06/05/2023
الكلاخ المبين
الأشواط الأولى عند الرجاء كتشابه 4 كواري تزكلو و ما كايناش نجاعة هجومية لترجمة هاذ الفرص لأهداف و في الحقيقة ما تحركو حتى 5 دقايق الأخيرة و وحدة فيهم اللي حضر فيها لعقل من بعد صونطراج بنتايك الزرهوني روض الكرة و حطها في الطريق للحافيظي قذفها أرضية كانت ساهلة باش يخرجها الحارس و الملاحظ خو الغياب التام لخابا رغم التواجد ديالو في التشكيلة
و منين كتزكل انتظر العقاب اللي ما تعطلش في بداية الشوط الثاني بعد مرور 3 دقائق فقط بعد انسلال في الجهة اليسرى و فراغ خلاه بنتايك في جيهتو و سوء التغطية من حركاس و بلكسوت و هنا كيبان أن الدفاع هو أسوء الخطوط و كيخلي الفراغات و أي فريق متواضع يمكن يستغل الهفوات و يسجل
ردة الفعل كالعادة كانت ضعيفة و الرجاء ما دارش هجمة منظمة وحدة و بقى شاد البالون بلا فائدة و يْدي و يجيب فيه بتمريرات عادية ما يمكنش تسكل خطورة على الخصم و هكذا المحدودية ديال الفريق بانت و المدرب كيتحمل جزء كبير من الوضع اللي وصل ليه اللعابة حين ما قدرش يطور الفكر ديالهم و بقاو بنفس النهج السلبي اللي ما يجيبش أهداف و لو استمر اللقاء 90 دقيقة أخرى
التفكير في التغيير خاصو يبدا من دابا و اللعابة ابين انه ما لاعبين على والو و كل واحد حاضي رجليه و كيسركل في الملعب و ما على بالوش التوني اللي لابس و لأي فريق هذاك التوني
النشاف و قلة الحيلة و الخطة و التكتيك مدكدك ما شفناش لعاب واحد دار الكرة قدامو و دخل بها للكاري و هز عينيه و سلم الكرة بشكل ترتاح ليه الحاصول العشوائية في الملعب أكوكو A GOGO و الكلاخ المبين
