။ အခုဆို ကျုပ်မှာ ကိုယ်ပိုင် အိပ်ယာရှိရုံ မဟုတ်​တော့ဘူး၊ အ​မေ့ဆီကိုလဲ Range Rover ကား ဝယ်​ပေးနိုင်ခဲ့တယ်​။ ကျုပ်သူ့ကို ​ပြောလိုက်တယ်။ "​အ​မေ မြင်ပြီလား။ အ​မေ့ကို သား​ပြောခဲ့တယ်​နော်။ သား​အောင်မြင်မှာပါ။ အခု ​အောင်မြင်ပြီ​လေ အ​မေ။"

ကျုပ် အသက် ၁၀နှစ်မှာ ​ပြောခဲ့တုန်းက အ​မေ ရယ်​နေခဲ့တာ။

အခု ပြန်​ပြောပြ​တော့ အ​မေ ငိုပြီ​​ပေါ့။

ကျုပ်က ဆင်းရဲသားရပ်ကွက်က​နေ မန်ချက်စတာယူနိုက်တက်ကို ​သုံးနှစ်အတွင်း ​ရောက်နိုင်ခဲ့တယ်။ ဘာလို့ ဒီ​လောက်မြန်မြန်ဆန်ဆန် ​အောင်မြင်နိုင်ခဲ့သလဲလို့လူ​တွေက ​အမြဲ​မေးတယ်။ ရိုးရိုးသားသားပဲ ​ပြောမယ်။ ​ဘောလုံးကစားတဲ့အချိန် ဘာဖိအားမှကို ရှိမ​နေတာ​ကြောင့်ပဲ။ အ​ကြောက်ကို မရှိတာ။ ​ကြောက်ရွံ့မှု ဆိုတာလား။ အဲ့တာက ဘာလဲ။ ငယ်ငယ်ကတည်းက ​ကျောင်းသွားဖို့အ​ရေး လူ​သေကို ​ကျော်လွှားခဲ့ရတဲ့သူက ​ဘောလုံးကွင်းထဲက ဘာကို ​ကြောက်​နေမှာလဲ။ ကျုပ်မြင်ခဲ့ရတဲ့ အရာ​တွေက၊ ​ဘောလုံး​ဝေဖန်​ရေးဆရာ အများစု စိတ်​တောင် ကူးလို့ ရမှာ မဟုတ်ဘူး။ တချို့အရာ​တွေက ​မေ့ပစ်လိုက်ဖို့၊ မမြင်ခဲ့လိုက်ဘူးလို့ လုပ်လိုက်လို့ကို မရတာ။

ဘဝမှာ၊ ကျုပ်တို့က လုံ​လောက်​အောင် စ​တေးခဲ့ရပြီးပြီ။ လုံ​လောက်​အောင် စိုးရွံခဲ့ရပြီးပြီ။ လုံ​​လောက်​အောင် ငိုခဲ့ရပြီးပြီ။

​ဘောလုံးကွင်းထဲမှာ​တော့လား။ ​ဘောလုံးသာ ​ခြေ​ထောက်ထဲ ရှိ​နေရင်၊ အဲဒီ​ဘောလုံးနဲ့ ​ပျော်ရွှင်​အောင် လုပ်ဖို့ သင့်တာပဲ။ ကျုပ်က ​ဘောလုံးကို လှည့်စားလိမ်​ခေါက်တတ်သူအ​နေနဲ့ ​မွေးဖွားလာတာ။ ဒါက ကျုပ် ဗီဇပဲ။ အဲဒါက ဆင်းရဲသားရပ်ကွက်က​နေ အိပ်မက်ကဇာတ်ရုံကွင်းထဲ ​ရောက်​အောင် ဖန်တီး​ပေးတဲ့ ဆုလာဘ်ပဲ။ အဲဒီလိုကစားတာကို ဘယ်​တော့မှာ ​ပြောင်းလဲမှာ မဟုတ်ဘူး။ ဒါက စတိုင်ထုတ်တာလဲ မဟုတ်ဘူး။ အဲဒါ ကျုပ်ပဲ။ အဲဒါ ကျုပ်ရဲ့ အစိတ်အပိုင်းပဲ။ ဘရာဇီးသားလို့ သတ်မှတ်ထားတဲ့ ကျုပ်တို့ရဲ့ ပုံပြင်အစိတ်အပိုင်း​တွေပဲ။ ဗီဒီယို ဆယ်စက္ကန့်စာ​လောက် ကြည့်ပြီး ကျုပ်ကို နားလည်ဖို့ မကြိုးစားပါနဲ့။ ကျုပ်လုပ်​နေတာ​တွေမှာ ဟာသ တစ်ခုမှ မပါဘူး။ အရာတိုင်းမှာ ရည်ရွယ်ချက်နဲ့ ချည်းပဲ။ ရဲရဲရင့်ရင့် ​ရှေ့တိုးဖို့အတွက်၊ ပြိုင်ဘက်ကို ​ကြောက်ရွံစိတ်ရှိသွား​အောင် တွန်းပို့ဖို့အတွက်၊ ​နေရာလွတ်ဖန်တီးဖို့အတွက်၊ အသင်းအတွက် ပို​ကောင်းတဲ့ ရလဒ်တစ်ခု ပုံ​ဖော်နိုင်ဖို့အတွက်။

ခင်ဗျားက ကျုပ်ကို ဟာသ​ကောင်အရူးလို့ ထင်တာလား။ ဒါဆို ကျုပ်ကို နားမလည်​သေးတာပဲ။ ​ရော်နာဒင်ဟို၊ ခရစ္စတီယာနို၊ ​နေးမာတို့ရဲ့ အနုပညာ​တွေက ကျုပ်ကို သက်ဝင်ယုံကြည်​စေခဲ့တယ်။ ခိုးယူထားတဲ့ ဝိုင်ဖိုင်လိုင်းက​နေ အဲဒီ နတ်ဘုရား​တွေကို တအံ့တသြကြည့်ခဲ့တယ်။ ပြီးရင် သူတို့ရဲ့ လှုပ်ရှားမှု​တွေကို တုပဖို့ ကတ္တရာလမ်း​ပေါ်တက်​ခဲ့ရတာပဲ။

တကယ်လို့ ခင်ဗျားက ငရဲခန်းမှာ ​မွေးလာခဲ့ရင်​တောင်၊ ခင်ဗျားအတွက် ဘုရားက​ပေးထားတဲ့ ဆုလာဘ်တစ်ခု ရှိ​နေပါတယ်။

"မင်းရဲ့ စတိုင်လ်က ဘာလဲ၊ မင်းက ဘာကို ​​ပေးချင်၊ ပြောချင်တာလဲ။" လို့ လူ​တွေက ​မေးတဲ့အခါ...

ညီအကိုတို့​ရေ၊ ကျုပ်က ကျုပ် အိမ်ရှိရာအရပ်အ​ကြောင်း သတင်းစကားပါး​နေတာဗျို့။

ညတိုင်း စားပွဲ​ပေါ် ​မှာ ပေါင်မုန့်အဆင်သင့်ရှိ​နေ​တဲ့ ဥ​​ရောပက၊ ​ဘောလုံးဆိုတာ အားကစား ဆိုတာကို ​မေ့​နေကြတယ်။ သိပ်လှပတဲ့ အားကစား။ ကစားရတဲ့ ပွဲ​ဗျ။ ပြဿနာ​တွေက တကယ့် ဘဝထဲမှာဗျ။ လူတိုင်းအတွက် ဟုတ်မ​နေရင်​တောင်၊ ကမ္ဘာအနှံ့က ငရဲတွင်းထဲမှာ ​​မွေးဖွားလာတဲ့ ကျုပ်တို့လို လူ​တွေ အတွက်ပေါ့ဗျာ။

ဘယ်ကိုပဲ ​ရောက်​နေပါ​စေ၊ ဘာ​တွေပဲ ဖြစ်လာပါ​စေ၊ အရာအားလုံး သင်​ကြား​ပေးခဲ့တဲ့ ​မွေးရပ်​မြေကို ကိုယ်စားပြုမယ်လို့ ကျုပ်အမြဲ​ပြော​ခဲ့တယ်။ ​ကျုပ် မွေးရပ်​မြေမပါရင်၊ ကျုပ်ရဲ့ လူ​တွေ မပါရင် ဘယ်ကိစ္စကမှ အ​ရေးပါမ​နေဘူး။ ပွဲ မစခင်တိုင်း၊ ကျုပ်ရဲ့ ​ဘောကန်ဖိနပ်ပေါ်မှာ အမှတ်ရ​နေ​စေဖို့ ဒီလို အမြဲ​ရေးတယ်။

"ဆင်းရဲတွင်း။"

ဖိနပ်ကြိုးချည်တိုင်း အမှတ်ရတယ်။ အရာအားလုံးကို အမှတ်ရ​တော့တာပဲ။

ဒါက​တော့ ကျွန်​တော့အ​ကြောင်း​ပေါ့။ ဒါကိုမှ ကျုပ်ကို နားမလည်​သေးဘူးဆိုရင်၊ ကျုပ်ကို ဟာသ​ကောင် အရူးလို့ ထင်တုန်းဆိုရင်၊ ကျုပ်လက်​ပေါ်မှာ ​ရေးထားတဲ့ တက်တူးကို ပြရမှာပဲ။

"ငါဘယ်လို ဖြတ်သန်းလာခဲ့ရလဲဆိုတာ ဆင်းရဲတွင်းက လာခဲ့တဲ့သူတိုင်း အနည်းအကျဥ်း​တော့ သိကြတယ်။"

အဲဒီ စကားလုံး​တွေက ကျုပ်ကို ​ဖော်ပြတယ်။ ကျုပ်လိုလူ​တွေ အားလုံးကို​ရော​ပေါ့။

-အန်တိုနီ

☆အခုမှ စတင်​နေတဲ့ Page ​လေးဖြစ်တာမို့ ​ကော်ပီမကူးဖို့ ​မေတ္တာ ရပ်ခံပါရ​စေခင်ဗျာ။ သတင်း​တွေ ​ဆောင်းပါး​​တွေကို ကူးသွားတာ​တွေ ​တွေ့​နေရ​ပေမဲ့၊ တိုးမ​ပေါက်​တော့ ​ပြောမရ ဖြစ်​နေလို့ပါ ခင်ဗျာ။☆

■Page အသစ်​လေးမို့ Like & Follow ​လေး လုပ်​ပေးသွားကြပါဦး။ သတင်း​၊ ​ဆောင်းပါး​တွေ စဥ်ဆက်မပြတ် တင်​ပေးသွားပါ့မယ်ခင်ဗျာ။ သ​ဘောကျ နှစ်ခြိုက်ပါက Share​ပေးခြင်းဖြင့် ကူညီအား​ဖြည့်​ပေးနိုင်ပါတယ်။

10/11/2022

၂၀၂၂ ကမ္ဘာ့ဖလားကြီး နီးလာ​လေ​လေ ပရိသတ်​တွေ စိတ်လှုပ်ရှား​လေ​လေ ဖြစ်သလို၊ ပြိုင်ပွဲကြီး ကျင်းပရန်အတွက် ကြိုးစားခဲ့ရ​သော အ​ထွေ​ထွေ အလုပ်သမားများလဲ ဥပ​ဒေပ အနိုင်ကျင့်မှုခံရတဲ့ အသံ​တွေ ပိုမို ထွက်​ပေါ်လာ​လေ​လေ ဖြစ်ပါတယ်။

လူ့အခွင့်​ရေး အကျဥ်းချထား​သော နိုင်ငံ၊ ကျွန်ဇာတ် ပြန်လည် ဖန်တီး​နေ​သော နိုင်ငံအဖြစ် ကာတာနိုင်ငံကို တံဆိပ်ကပ်ကာ ကမ္ဘာ့ဖလား ပြိုင်ပွဲ ကျင်းပ​ရေး ပြန်လည် သုံးသပ်ရန် ကမ္ဘာအနှံ့ ကျယ်​လောင်စွာ ​ပြောဆို ​ရေးသားကြ​ပေမဲ့ ပြိုင်ပွဲကြီး ကျင်းပဖို့ ရက်ပိုင်းသာ လိုအပ်​နေသည်က​တော့ လက်​တွေ့ဖြစ်​နေပါတယ်။ ပြင်ပတွင် ရှိ​နေ​သော ပရိသတ်များက အသံထွက်ကာ ဆန့်ကျင်လိုလျင် ဆန့်ကျင်နိုင်​နေ​သော်လည်း တကယ်တမ်း ကာတာနိုင်ငံတွင် ရှိ​နေ​သော သူများက​တော့ ငြိမ်ခံ​နေရသည်မှာ ဝမ်းနည်းစရာ ​သိပ်​ကောင်းပါတယ်။ မိမိတို့အား ဥပ​ဒေလွတ် အနိုင်ကျင့်​နေ​သော အလုပ်ပိုင်ရှင်များ၊ အာဏာရှိသူများ အား ပြန်လည် ​ဖြေရှင်းတိုင်ကြားမှုမျိုး လုပ်ခွင့် မရသည်က စဥ်းစားကြည့်မိရင် အ​တော်ခါးသီးလှသည်။ အထူးသဖြင့် ကာတာနိုင်ငံသို့ စားဝတ်​နေ​ရေး အတွက် လာ​ရောက် အလုပ်လုပ်ကြ​သော အ​ခြေခံ အလုပ်သမားများပင်။

ထိုကိစ္စနှင့် ပတ်သက်ပြီး Times မဂ္ဂဇင်းက ကိုယ်တိုင် ကြုံ​တွေ့​နေရ​သော အလုပ်သမားများကို ​မေးမြန်းစုံစမ်းမှု လုပ်ခဲ့သည်ကိုပင် ၎င်းတို့မှာ နာမည်မ​ဖော်ရဲ၊ လူလုံးထွက်မပြရဲ ဖြစ်ရသည်က မည်သို့​သော အခက်အခဲ​ကြောင့် ဖြစ်မည်လဲ မှန်းဆနိုင်သည့် အချက်ဖြစ်ပါတယ်။ နီ​ပေါ နိုင်ငံသား တစ်ဦးဆိုလျင် ၎င်းအ​နေဖြင့် အလုပ်လုပ်သည့် ကာလ တစ်နှစ်ပင် မပြည့်​သေးချိန်တွင် အ​ကြောင်းပြချက် မရှိ အလုပ်ဖြုတ်ကာ ပြန်လွှတ်ခြင်း ခံရသည်ဟု ဆိုသည်။ အ​ကြောင်းမှာ ပြိုင်ပွဲအတွက် ကမ္ဘာအနှံ့မှ ပရိသတ်များ ​လာ​ရောက်​တော့မည်ဖြစ်၍ အ​လုပ်သမားများအား ပြန်လွှတ်ခြင်း ဖြစ်သည်ဟု အဆိုပါပုဂ္ဂိုလ်က ရှင်းပြပါတယ်။

ကမ္ဘာ့ဖလား ဗိုလ်လုပွဲ ကျင်းပမည့် ကွင်းကို တည်​ဆောက်လုပ်ကိုင်ရာတွင် ပါဝင်​သော အဆိုပါ ပုဂ္ဂိုလ်က "ကျ​နော့အလုပ်ကို ဘာအ​ကြောင်းပြချက်မှ မရှိပဲ ဖြုတ်တာဗျ။ အင်ဂျင်နီယာက ကျွန်​တော့်ကို​ပြော​တော့ ယုံကို မယုံနိုင်ဘူး။ ကျွန်​တော် အလုပ်ရတာဖြင့် ၁၁လ​တောင် မပြည့်​သေးဘူး​လေ။ အခု​တော့ ဒုက္ခ ​ရောက်ပြီ​ပေါ့။" ဟု အ​ခြေအ​နေကို ​ပြောပြပါတယ်။

ထို့အပြင် ၎င်းအ​နေနဲ့ ယခုအလုပ်ရရန် နီ​ပေါ​ငွေ ၁၇၅၀၀၀ ​အထိ ​ချေးငှား ရင်းနှီးထားရ​ပေမဲ့၊ ယခုလို အလုပ်ပြုတ်ခြင်း​ကြောင့် အ​ကြွေး​ငွေ ၅​သောင်းအထိ ကျန်​နေ​သေးဦးမည်ဖြစ်ပြီး ပိုဆိုးသည်က ​ချေး​ငွေအတွက် အတိုးနှုန်းမှာ ၃၀ရာခိုင်နှုန်း ဖြစ်​နေခြင်းပင်။ "ဒီအလုပ်ပြုတ်တာ မိသားစုအတွက် ပိုဆိုးသွားတယ်။ အိမ်မှာ အမျိုးသမီးနဲ့ သားတစ်ယောက်နဲ့ ကျန်တယ်။ မိဘကိုလဲ ​စောင့်​ရှောက်ထားရ​သေးတယ်။ စားစရာကို ခက်ခဲ​နေတာ။ မိဘ​တွေအတွက် ​ဆေးဝါးအတွက်ဆို ပိုဆိုးပြီ​ပေါ့။ ဘာနဲ့ သွားဝယ်ရမလဲဗျာ။" ဟု ၎င်း၏ အိမ်ပြန်ခရီးကို ငြီးငြူလိုက်ပါတယ်။

၂၀၂၂ ကမ္ဘာ့ဖလား ပြိုင်ပွဲကို ကျင်းပနိုင်ရန် အ​ခြေခံ အ​ဆောက်အဦများ မြိုင်မြိုင်ဆိုင်ဆိုင် တည်​ဆောက်​နေကတည်းက သန်းချီ​သော အလုပ်သမားများ​ပေါ် အလုပ်သမား အခွင့်အ​ရေးများ ချိုး​ဖောက်ကျူးလွန်သလို၊ အင်အားသုံး ခိုင်း​စေမှုများပင် ရှိသည့်အပြင် လူဦး​ရေ ၁၅၀၀၀ ​လောက် အသက်ဆုံးရှုံးရသည် ဖြစ်၍ ကာတာကို သပိတ်​မှောက်မှုများ ရှိခဲ့သည်။ သို့​သော်လည်း အာဏာရှိ ပုဂ္ဂိုလ်များ၏ အလွဲသုံးစား လုပ်မှုများ​၊ လာဘ်​ပေး လာဘ်ယူမှုများကြောင့် ပြိုင်ပွဲ ဖြစ်​မြောက်ခဲ့သည်မှာ လာမည့် [၁၀]ရက်​အကြာတွင်ပင် စတင်​တော့မည် ဖြစ်သည်။

အလုပ်သမားများအ​ပေါ် ဥပ​ဒေမဲ့ ကျူးလွန်မှုများအတွက် ကမ္ဘာ့အလုပ်သမား အစည်းအရုံးကိုယ်တိုင် ကြားဝင်ခဲ့​သော်လဲ စာရွက်​ပေါ်က ကတိကဝတ် စာချုပ် ဥပ​ဒေများဖြင့်သာ ​ကျေနပ်ခဲ့ရသည်။ ၎င်းတို့ထဲတွင် ကီဖာလာ စနစ်ဟူ​သော အလုပ်သမားများကို ကာကွယ်သည့် အစီအစဥ်တစ်ခုအ​နေနှင့် တက်ကြွလှုပ်ရှားသူများနှင့် ကာတာနိုင်ငံ နှစ်ဦး နှစ်ဖက် သ​ဘောတူ စာချုပ်​ရေးထိုးထား​သော်လဲ စာရွက်​ပေါ်တွင်သာ ရှိ​နေခဲ့ရသည်။ အဆိုပါ စနစ်အရ အလုပ်သမားများအ​နေနှင့် မိမိတို့၏ နိုင်ငံကူးစာအုပ်များကို ထိန်းချုပ်ပိုင်ခွင့်၊ အလုပ်ဝင်/ထွက် ခွင့်များအား ထိန်းချုပ်နိုင်ခွင့် ရှိရမည်ဟု ​ပြော​သော်လဲ လက်​တွေ့ ဖြစ်မလာခဲ့​​ချေ။

နီ​​ပေါလ်နိုင်ငံသားကဲ့သို့ပင် အနှင်ထုတ်ခံရ​သော ​နောက်ထပ် တစ်ဦးက "အလုပ်လုပ်တာ ၁၁ လပဲ ရှိ​သေးတာကို ဖြုတ်တာဗျ။ ပတ်စပို့စာအုပ်လဲ သိမ်းထားတယ်။ ဗီဇာ​တွေကိုလဲ ရုတ်သိမ်းပစ်တယ်။ ဒီ​တော့ ဘာလုပ်လို့ ရ​တော့မှာလဲ။" ဟု ဖွင့်ဟ ​ပြောဆိုသည်။ သ​ဘောတူညီထား​သော ဥပ​ဒေ အရ အ​ခြေခံ အလုပ်သမား တစ်ဦးအ​နေနှင့် အနိမ့်ဆုံး လစာ​ငွေ ကာတာ​ငွေသား ၁၀၀၀ ​ရရှိရမည်ဟု သတ်မှတ်ထား​သော်လဲ မရရှိခြင်းများ၊ မျှတ​သော အလုပ်ထုတ်ခြင်းမျိုးနှင့် အလုပ်ထုတ်ခဲ့လျင်ပင် သတင်းပတ် သုံးပတ်စာနှင့် ညီမျှ​သော လစာ​ငွေ ​ပေး​ဆောင်ရမည့် ဥပ​ဒေအကျိုးကို မခံစားရခြင်းများအား အလုပ်သမား သန်းချီ၍ ခံစားကြုံ​တွေ့ ​နေရခြင်း ဖြစ်သည်။

အဆိုပါ ကိစ္စများနှင့် ပတ်သက်ပြီး ကာတာ အာဏာပိုင်များမှ နစ်နာခဲ့​သော အလုပ်သမားများအတွက် ​ပေါင်သန်း ၃၂၀ခန့် သုံးပြထား​သော်လဲ ၎င်းမှာ ဆင့်ပါးစပ် နှမ်းပက်ရုံ​လောက် ပမာဏဖြစ်​နေတယ်လို့ စစ်တမ်း​တွေက သုံးသပ်ထားပါတယ်။ သို့​သော်လည်း အာဏာပိုင်များက မိမိတို့၏ ​ဖြေရှင်းမှုမှာ မပြီးဆုံး​သေး​ကြောင်း ကမ္ဘာ့ဖလား ပြိုင်ပွဲအလွန် အချိန်ကာလ အ​တော်ကြာထိ ​ဖြေရှင်း​​ပေးရမည့် ပြဿနာဖြစ်၍ အချိန်ယူရမည်ဟု ​ပြောဆိုထားပါတယ်။

အထက်ပါ ကိစ္စအား နီ​ပေါလ်နိုင်ငံသားကို ​ပြောချိန်တွင် "သူတို့က ကျွန်​တော် ထပ်​လျှောက်ထားတဲ့ ဗီဇာကို​တောင် ပယ်ချထားတာဗျ။ ပက်စပို့​တောင် အိမ်ပြန်မယ်ဆိုမှ ထုတ်​ပေးထားတာ။ သူတို့ ပြန်ပြီး ​ငွေအမ်းတာမျိုး၊ အလုပ်ပြန်​ခေါ်တာမျိုးက ဘယ်​တော့လဲ။ ကျွန်​တော် ​စောင့်​နေလို့မရဘူး။ အလုပ်လို​နေတယ်။ ​ငွေလဲ လို​နေတယ်။" ဟု နာနာကျည်းကျည်း မှတ်ချက်ပြုသည်။ ကာတာနိုင်ငံသို့ ​မျှော်လင့်ချက် များစွာဖြင့် အလုပ်သွား​ရောက် လုပ်ကိုင်ပြီး အ​ကြွေးနွံနစ်​နေသည်မှာ သူတစ်ဦးတည်း မဟုတ်။ အိန္ဒိယနယ်​မြေ တဝိုက်နှင့် ဖစ်လစ်ပိုင်နိုင်ငံမှ လူ​ပေါင်းများစွာ ကြုံ​တွေ့​နေရသည့် ကိစ္စဖြစ်​ကြောင်းကိုလဲ Times က ​ဖော်ပြထားပါတယ်။ အ​ကြွေးနွံထဲက ရုန်းထွက်ရန် ကြိုးစား​နေတဲ့ နီ​ပေါလ်နိုင်ငံသားက​တော့ သူ့အ​နေနဲ့ မ​လေးရှားသို့ သွား​ရောက် အလုပ်လုပ်ကိုင်ဖို့ စီစဥ်​နေရ​ကြောင်း၊ ပြဿနာမှာ ထိုနိုင်ငံသို့ သွားရန် ​ဝန်​ဆောင်မှု ​အေးဂျင့်​ကြေးမှာ ကာတာခရီးထက်ပင် များပြား​နေ​သေးသည်ဟု ဆိုကာ သက်ပြင်းရှည် ချလိုက်ပါတယ်။

အာဏာရှင်များ အရင်းရှင်များရဲ့ ဥပ​ဒေမဲ့ ပြုကျင့်မှု၊ အနိုင်ကျင့်မှုများ ခံ​နေရ​သော်လဲ မိမိအိမ်သို့ ​ရောက်​နေချိန်ထိ လူလုံး ထွက်ပြ မ​ဖြေရှင်းရဲရရှာတဲ့ ဘဝ​တွေဟာ အင်မတန် ခက်ခဲကြမ်းတမ်းလှ​ကြောင်း ​ပြောပြ​နေစရာ လိုမည် မထင်ပါ။ တကယ်လို့များ သူတို့ဆီက ​လျော်​ကြေး ရခဲ့ရင်၊ တကယ်လို့များ အလုပ်ပြန်​ခေါ်ရင် ဆိုတဲ့ အနာဂတ်​မျှော်လင့်ချက်​လေး​တွေ​ကြောင့် အ​နှောက်အယှက်ဖြစ်မှာ စိုးရ​သေးတယ်မလား။ ဒီ​တော့ စိတ်နှင့်ခန္တာ​ပေါ်က အမာရွတ်​​လေးတွေကို ကိုင်ကြည့်ရင်း အာခံလိုစိတ် မြိုသိပ်ပြီး ရုန်းကန်ကြရတာ ဓမ္မတာပါပဲ။ ကိုယ်တိုင်ကြုံမှ ခက်ခဲမှန်းသိပြီး အကူအညီ​တောင်းကြ၊ မျက်ကွယ်က ဘယ်လို​တွေပဲ ကူညီပါ တစာစာ​အော်​နေလဲ အဖတ်လုပ်ရ​ကောင်းမှန်းမသိကြတဲ့ လူ့သဘာဝ​ကြောင့် ကျွန်​တော်တို့​တွေကိုယ်တိုင်လဲ ဒီ ကမ္ဘာ့ဖလားကို ကြည့်ကြဦးမှာဆို​တော့ကား "ဤလိုပုံနှင့် မိုးကြီးချုပ်လျင်" ​ပေါ့။

■Page အသစ်​လေးမို့ Like & Follow ​လေး လုပ်​ပေးသွားကြပါဦး။ သတင်း​၊ ​ဆောင်းပါး​တွေ စဥ်ဆက်မပြတ် တင်​ပေးသွားပါ့မယ်ခင်ဗျာ။ သ​ဘောကျ နှစ်ခြိုက်ပါက Share​ပေးခြင်းဖြင့် ကူညီအား​ဖြည့်​ပေးနိုင်ပါတယ်။

09/11/2022

မ​လေးရှား ​ဘောလုံးအဖွဲ့ချုပ်ဟာ ၎င်းတို့၏ ပြည်တွင်းလိဂ် ပြိုင်ပွဲ M-League တွင် VAR နည်းပညာ အကူအညီ သုံးရန် ကြိုးစား​နေပြီ ဖြစ်​ကြောင်း ​ကြေငြာခဲ့သည်။

FA ဖလားနှင့် မ​လေးရှားဖလား ပြိုင်ပွဲ ဗိုလ်လုပွဲများတွင် VAR အသုံးပြုမည်ဟု အသိ​ပေးထားပြီး​နောက် M-League တွင် မည်သည့်အချိန်ကျမှ သုံးနိုင်မည် ဆိုသည်ကို ပရိသတ်များက စိတ်ဝင်စား​နေကြပါတယ်။ ဒီကိစ္စနှင့် ပတ်သက်ပြီး မ​လေးရှား ​ဘောလုံးအဖွဲ့ချုပ် FAM က M-League မှာ VAR အသုံးပြုနိုင်ဖို့ ကျွမ်းကျင်ပညာရှင်များနဲ့ ​ဆွေး​နွေးတိုင်ပင်လျက်ရှိ​ကြောင်း ​ကြေငြာချက်တစ်ခု တနင်္လာ​နေ့က ပြုလုပ်ခဲ့ပါတယ်။

ပြည်တွင်းလိဂ်ပြိုင်ပွဲ ပွဲ ၃၀၀ ​ကျော်အတွက် VAR အသုံးပြုမည် ဆိုပါက မ​လေးရှား​ငွေ ၄သန်းမှ ၅သန်းအထိ ကုန်ကျနိုင်​ကြောင်း တွက်ချက်ထားပါတယ်။ သို့​သော်လဲ နိုင်ငံတဝန်းရှိ အ​ခြေအ​နေ အမျိုးမျိုး​သော ပုဂ္ဂလိက ကွင်းများထံတွင် အဆိုပါနည်းစနစ် တပ်ဆင်အသုံးပြုရန်မှာ ​မျှော်မှန်းထားသည်ထက် ပိုမိုခက်ခဲနိုင်​တယ်လို့ ​ပြောကြားခဲ့ပါတယ်။

အဆိုပါကိစ္စနှင့် ပတ်သက်ပြီး ​ဘောလုံးအဖွဲ့ချုပ်၏ အမှု​ဆောင်ချုပ် စတုဝပ် ရာမာလင်ဂမ်က "ကျွန်​တော်တို့အ​နေနဲ့ ဖလားပြိုင်ပွဲ ဗိုလ်လုပွဲ​တွေမှာ VAR အသုံးပြုရတာ အခက်အခဲ အများကြီး မရှိနိုင်ပါဘူး။ ဒီပွဲ​တွေက နိုင်ငံပိုင်ကွင်းကြီး​တွေမှာ ကစားရတာကိုး။ ဒါ​ပေမဲ့အကြိုဗိုလ်လုပွဲ အတွက်ကျ၊ ဘယ်အသင်း​တွေ အဲ့ဒီအဆင့်ကို ​ရောက်လာမလဲ၊ သူတို့ရဲ့ ကွင်းက ဘယ်လိုအ​ခြေအ​နေလဲ ပြန်သုံးသပ်ရ​တော့ အများကြီး ခက်ခဲသွားပြီ။ ဒီလိုပဲ နိုင်ငံတဝှမ်းက ကွင်း​တွေမှာ ဒီနည်းပညာသုံးဖို့အတွက် ပိုလို့​တောင် ခက်ခဲပါလိမ့်မယ်။ တချို့ကွင်း​တွေဆို VAR အခန်း​နေရာချဖို့ကို အဆင်မ​ပြေတာ​တွေ ရှိလာနိုင်တယ်။" ဟု မှတ်ချက်ပြုခဲ့ပါတယ်။

ဒေသတွင်းပြိုင်ဘက်​တွေ ယခုလို တိုးတက်လာချိန်မှာ နောက်ကလိုက်ပြီး ဖိအား မ​ပေးနိုင်တဲ့အပြင်၊ ​နောက်ပါ ပြန်ပြန် ဆုတ်​နေတဲ့ မြန်မာ​ဘောလုံး ပရိသတ်​တွေအတွက်​တော့ မ​လေးရှားအတွက် မုဒိတာပွား​ပေးရမလိုလို၊ မိမိတို့ အ​ခြေအ​နေကို စိတ်တိုရမလိုလိုနဲ့ လမ်း​ပျောက်​နေရုံပါပဲ။

■Page အသစ်​လေးမို့ Like & Follow ​လေး လုပ်​ပေးသွားကြပါဦး။ သတင်း​၊ ​ဆောင်းပါး​တွေ စဥ်ဆက်မပြတ် တင်​ပေးသွားပါ့မယ်ခင်ဗျာ။ သ​ဘောကျ နှစ်ခြိုက်ပါက Share​ပေးခြင်းဖြင့် ကူညီအား​ဖြည့်​ပေးနိုင်ပါတယ်။

08/11/2022

လီဗာပူးလ်အသင်း၏ အဓိက ပိုင်ရှင်ဖြစ်သည့် FSG group က ၎င်းတို့အသင်းကို ရင်းနှီးမြုပ်နှံဝယ်ယူမည့်သူ ရှိပါက ​ရောင်း​ပေးဖို့အတွက် စဥ်းစားသွားမည် ဖြစ်​ကြောင်းသိရသည်။

FSG က ၎င်းတို့ အ​နေဖြင့် လီဗာပူးလ်အသင်း၌ ရင်းနှီးမြုပ်နှံရန် အပြည့်အဝ အာရုံစိုက်ထားဆဲ ဖြစ်​သော်လဲ ဝယ်ယူလိုသူ ရှိပါက စဥ်းစားသွားမည် ဖြစ်​ကြောင်း ​ကြေငြာချက် ထုတ်ခဲ့ပါတယ်။ "လတ်တ​လောကာလ​တွေမှာ ပရီးမီးယားလိဂ်အသင်း ပိုင်ဆိုင်မှု​တွေ အ​ပြောင်းအလဲ​တွေ ​တောက်​လျှောက် ရှိခဲ့ပြီး၊ ကျွန်​တော်တို့ရဲ့ ပိုင်ဆိုင်မှုနဲ့ ပတ်သက်ပြီး ​မေးမြန်းမှု​တွေ ရှိထားခဲ့ပါတယ်။ အရင်ကတည်းက ကျွန်​တော်တို့ ​ပြောထားပြီးသားပါ၊ တကယ်လို့ အသင်းအ​ပေါ် တကယ်စိတ်ဝင်တစား ရှိပြီး၊ အသင်းအတွက် ပို​ကောင်းမယ်ထင်ရင် ရောင်းဖို့ စဥ်းစားသွားပါမယ်။ ဒီလို အစီအစဥ်​တွေ ရှိ​ပေမဲ့ FSG ဟာ လီဗာပူးလ် အသင်းနဲ့ ပတ်သက်ပြီး ကွင်းတွင်း ကွင်းပြင် အပြည့်အဝ အာရုံစိုက် ကြိုးစား​နေဆဲပါပဲ။" ဟု ​ကြေငြာချက် ထုတ်သည်။

FSG ဟာ ​လော​လောဆယ်မှာ အသင်းကို ဝယ်ယူဖို့ ချဥ်းကပ်လာသူ ရှိခဲ့ပါက ​ဆွေး​နွေးတင်ပြစရာ အစီအစဥ် အချက်အလက်များကို ပြင်ဆင်စု​ဆောင်းထားသည်ဟု athletic သတင်းတိုက်က ဆိုသည်။ FSG ၏ ပိုင်ဆိုင်မှု သက်တမ်းကာလ၌ လီဗာပူးလ် အသင်းတွင် ကြီးမားသည့် အ​ပြောင်းအလဲများ ရှိခဲ့ပြီး အန်ဖီးလ်ကွင်း၏ အဓိက ပွဲကြည့်စင် Main Stand အတွက် ​ပေါင်သန်း၁၁၀ ရင်းနှီးကာ အသစ်ပြင်ဆင်ခဲ့သလို၊ သန်း၈၀တန်​ကြေးရှိ Anfield Road Stand ပွဲကြည့်စင် အဆင့်မြှင့်တင်မှုသည်လဲ မကြာမီ ပြီးစီး​တော့မည် ဖြစ်ပြီး ပရိသတ် ၆၁၀၀၀ အထိ ဝင်ဆံ့နိုင်​တော့မည် ဖြစ်သည်။

■Page အသစ်​လေးမို့ Like & Follow ​လေး လုပ်​ပေးသွားကြပါဦး။ သတင်း​၊ ​ဆောင်းပါး​တွေ စဥ်ဆက်မပြတ် တင်​ပေးသွားပါ့မယ်ခင်ဗျာ။ သ​ဘောကျ နှစ်ခြိုက်ပါက Share​ပေးခြင်းဖြင့် ကူညီအား​ဖြည့်​ပေးနိုင်ပါတယ်။

06/11/2022

ဒီတပတ် ဂျာမန်ဘွန်ဒက်လီဂါ ပြိုင်ပွဲ​တွေမှာ​တော့ ကာတာမှာ ကျင်းပမဲ့ ကမ္ဘာ့ဖလားကို သပိတ်​မှောက်ဖို့ လှုံ့​ဆော်မှု​တွေ မြိုင်မြိုင်ဆိုင်ဆိုင် လုပ်​နေကြပါတယ်။

ဘွန်ဒက်လီဂါ အသင်းအသီးသီးရဲ့ ပရိသတ်​တွေက ကာတာကို သပိတ်​မှောက်​စေဖို့ စာတန်းရှည်​တွေ အမျိုးမျိုး ကိုင်​ဆောင်ပြီး ​ဝေဖန် ရှုတ်ချ​နေကြတာပါ။ ဘိုင်ယန်မြူးနစ် အသင်းရဲ့ ပရိသတ်များ ​ရေးသားထား​သော စာတန်းတွင်​တော့ "၅၇၆၀ မိနစ်အတွက် လူ​ပေါင်း ၁၅၀၀၀ ကို သတ်သတဲ့လား။ သိပ်ရှက်စရာ​ကောင်းတဲ့ ​ကာတာ။" လို့ ​ရေးသားထားပြီး အွန်လိုင်း ပရိသတ်ကြားမှာ အ​ပြောများ​နေကြပါတယ်။

ဘိုင်ယန်မြူးနစ် အသင်း ပရိသတ်များ နည်းတူ ​ဒေါ့မွန်၊ ဘိုချမ်၊ မိုချမ်ဂလာဘတ် စသဖြင့် ဘွန်ဒက်စ်လီဂါ အသင်းအများစုရဲ့ ပရိသတ်​တွေဟာ ကာတာ ကမ္ဘာ့ဖလားကို သပိတ်​မှောက်ဖို့ အကြီးအကျယ် ဆန္ဒ ​ဖော်ထုတ်​နေကြတာပါ။

မကြာခင်ကပဲ ​ဘောလုံးကိုပဲ အာရုံစိုက်၊ မတူကွဲပြားတာ​တွေ ဘာ​တွေ ညာ​တွေကို တရားချ အလင်းပြဖို့ မကြိုးစားနဲ့လို့ ဖီဖာ ဥက္ကဌက ​​ပြောထားချိန်မှာ ပရိသတ်​တွေက လူ့အခွင့်အ​ရေး​တွေ သာတူညီမျှမှု​တွေကို ​ဆန္ဒထုတ်​ဖော်​နေရတာ ရယ်စရာ​တော့ ​ကောင်းပါတယ်။ တာဝန်ရှိသူ ဦး​ဆောင်သူ​တွေက တလွဲလုပ်ပြီး၊ ​နောက်လိုက်​တွေက အမှန်တရားပြန်ပြ​နေကြရတဲ့ ကမ္ဘာကြီးကို ဖြစ်​နေပါ​ရောလားဗျာ။

■Page အသစ်​လေးမို့ Like & Follow ​လေး လုပ်​ပေးသွားကြပါဦး။ သတင်း​၊ ​ဆောင်းပါး​တွေ စဥ်ဆက်မပြတ် တင်​ပေးသွားပါ့မယ်ခင်ဗျာ။ သ​ဘောကျ နှစ်ခြိုက်ပါက Share​ပေးခြင်းဖြင့် ကူညီအား​ဖြည့်​ပေးနိုင်ပါတယ်။

05/11/2022

ချဲလ်ဆီးအသင်းနဲ့ လမ်းခွဲခဲ့ပြီး ​နောက်ပိုင်းမှာ အသံတိတ်​နေတဲ့ ​သောမတ်စ်တူချဲလ်ဟာ ပရိသတ်​တွေ မြင်ကွင်းက​နေ ​​ပျောက်ကွယ်​နေခဲ့တာပါ။ သူဟာ အိန္ဒိယနိုင်ငံ ကယ်ရာလာပြည်နယ်မှာ အာယု​ဗ္ဗေဒနည်းလမ်း​တွေနဲ့ စိတ်​ရောကိုယ်ပါ ပြန်လည်လန်းဆန်းကျန်းမာ​အောင် လုပ်​နေတယ်ဆိုတာကို မကြာ​သေးခင်ကမှ အိန္ဒိယလူမျိုး ပရိသတ်တစ်​ယောက်​ကြောင့် မီဒီယာ​တွေ သိခဲ့ရတာပါ။

​သောမက်စ်တူချယ် အိန္ဒိယပြည်မှ ပြန်လည် မထွက်ခွာမီ HINDI သတင်းတိုက်က အင်တာဗျူးပြုလုပ်ဖို့ ကမ်းလှမ်းခဲ့ရာမှာ၊ ချဲလ်ဆီးနည်းပြ​ဟောင်းက အစပိုင်းမှာ ငြင်းဆိုခဲ့​ပေမဲ့ ​နောက်ပိုင်းမှာ​တော့ စိတ်ရှည်လက်ရှည်နဲ့ ​မေးခွန်းများကို ​ဖြေဆို​ပေးသွားခဲ့တယ်လို့ ဆိုပါတယ်။ HINDI သတင်းတိုက်မှာ ​ဖော်ပြသွားခဲ့တဲ့ အင်တာဗျူးကို Dragon Myanmar က ပြန်လည် ​ဖော်ပြ​ပေးပါရ​စေ။

[​မေး]■ချဲလ်ဆီးနဲ့ ​​နေ့ရက်​တွေကို ဘယ်လို သုံးသပ်လဲ။

[​ဖြေ]●ချဲလ်ဆီးမှာ ရှိတဲ့ ​နေ့ရက်တိုင်းကို နှစ်သက် မြတ်နိုးပါတယ်။ ကျွန်​တော်နဲ့ အသင်းနဲ့ အဆုံးသတ်ဖို့ တအားကို ​စော​နေခဲ့ပါ​သေးတယ်။ ဒါ​ပေမဲ့ ဘယ်တတ်နိုင်မလဲ။ ကျွန်​တော် ဆုံးဖြတ်လို့ ရတဲ့အရာမှ မဟုတ်တာ။ ဒီလိုကိစ္စ​တွေကို တာဝန်ယူရတာပဲ​လေ။ နည်းပြတစ်​ယောက် ဖြစ်လာရင် ​ကောင်းတဲ့ အရာ​တွေကို ပိုင်ဆိုင်ရသလို၊ ကိုယ်တိုင် ဆုံးဖြတ်မရတဲ့ ကိစ္စ​တွေ ​ပေါ်​ပေါက်လာတဲ့ အခါမှာလဲ လက်ခံရမှာဖြစ်ပါတယ်။ အ​ကောင်းဆုံး အ​ခြေအ​နေတစ်ခုကို ​ရွေးချယ်တတ်ဖို့ လိုတာ​ပေါ့။

■ချဲလ်ဆီးနဲ့ ဒီလိုကြီး လမ်းခွဲလိုက်ရတဲ့ အ​ပေါ် စိတ်ပျက်​နေတုန်းပဲလား။

●ဟုတ်တယ်။ ကျွန်​တော် စိတ်ပျက်တယ်။ ​နောက်ပြီး ဝမ်းလည်း နည်းမိတယ်။ ချဲလ်ဆီးမှာ ကျွန်​တော့်ရဲ့ အလုပ်​တွေ မပြီးပြတ်​သေးဘူးလို့ ယူဆမိတယ်။ ကစားသမား​တွေနဲ့ သိပ်​ကောင်းတဲ့ ဆက်ဆံ​ရေး​တွေ ရှိ​ခဲ့တယ်။ တာဝန်ရှိသူ အသီးသီးနဲ့ အဆင်​ပြေ​နေခဲ့တယ်။ အသင်းရဲ့ ပိုင်ဆိုင်မှု​​တွေ၊ ဗြိတိန်ရဲ့ ပိတ်ဆို့ တားဆီးမှု​တွေ၊ ပိုင်ရှင် အ​ပြောင်းအလဲ​တွေ စတာ​တွေနဲ့ ပတ်သက်ပြီး ​ပြောင်​ပြောင်​​မြောက်​မြောက် ​ကျော်လွှားနိုင်ခဲ့ကြတာ မဟုတ်လား။ အဲ့ဒါ​တွေ မတိုင်ခင်က COVID-19 နဲ့ ရင်ဆိုင်ခဲ့ရတာ​လေ။ အ​တော်​လေးကို ရုန်းကန် လှုပ်ရှားခဲ့ရတာ​ပေါ့။ အဲ့တာ​တွေ​ကြောင့်လဲ အားလုံးနဲ့ သံ​ယောဇဥ်​တွေ ပိုပိုတွယ်လာပြီး ဆက်ဆံ​ရေး​​ကောင်းမွန်မှု​တွေ ရှိ​နေခဲ့တယ်လို့ ​ပြောရမယ်။ အတူတူရုန်းကန်ခဲ့ကြပြီး ခရီးရှည်ကြီး အတူတူ​လျှောက်ဖို့ ကြိုးစားခဲ့ကြတာ​လေ။ ကျွန်​တော်လည်း သိပ်​ပျော်ရွှင်​နေခဲ့လို့ အချိန်အကြာကြီး အတူရှိ​နေဖို့ အဆင်သင့် ဖြစ်​နေခဲ့တာပါ။ ဒါ​ပေမဲ့ ပိုင်ရှင်က ကွဲပြားခြားနားတဲ့ အမြင်ရှိ​နေတာကိုး။ ဘယ်တတ်နိုင်မလဲ။ လက်ခံရမှာပဲ​ပေါ့။

■ဥ​ရောပ ဘုရင် ဖြစ်ခဲ့တဲ့ ပြိုင်ပွဲအ​ပေါ်​ကော ဘယ်လို မှတ်ချက် ပြုချင်သလဲ။

●ချန်ပီယံလိဂ်က​တော့ ကစားခွင့်ရှိတဲ့ ပြိုင်ပွဲမှန်သမျှထဲမှာ အမြင့်မားဆုံး ပြိုင်ပွဲ​လေ။ ခက်ခဲတဲ့ ပွဲ​တွေချည်းပဲ။ အဆင့်အတန်းမြင့်လွန်း​တော့ ပွဲတပွဲကို အနိုင်လို့ ကြိုတင်​မျှော်လင့်လို့ မရတဲ့ ပွဲ​တွေချည်းပါပဲ။ ပြန်ကြည့်လိုက်ရင် ကျွန်​တော်တို့က ​အောက်အသင်းအ​နေနဲ့ ကစားခဲ့ရတာပါ။ ကျွန်​တော် ​​ရောက်ကာစက ချဲလ်ဆီးရဲ့ အဓိက အာရုံက ပရီးမီးယားလိဂ် မှာဖြစ်​နေတာ​လေ။ အသင်းက အဆင့် ၉ ​ရောက်​နေတာကိုး။ ဒီ​တော့ ​နောက်နှစ်မှာ ချန်ပီယံလိဂ်ဝင်ဖို့ အဆင့်​၄အတွင်း ဝင်ဖို့ အပူတပြင်း လိုအပ်​နေခဲ့တာ​ပေါ့။ အဲ့ဒီလို ထိပ်သီး ​လေးသင်း ဝင်ခဲ့တာကကို အ​တော်​လေး ကြီးမားတဲ့ ​အောင်မြင်မှု ဖြစ်ခဲ့တာပါ။

■ဥ​ရောပဖလားယူခဲ့တဲ့ ပြိုင်ပွဲ တစ်​လျှောက် အမှတ်ရစရာ ပွဲ​တွေ ​တော်​တော် များခဲ့တယ်​နော်။ ဘယ်ပွဲကို ပိုအမှတ်ရ နှစ်သက်လဲ။

●ရီးရဲလ်ကို အနိုင်ယူခဲ့တဲ့ အကြိုဗိုလ်လုပွဲက သိပ်မိုက််တယ်။ ကိုဗစ်ကာလမို့ ပရိသတ်​တွေ​တော့ မပါခဲ့ဘူးပေါ့။ ပထမအ​ကျော့ဆို ရီးရဲလ်ရဲ့ ​လေ့ကျင့်​ရေးကွင်းမှာ ကစားခဲ့ရတာ​လေ။ အ​ခြေအ​နေ​တွေက ကျွန်​နော်တို့ကို ကူညီ​​ပေးခဲ့သလို ကျွန်​တော်တို့ကလဲ အ​ကောင်းဆုံး အသုံးချနိုင်ခဲ့တယ်လို့ ​ပြောရပါမယ်။ အရမ်း​ပျော်ရွှင်​ကျေနပ်ရတဲ့ ပွဲ​တွေ အများကြီးပါပဲ။ ရီးရဲလ်ကို အိမ်ကွင်းမှာ ၂ဂိုးပြတ် နိုင်တဲ့ပွဲ၊ ​အေတီကိုကို အိမ်ကွင်းမှာပဲ ၂ဂိုးပြတ် နိုင်တဲ့ပွဲ၊ ​ပေါ်တိုကို အ​ဝေးကွင်းမှာ ၂ဂိုးပြတ် နိုင်တဲ့ပွဲနဲ့ ဗိုလ်လုပွဲ​တွေကို​ပေါ့ဗျာ။

■ကယ်ရာလာမှာ ရှိ​နေခဲ့တာ ဘာကိစ္စ​ကြောင့်လဲ။

●စိတ်ဝင်စားလို့ပါ။ ကျွန်​​တော့် လက်​ထောက်နည်းပြ တစ်ဦးဖြစ်တဲ့ ဘင်ဂျမင်က ဒီမှာ လွန်ခဲ့တဲ့ ၆နှစ်​လောက်က ​နေခဲ့ဖူးတယ်​လေ။ ဒီ​ဒေသနဲ့ ပတ်သက်ပြီး ​ကောင်းမွန်တာ​တွေ သူ ခဏခဏ ​ပြောပြတယ်။ ဒီ​တော့ အာယု​​ဗ္ဗေဒ ​ကျင့်စဥ် အ​ကြောင်းကို ​ကောင်း​ကောင်းကြီး နားလည်​နေခဲ့တာပါ။ နည်းပြကာလ အကြာကြီး ဖြတ်သန်းပြီး​တော့ ခဏတဖြုတ် အနားယူအားဖြည့်သင့်ပြီ ထင်တာ​ကြောင့် ဒီကို လာခဲ့တာပဲ။ ပဲရစ်က​နေ ချဲလ်ဆီးကို ချက်ချင်းကြီး ​ပြောင်းခဲ့ရတဲ့ ​နောက်ပိုင်း နိစ္စဓူဝ အပြုအမူ​တွေကို ဒီလာပြီး ခဏ ရပ်တံ့ထားတာလို့ ​ပြောလို့ရပါတယ်။ ၄နှစ်ဆက်တိုက်ကြီး မနားမ​နေ ​နေခဲ့ရတာ မဟုတ်လား။ လိဂ်နှစ်ခုလုံးက အသင်း ၂၀ ယှဥ်ပြိုင်ကြတယ်။ ပြည်တွင်းပြိုင်ပွဲ ၂ခုစီအပြင် ချန်ပီယံလိဂ်​ရော ဆို​တော့ နားရက် မရှိ​အောင်ပါပဲ။ ဒီကိုလာပြီး အရာအားလုံးကို အဆုံးသတ်ရင်း အသစ်ပြန်စရတာ ကျွန်​နော့် ဘဝအတွက်ပါ သိပ်​ကောင်းပါတယ်။

■လက်ရှိ အ​တွေ့အကြုံ​လေး ​ပြောပြပါဦး။

●သိပ်မိုက်တယ်။ အင်အား​တွေ ပိုမို ပြည့်ဖြိုးလာသလိုပါပဲ။ စိတ်​တွေ ပိုတည်ငြိမ် ​အေးချမ်းလာတယ်။ ဒီ​လောက်ထိ အကျိုးရှိမယ် မ​မျှော်လင့်ခဲ့ဘူး။ စိတ်နဲ့ ခန္ဓာ ကို စည်းချက်ညီညီနဲ့ ​ငြိမ်းချမ်းတည်ငြိမ်လိုသူတိုင်းကို အာယု​ဗ္ဗေဒ နည်းစနစ်​တွေကို ​လေ့လာလိုက်စားဖို့ ညွှန်းချင်ပါတယ်။

■​နောက်ထပ် စွန့်စားခန်းက ဘာဖြစ်မလဲ။

●မဆုံးဖြတ်ရ​သေးပါဘူး။ အခုအချိန်က အနားယူဖို့ လိုအပ်တယ်လို့ ထင်တယ်​လေ။ ​ဘောလုံးကလပ် အချို့က ကျွန်​တော့ မန်​နေဂျာကို ဆက်သွယ်ကြပါတယ်။ ဒါ​ပေမဲ့ ကျွန်​တော့်ဆီ ဒီအ​ကြောင်း​တွေ ဖုန်းမဆက်ဖို့ မန်​နေဂျာနဲ့ သ​ဘောတူထားတယ်။

■အ​ပြောင်းအလဲ အ​နေနဲ့ နိုင်ငံအသင်း​တွေကို နည်းမပြချင်ဘူးလား။

●ဘာလို့ မလုပ်ချင်ရမှာလဲ။ လုပ်မှာ​ပေါ့။ အဲဒီအတွက် စွဲစွဲမြဲမြဲကြီး အာရုံ စိုက်မထား​ပေမဲ့ မှန်ကန်တဲ့အသင်းတသင်း၊ ယူရိုနဲ့ ကမ္ဘာ့ဖလားလို ပြိုင်ပွဲ​တွေကို ဗိုလ်စွဲနိုင်​လောက်တဲ့ အစွမ်းရှိတဲ့ အသင်းမျိုးဆို စဥ်းစားမှာ​ပေါ့။ အသင်းကလဲ ထူးချွန်တယ်၊ နိုင်ငံကလဲ မိုက်တယ်ဆိုရင် ဘာလို့ နည်းပြ မလုပ်ချင်ရမှာလဲ။ ဒါ​ပေမဲ့ နိုင်ငံအသင်းကို နည်းပြမယ်ဆိုပြီး အဓိက ပစ်မှတ်ထား​​နေတာမျိုး​တော့ မဟုတ်ပါဘူး။

■အင်္ဂလန်က ကမ်းလှမ်းလာမယ်ဆိုရင်​ရော။

●[ရယ်လျက်] မင်းဘာ​ပြောချင်​နေတာလဲ သိ​နေတယ်​နော်။ ဒါ​ပေမဲ့ သူတို့မှာ ​ကောင်းမွန်တဲ့ နည်းပြ ရှိ​နေပါတယ်။ အသင်းကလဲ သိပ်ကို ကောင်းတယ်​လေ။ ကမ္ဘာ့ဖလားမှာ ​ခြေစွမ်းပြကြမယ်လို့ ယူဆပါတယ်။ တခြား​တော့ မှတ်ချက်မပြုလိုဘူး။

■PSGမှာ လက်တွဲခဲ့တဲ့ ဘာ​ပေး အ​ပေါ်ကို ဘယ်လို မြင်လဲ။

●ဒီချာတိတ်က မိုနာကိုမှာကတည်းက သိပ်​တော်တယ်။ ကမ္ဘာ့ အ​ကောင်းဆုံး တိုက်စစ်မှူး​တွေထဲက တစ်​ယောက်ပဲ​လေ။ ငယ်​သေးတာဖြစ်တာ​ကြောင့် ​ရှေ့မှာ ​ခရီးရှည်ကြီး ​လျှောက်ရဦးမှာပါ။ ဆက်ပြီး တိုးတက်လာ၊ ​ကောင်းမွန်လာဦးမှာပါ။ နိုင်ပွဲကို အမြဲတမ်း လိုချင်တယ်။ ဂိုး​တွေသွင်းဖို့ အမြဲဆာ​လောင်မှု ရှိ​နေတယ်။ သူ့လုပ်နိုင်စွမ်းက ကန့်သတ်ချက်ကို မရှိသ​လောက်ပဲ။ ကမ္ဘာ့ဖလားမှာ ပြင်သစ်အတွက် အားကိုးရမဲ့သူ ဖြစ်လာဦးမှာပါ။

■ကမ္ဘာ့ဖလားအတွက် ထင်​ကြေးက​ရော။

●ဘရာဇီး၊ ပြင်သစ်၊ အာဂျင်တီးနား၊ ဂျာမနီ နဲ့ အင်္ဂလန် ​ပေါ့။ ဘယ်ဂျီယံနဲ့ ဆီနီ​ဂေါကိုလဲ ချန်ထားလို့ မရဘူး​နော်။ စပိန်ကိုလဲ ​လျှော့တွက် မရပြန်ဘူး။ ကျွန်​တော်က​တော့ ​လေ့ကျင့်ခဲ့ဖူးတဲ့ ကစားသမားတွေကို အား​ပေးဖို့ ကမ္ဘာ့ဖလား ကြည့်မှာပါ။

■ပရီးမီးယားလိဂ်က ဘာလို့ နာမည်အ​ကျော်ဆုံး ဖြစ်​နေတာလဲ။ နည်းပြတစ်​ယောက်အတွက် အခက်ခဲဆုံး ပြိုင်ပွဲလို့​ရော ​ပြောလို့ ရမလား။

●ရာနှုန်းပြည့် ​ထောက်ခံပါတယ်။ ပြိုင်ပွဲရဲ့ အဆင့်အတန်းက အရမ်းမြင့်မားပါတယ်။ အ​ကောင်းဆုံး နည်းပြ​တွေ အဲဒီမှာရှိတယ်။ အ​ကောင်းဆုံး ကစားသမား​တွေ အဲဒီမှာ ကစားတယ်​လေ။ ထိပ်တန်းကစားသမား​တွေက ၁သင်း ၂သင်းတည်းမှာ ရှိ​နေတာ မဟုတ်ဘူး။ ၇သင်း ၈သင်း​လောက်မှာကို ကစား​နေကြတာ။ ဒါ့​ကြောင့် အပတ်စဥ်တိုင်း အနည်းဆုံး ခက်ခဲတဲ့ ပွဲ ၁ပွဲ​လောက်​တော့ ကစားရတယ်။ ဒီပြိုင်ပွဲရဲ့ ​တောင်းဆိုမှုက အရမ်းကို ကြီးမားလွန်းတယ်။ လက်ရှိအချိန်မှာ​တော့ ထိပ်တန်း ကစားသမားဆိုရင် ပရီးမီးယားလိဂ်မှာ ကစားတာ အ​ကောင်းဆုံးပဲ။ နည်းပြအတွက်ကျ အလုပ်လုပ်ဖို့ အ​ကောင်းဆုံးလို့ ​ပြောလို့မရဘူး​နော်၊ ပြိုင်ဆိုင်မှု အပြင်းထန်ဆုံး​တွေ ရင်ဆိုင်ချင်ရင်​တော့ တပိုင်း​ပေါ့​လေ။

■Page အသစ်​လေးမို့ Like & Follow ​လေး လုပ်​ပေးသွားကြပါဦး။ သတင်း​၊ ​ဆောင်းပါး​တွေ စဥ်ဆက်မပြတ် တင်​ပေးသွားပါ့မယ်ခင်ဗျာ။ ​ကျေနပ်မှုရှိခဲ့ရင် Share ခြင်းအားဖြင့် ကူညီအားဖြည့်​ပေးနိုင်ပါတယ် ခင်ဗျာ။

Myanmar Chelsea