12/08/2026
الشركات الرياضية: بين الاستثمار الخاص و الدعم العمومي (الرجاء و الماص نموذجا)
لي واقع حاليا بين الرجاء والماص فطريقة تدبير الانتدابات كيعطينا صورة واضحة بزاف على الفرق بين الاستثمار الخاص والرأسمال العمومي فالتسيير الرياضي.
فالماص، كيبان بالملموس أن كاينة سرعة فحسم الصفقات، وتنظيم وهيكلة احترافية، مع وضوح فالرؤية وسرعة فصناعة القرار. فالمقابل، فالرجاء كاين تأخر كبير ومماطلة فحسم مجموعة من الملفات.
ملي كيكون عندك مستثمر محب حاط فلوسو الخاصة، فمن الطبيعي يكون حريص أكثر على كل درهم كيتصرف، وعلى النتائج، على مشروعو، وعلى سمعتو، وكيكون محاط بناس اختارهم باش يتبعو الاستثمار ديالو ويحافظو عليه.
أما ملي كيكون الاستثمار جاي من شركة عمومية، فالحسابات كتكون مختلفة. النادي كيولي جزء من مشروع أكبر، والأهداف ما كتكونش بالضرورة رياضية فقط، وإنما حتى مؤسساتية وتسويقية، بحال الإشعاع وتقوية صورة الشركة والعلامة التجارية ديالها. وبالتالي، من الطبيعي تكون طريقة اتخاذ القرار مختلفة، وأحياناً أبطأ وأكثر ارتباطاً بالمساطر والحسابات المؤسساتية.
الماص هاد السنة احتكر السوق و تفوق بمراحل على جميع المنافسين بما فيهم الرجاء لي وخا فعلات الشركة الرياضية هي لولا، الماص ضربات عليها الدورة 🔁
