17/02/2024
الغالية الحبيبة لي غرقات في التسيير الهاوي و الإنفرادي ، مع رئيس ماشي غير باغي يهرب من المسؤولية فقط ، و لكن باغي يسترجع فلوسو كاملة بطريقة فيها التعجيز و المساومة و المزاجية و الضد مع الجمهور ، و هادشي كيأكدو هو فاش صرح أنه كان ممكن يلقى حلول للأزمة و لكن مادارش عليا وقفة احتجاجية و مينتقدونيش .. ناسي أن هادي فرقة ديال المدينة ماشي ديالو و من حق الجمهور مايسكتش و هو كيشوف الفرقة كتغرق و عندهوم الحق حيت كانت عندهم نظرة استباقية و الدليل هادشي لي حنا فيه اليوم ، حيت طريقة تدبير شؤون الماص كان عندها مسار واحد اتجاه الأزمة
عائلة الجامعي دعمات الماص لسنين طويلة و لكن حتا شي واحد ما سبق و من علينا حتا جا الرئيس الحالي لي مستقل من الجمعية و لكن باقي في الشركة راهن و محتجز الماص عندو
سي الرئيس لي كيبان أنه نسا القانون ديال الجامعة لي كيمنع الرؤساء يسلفو الفراقي و يدخلوها في الحسابات المالية ،و اليوم باغي رئيس جديد يجي و يجيب معاه 18 مليار ، باش يرجع فلوسو بطريقة غير قانونية ، قبل ذلك خاص يدار امتحاص و تدقيق كبير ، الوحيد لي كان كيسير و ينتذب هو نتا ، ماتجيش اليوم تحمل غيرك مسؤولية الفشل و التدبير السيء
كونك رئيس مجلس الإدارة للشركة فمسؤولية كذلك قانونية و أنت الآن تريد الخروج أكثر من إلحاح جماهير الماص على رحيلك، فإن كانت مغادرتك مسألة وقت في انتظار إيجاد الصيغة ، التي لن تضر بالفريق أكثر فسير و خلي سمعة عائلتك مزيانة عند أهل فاس، و ما عمرك تنسى راه الماص هادي عمرها توقف على شخص واحد. و على عائلة الجامعي المحترمة لي كيعزوها أهل فاس و كيتحرموها ميوقفوش كيتفرجو و يتدخلو عاجلا من أجل رحيل سلس للرئيس و بدون مديونية مبالغ فيها.
