06/04/2026
ရေသောက်ခြင်းရဲ့ အနုပညာ (သို့မဟုတ်) ကိုယ့်ခန္ဓာကိုယ်ကို ချစ်ခြင်း
🔳 ကျွန်တော်တို့ တစ်နေ့တာ ဖြတ်သန်းမှုတွေထဲမှာ အလွယ်ကူဆုံးနဲ့ အကျိုးရှိဆုံး ကျန်းမာရေး အလေ့အကျင့်တစ်ခုကို ပြပါဆိုရင် “ရေသောက်တာ” လို့ပဲ ကျွန်တော် ညွှန်းပါရစေ။ ဒါပေမဲ့ လူတော်တော်များများကတော့ ရေငတ်မှ ရေသောက်ကြတယ်။ တချို့ကျတော့လည်း တစ်နေ့ကို ရေ ဘယ်လောက်သောက်ရမှန်း မသိကြပြန်ဘူး။
🔳 ရေကိစ္စမှာ လူတိုင်းနဲ့ကိုက်ညီတဲ့ ပုံသေကားချပ် (One size fits all) ဆိုတာ မရှိပါဘူး။ ဒါပေမဲ့ အကြမ်းဖျင်း တွက်ချက်လို့ရတဲ့ နည်းလမ်းလေးတစ်ခု ရှိတယ်။ အဲဒါကတော့
ကိုယ်အလေးချိန် ၂၃ ကီလိုဂရမ် (၅၀ ပေါင်ခန့်) တိုင်းအတွက် ရေ ၁ လီတာ သောက်ပေးဖို့ပါပဲ။
Body Weight (23kg)=Water (1 liter)
ဆိုပါတော့။ သင်က ကိုယ်အလေးချိန် ၄၆ ကီလိုဂရမ် (ပေါင် ၁၀၀) ရှိတယ်ဆိုရင် တစ်နေ့ကို ရေ ၂ လီတာလောက် သောက်ပေးဖို့ လိုအပ်ပါတယ်။ ဒါဟာ ခန္ဓာကိုယ်ရဲ့ ဇီဝကမ္မဖြစ်စဉ်တွေ ကောင်းကောင်းလည်ပတ်ဖို့အတွက် အခြေခံအကျဆုံး လိုအပ်ချက်ပဲ ဖြစ်ပါတယ်။
🔳 “ရေသောက်တာပဲ ဘာထူးမှာလဲ” လို့ မေးစရာ ရှိပါတယ်။ တကယ်တော့ ရေဟာ ကျွန်တော်တို့ ခန္ဓာကိုယ်ရဲ့ ၆၀ ရာခိုင်နှုန်းကျော်ကို ဖွဲ့စည်းထားတာပါ။ ရေ လုံလောက်အောင် သောက်တဲ့အခါ -
အသားအရေ စိုပြေလာမယ်။ (အပြင်က လိမ်းတဲ့ Cream တွေထက် အတွင်းက သောက်တဲ့ရေက ပိုစွမ်းပါတယ်)
ဦးနှောက် ကြည်လင်လာမယ်။ (ခေါင်းမကြာခဏ ကိုက်တာ၊ အာရုံစိုက်မရတာတွေဟာ ရေဓာတ်ခန်းခြောက်ခြင်းရဲ့ လက္ခဏာတွေ ဖြစ်နေတတ်တယ်)
ကိုယ်အလေးချိန် ထိန်းညှိရ လွယ်ကူစေတယ်။ (ရေက အစာခြေစနစ်ကို ကောင်းမွန်စေပြီး မလိုအပ်တဲ့ အဆိပ်အတောက်တွေကို ဖယ်ရှားပေးလို့ပါ)
🔳 ဒါပေမဲ့ ကျွန်တော်တို့က အလေ့အကျင့် မရှိသေးတော့ တစ်ခါတလေကျ မေ့သွားတတ်ကြတယ်။ အလုပ်ရှုပ်နေလို့၊ သတိမရလို့ စသဖြင့်ပေါ့။ ဒီနေရာမှာ တစ်ခုသတိပြုစေချင်တာက “ရေငတ်ပြီ” လို့ ခံစားရတဲ့အချိန်ဟာ သင့်ခန္ဓာကိုယ်က ရေဓာတ် တော်တော်လေး လိုအပ်နေပြီဆိုတဲ့ အရေးပေါ် အချက်ပေးသံ (Alarm) ပေးနေတာပါ။
ဒါကြောင့် ရေငတ်မှ သောက်တာထက်၊ ရေသောက်ခြင်းကို Daily Routine (နေ့စဉ်အလုပ်) တစ်ခုလို ဖြစ်သွားအောင် လုပ်ဖို့ လိုပါတယ်။
🔳 အစပိုင်းမှာတော့ မသက်မသာ ဖြစ်နိုင်ပါတယ်။ ဆီး ခဏခဏ သွားရတာမျိုး၊ ဗိုက်အမြဲ ပြည့်နေသလို ခံစားရတာမျိုးတွေ ရှိနိုင်တယ်။ ဒါဟာ အသစ်အဆန်း မဟုတ်ပါဘူး။ သင့်ခန္ဓာကိုယ်က အပြောင်းအလဲတစ်ခုကို လိုက်လျောညီထွေဖြစ်အောင် ပြင်ဆင်နေတာပါ။
🔳 နောက်ဆုံးအနေနဲ့ ပြောချင်တာကတော့ ကျန်းမာရေးဆိုတာ ကြီးကြီးမားမား ပြုပြင်ပြောင်းလဲမှုတွေကနေ လာတာ မဟုတ်ပါဘူး။ အခုလို ရေတစ်ခွက်ကို နည်းစနစ်တကျ သောက်လိုက်တဲ့ သေးငယ်တဲ့ အလေ့အကျင့်လေးတွေ စုပေါင်းရာကနေ လာတာပါ။
ကိုယ့်ရဲ့ ခန္ဓာကိုယ်ကို တကယ်ချစ်တယ်ဆိုရင်၊ တကယ်တန်ဖိုးထားတယ်ဆိုရင် ဒီနေ့ကစပြီး ရေကို လုံလောက်အောင် သောက်ကြည့်ပါ။ ရက်အနည်းငယ် ကြာတဲ့အခါ အကိုတို့အမတို့ခန္ဓာကိုယ်ရဲ့ သိသိသာသာ ပြောင်းလဲလာတဲ့ တုံ့ပြန်မှုတွေကို
အကိုတို့အမတို့ ကိုယ်တိုင် ခံစားရပါလိမ့်မယ်။
အားလုံးပဲ ကျန်းမာရွှင်လန်းကြပါစေ။
Train Smart By Thu Rein
🧠Train Smart.Move Better.Live Stronger 💪
