22/02/2026
ကျွန်တော်တို့ ခန္ဓာကိုယ်ထဲက ရေဓာတ်နဲ့ စွမ်းအင်စနစ်ကို စက်ရုံတစ်ရုံလို စဉ်းစားကြည့်ရင် အရည်တစ်ခုချင်းစီက စက်ယန္တရားတွေအပေါ် သက်ရောက်ပုံချင်း လုံးဝမတူပါဘူး။ ရေဆိုတာကတော့ အခြေခံအကျဆုံး သန့်စင်စနစ်ပါပဲ။ ကျွန်တော်တို့ ခန္ဓာကိုယ်ရဲ့ ဆဲလ်တိုင်းမှာရှိတဲ့ ဇီဝကမ္မဖြစ်စဉ်တွေ ချောမွေ့ဖို့နဲ့ ကိုယ်တွင်းအပူချိန်ကို ပုံမှန် ၃၇ ဒီဂရီစင်တီဂရိတ်ဝန်းကျင်မှာ ထိန်းထားနိုင်ဖို့ ရေက အဓိက တာဝန်ယူရပါတယ်။ ရေဓာတ်ပြည့်ဝနေမှ သွေးထုထည် (Blood Volume) က ပုံမှန်ရှိနေမှာဖြစ်ပြီး နှလုံးက အောက်ဆီဂျင်တွေကို ကြွက်သားတွေဆီ အလွယ်တကူ ပို့ဆောင်ပေးနိုင်မှာပါ။
ဒါပေမဲ့ အားကစားပြင်းပြင်းထန်ထန်လုပ်လို့ ချွေးထွက်များလာတဲ့အခါမှာတော့ ရေတစ်မျိုးတည်းနဲ့ မလုံလောက်တော့တဲ့ သိပ္ပံနည်းကျ အကြောင်းရင်းရှိပါတယ်။ ချွေးထဲမှာ ရေတင်မကဘဲ လျှပ်စစ်ဓာတ်ဆောင်တဲ့ ဆိုဒီယမ်၊ ပိုတက်စီယမ်နဲ့ မဂ္ဂနီစီယမ်လို သတ္တုဓာတ်တွေ (Electrolytes) ပါသွားလို့ပါ။ ဒီဓာတ်တွေဟာ ဆဲလ်နံရံတွေကြားမှာ ရေဓာတ်အဝင်အထွက်ကို ထိန်းညှိပေးသလို အာရုံကြောကနေ ကြွက်သားဆီ လျှပ်စစ်လှိုင်းတွေ ပို့လွှတ်ဖို့အတွက်လည်း မရှိမဖြစ်လိုအပ်ပါတယ်။ ဒီဓာတ်တွေ အရမ်းနည်းသွားရင် ခန္ဓာကိုယ်က ရေကို ဆဲလ်ထဲမှာ မထိန်းထားနိုင်တော့ဘဲ ကြွက်တက်တာနဲ့ အားအင်ချည့်နဲ့တာတွေ ဖြစ်လာပါတယ်။ အဲဒီအခါမှာ ဓာတ်ဆားရည်က ပိုထိရောက်ပါတယ်။ သူ့မှာပါတဲ့ ဆိုဒီယမ်က အူလမ်းကြောင်းမှာရှိတဲ့ Glucose-Sodium Transport စနစ်ကို အသုံးချပြီး ရေဓာတ်ကို သွေးထဲရောက်အောင် အရှိန်အဟုန်နဲ့ ဆွဲတင်ပေးနိုင်လို့ပါ။
အများစု မှားတတ်ကြတာက အားဖြည့်အချိုရည် (Energy Drinks) တွေကို ဓာတ်ဆားရည်နဲ့ အတူတူပဲလို့ ထင်နေကြတာပါ။ အားဖြည့်အချိုရည်တွေက ရေဓာတ်ဖြည့်ဖို့ထက် ဦးနှောက်ကို လှည့်စားဖို့ ရည်ရွယ်ပါတယ်။ သူ့မှာပါတဲ့ ကဖင်း (Caffeine) ဟာ ဦးနှောက်ထဲက ပင်ပန်းမှုကို အချက်ပြတဲ့ Adenosine receptors တွေကို ပိတ်ပင်လိုက်တာကြောင့် လူက မပင်ပန်းတော့ဘူးလို့ ထင်သွားတာပါ။ ဒါပေမဲ့ သိပ္ပံနည်းကျကြည့်ရင် ကဖင်းဟာ ဆီးရွှင်စေတဲ့ (Diuretic effect) ရှိတာကြောင့် ခန္ဓာကိုယ်က ရေဓာတ်ကို ပိုခန်းခြောက်စေပါတယ်။ ဒါ့အပြင် ပါဝင်တဲ့ သကြားဓာတ်အလွန်အကျွံကြောင့် သွေးထဲမှာ အင်ဆူလင်တွေ ရုတ်တရက် ထိုးတက်သွားပြီး ခေတ္တအကြာမှာ သွေးတွင်းသကြားဓာတ် ပြန်ထိုးကျသွားတဲ့ Sugar Crash ဖြစ်စဉ်ကို ကြုံရပြီး အရင်ကထက် ပိုနုံးသွားစေပါတယ်။
နောက်ဆုံး သာမန်အချိုရည် (Soft Drinks) တွေကတော့ ကျန်းမာရေးအတွက် အန္တရာယ်အရှိဆုံးပါပဲ။ သူ့မှာပါတဲ့ သကြား (Fructose) ဟာ သွေးထဲကို စွမ်းအင်ချက်ချင်းမပေးနိုင်ဘဲ အသည်းမှာပဲ သွားခြေဖျက်ရတာဖြစ်လို့ အဆီအဖြစ် ပြောင်းလဲဖို့ အရမ်းလွယ်ပါတယ်။ သိပ္ပံနည်းကျ ခွဲခြားရရင် ပုံမှန်အချိန်မှာ ရေကိုသောက်ပါ၊ ချွေးထွက်များရင် ဓာတ်ဆားရည်နဲ့ ပြန်ဖြည့်ပါ၊ ဦးနှောက်ကို လှည့်စားပြီး ရေဓာတ်ကို ခန်းခြောက်စေမယ့် အားဖြည့်အချိုရည်နဲ့ သာမန်အချိုရည်တွေကိုတော့ လုံးဝရှောင်ကြဉ်တာက သင့်ရဲ့ စွမ်းအင်စနစ်ကို အထိရောက်ဆုံး ကာကွယ်ရာ ရောက်ပါတယ်။
အရက်များ ပါဦးမလား တွေးနေတာလား။ ဆောရီးပါ။
